ಸ್ಪಾಟಿಫೈ ಅಪ್ಲಿಕೇಶನ್‌ನಿಂದ ಹೊಸದಾಗಿ ಭಾರತದ 12 ಭಾಷೆಗಳಿಗೆ ಬೆಂಬಲ!

ಹೌದು, ಸ್ವೀಡಿಷ್‌ ಮೂಲದ ಸ್ಪಾಟಿಫೈ ಸಂಸ್ಥೆ ಇತ್ತೀಚಿಗಷ್ಟೇ 36 ಹೊಸ ಭಾಷೆಗಳನ್ನು ಪರಿಚಯಿಸುವ ಯೋಜನೆಯನ್ನು ಪ್ರಕಟಿಸಿತ್ತು. ಇದೀಗ ಭಾರತದ 12 ಭಾರತೀಯ ಭಾಷೆಗಳನ್ನು ಒಳಗೊಂಡಿರುವ ಹೊಸ ಭಾಷೆಗಳಿಗೆ ಅಧಿಕೃತ ಬೆಂಬಲವನ್ನು ಪ್ರಾರಂಭಿಸಿದೆ. ಈ ಹೊಸ ಭಾಷೆಗಳು ಹೆಚ್ಚು ಭಾರತೀಯ ಬಳಕೆದಾರರಿಗೆ ಸ್ಪಾಟಿಫೈಗೆ ಪ್ರವೇಶವನ್ನು ಪಡೆಯಲು ಸಹಾಯ ಮಾಡುತ್ತದೆ. ಹಾಗಾದ್ರೆ ಸ್ಪಾಟಿಫೈ ಹೊಸದಾಗಿ ಯಾವೆಲ್ಲಾ ಭಾಷೆಗಳಿಗೆ ಬೆಂಬಲ ನೀಡಲಿದೆ ಅನ್ನೊದನ್ನ ಈ ಲೇಖನದಲ್ಲಿ ತಿಳಿಸಿಕೊಡ್ತೀವಿ ಓದಿರಿ.

ಸ್ಪಾಟಿಫೈ ಸಂಸ್ಥೆ ಹೊಸದಾಗಿ 12 ಭಾರತೀಯ ಭಾಷೆಗಳಿಗೆ ಬೆಂಬಲಿಸಲಿದೆ. ಈ ಮೂಲಕ ಭಾರತದ ಸ್ಥಳೀಯ ಭಾಷೆ ಬಳಕೆದಾರರನ್ನು ಆಕರ್ಷಿಸಲು ಮುಂದಾಗಿದೆ. ಸದ್ಯ ಹೊಸದಾಗಿ ಸೇರಿಸಲಾದ 12 ಭಾರತೀಯ ಭಾಷೆಗಳಲ್ಲಿ ಹಿಂದಿ, ಗುಜರಾತಿ, ಭೋಜ್‌ಪುರಿ, ಕನ್ನಡ, ಮಲಯಾಳಂ, ಮರಾಠಿ, ಒಡಿಯಾ, ಪಂಜಾಬಿ, ತಮಿಳು, ತೆಲುಗು, ಉರ್ದು ಮತ್ತು ಬಂಗಾಳಿ ಸೇರಿವೆ. ಭಾರತದಲ್ಲಿನ ನಮ್ಮ ಬಳಕೆದಾರರಿಗೆ ಉತ್ತಮವಾದ ಆಡಿಯೊ ವಿಷಯವನ್ನು ನೀಡುವುದಕ್ಕೆ ನಾವು ಬದ್ಧರಾಗಿದ್ದೇವೆ.ಇದೇ ಕಾರಣಕ್ಕೆ ನಮ್ಮ ಬಳಕೆದಾರರು ಮಾತನಾಡುವ ಭಾಷೆಗಳಲ್ಲಿ ನಮ್ಮ ಸೇವೆಯನ್ನು ನೀಡಲು ನಾವು ಮುಂದಾಗಿದ್ದೇವೆ ಎಂದು ಸ್ಪಾಟಿಫೈ ಸಂಸ್ಥೆ ಹೇಳಿಕೊಂಡಿದೆ.

ಭಾಷೆಗಳ ಬೆಂಬಲದಲ್ಲಿ ಹೊಸ ವಿಸ್ತರಣೆಯು ನಮ್ಮ ಬಳಕೆದಾರರಿಗೆ ಇನ್ನಷ್ಟು ಸ್ಥಳೀಯ ಅನುಭವವನ್ನು ಅನ್ಲಾಕ್ ಮಾಡುತ್ತದೆ. ಹೆಚ್ಚಿನ ಕೇಳುಗರಿಗೆ ತಮ್ಮ ಮಾತೃಭಾಷೆಯಲ್ಲಿ ಸ್ಪಾಟಿಫೈ ಮ್ಯೂಸಿಕ್‌ ಅನ್ನು ಅನುಭವಿಸಲು ಸಾಧ್ಯವಾಗಲಿದೆ ಎಂದು ಕಂಪನಿ ಹೇಳಿದೆ. ಭಾರತದ ಸ್ಥಳೀಯ ಭಾಷೆಗಳನ್ನು ಬೆಂಬಲಿಸುವುದರಿಂದ, ಆ ಭಾಷೆಯ ಮ್ಯೂಸಿಕ್‌ ಅನ್ನು ಕೇಳುವುದಕ್ಕೆ ಅವಕಾಶ ದೊರೆಯಲಿದೆ. ಸದ್ಯ ವಿಶ್ವದಲ್ಲಿಯೇ ಹೆಚ್ಚಿನ ಜನಪ್ರಿಯ ಮ್ಯೂಸಿಕ್‌ ಆಪ್‌ ಆಗಿರುವ ಸ್ಪಾಟಿಫೈ ಮಾರುಕಟ್ಟೆಯಲ್ಲಿನ ಸ್ಫರ್ಧೆಯನ್ನು ಎದುರಸಿವುದಕ್ಕಾಗಿ ಬಳಕೆದಾರರಿಗೆ ಇನ್ನು ಹತ್ತಿರವಾಗುವ ಪ್ರಯತ್ನ ಮಾಡುತ್ತಿದೆ.

ಸದ್ಯ 12 ಹೊಸ ಭಾಷೆಗಳ ಸೇರ್ಪಡೆಯೊಂದಿಗೆ, ಸ್ಪಾಟಿಫೈ ಈಗ ಜಾಗತಿಕವಾಗಿ 62 ಭಾಷೆಗಳಲ್ಲಿ ಬಳಕೆದಾರರಿಗೆ ಲಭ್ಯವಿದೆ. ಇದು ಹಲವಾರು ವಿದೇಶಿ ಭಾಷೆಗಳನ್ನು ಒಳಗೊಂಡಿದೆ. ವಿದೇಶಿ ಭಾಷೆಗಳಿಗೂ ಅಪ್ಲಿಕೇಶನ್ ಬೆಂಬಲವನ್ನು ನೀಡುತ್ತಿದೆ. ರೊಮೇನಿಯನ್, ಸ್ವಹಿಲಿ, ಸ್ಲೊವೇನಿಯನ್, ಫಿಲಿಪಿನೋ, ಸರಳೀಕೃತ ಚೈನೀಸ್ ಮತ್ತು ಪೋರ್ಚುಗೀಸ್ ಬಳಕೆದಾರರು ಕೂಡ ಸ್ಪಾಟಿಫೈ ಅನ್ನು ಪ್ರವೇಶಿಸಬಹುದಾಗಿದೆ. ಅಷ್ಟೇ ಅಲ್ಲ ಸ್ಪಾಟಿಫೈ ಈ ಹಿಂದೆ ಆಫ್ರಿಕಾನ್ಸ್, ಅಂಹರಿಕ್, ಅಜೆರ್ಬೈಜಾನಿ, ಬಲ್ಗೇರಿಯನ್, ಕ್ರೊಯೇಷಿಯನ್, ಡ್ಯಾನಿಶ್, ಎಸ್ಟೋನಿಯನ್, ಐಸ್ಲ್ಯಾಂಡಿಕ್, ಲಾಟ್ವಿಯನ್, ಲಿಥುವೇನಿಯನ್, ನೇಪಾಳಿ, ಪರ್ಷಿಯನ್, ಪೂರ್ವ ಪಂಜಾಬಿ, ಪಶ್ಚಿಮ ಪಂಜಾಬಿ, ಸರ್ಬಿಯನ್, ಸ್ಲೋವಾಕ್, ಉಕ್ರೇನಿಯನ್ ಮತ್ತು ಜುಲು ಭಾಷೆಗಳಲ್ಲೂ ಕೂಡ ಲಭ್ಯವಿತ್ತು.