ಆನ್‌ಲೈನ್ ವಂಚಕನ ಮಾತಿಗೆ ಮರುಳಾಗಿ 22.54 ಲಕ್ಷ ರೂ.ಕಳೆದುಕೊಂಡ ಮಹಿಳಾ ಟೆಕ್ಕಿ!!

ವಂಚಕ ಬಲೆ ಬೀಸಿದ್ದು ಹೇಗೆ?

ರವೆತ್ ನಿವಾಸಿಯಾಗಿರುವ ಮೊಸಹೋದ ಟೆಕ್ಕಿ ಯುವತಿಯು ಮ್ಯಾಟ್ರಿಮೊನಿಯಲ್ ವೆಬ್‌ಸೈಟ್‌ನಲ್ಲಿ ಹೆಸರು ನೋಂದಾಯಿಸಿದ್ದರು. ಇದನ್ನು ಗಮನಿಸಿದ್ದ ವಂಚಕ ಲಂಡನ್‌ನಲ್ಲಿ ವಾಸವಿರುವ ವೈದ್ಯ ಎಂದು ಪರಿಚಯಿಸಿಕೊಂಡು ಮದುವೆ ಪ್ರಸ್ತಾಪವಿಟ್ಟಿದ್ದ. ಯುವತಿಗೂ ಈ ಪ್ರಸ್ತಾಪ ಇಷ್ಟವಾದ ನಂತರ ಇವರೀರ್ವರ ಬಳಿ ಸ್ನೇಹ ಸಲುಗೆ ಬೆಳೆದಿತ್ತು.

ನಿಧಾನವಾಗಿ ಬಲೆ ಹೆಣೆದ!

ವೈದ್ಯ ಎಂದು ಪರಿಚಯಿಸಿಕೊಂಡು ಮದುವೆ ಪ್ರಸ್ತಾಪವಿಟ್ಟ ವಂಚಕನು ಒಮ್ಮೆಲೆ ಹಣವನ್ನು ವಂಚಿಸಲು ಮುಂದಾಗಲಿಲ್ಲ. ಬದಲಾಗಿ ಕೆಲವು ತಿಂಗಳುಗಳ ಕಾಲ ಆ ಯುವತಿಯ ಜೊತೆ ಸ್ನೇಹ ಸಲುಗೆಯಿಂದ ವರ್ತಿಸಿ ನಂಬಿಕೆ ಹುಟ್ಟುವಂತೆ ಮಾಡಿದ್ದ. ನಂತರ ಲಂಡನ್ ನಿಂದ ಭಾರತಕ್ಕೆ ಬರುವ ನಾಟಕವಾಡಿ ವಂಚನೆಯ ಬಲೆಯನ್ನು ನಿಧಾನವಾಗಿ ಎಳೆದ.

ಜುಲೈ 23ರಂದು ಭಾರತಕ್ಕೆ!

ಮದುವೆ ಬಗ್ಗೆ ಮಾತನಾಡಲು ಜುಲೈ 23ರಂದು ಭಾರತಕ್ಕೆ ಬರುತ್ತಿದ್ದೇನೆ ಎಂದು ಆರೋಪಿ ಟೆಕ್ಕಿಗೆ ತಿಳಿಸಿದ್ದ. ಅದೇ ದಿನ ಮುಂಬಯಿ ವಿಮಾನ ನಿಲ್ದಾಣದ ಕಸ್ಟಮ್ಸ್ ಅಧಿಕಾರಿ ಎಂದು ಹೇಳಿ ಕರೆ ಮಾಡಿದ್ದ ವ್ಯಕ್ತಿಯೊಬ್ಬ, ನಿಮ್ಮ ಪರಿಚಯಸ್ಥರು ಲಂಡನ್‌ನಿಂದ ಅಕ್ರಮವಾಗಿ 72,000 ಪೌಂಡ್ ತಂದಿದ್ದಾರೆ, ಅವರು ದಂಡ ಕಟ್ಟಿದರೆ ಮಾತ್ರ ಬಿಡುಗಡೆ ಮಾಡುವುದಾಗಿ ಹೇಳಿದ್ದ.

ಕರೆ ಮಾಡಿ ನಂಬಿಸಿದ ಭೂಪ!

ಪ್ರೀತಿಯ ನಾಟಕವನ್ನಾಡಿದ್ದ ವಂಚಕನು ಮುಂಬಯಿ ವಿಮಾನ ನಿಲ್ದಾಣದ ಕಸ್ಟಮ್ಸ್ ಅಧಿಕಾರಿಗಳು ನನ್ನನ್ನು ಬಂದಿಸಿದ್ದಾರೆ. ನನ್ನ ಬಳಿ ಅಕ್ರಮ ಹಣವಿರುವುದಾಗಿ ಅವರು ನನ್ನನ್ನು ಬಿಡುತ್ತಿಲ್ಲ. ಹಾಗಾಗಿ, ಹೊರ ಬರಲು ಹಣ ಬೇಕಿದೆ ಎಂದು ಆಕೆಗೆ ಕರೆ ಮಾಡಿ ಕೇಳಿಕೊಂಡಿದ್ದ. ಆತನ ಮಾತಿಗೆ ಮರುಳಾಗಿ ಟೆಕ್ಕಿ ಹಣವನ್ನು ಸಂದಾಯ ಮಾಡಲು ಒಪ್ಪಿದರು.

22.54 ಲಕ್ಷ ರೂ.ಹಣ ಪಾವತಿ!

ಅದೇ ದಿನ ಸ್ವಲ್ಪ ಹೊತ್ತಿನ ಬಳಿಕ ಆರ್‌ಬಿಐ ಅಧಿಕಾರಿ ಎಂದು ಹೇಳಿಕೊಂಡ ವ್ಯಕ್ತಿ ಹಣ ಪಾವತಿಸಬೇಕಾಗಿರುವ ಬ್ಯಾಂಕ್‌ ಖಾತೆ ನಂಬರ್‌ ಹೇಳಿದ್ದಾನೆ. ಅದರಂತೆ ಟೆಕ್ಕಿ ತನ್ನೆಲ್ಲ ಉಳಿತಾಯದ ಹಣದ ಜತೆಗೆ ಸ್ನೇಹಿತರಿಂದ ಹಣ ಪಡೆದು ಒಟ್ಟು 22.54 ಲಕ್ಷ ರೂ. ಹಣವನ್ನು ಆ ಖಾತೆಗೆ ಹಣ ತುಂಬಿದ್ದಾರೆ.

ಎಲ್ಲವೂ ವಂಚನೆ!

ಈ ಘಟನೆಯ ನಂತರ ಯುವತಿ ಮಾಡುವ ಕರೆಗಳಿಗೆ ಆತ ಪ್ರತಿಕ್ರಿಯಿಸುತ್ತಿರಲಿಲ್ಲ. ನಂತರ ಅನುಮಾನದಿಂದ ಮುಂಬಯಿ ವಿಮಾನ ನಿಲ್ದಾಣದ ಕಸ್ಟಮರ್‌ ಕೇರ್‌ಗೆ ಕರೆ ಮಾಡಿ ವಿಚಾರಿಸಿದ್ದಾರೆ. ಆಗ ಮೋಸ ಹೋಗಿರುವುದು ಗೊತ್ತಾಗಿ, ಇದೀಗ ಪೊಲೀಸರಿಗೆ ದೂರು ನೀಡಿದ್ದಾರೆ.