ಆಧಾರ್ ಇ-ಕೆವೈಸಿ ಪರಿಶೀಲನೆ ಮಾಡಿಸದಿದ್ದರೆ ನಿಮ್ಮ ಸಿಮ್ ವರ್ಕ್ ಆಗೊಲ್ಲಾ!!

ಭಾರತೀಯ ಟೆಲಿಕಾಂ ನಿಯಂತ್ರಣ ಪ್ರಾಧಿಕಾರ "ಟ್ರಾಯ್" ಟೆಲಿಕಾಂನಲ್ಲಿ ಹೊಸದೊಂದು ಬದಲಾವಣೆಯನ್ನು ಜಾರಿಗೆ ತರಲು ಚಿಂತಿಸಿದೆ. ಸಿಮ್ ಪರಿಶೀಲನೆ‌ಗೆ ಇತ್ತೀಚಿಗೆ ಬಂದಿರುವ ಆಧಾರ್ ಇ-ಕೆವೈಸಿ ಪರಿಶೀಲನೆ ತಂತ್ರಜ್ಞಾನವನ್ನು ಹಳೆಯ ಟೆಲಿಕಾಂ ಗ್ರಾಹಕರಿಗೂ ಜಾರಿಗೆ ತರಲು ಮುಂದಾಗಿದೆ.

ಪ್ರಸ್ತುತ ಕಾರ್ಯಾಚರಣೆಯಲ್ಲಿರುವ ಎಲ್ಲಾ ಸಿಮ್‌ಗಳನ್ನು ಮತ್ತೆ ಇ-ಕೆವೈಸಿ ಪರಿಶೀಲನೆ ಮಾಡಿಸಬೇಕಾದ ಅನಿವಾರ್ಯತೆ ಎಲ್ಲಾ ಟೆಲಿಕಾಂ ಗ್ರಾಹಕರಿಗೂ ಒದಗಿಬಂದಿದೆ. ಸಿಮ್‌ ಖರೀದಿಸುವ ಸಮಯದಲ್ಲಿ ಆಗುತ್ತಿದ್ದ ತೊಂದರೆಗಳನ್ನು ನಿವಾರಿಸಲು ಈ ಕ್ರಮ ಸೂಕ್ತವಾದುದು ಎಂದು ಟ್ರಾಯ್ ಅಭಿಪ್ರಾಯಪಟ್ಟಿದೆ.

ಪೊಲೀಸ್‌ ಇಲಾಖೆ ಮಾಹಿತಿಯಂತೆ ಸಾವಿರಾರು ಸಿಮ್‌ಗಳು ಫೇಕ್‌ ಡಾಕ್ಯುಮೆಂಟ್ಸ್‌ಗಳನ್ನು ಹೊಂದಿದ್ದು, ಇದರಿಂದ ಇತರರಿಗೆ ತೊಂದರೆ ಹೆಚ್ಚಾಗಿದೆ. ಹಾಗಾಗಿ, ಈ ಮೊದಲು ಇದ್ದ ಪರಿಶೀಲನೆ ಸಿಸ್ಟಮ್‌ ಅನ್ನು ಸಂಪೂರ್ಣ ಬದಲಿಸಬೇಕಿದೆ ಎಂದು ಹೇಳಿದೆ.

ಭಾರತದಲ್ಲಿ ನೂರು ಕೋಟಿಗೂ ಹೆಚ್ಚು ಸಿಮ್‌ ಬಳಕೆದಾರರು ಇದ್ದು, ಭದ್ರತಾ ದೃಷ್ಟಿಯಿಂದ ಇ-ಕೆವೈಸಿ ಪರಿಶೀಲನೆ ಪ್ರಮುಖವಾಗಲಿದೆ. ಇದರಿಂದ ಪೊಲೀಸ್‌ ಇಲಾಖೆಗಳಿಗೂ ಸಹಾಯಕವಾಗುತ್ತದೆ. ಮತ್ತು ಅಕ್ರಮವಾಗಿ ಉಪಯೋಗವಾಗುತ್ತಿರುವ ಸಿಮ್‌ಗಳನ್ನು ನಿಷ್ಕ್ರಿಯಮಾಡಬಹುದಾಗಿದೆ.