ವಾಟ್ಸಾಪ್‌ ವೆಬ್‌ ಆವೃತ್ತಿಯಲ್ಲೂ ಬರಲಿದೆ ವಿಡಿಯೋ ಕಾಲ್‌ ಫೀಚರ್ಸ್‌!

ಹೌದು, ವಾಟ್ಸಾಪ್ ತನ್ನ ವೆಬ್‌ ಆವೃತ್ತಿಯಲ್ಲಿ ಹೊಸ ಆಪ್ಡೇಟ್‌ ಮಾಡುವುದಕ್ಕೆ ಮುಂದಾಗಿದೆ. ಈ ಮೂಲಕ ತನ್ನ ವೆಬ್ ಅಪ್ಲಿಕೇಶನ್ ಅನ್ನು ಇನ್ನಷ್ಟು ಉತ್ತಮಗೊಳಿಸುತ್ತದೆ. ಸದ್ಯ ಲಭ್ಯ ಮಾಹಿತಿ ಪ್ರಕಾರ ವಾಟ್ಸಾಪ್ ವೆಬ್‌ನಲ್ಲಿ ವಾಯ್ಸ್‌ ಮತ್ತು ವೀಡಿಯೊ ಕರೆಗಳನ್ನು ಮಾಡುವುದಕ್ಕೆ ಅವಕಾಶ ನೀಡುವ ಫೀಚರ್ಸ್‌ ಅನ್ನು ಪರಿಚಯಿಸುವುದಕ್ಕೆ ವಾಟ್ಸಾಪ್‌ ಸಿದ್ದತೆ ನಡೆಸಿದ್ದ, ಇದು ಶೀಘ್ರದಲ್ಲೇ ಲಭ್ಯವಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.ಇನ್ನು ಈ ಹೊಸ ಫೀಚರ್ಸ್‌ನ ವಿಶೇಷತೆ ಏನು? ಇದರ ಬಳಕೆ ಹೇಗೆ ಅನ್ನೊದನ್ನ ಈ ಲೇಖನದಲ್ಲಿ ತಿಳಿಸಿಕೊಡ್ತೀವಿ ಓದಿರಿ.

ವಾಟ್ಸಾಪ್ ಪ್ರಸ್ತುತ ತನ್ನ ಮೊಬೈಲ್ ಅಪ್ಲಿಕೇಶನ್‌ನಲ್ಲಿ ಮಾತ್ರ ವಾಯ್ಸ್‌ ಮತ್ತು ವೀಡಿಯೊ ಕರೆಗಳನ್ನು ಬೆಂಬಲಿಸುತ್ತದೆ. ಜೊತೆಗೆ ಮೊಬೈಲ್ ಅಪ್ಲಿಕೇಶನ್‌ನಲ್ಲಿ ಮಾಡಬಹುದಾದ ಎಲ್ಲ ಪ್ರಮುಖ ಕೆಲಸಗಳನ್ನು ಮಾಡಲು ವಾಟ್ಸಾಪ್ ವೆಬ್‌ನಲ್ಲಿಯೂ ಸಹ ಅವಕಾಶ ನೀಡುತ್ತದೆ. ಆದರೆ ವೆಬ್‌ ಆವೃತ್ತಿಯಲ್ಲಿ ಇಲ್ಲಿಯವರೆಗೆ ವಾಯ್ಸ್‌ ಮತ್ತು ವೀಡಿಯೊ ಕರೆ ಮಾಡುವುದಕ್ಕೆ ಅವಕಾಶ ನೀಡಿಲ್ಲ. ಅಲ್ಲದೆ ಹೊಸ ಸಂಪರ್ಕಗಳನ್ನು ಸೇರಿಸುವಂತಹ ಫೀಚರ್ಸ್‌ಗಳನ್ನ ಸಹ ನೀಡಿಲ್ಲ. ಇದೀಗ ಶೀಘ್ರದಲ್ಲೇ ವಾಟ್ಸಾಪ್ ವೆಬ್‌ನಲ್ಲಿ ಕರೆಯನ್ನು ಮಾಡುವುದಕ್ಕೆ ಅವಕಾಶ ನೀಡುವ ಫೀಚರ್ಸ್‌ ಬಿಡುಗಡೆ ಆಗಲಿದೆ.

ವಾಟ್ಸಾಪ್‌ ವೆಬ್‌ನಲ್ಲಿಯೂ ವಿಡಿಯೋ ಮತ್ತು ವಾಯ್ಸ್‌ ಕಾಲ್‌ ಬೆಂಬಲ ಇದ್ದರೆ ಎಷ್ಟು ಚೆಂದ ಎಂದು ಅಂದುಕೊಂಡಿದ್ದವಾಟ್ಸಾಪ್‌ ಬಳಕೆದಾರರಿಗೆ ಇದು ಸಾಕಷ್ಟು ಉಪಯುಕ್ತವಾಗಲಿದೆ. ಇನ್ನು ವಾಟ್ಸಾಪ್‌ ವೆಬ್‌ನಲ್ಲಿ ವಾಯ್ಸ್‌ ಕಾಲ್‌ ಮತ್ತು ವಿಡಿಯೋ ಕಾಲ್‌ ಫೀಚರ್ಸ್‌ ಹೇಗಿರಲಿದೆ ಎನ್ನುವ ಕೆಲವು ಸ್ಕ್ರೀನ್‌ಶಾಟ್‌ಗಳನ್ನು ವಾಟ್ಸಾಪ್‌ ಸಂಸ್ಥೆ ಆನ್‌ಲೈನ್‌ನಲ್ಲಿ ಹಂಚಿಕೊಂಡಿದೆ. ಇದರಂತೆ ವಾಟ್ಸಾಪ್‌ ಕಾಲ್‌ ಮಾಡಲು ಸ್ಮಾರ್ಟ್‌ಫೋನ್‌ ಬಳಸುವ ಬದಲು ನಿಮ್ಮ ಕಂಪ್ಯೂಟರ್‌, ಲ್ಯಾಪ್‌ಟಾಪ್‌ನ ವಿಶಾಲ ಪರದೆಯನ್ನು ಬಳಸಬಹುದಾಗಿದೆ.

ಇನ್ನು ವಾಟ್ಸಾಪ್‌ ವೆಬ್‌ನಲ್ಲಿ ಒಳಬರುವ ಕರೆ ಇದ್ದಾಗ ಹೊಸ ಪಾಪ್-ಅಪ್ ವಿಂಡೋ ಪರದೆಯ ಮೇಲೆ ಕಾಣಿಸುತ್ತದೆ. ವಾಟ್ಸಾಪ್ ವೆಬ್‌ನಿಂದಲೇ ಕರೆಯನ್ನು ಸ್ವೀಕರಿಸಲು ಅಥವಾ ನಿರಾಕರಿಸಲು ನೀವು ಆಯ್ಕೆ ಮಾಡುವ ಅವಕಾಶವನ್ನು ಸಹ ನೀಡಿದೆ ಎನ್ನಲಾಗಿದೆ. ಅಲ್ಲದೆ ನೀವು ವಾಟ್ಸಾಪ್ ವೆಬ್‌ನಲ್ಲಿ ಕರೆ ಮಾಡಿದಾಗ ಸಣ್ಣ ವಿಂಡೋ ಕರೆ ಕೊನೆಗೊಳಿಸಲು, ವೀಡಿಯೊಗೆ ಬದಲಾಯಿಸಲು, ಮೈಕ್ರೊಫೋನ್ ಆಫ್ ಮಾಡಲು ಮತ್ತು ಮೆನು ಬಟನ್ ಕ್ರಿಯೆಗಳೊಂದಿಗೆ ಪಾಪ್-ಅಪ್ ಆಗುತ್ತದೆ. ಜೊತೆಗೆ ಈ ಅಪ್‌ಡೇಟ್‌ನಲ್ಲಿ ಗ್ರೂಪ್‌ ವಾಯ್ಸ್‌ ಮತ್ತು ವೀಡಿಯೊ ಕರೆಗಳನ್ನು ಸಹ ಬೆಂಬಲಿಸಲಾಗುತ್ತದೆ ಎಂದು ವಾಟ್ಸಾಪ್‌ನ ಮೂಲಗಳು ಖಚಿತಪಡಿಸಿವೆ.

ಸದ್ಯ ವಾಟ್ಸಾಪ್‌ ವೆಬ್‌ ಆವೃತ್ತಿಯು ಸಹ ವಿಡಿಯೋ ಕರೆಯನ್ನ ಬೆಂಬಲಿಸುವುದರಿಂದ ವಿಡಿಯೋ ಕಾನ್ಫರೆನ್ಸಿಂಗ್‌ ಮತ್ತು ಮೀಟಿಂಗ್‌ ಅನ್ನು ಮಾಡುವುದಕ್ಕೆ ಅವಕಾಶ ಸಿಗಲಿದೆ. ಅಲ್ಲದೆ ವಾಟ್ಸಾಪ್‌ ಬಳಕೆದಾರರು ತಮ್ಮ ಫೋನ್‌ಗಳಿಗೆ ಬದಲಾಯಿಸದೆ ಡೆಸ್ಕ್‌ಟಾಪ್‌ನಿಂದ ತ್ವರಿತವಾಗಿ ಕರೆಗಳನ್ನು ಮಾಡಲು ವಾಟ್ಸಾಪ್ ವೆಬ್ ಸುಲಭವಾದ ಮಾರ್ಗವಾಗಿದೆ. ಇನ್ನು ಈ ಫೀಚರ್ಸ್‌ ಶೀಘ್ರದಲ್ಲಿಯೇ ಲಭ್ಯವಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.