ಭಾರತದಲ್ಲಿ ಸ್ಟಾರ್‌ಲಿಂಕ್ ಇಂಟರ್‌ನೆಟ್‌ಗೆ ಅನುಮೋದನೆ: ಇಲ್ಲಿದೆ ಸಂಪೂರ್ಣ ಮಾಹಿತಿ!

ಭಾರತದಲ್ಲಿ ತನ್ನ ಉಪಗ್ರಹ ಇಂಟರ್ನೆಟ್ ಸೇವೆಗಳನ್ನು ಪ್ರಾರಂಭಿಸಲು ಎಲಾನ್ ಮಸ್ಕ್ ಅವರ ಸ್ಟಾರ್‌ಲಿಂಕ್ ಸಂಸ್ಥೆಯು ಭಾರತ ಸರ್ಕಾರದಿಂದ ತಾತ್ವಿಕ ಅನುಮೋದನೆ ಪಡೆದಿದೆ ಎಂಬ ಸುದ್ದಿ ಹೊರಬಿದ್ದಿದೆ. ಮನಿ ಕಂಟ್ರೋಲ್‌ನ ವರದಿಯ ಪ್ರಕಾರ, ಟೆಲಿಕಾಂ ಇಲಾಖೆಯು (DoT) ಸ್ಟಾರ್‌ಲಿಂಕ್‌ಗೆ ಉದ್ದೇಶ ಪತ್ರ (Letter of Intent - LoI) ನೀಡಿದೆ. ಆದಾಗ್ಯೂ, ಕಂಪನಿಯು ಇನ್ನೂ ಅಂತಿಮ ಪರವಾನಗಿಯನ್ನು ಪಡೆಯಬೇಕಿದ್ದು, ಎಲ್ಲಾ ಪರವಾನಗಿ ಷರತ್ತುಗಳನ್ನು ಪೂರೈಸಿದ ನಂತರವಷ್ಟೇ ಅದು ಲಭ್ಯವಾಗಲಿದೆ ಎಂದು ವರದಿಯು ತಿಳಿಸಿದೆ.

ಈ ವರ್ಷದ ಆರಂಭದಲ್ಲಿ ಜಿಯೋ ಮತ್ತು ಏರ್‌ಟೆಲ್ ಎರಡೂ ಸ್ಪೇಸ್‌ಎಕ್ಸ್‌ನ ಸ್ಟಾರ್‌ಲಿಂಕ್‌ನೊಂದಿಗೆ ಪಾಲುದಾರಿಕೆ ಒಪ್ಪಂದಕ್ಕೆ ಸಹಿ ಹಾಕಿವೆ. ಮಾರ್ಚ್ 2025 ರಲ್ಲಿ ಘೋಷಿಸಲಾದ ಈ ಒಪ್ಪಂದವು, ಭಾರತದಲ್ಲಿ ಸ್ಟಾರ್‌ಲಿಂಕ್ ಅನ್ನು ಮಾರಾಟ ಮಾಡಲು ಅಗತ್ಯವಿರುವ ಅನುಮೋದನೆಗಳನ್ನು ಸ್ಪೇಸ್‌ಎಕ್ಸ್ ಪಡೆಯುವುದರ ಮೇಲೆ ಅವಲಂಬಿತವಾಗಿತ್ತು. ಈಗ ಕಂಪನಿಯು ಉದ್ದೇಶ ಪತ್ರವನ್ನು ಪಡೆದುಕೊಂಡಿರುವುದರಿಂದ, ಶೀಘ್ರದಲ್ಲೇ ಅಂತಿಮ ಅನುಮೋದನೆ ದೊರೆಯುವ ನಿರೀಕ್ಷೆಯಿದೆ ಎಂದು ಹಲವು ಮಾಧ್ಯಮಗಳು ವರದಿ ಮಾಡಿವೆ.

ಸ್ಟಾರ್‌ಲಿಂಕ್ ಕಡಿಮೆ ಭೂಮಿಯ ಕಕ್ಷೆಯಲ್ಲಿರುವ ಉಪಗ್ರಹಗಳ ಒಂದು ದೊಡ್ಡ ಜಾಲವಾಗಿದ್ದು, ಇದು ಹೆಚ್ಚಿನ ವೇಗದ ಇಂಟರ್ನೆಟ್ ಅನ್ನು ಒದಗಿಸುವ ಗುರಿಯನ್ನು ಹೊಂದಿದೆ. ಸಾಂಪ್ರದಾಯಿಕ ಕೇಬಲ್ ಆಧಾರಿತ ಇಂಟರ್ನೆಟ್ ಸೇವೆಗಳಿಗಿಂತ ಭಿನ್ನವಾಗಿ, ಸ್ಟಾರ್‌ಲಿಂಕ್ ದೂರದ ಮತ್ತು ತಲುಪಲು ಕಷ್ಟಕರವಾದ ಪ್ರದೇಶಗಳಲ್ಲಿ ವೇಗದ ಮತ್ತು ವಿಶ್ವಾಸಾರ್ಹ ಇಂಟರ್ನೆಟ್ ಸಂಪರ್ಕವನ್ನು ಒದಗಿಸಲು ವಿನ್ಯಾಸಗೊಳಿಸಲಾಗಿದೆ. ಇದು ಭೂಮಿಗೆ ಮತ್ತು ಅಲ್ಲಿಂದ ಡೇಟಾವನ್ನು ರವಾನಿಸುವ ಉಪಗ್ರಹಗಳ ಮೂಲಕ ಬಳಕೆದಾರರನ್ನು ಸಂಪರ್ಕಿಸುತ್ತದೆ.

ಸಾಂಪ್ರದಾಯಿಕ ಬ್ರಾಡ್‌ಬ್ಯಾಂಡ್ ಮೂಲಸೌಕರ್ಯವನ್ನು ಸ್ಥಾಪಿಸಲು ಕಷ್ಟಕರವಾದ ಪ್ರದೇಶಗಳಿಗೆ, ವಿಶೇಷವಾಗಿ ದೂರದ ಅಥವಾ ಭೌಗೋಳಿಕವಾಗಿ ಸವಾಲಿನ ಪ್ರದೇಶಗಳಿಗೆ ಸ್ಟಾರ್‌ಲಿಂಕ್‌ನ ಉಪಗ್ರಹ ಆಧಾರಿತ ಇಂಟರ್ನೆಟ್ ಭರವಸೆಯ ಪರಿಹಾರವಾಗಿದೆ. ಈ ಸೇವೆಯು ಈಗಾಗಲೇ ಅನೇಕ ದೇಶಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದು, ತನ್ನ ಜಾಗತಿಕ ವ್ಯಾಪ್ತಿ ಮತ್ತು ಕಾರ್ಯಕ್ಷಮತೆಯನ್ನು ಹೆಚ್ಚಿಸಲು ಉಪಗ್ರಹಗಳ ಸಂಖ್ಯೆಯನ್ನು ವಿಸ್ತರಿಸುತ್ತಿದೆ. ಇತ್ತೀಚೆಗೆ, ಸ್ಪೇಸ್‌ಎಕ್ಸ್ ಬ್ರೆಜಿಲ್‌ನಲ್ಲಿಯೂ ಸ್ಟಾರ್‌ಲಿಂಕ್ ಸೇವೆಗಳನ್ನು ಪ್ರಾರಂಭಿಸಿದೆ.

ಭಾರತದಲ್ಲಿ ಪ್ರಾರಂಭವಾದಾಗ, ಸ್ಟಾರ್‌ಲಿಂಕ್ 25 Mbps ನಿಂದ 220 Mbps ವರೆಗಿನ ಡೌನ್‌ಲೋಡ್ ವೇಗವನ್ನು ಮತ್ತು 5 Mbps ನಿಂದ 20 Mbps ವರೆಗಿನ ಅಪ್‌ಲೋಡ್ ವೇಗವನ್ನು ನೀಡುವ ನಿರೀಕ್ಷೆಯಿದೆ. ಇದರೊಂದಿಗೆ, 25 ರಿಂದ 50 ಮಿಲಿಸೆಕೆಂಡ್‌ಗಳವರೆಗೆ ಸುಪ್ತತೆ ಇರಲಿದ್ದು, ಸ್ಟ್ರೀಮಿಂಗ್, ಗೇಮಿಂಗ್ ಮತ್ತು ವೀಡಿಯೊ ಕರೆಗಳಿಗೆ ಇದು ಸಹಕಾರಿಯಾಗಲಿದೆ. ಉಪಗ್ರಹಗಳ ಗುಚ್ಚದ ಸಹಾಯದಿಂದ ದೇಶದ ಯಾವುದೇ ಮೂಲೆಯಲ್ಲಿಯೂ ಸಹ ಸ್ಟಾರ್‌ಲಿಂಕ್ ಇಂಟರ್‌ನೆಟ್ ಅನ್ನು ಒದಗಿಸಲು ಸಾಧ್ಯವಾಗುತ್ತದೆ ಎಂದು ಹೇಳಲಾಗಿದೆ.

ಏರ್‌ಟೆಲ್ ಮತ್ತು ಜಿಯೋ ಎರಡೂ ಗ್ರಾಮೀಣ ಶಾಲೆಗಳು, ಆರೋಗ್ಯ ಸೌಲಭ್ಯಗಳು ಮತ್ತು ಸಾಂಪ್ರದಾಯಿಕ ಮೂಲಸೌಕರ್ಯದ ಕೊರತೆಯಿರುವ ದೂರದ ಪ್ರದೇಶಗಳಲ್ಲಿ ಇಂಟರ್ನೆಟ್ ಪ್ರವೇಶವನ್ನು ವಿಸ್ತರಿಸಲು ಸ್ಟಾರ್‌ಲಿಂಕ್‌ನ ತಂತ್ರಜ್ಞಾನವನ್ನು ಬಳಸಿಕೊಳ್ಳಲು ಬಯಸುತ್ತಿವೆ ಮತ್ತು ಈ ಕುರಿತು ಪಾಲುದಾರಿಕೆ ಮಾಡಿಕೊಂಡಿವೆ. ಏರ್‌ಟೆಲ್ ತನ್ನ ಪ್ರಸ್ತುತ ನೆಟ್‌ವರ್ಕ್‌ಗೆ ಸ್ಟಾರ್‌ಲಿಂಕ್ ಅನ್ನು ಸಂಯೋಜಿಸಲು ಮತ್ತು ಭಾರತದಲ್ಲಿ ಏರ್‌ಟೆಲ್‌ನ ಟೆಲಿಕಾಂ ಮೂಲಸೌಕರ್ಯವನ್ನು ಬಳಸಿಕೊಳ್ಳಲು ಸ್ಪೇಸ್‌ಎಕ್ಸ್‌ಗೆ ಅವಕಾಶಗಳನ್ನು ಅನ್ವೇಷಿಸಲು ಯೋಜಿಸಿದೆ.

ಭಾರತೀಯ ಟೆಲಿಕಾಂ ವಲಯದಲ್ಲಿ ಈಗಾಗಲೇ ಉಪಗ್ರಹ ಬ್ರಾಡ್‌ಬ್ಯಾಂಡ್ ಸೇವೆಗಳನ್ನು ಒದಗಿಸುತ್ತಿರುವ ಒನ್‌ವೆಬ್‌ನಂತೆಯೇ ಸ್ಟಾರ್‌ಲಿಂಕ್ ಸಹ ಕಾರ್ಯನಿರ್ವಹಿಸಲಿದೆ. ಒನ್‌ವೆಬ್ ಏರ್‌ಟೆಲ್‌ನಲ್ಲಿ ಗಣನೀಯ ಪಾಲನ್ನು ಹೊಂದಿದ್ದು, ವ್ಯವಹಾರಗಳು ಮತ್ತು ಸಮುದಾಯಗಳಿಗೆ ಉಪಗ್ರಹ ಬ್ರಾಡ್‌ಬ್ಯಾಂಡ್ ಸೇವೆಗಳನ್ನು ನೀಡುತ್ತಿದೆ. ಏರ್‌ಟೆಲ್ ತನ್ನ ಗ್ರಾಹಕರಿಗೆ ಉಪಗ್ರಹ ಇಂಟರ್ನೆಟ್ ಒದಗಿಸಲು ಒನ್‌ವೆಬ್‌ನ ತಂತ್ರಜ್ಞಾನವನ್ನು ಬಳಸಿಕೊಳ್ಳುವ ಸಾಧ್ಯತೆ ಇದೆ. ಇದರ ಜೊತೆಗೆ ಸ್ಟಾರ್‌ಲಿಂಕ್ ಸಹ ಏರ್‌ಟೆಲ್‌ನ ಬಾಗವಾಗಿರಲಿದೆ.

ವಾಷಿಂಗ್ಟನ್ ಪೋಸ್ಟ್‌ನ ವರದಿಯ ಪ್ರಕಾರ, ಭಾರತದಲ್ಲಿ ಸ್ಟಾರ್‌ಲಿಂಕ್‌ಗೆ ದೊರೆತ ಈ ಹಠಾತ್ ಅನುಮೋದನೆಯ ಹಿಂದೆ ವ್ಯಾಪಾರ ಸಂಬಂಧಗಳೂ ಇರಬಹುದು. ವರದಿಯ ಪ್ರಕಾರ, ಭಾರತ ಸರ್ಕಾರವು ಅಮೆರಿಕದೊಂದಿಗೆ ನಡೆಯುತ್ತಿರುವ ವ್ಯಾಪಾರ ಮಾತುಕತೆಗಳನ್ನು ಬೆಂಬಲಿಸುವ ಕ್ರಮವಾಗಿ ಸ್ಟಾರ್‌ಲಿಂಕ್‌ಗೆ ಅನುಮತಿ ನೀಡಲು ತ್ವರಿತವಾಗಿ ಮುಂದಾಗಿದೆ. ಭಾರತೀಯ ಅಧಿಕಾರಿಯೊಬ್ಬರು ತಿಳಿಸಿರುವಂತೆ, "ಇದು ಅಮೆರಿಕದೊಂದಿಗಿನ ವ್ಯಾಪಾರ ಮಾತುಕತೆಗಳಲ್ಲಿ ನೇರವಾದ ಅಂಶವಾಗಿರದಿದ್ದರೂ, ಭಾರತದ ಕಡೆಯಿಂದ ಇದನ್ನು ಒಪ್ಪಂದವನ್ನು ಸುಲಭಗೊಳಿಸುವ ಪ್ರಮುಖ ಸಾಧನವೆಂದು ಪರಿಗಣಿಸಲಾಗಿದೆ."

ಸರ್ಕಾರಿ ಅಧಿಕಾರಿಯೊಬ್ಬರು ಮನಿ ಕಂಟ್ರೋಲ್‌ಗೆ ಮಾಹಿತಿ ನೀಡಿದ್ದು, "ಭಾರತದಲ್ಲಿ GMPCS, VSAT ಮತ್ತು ISP ಪರವಾನಗಿಗಳಿಗಾಗಿ ಸ್ಟಾರ್‌ಲಿಂಕ್‌ಗೆ DoT ಯಿಂದ LoI ನೀಡಲಾಗಿದೆ. ಸ್ಟಾರ್‌ಲಿಂಕ್ ಎಲ್ಲಾ ಪರವಾನಗಿ ಷರತ್ತುಗಳನ್ನು ಪೂರೈಸಿದ ನಂತರ ಅಂತಿಮ ಪರವಾನಗಿಯನ್ನು ನೀಡಲಾಗುವುದು" ಎಂದು ಹೇಳಿದ್ದಾರೆ. " ಸ್ಪೇಸ್‌ಎಕ್ಸ್‌ಗೆ ಭಾರತೀಯ ಮಾರುಕಟ್ಟೆಯು ಅತ್ಯಂತ ಮಹತ್ವದ್ದಾಗಿದ್ದು, ಕೇವಲ 1% ಗ್ರಾಹಕರ ಬ್ರಾಡ್‌ಬ್ಯಾಂಡ್ ಮಾರುಕಟ್ಟೆಯನ್ನು ಪಡೆದುಕೊಂಡರೂ ಸಹ ವಾರ್ಷಿಕವಾಗಿ ಸುಮಾರು $1 ಬಿಲಿಯನ್ ಆದಾಯ ಗಳಿಸುವ ಸಾಮರ್ಥ್ಯವನ್ನು ಹೊಂದಿದೆ.