ಫೋನ್‌ಪೇ, ಗೂಗಲ್‌ಪೇ ಬಳಸುವ ಮುನ್ನ ಈ ಹೊಸ ನಿಯಮಗಳ ಬಗ್ಗೆ ಅರಿವಿರಲಿ

ಭಾರತದಲ್ಲಿ ಯುಪಿಐ ಪಾವತಿ ವ್ಯವಸ್ಥೆ ಹೆಚ್ಚು ಜನಪ್ರಿಯವಾಗುತ್ತಿದ್ದ ಹಾಗೇ ಹಲವು ಬದಲಾವಣೆಗಳು ಶುರುವಾಗಿವೆ. ಇದೀಗ 2024ಕ್ಕೆ ಕಾಲಿಡುತ್ತಿದ್ದ ಹಾಗೇ ಆರ್‌ಬಿಐ ಯುಪಿಐ ವ್ಯವಸ್ಥೆ ಸೇರಿದಂತೆ ಬ್ಯಾಂಕಿಂಗ್‌ ವ್ಯವಸ್ಥೆಯಲ್ಲಿ ಹೊಸ ಬದಲಾವಣೆಗಳನ್ನು ಮಾಡಿದೆ. ಈ ನಿಯಮಗಳು ಹೊಸ ವರ್ಷದಿಂದಲೇ ಶುರುವಾಗಿದ್ದು, ಈಗಾಗಲೇ ಜಾರಿಗೆ ಬಂದಿವೆ.

ಹೌದು, ಹೊಸ ವರ್ಷ 2024 ಪ್ರಾರಂಭದಲ್ಲಿಯೇ ಬ್ಯಾಂಕಿಂಗ್‌ ವ್ಯವಸ್ಥೆಯಲ್ಲಿ ಅನೇಕ ಬದಲಾವಣೆಗಳನ್ನು ಮಾಡಲಾಗಿದೆ. ಈ ಬದಲಾವಣೆಗಳು ನಮ್ಮ ನಿಮ್ಮ ಮೇಲೆ ನೇರ ಪರಿಣಾಮ ಬೀರುವುದರಿಂದ, ಈ ನಿಯಮಗಳ ಬಗ್ಗೆ ತಿಳಿದುಕೊಳ್ಳುವುದು ಮುಖ್ಯವಾಗಿದೆ. ಹಾಗಾದ್ರೆ ಹೊಸ ವರ್ಷದಿಂದ ಆರ್‌ಬಿಐ ಮಾಡಿರುವ ಬದಲಾವಣೆಗಳು ಏನು ಅನ್ನೊದನ್ನ ಈ ಲೇಖನದಲ್ಲಿ ತಿಳಿಸಿಕೊಡ್ತೀವಿ ಓದಿರಿ.

ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಜನವರಿ 1, 2024 ರಂದು ಜಾರಿಗೆ ಬರುವಂತೆ UPI ಪಾವತಿ ವ್ಯವಸ್ಥೆಯಲ್ಲಿ ಬದಲಾವಣೆಗಳನ್ನು ಮಾಡಿದೆ. ಯುಪಿಐ ಪಾವತಿ ವ್ಯಾಪ್ತಿಯನ್ನು ವಿಸ್ತರಿಸುವ ಗುರಿಯನ್ನು ಈ ನಿಯಮಗಳಲ್ಲಿ ಕಾಣಬಹುದಾಗಿದೆ. ಅದರಂತೆ ಈ ಹೊಸ ನಿಯಮಗಳು ಆನ್‌ಲೈನ್ ಬ್ಯಾಂಕಿಂಗ್ ಮತ್ತು ಪಾವತಿ ವಹಿವಾಟಿನ ಅನುಭವದಲ್ಲಿ ಹೊಸ ಬದಲಾವಣೆ ತರಲಿವೆ.

ಹೀಗೆ ಮಾಡಿದ್ರೆ ನಿಮ್ಮ ಯುಪಿಐ ಐಡಿ ರದ್ದಾಗಲಿದೆ
ಒಂದು ವರ್ಷಕ್ಕಿಂತ ಹೆಚ್ಚು ಕಾಲ ಬಳಸದೆ ಇರುವ ನಿಮ್ಮ ಯುಪಿಐ ಐಡಿಗಳನ್ನು ನಿಷ್ಕ್ರಿಯಗೊಳಿಸಲಾಗುತ್ತದೆ. ಏಕೆಂದರೆ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ನವೆಂಬರ್ 7 ರ ಸುತ್ತೋಲೆಯಲ್ಲಿ, ಒಂದು ವರ್ಷಕ್ಕಿಂತ ಹೆಚ್ಚು ಕಾಲ ಸಕ್ರಿಯವಾಗಿರದ UPI ಐಡಿಗಳನ್ನು ನಿಷ್ಕ್ರಿಯಗೊಳಿಸುವುದಾಗಿ ಹೇಳಿದೆ. ಇದಕ್ಕಾಗಿ ವರ್ಷದಿಂದ ಬಳಕೆ ಮಾಡದ ಯುಪಿಐ ಐಡಿ ಮತ್ತು ಸಂಖ್ಯೆಗಳನ್ನು ನಿಷ್ಕ್ರಿಯಗೊಳಿಸಲು ಪಾವತಿ ಅಪ್ಲಿಕೇಶನ್‌ಗಳು ಮತ್ತು ಬ್ಯಾಂಕ್‌ಗಳನ್ನು ಕೇಳಿದೆ. ಇದು ಕಳೆದ ವರ್ಷದ ಡಿಸೆಂಬರ್ 31ಕ್ಕೆ ಮುಕ್ತಾಯವಾಗಿದ್ದು, ಹೊಸ ಬದಲಾವಣೆ ಜಾರಿಗೆ ತರಲಾಗಿದೆ.

ಪಾವತಿ ಮಿತಿ ಹೆಚ್ಚಳ
ಇನ್ನು ಆರ್‌ಬಿಐ ಇತ್ತೀಚೆಗೆ ಆಸ್ಪತ್ರೆಗಳು ಮತ್ತು ಶಿಕ್ಷಣ ಸಂಸ್ಥೆಗಳಿಗೆ ಯುಪಿಐ ವಹಿವಾಟಿನ ಮಿತಿಯನ್ನು 1 ಲಕ್ಷದಿಂದ 5 ಲಕ್ಷಕ್ಕೆ ಹೆಚ್ಚಿಸಿದೆ. ಹಣಕಾಸು ನೀತಿ ಸಮಿತಿ ಸಭೆಯ ನಂತರ ಹೆಚ್ಚಿನ ಆನ್‌ಲೈನ್ ಪಾವತಿಗಳನ್ನು ಸಕ್ರಿಯಗೊಳಿಸುತ್ತದೆ. ಇದಲ್ಲದೆ RBI ಹೊಸ ಸ್ವೀಕೃತದಾರರಿಗೆ ಪಾವತಿ ವ್ಯವಸ್ಥೆಯಲ್ಲಿ ಬದಲಾವಣೆ ಮಾಡಿದೆ. ಮೊದಲ ಪಾವತಿಯಲ್ಲಿ 2,000 ಕ್ಕಿಂತ ಹೆಚ್ಚಿನ ಮೊತ್ತವನ್ನು ಪಾವತಿ ಮಾಡುವ ಬಳಕೆದಾರರಿಗೆ 4 ಗಂಟೆಗಳ ವಿಂಡೋವನ್ನು ನೀಡಲು ಮುಂದಾಗಿದೆ. ಅಂದರೆ ಮೊದಲ ಪಾವತಿಯ ನಂತರ ನೀವು 24 ಗಂಟೆಗಳ ತನಕ ಕಾಯುವ ಅಗತ್ಯವಿರುವುದಿಲ್ಲ.

ಪ್ಲೇ ಆಗಲಿದೆ ನಿಜವಾದ ಹೆಸರು
ಇನ್ನು ನೀವು ಯಾರಿಗಾದರೂ UPI ಅಪ್ಲಿಕೇಶನ್‌ಗಳನ್ನು ಬಳಸಿಕೊಂಡು ಪಾವತಿಯನ್ನು ಮಾಡಿದಾಗ, ವ್ಯಕ್ತಿಯ ಬ್ಯಾಂಕ್ ಖಾತೆಯ ನಿಜವಾದ ಹೆಸರನ್ನು ತೋರಿಸಲಾಗುತ್ತದೆ. ಇದರಿಂದ ಇನ್ಮುಂದೆ ಯಾರು ಕೂಡ ತಮ್ಮ ಹೆಸರನ್ನು ಹೈಡ್‌ ಮಾಡುವುದಕ್ಕೆ ಸಾದ್ಯವಾಗುವುದಿಲ್ಲ.

ಮೊದಲ UPI-ATM
ಇನ್ನು ಇದೇ ವರ್ಷ NPCI ಯ 'ಯುಪಿಐ ಫಾರ್ ಸೆಕೆಂಡರಿ ಮಾರ್ಕೆಟ್' ಬೀಟಾ ಹಂತವನ್ನು ಪ್ರವೇಶಿಸುತ್ತದೆ. ಇದು ಸೀಮಿತ ಪೈಲಟ್ ಗ್ರಾಹಕರಿಗೆ ನಿಧಿಗಳನ್ನು ವ್ಯಾಪಾರದ ನಂತರದ ದೃಢೀಕರಣವನ್ನು ನಿರ್ಬಂಧಿಸಲು ಅವಕಾಶ ನೀಡಲಿದೆ. ಜೊತೆಗೆ ಕ್ಲಿಯರಿಂಗ್ ಕಾರ್ಪೊರೇಷನ್‌ಗಳ ಮೂಲಕ T 1 ಆಧಾರದ ಮೇಲೆ ಪಾವತಿಗಳನ್ನು ಹೊಂದಿಸಲು ನೀಡಲಿದೆ. ಇದಲ್ಲದೆ QR ಕೋಡ್ ಸ್ಕ್ಯಾನಿಂಗ್ ಮೂಲಕ ನಗದು ಹಿಂಪಡೆಯುವಿಕೆಯನ್ನು ಅನುಮತಿಸಲು ಮುಂದಾಗಿದೆ.

ಬ್ಯಾಂಕ್ ಲಾಕರ್ ಒಪ್ಪಂದ

ಇದರೊಂದಿಗೆ RBI ಸುರಕ್ಷಿತ ಠೇವಣಿ ಲಾಕರ್‌ಗಳ ಹೊಸ ನಿಯಮಗಳನ್ನು ಜಾರಿಗೊಳಿಸಿದೆ. ಅದರಂತೆ ಗ್ರಾಹಕರು ತಮ್ಮ ಬ್ಯಾಂಕ್‌ಗಳೊಂದಿಗೆ ಹೊಸ ಒಪ್ಪಂದಕ್ಕೆ ಸಹಿ ಹಾಕಬೇಕಾಗುತ್ತದೆ. ಗ್ರಾಹಕರು ಬಾಡಿಗೆಯನ್ನು ಪಾವತಿಸುವವರೆಗೆ ಮಾತ್ರ ಲಾಕರ್ ಅನ್ನು ಬಳಸಲು ಅನುಮತಿಸಲಾಗಿದೆ.