ಭಾರತದಲ್ಲಿ 7,550mAh ಬ್ಯಾಟರಿ ಫೋನ್ 'Poco F7 5G' ರಿಲೀಸ್ ಡೇಟ್ ಫಿಕ್ಸ್!

Poco ತನ್ನ ಬಹುನಿರೀಕ್ಷಿತ Poco F7 5G ಸ್ಮಾರ್ಟ್‌ಫೋನ್ ಅನ್ನು ಈ ತಿಂಗಳ ಕೊನೆಯಲ್ಲಿ ಭಾರತದಲ್ಲಿ ಬಿಡುಗಡೆ ಮಾಡುವುದು ಖಚಿತವಾಗಿದೆ. ಜಾಗತಿಕ ಮತ್ತು ಭಾರತೀಯ ಮೊಬೈಲ್ ಮಾರುಕಟ್ಟೆಯಲ್ಲಿ ಏಕ ಕಾಲಕ್ಕೆ Poco F7 5G ಫೋನ್ ಅನಾವರಣಗೊಳ್ಳಲಿದ್ದು, ಜೂನ್ 24 ರಂದು ಸಂಜೆ 5:30 IST ಕ್ಕೆ ಭಾರತದಲ್ಲಿ Poco F7 5G ಸ್ಮಾರ್ಟ್‌ಫೋನ್ ಬಿಡುಗಡೆಯಾಗಲಿದೆ ಎಂದು ಕಂಪನಿಯು X (ಹಿಂದಿನ ಟ್ವಿಟರ್) ಪೋಸ್ಟ್ ಮೂಲಕ ದೃಢಪಡಿಸಿದೆ. ಮತ್ತು Flipkart ಮೂಲಕ ಲಭ್ಯವಿರಲಿರುವ ಈ ಫೋನ್‌ನ ವಿನ್ಯಾಸವನ್ನು ಅನಾವರಣಗೊಳಿಸಿದೆ.

Poco F7 5G ಪ್ರಚಾರದ ಟೀಸರ್‌ಗಳು ಫೋನ್‌ನ ಅಧಿಕೃತ ವಿನ್ಯಾಸವನ್ನು ಬಹಿರಂಗಪಡಿಸಿವೆ. ಈ ಫೋನ್ ಕಪ್ಪು ಮತ್ತು ಬೆಳ್ಳಿ ಡ್ಯುಯಲ್-ಟೋನ್ ಫಿನಿಶ್‌ನಲ್ಲಿ ಲಭ್ಯವಿರಲಿದೆ. ವಿಶೇಷವಾಗಿ, ಹಿಂಭಾಗದ ಪ್ಯಾನೆಲ್‌ನಲ್ಲಿ "Limited Edition" ಎಂಬ ಪದಗಳನ್ನು ಕೆತ್ತಲಾಗಿದ್ದು, ಈ ನಿರ್ದಿಷ್ಟ ಬಣ್ಣದ ಮಾದರಿಯ ಸೀಮಿತ ಲಭ್ಯತೆಯನ್ನು ಸೂಚಿಸುತ್ತದೆ. Poco F7 5G ಫೋನ್‌ನ ಹಿಂಭಾಗದಲ್ಲಿ ಲಂಬವಾಗಿ ಇರಿಸಲಾದ ಅಂಡಾಕಾರದ ಡ್ಯುಯಲ್ ಕ್ಯಾಮೆರಾ ಮಾಡ್ಯೂಲ್ ಕಾಣಿಸಿಕೊಳ್ಳುತ್ತದೆ, ಜೊತೆಗೆ ಪಿಲ್ಲರ್-ಆಕಾರದ LED ಫ್ಲ್ಯಾಷ್ ಯೂನಿಟ್ ಇದೆ.

ಈಗ ಬಹಿರಂಗಪಡಿಸಿರುವ ಮಾಡ್ಯೂಲ್ ಪಕ್ಕದಲ್ಲಿರುವ ಬರಹವು, ಕ್ಯಾಮೆರಾ ವಿಭಾಗದಲ್ಲಿ Poco F7 5G ಫೋನ್ ಆಪ್ಟಿಕಲ್ ಇಮೇಜ್ ಸ್ಟೆಬಿಲೈಸೇಶನ್ (OIS) ಬೆಂಬಲದೊಂದಿಗೆ 50-ಮೆಗಾಪಿಕ್ಸೆಲ್ ಸಾಮರ್ಥ್ಯದ ಪ್ರಾಥಮಿಕ ಸಂವೇದಕವನ್ನು ಹೊಂದಿರುತ್ತದೆ ಎಂದು ಖಚಿತಪಡಿಸುತ್ತದೆ. ಇತ್ತೀಚಿನ ಕೆಲವು ಸೋರಿಕೆಯ ವರದಿಗಳಂತೆ, ಈ Poco F7 5G ಫೋನ್ 50-ಮೆಗಾಪಿಕ್ಸೆಲ್ Sony IMX882 ಪ್ರಾಥಮಿಕ ಸೆನ್ಸರ್, 8-ಮೆಗಾಪಿಕ್ಸೆಲ್ ಅಲ್ಟ್ರಾವೈಡ್ ಶೂಟರ್ ಮತ್ತು ಮುಂಭಾಗದಲ್ಲಿ 20-ಮೆಗಾಪಿಕ್ಸೆಲ್ ಸೆಲ್ಫಿ ಕ್ಯಾಮೆರಾವನ್ನು ಒಳಗೊಂಡಿರುವ ನಿರೀಕ್ಷೆಯಿದೆ.

ಜೊತೆಗೆ, ಹಿಂಭಾಗದ ಪ್ಯಾನೆಲ್‌ನಲ್ಲಿರುವ ಸ್ನಾಪ್‌ಡ್ರಾಗನ್ ಲೋಗೋ, ಹ್ಯಾಂಡ್‌ಸೆಟ್ ಸ್ನಾಪ್‌ಡ್ರಾಗನ್ ಚಿಪ್‌ಸೆಟ್‌ನಿಂದ ಚಾಲಿತವಾಗಲಿದೆ ಎಂದು ಸೂಚಿಸುತ್ತದೆ. ಕಾರ್ಯಕ್ಷಮೆಗೆ ಸಂಬಂಧಿಸಿದಂತೆ, Poco F7 5G ಫೋನ್ ಸ್ನಾಪ್‌ಡ್ರಾಗನ್ 8s Gen 4 SoC ನಿಂದ ಚಾಲಿತವಾಗುವ ಸಾಧ್ಯತೆಯಿದೆ ಎಂದು ಹಿಂದಿನ ಸೋರಿಕೆಗಳು ಸೂಚಿಸಿವೆ. ಇಷ್ಟೇ ಅಲ್ಲದೆ, ಈ Poco F7 5G ಫೋನ್ 6.83-ಇಂಚಿನ AMOLED ಡಿಸ್ಪ್ಲೇ, IP68-ರೇಟೆಡ್ ಬಿಲ್ಡ್ ಮತ್ತು ಅಲ್ಯೂಮಿನಿಯಂ ಮಿಡಲ್ ಫ್ರೇಮ್‌ನೊಂದಿಗೆ ಬರಬಹುದು ಎಂದು ಕೆಲ ವರದಿಗಳು ಹೇಳಿವೆ.

ಬ್ಯಾಟರಿ ಸಾಮರ್ಥ್ಯದ ಬಗ್ಗೆ ಮಾತನಾಡುವುದಾದರೆ, Poco F7 5G ಫೋನ್ ಭಾರತೀಯ ರೂಪಾಂತರವು 90W ವೈರ್ಡ್ ಫಾಸ್ಟ್ ಚಾರ್ಜಿಂಗ್ ಮತ್ತು 22.5W ರಿವರ್ಸ್ ವೈರ್ಡ್ ಚಾರ್ಜಿಂಗ್ ಬೆಂಬಲದೊಂದಿಗೆ ಬೃಹತ್ 7,550mAh ಬ್ಯಾಟರಿಯನ್ನು ಹೊಂದಿರಲಿದೆ ಎಂದು ಕಂಪನಿ ದೃಢಪಡಿಸಿದೆ. ಆದರೆ, ಜಾಗತಿಕ ಆವೃತ್ತಿಯು 6,500mAh ಬ್ಯಾಟರಿಯನ್ನು ಪ್ಯಾಕ್ ಮಾಡಬಹುದು. ಇನ್ನು ಭಾರತದಲ್ಲಿ ಈ Poco F7 5G ಫೋನ್ ಬೆಲೆ ಸುಮಾರು ರೂ. 30,000 ಆಗಿರಬಹುದು ಎಂದು ಅಂದಾಜಿಸಲಾಗಿದೆ. ಆದರೆ, ಅಧಿಕೃತ ಬೆಲೆ ಮಾಹಿತಿ ಹೊರಬಿದ್ದಿಲ್ಲ.

ಗಮನಿಸುವುದಾದರೆ, Poco ಇಂಡಿಯಾ ಮುಖ್ಯಸ್ಥ ಹಿಮಾಂಶು ಟಂಡನ್ ಈ ಹಿಂದೆ ಭಾರತದಲ್ಲಿ Poco F7 Ultra ರೂಪಾಂತರದ ಆಗಮನವನ್ನು ಸಹ ಸೂಚಿಸಿದ್ದರು. ವೆನಿಲ್ಲಾ Poco F7 5G ಮಾದರಿಯ ಜೊತೆಗೆ ಈ ಫೋನ್ ಕೂಡ ದೇಶದಲ್ಲಿ ಅನಾವರಣಗೊಳ್ಳುವ ಸಾಧ್ಯತೆಯಿದೆ. ಒಟ್ಟಾರೆಯಾಗಿ, Poco F7 5G ಶಕ್ತಿಶಾಲಿ ಕಾರ್ಯಕ್ಷಮತೆ, ಉತ್ತಮ ಕ್ಯಾಮೆರಾ ಮತ್ತು ವೇಗದ ಚಾರ್ಜಿಂಗ್ ಸಾಮರ್ಥ್ಯಗಳೊಂದಿಗೆ ಸ್ಪರ್ಧಾತ್ಮಕ ಬೆಲೆಯಲ್ಲಿ ಭಾರತೀಯ ಮಾರುಕಟ್ಟೆಯನ್ನು ಪ್ರವೇಶಿಸಲು ಸಜ್ಜಾಗಿದೆ. ಈ ಕುರಿತು ನಿಮ್ಮ ಅನಿಸಿಕೆ ಏನು ಎಂಬುದನ್ನು ಕಾಮೆಂಟ್ ಮಾಡಿ ತಿಳಿಸಿ.