ಕೇಬಲ್ ಮತ್ತು ಡಿಟಿಹೆಚ್ ಆಪರೇಟರ್‌ಗಳಿಗೆ ಸರ್ಕಾರದಿಂದ ಮತ್ತೊಂದು ಬಿಗ್‌ಶಾಕ್!!

ಸೆಟ್‌ಟಾಪ್‌ ಬಾಕ್ಸ್‌ ಪೋರ್ಟಬಿಲಿಟಿ

ಮೊಬೈಲ್‌ ನಂಬರ್‌ ಅನ್ನು ಒಂದು ಸೇವಾ ಕಂಪನಿಯಿಂದ ಇನ್ನೊಂದು ಬದಲಿಸಲು ಅವಕಾಶವಿರುವಂತೆಯೇ, ಟಿ.ವಿಯ ಸೆಟ್‌ಟಾಪ್‌ ಬಾಕ್ಸ್‌ ಸೇವೆಯನ್ನು ಸಹ ಬದಲಾಯಿಸಿಕೊಳ್ಳಬಹುದಾದ ಆಯ್ಕೆಯನ್ನು ಈ ವರ್ಷಾಂತ್ಯಂದ ವೇಳೆಗೆ ತರಲು ಟ್ರಾಯ್ ತಯಾರಾಗಿದೆ. ಈ ಬಗ್ಗೆ ಕಾರ್ಯ ಯೋಜನೆ ತಯಾರಾಗುತ್ತಿದೆ ಎಂದು ಟ್ರಾಯ್ ಆರ್‌.ಎಸ್‌ ಶರ್ಮಾ ಅವರು ತಿಳಿಸಿದ್ದಾರೆ.

ಕೋಟ್ಯಂತರ ಗ್ರಾಹಕರಿಗೆ ಅನುಕೂಲ

ಪ್ರಸ್ತುತ ಒಂದು ಸೆಟ್‌ಟಾಪ್‌ ಬಾಕ್ಸ್‌ಗೆ 1,400 ರೂ.ಗಳಿಂದ 1,600 ರೂ.ಗಳ ವರೆಗೂ ವೆಚ್ಚವಾಗುತ್ತದೆ. ಇದಕ್ಕೆ ತಗಲುವ ವೆಚ್ಚ ಕೂಡ ರಿಫಂಡ್ ಆಗುತ್ತಿಲ್ಲ. ಆದರೂ ಅದು 500 ಗಳಿಂಗಿಂತ ಹೆಚ್ಚಿಲ್ಲ ಎನ್ನುತ್ತವೆ ವರದಿಗಳು. ಹಾಗಾಗಿ, ಈ ಪೋರ್ಟಬಿಲಿಟಿ ನಿಯಮ ಸಾಧ್ಯವಾದರೆ ಗ್ರಾಹಕರಿಗೆ ಈ ವೆಚ್ಚ ಉಳಿತಾಯವಾಗಲಿದೆ. ಇದು ಕೋಟ್ಯಂತರ ಗ್ರಾಹಕರಿಗೆ ಅನುಕೂಲವಾಗಲಿದೆ.

ಒಂದು ಎಸ್‌ಎಂಎಸ್‌ಗೆ ಸೇವೆ ಬದಲು!

ಪ್ರಸ್ತುತ ಇರುವ ನಂಬರ್ ಅನ್ನೇ ಯಾವುದೇ ಟೆಲಿಕಾಂ ಕಂಪೆನಿಗಳ ಸೇವೆ ಪಡೆಯಲು ಇದೀಗ ಒಂದು ಎಸ್‌ಎಂಎಸ್ ಸಾಕು. ಹಾಗೆಯೇ, ಡಿಟಿಎಚ್ ಅಥವಾ ಕೇಬಲ್‌ ಗ್ರಾಹಕರು ತಮ್ಮ ಸೇವೆಯನ್ನು ಒಂದು ಎಸ್‌ಎಂಎಸ್‌ನಿಂದ ಇನ್ಮುಂದೆ ಬದಲಾಯಿಸಿಕೊಳ್ಳಬಹುದಾಗಿದೆ. ಟ್ರಾಯ್ ನೀಡುವ ಮಾರ್ಗದರ್ಶನದ ಪ್ರಕಾರ ಈ ಹೊಸ ಸೇವೆ ಜಾರಿಗೊಳ್ಳಲಿದೆ ಎಂದು ಹೇಳಲಾಗಿದೆ.

ಆದರೆ ಸಮಸ್ಯೆ ಎದುರಾಗಿದೆ!

ಟ್ರಾಯ್‌ನ ನೂತನ ನಿಯಮ ತರಲು ಕೆಲವೊಂದು ಸಮಸ್ಯೆಗಳು ಎದುರಾಗಿದೆ. ಪ್ರತಿಯೊಂದು ನಿರ್ವಾಹಕರ ಸೆಟ್‌ ಟಾಪ್‌ ಬಾಕ್ಸ್‌ನಲ್ಲಿರುವ ಸಾಫ್ಟ್‌ವೇರ್‌ ವಿನ್ಯಾಸಗಳು ಭಿನ್ನವಾಗಿವೆ. ಇದನ್ನು ಭೇದಿಸುವುದರಿಂದ ಪೈರಸಿಯ ಸಮಸ್ಯೆ ಉಂಟಾಗುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಇಂಥ ಸವಾಲುಗಳ ಬಗ್ಗೆ ಟ್ರಾಯ್‌ ಪರಿಹಾರವನ್ನು ಕಂಡುಕೊಳ್ಳಬೇಕಾಗಿದೆ ಎಂದು ತಿಳಿದುಬಂದಿದೆ.

ಸಮಸ್ಯೆಯನ್ನು ಬಗೆಹರಿಸಲು ಸಾಧ್ಯ

ಹೀಗಿದ್ದರೂ, ಈ ಸಮಸ್ಯೆಯನ್ನು ಬಗೆಹರಿಸಲು ಸಾಧ್ಯ ಇದೆ ಎನ್ನುತ್ತಿದ್ದಾರೆ ಶರ್ಮಾ. ಸೆಟ್‌ ಟಾಪ್‌ ಬಾಕ್ಸ್‌ಗಳನ್ನು ಖರೀದಿಸಿದ ನಂತರ, ಅದರ ಸಾಫ್ಟ್‌ವೇರ್‌ ಅನ್ನು ಬಳಕೆದಾರರೇ ಡೌನ್‌ಲೋಡ್‌ ಮಾಡಬಹುದಾದ ಪದ್ಧತಿಯನ್ನು ಪರಿಚಯಿಸುವುದರಿಂದ ಸಮಸ್ಯೆ ಬಗೆಹರಿಸಬಹುದು ಎಂದು ಶರ್ಮಾ ಹೇಳಿದ್ದಾರೆ. ಸಮಸ್ಯೆಗಳ ಪರಿಹಾರಕ್ಕಾಗಿ ಟ್ರಾಯ್ ಇತರ ಕನ್ಸಲ್ಟೆನ್ಸಿಗಳ ಹಿಂದೆ ಬಿದ್ದಿದೆ.

ಸಿಡಿಒಟಿ ಜತೆ ಸಂಪರ್ಕ

ಸಮಸ್ಯೆಯನ್ನು ಬಗೆಹರಿಸುವ ಸಲುವಾಗಿ ಟ್ರಾಯ್‌, ಈಗಾಗಲೇ ದೂರಸಂಪರ್ಕ ಇಲಾಖೆಯ ಅಧೀನದಲ್ಲಿರುವ ಸೆಂಟರ್‌ ಫಾರ್‌ ಡೆವಲಪ್‌ಮೆಂಟ್‌ ಆಫ್‌ ಟೆಲಿಮ್ಯಾಟಿಕ್ಸ್‌ (ಸಿಡಿಒಟಿ) ಜತೆ ಸಂಪರ್ಕದಲ್ಲಿದೆ. ಸೆಟ್‌ ಟಾಪ್ ಬಾಕ್ಸ್‌ನಲ್ಲಿ ಸಾಫ್ಟ್‌ವೇರ್‌ ತಂತ್ರಜ್ಞಾನ ಬದಲಾವಣೆಯ ಮಾದರಿ ಸಿದ್ಧಪಡಿಸಲು ಯತ್ನಿಸಲಾಗುತ್ತಿದೆ ಎಂದು ಟ್ರಾಯ್ ಮೂಲಗಳಿಂದ ತಿಳಿದುಬಂದಿದೆ.

ವೆಚ್ಚ ಉಳಿಸುವ ಜೊತೆಗೆ ಉತ್ತಮ ಸೇವೆ!

ಪ್ರಸ್ತುತ ಟಿ.ವಿ ಬಳಕೆದಾರರು ನಿರ್ದಿಷ್ಟ ಕಂಪನಿಯ ಸೆಟ್‌ ಟಾಪ್‌ ಬಾಕ್ಸ್‌ ಅಳವಡಿಸಿದ ನಂತರ, ಸೇವೆಯ ಗುಣಮಟ್ಟ ಹಿಡಿಸದಿದ್ದರೆ ಬೇರೆ ಕಂಪನಿಯ ಸೇವೆಗೆ ಬದಲಾಯಿಸುವಾಗ ಹೊಸ ಸೆಟ್‌ ಟಾಪ್‌ ಬಾಕ್ಸ್‌ ಕೊಂಡುಕೊಳ್ಳಬೇಕಾಗುತ್ತದೆ. ಆಗ ಹಳೆ ಕಂಪನಿಯದ್ದು ವ್ಯರ್ಥವಾಗುತ್ತದೆ. ಆದರೆ, ಈ ಪೋರ್ಟಬಿಲಿಟಿಯಿಂದ ಅದನ್ನು ತಪ್ಪಿಸಬಹುದು ಮತ್ತು ಉತ್ತಮ ಸೇವೆ ಪಡೆಯಬಹುದು.