ಪ್ರಸ್ತುತ ಜಾಗತಿಕ ಸ್ಮಾರ್ಟ್‌ಫೋನ್ ಮಾರುಕಟ್ಟೆ ಹೇಗಿದೆ?..ನಂ.1 ಬ್ರ್ಯಾಂಡ್ ಯಾವುದು?

ಜಾಗತಿಕ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯು 2025 ರ ಮೊದಲ ತ್ರೈಮಾಸಿಕದಲ್ಲಿ ವರ್ಷದಿಂದ ವರ್ಷಕ್ಕೆ ಶೇಕಡಾ 0.4 ರಷ್ಟು ಸಾಧಾರಣ ಬೆಳವಣಿಗೆಯನ್ನು ಕಂಡಿದೆ. ಹಾಗೂ ಯುನೈಟೆಡ್ ಸ್ಟೇಟ್ಸ್ ಮತ್ತು ಚೀನಾ ನಡುವಿನ ಭೌಗೋಳಿಕ ರಾಜಕೀಯ ಉದ್ವಿಗ್ನತೆ ಮತ್ತು ಸುಂಕ ಅನಿಶ್ಚಿತತೆಯ ಹಿನ್ನೆಲೆಯಲ್ಲಿ, ಈ ವರ್ಷ ಸ್ಯಾಮ್‌ಸಂಗ್ ಕಂಪೆನಿಯು ಆಪಲ್ ಅನ್ನು ಹಿಂದಿಕ್ಕಿ ವಿಶ್ವದ ಪ್ರಮುಖ ಸ್ಮಾರ್ಟ್‌ಫೋನ್ ಮಾರಾಟಗಾರನಾಗಿ ತನ್ನ ಸ್ಥಾನವನ್ನು ಮರಳಿ ಪಡೆದುಕೊಂಡಿದೆ ಎಂದು ಇಂಟರ್ನ್ಯಾಷನಲ್ ಡೇಟಾ ಕಾರ್ಪೊರೇಷನ್ (IDC) ನ ಇತ್ತೀಚಿನ ಅಂಕಿಅಂಶಗಳು ತಿಳಿಸಿವೆ.

2025 ರ ಮೊದಲ ತ್ರೈಮಾಸಿಕದಲ್ಲಿ ಜಾಗತಿಕವಾಗಿ ಸ್ಮಾರ್ಟ್‌ಫೋನ್ ಮಾರಾಟವು 301.4 ಮಿಲಿಯನ್ ಯುನಿಟ್‌ಗಳನ್ನು ತಲುಪಿದೆ. ಈ ತ್ರೈಮಾಸಿಕದಲ್ಲಿ 60.6 ಮಿಲಿಯನ್ ಯುನಿಟ್‌ಗಳನ್ನು ರವಾನಿಸಿರುವ ಸ್ಯಾಮ್‌ಸಂಗ್ 20.1 ಶೇಕಡಾ ಮಾರುಕಟ್ಟೆ ಪಾಲನ್ನು ಕಾಯ್ದುಕೊಂಡಿದೆ. ಇತ್ತ ಆಪಲ್ 58.7 ಮಿಲಿಯನ್ ಐಫೋನ್‌ಗಳನ್ನು ವಿತರಿಸಿದೆ, ಇದು ವರ್ಷದಿಂದ ವರ್ಷಕ್ಕೆ 11.6 ಪ್ರತಿಶತ ಹೆಚ್ಚಳವಾಗಿದೆ. ಆದರೂ, ಆಪಲ್ ಅಗ್ರ ಸ್ಥಾನವನ್ನು ಕಳೆದುಕೊಂಡಿದೆ. ಇನ್ನೂ ಮೂರನೇ ಸ್ಥಾನದಲ್ಲರುವ ಶಿಯೋಮಿ 41.8 ಮಿಲಿಯನ್ ಯೂನಿಟ್‌ಗಳನ್ನು (ಶೇಕಡಾ 2.4 ರಷ್ಟು ಹೆಚ್ಚಾಗಿದೆ) ರವಾನಿಸಿದೆ.

ಟೆಕ್ ದೈತ್ಯ ಸ್ಯಾಮ್‌ಸಂಗ್ ಪ್ರಾಬಲ್ಯವು ಅದರ ಪ್ರಮುಖ ಗ್ಯಾಲಕ್ಸಿ S25 ಮತ್ತು ಹೆಚ್ಚು ಕೈಗೆಟುಕುವ ಗ್ಯಾಲಕ್ಸಿ A36 ಮತ್ತು A56 ಫೋನ್‌ಗಳ ಕಾರ್ಯಕ್ಷಮತೆಯಿಂದ ಉತ್ತೇಜಿಸಲ್ಪಟ್ಟಿದೆ. ಈ ಮಧ್ಯಮ ಶ್ರೇಣಿಯ ವಿಭಾಗಕ್ಕೆ ಸುಧಾರಿತ AI ವೈಶಿಷ್ಟ್ಯಗಳನ್ನು ತಂದಿದ್ದರ ಕಾರಣದಿಂದಾಗಿ, ಜಾಗತಿಕ ಮಾರುಕಟ್ಟೆಯಲ್ಲಿ ಸ್ಯಾಮ್‌ಸಂಗ್ ಮೊದಲ ಸ್ಥಾನ ಪಡೆದುಕೊಳ್ಳಲು ಸಾಧ್ಯವಾಗಿದೆ. ಚೀನಾದ ಆಮದುಗಳ ಮೇಲಿನ ನಿರೀಕ್ಷಿತ US ಸುಂಕಗಳ ಕಾರಣದಿಂದಾಗಿ, ಅಂತರರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಬಲವಾದ ಬೇಡಿಕೆ ಇದ್ದರೂ ಸಹ ಆಪಲ್ ಕಂಪೆನಿಯು ಎರಡನೇ ಸ್ಥಾನಕ್ಕೆ ತೃಪ್ತವಾಗಿದೆ.

ಈ ತ್ರೈ ಮಾಸಿಕದಲ್ಲಿ, ಚೀನೀ ಬ್ರ್ಯಾಂಡ್‌ಗಳು ಸಹ ಗಮನಾರ್ಹ ಲಾಭಗಳನ್ನು ಗಳಿಸಿವೆ. ವಿಶೇಷವಾಗಿ ದೇಶೀಯ ಮಾರುಕಟ್ಟೆಯಲ್ಲಿ, ರಾಜ್ಯ ಬೆಂಬಲಿತ ಸಬ್ಸಿಡಿ ಯೋಜನೆಯಿಂದ ಶಿಯೋಮಿ ಮತ್ತು ವಿವೋ ಗಮನಾರ್ಹವಾಗಿ ಪ್ರಯೋಜನ ಪಡೆದಿವೆ. ಶಿಯೋಮಿ 41.8 ಮಿಲಿಯನ್ ಯೂನಿಟ್‌ಗಳನ್ನು ವಾನಿಸಿದೆ, ಆದರೆ ವಿವೋ 6.5 ಶೇಕಡಾ ಹೆಚ್ಚಳವನ್ನು ಕಂಡಿದ್ದು, 22.7 ಮಿಲಿಯನ್ ಯೂನಿಟ್‌ಗಳನ್ನು ತಲುಪಿದೆ. OPPO, ನಾಲ್ಕನೇ ಸ್ಥಾನವನ್ನು ಮರಳಿ ಪಡೆದಿದ್ದರೂ, ದುರ್ಬಲ ಅಂತರರಾಷ್ಟ್ರೀಯ ಕಾರ್ಯಕ್ಷಮತೆಯಿಂದಾಗಿ ಶೇ. 6.6 ರಷ್ಟು ಕುಸಿತವನ್ನು ಅನುಭವಿಸಿದೆ ಎಂದು ವರದಿಯು ಹೇಳಿದೆ.

IDC ಯ ಕ್ಲೈಂಟ್ ಡಿವೈಸಸ್‌ನ ಉಪಾಧ್ಯಕ್ಷ ಫ್ರಾನ್ಸಿಸ್ಕೊ ಜೆರೋನಿಮೊ ಅವರು ಹೇಳುವಂತೆ, "ಸ್ಯಾಮ್‌ಸಂಗ್ ತನ್ನ ಉತ್ಪನ್ನ ಶ್ರೇಣಿಯಾದ್ಯಂತ AI ಸಾಮರ್ಥ್ಯಗಳನ್ನು ಎಂಬೆಡ್ ಮಾಡುವತ್ತ ಗಮನಹರಿಸಿದೆ - ಪ್ರೀಮಿಯಂ ಮಾದರಿಗಳಲ್ಲಿ ಮಾತ್ರವಲ್ಲದೆ ಪ್ರವೇಶಿಸಬಹುದಾದ ಮಧ್ಯಮ ಹಂತದ ಸಾಧನಗಳಲ್ಲಿ - ಗ್ರಾಹಕರೊಂದಿಗೆ, ವಿಶೇಷವಾಗಿ ವೆಚ್ಚ-ಸೂಕ್ಷ್ಮ ಮಾರುಕಟ್ಟೆಗಳಲ್ಲಿ ಪ್ರತಿಧ್ವನಿಸಿದೆ" ಎಂದು ಹೇಳಿದ್ದಾರೆ. "ಈ ವಿಶಾಲವಾದ AI ತಂತ್ರವು ಮಾರುಕಟ್ಟೆ ಡೈನಾಮಿಕ್ಸ್ ವೇಗವಾಗಿ ಬದಲಾಗುತ್ತಿರುವ ಸಮಯದಲ್ಲಿ ಸ್ಯಾಮ್‌ಸಂಗ್‌ಗೆ ನಿರ್ಣಾಯಕ ಸ್ಪರ್ಧಾತ್ಮಕ ಅಂಚನ್ನು ನೀಡಿದೆ." ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇನ್ನು ಈ IDC ವರದಿಯು ಸಣ್ಣ ಮಾರಾಟಗಾರರ ಪಾಲು ಕುಗ್ಗುತ್ತಿರುವುದನ್ನು ಬಹಿರಂಗಪಡಿಸಿದೆ. "ಇತರರು" ವರ್ಗದ ಅಡಿಯಲ್ಲಿ ವರ್ಷದಿಂದ ವರ್ಷಕ್ಕೆ ಸ್ಮಾರ್ಟ್‌ಫೋನ್ ಸಾಗಾಣೆಯು ಶೇ. 6.1 ರಷ್ಟು ಕುಸಿದಿವೆ. ಇದು ಬ್ರ್ಯಾಂಡ್‌ಗಳ ಬೆಳವಣಿಗೆಯನ್ನು ಸೂಚಿಸಿವೆ. ಇಂಟರ್ನ್ಯಾಷನಲ್ ಡೇಟಾ ಕಾರ್ಪೊರೇಷನ್ ಹೇಳಿರುವಂತೆ, AI ನಂತಹ ಉದಯೋನ್ಮುಖ ತಂತ್ರಜ್ಞಾನಗಳ ಸುತ್ತ ಕಾರ್ಯತಂತ್ರದ ಉತ್ಪನ್ನ ಅಭಿವೃದ್ಧಿಯು ಸ್ಯಾಮ್‌ಸಂಗ್‌ನ ಪ್ರಸ್ತುತ ಮುನ್ನಡೆಗೆ ಕಾರಣವಾಗಿದೆ. ಜಾಗತಿಕವಾಗಿ ಹಲವು ಅನಿಶ್ಚಿತ ಸಮಯದಲ್ಲೂ ಮಾರುಕಟ್ಟೆ ನಾಯಕತ್ವವನ್ನು ಹೇಗೆ ರೂಪಿಸುತ್ತದೆ ಎಂಬುದನ್ನು ಸ್ಯಾಮ್‌ಸಂಗ್‌ ತೋರಿಸಿದೆ.