ಐಫೋನ್‌ ಆರ್ಡರ್‌ ಮಾಡಿದವಳಿಗೆ ಬಂದಿದ್ದು ಆಪಲ್‌ ಜ್ಯೂಸ್‌..!

ವೈಬೊದ ವರದಿ ಪ್ರಕಾರ, ಚೀನಾದ ಲಿಯು ಎಂಬಾಕೆ ಐಫೋನ್ 12 ಪ್ರೊ ಮ್ಯಾಕ್ಸ್‌ ಖರೀದಿಗಾಗಿ ಭಾರೀ ಮೊತ್ತವನ್ನೇ ಪಾವತಿಸಿದ್ದಳು. ಆದರೆ, ಐಫೋನ್‌ ಬದಲಿಗೆ ಆಕೆಗೆ ಆಪಲ್‌ ಜ್ಯೂಸ್‌ ಬಂದಿರುವುದು ವಂಚನೆಯ ಪ್ರಮುಖ ಅಂಶ. ಹೊಸ ಐಫೋನ್ ಖರೀದಿಗೆ 1,500 ಡಾಲರ್‌ಗಿಂತ ಹೆಚ್ಚು ಹಣ ಖರ್ಚು ಮಾಡಿದ್ದೇನೆ ಎಂದು ಅವರು ವಿವರಿಸಿದ್ದಾರೆ.

ಆಶ್ಚರ್ಯಕರ ಸಂಗತಿಯೆಂದರೆ, ಅವರು ಆಪಲ್‌ನ ಅಧಿಕೃತ ವೆಬ್‌ಸೈಟ್‌ನಲ್ಲಿಯೇ ಫೋನ್‌ ಆರ್ಡರ್‌ ಮಾಡಿದ್ದಾರೆಯೇ ಹೊರತು ಥರ್ಡ್‌ ಪಾರ್ಟಿ ರಿಸೆಲ್ಲರ್‌ಗಳಿಂದಲ್ಲ. ಆಪಲ್‌ ಫೋನ್‌ ಬರುವಿಕೆಗಾಗಿ ಕಾಯುತ್ತಿದ್ದ ಲಿಯು ಐಫೋನ್‌ ಬದಲಿಗೆ ಆಪಲ್‌ ಜ್ಯೂಸ್‌ ನೋಡಿ ಆಘಾತಕ್ಕೊಳಗಾಗಿದ್ದಾಳೆ. ಆದರೆ, ಮಹಿಳೆ ನೇರವಾಗಿ ಹೋಮ್‌ ಡೆಲಿವರಿ ಆಯ್ಕೆ ಮಾಡದೇ ತನ್ನ ಲಾಕರ್‌ಗೆ ಪಾರ್ಸಲ್‌ ಕಳುಹಿಸುವ ಆಯ್ಕೆ ಮಾಡಿಕೊಂಡಿರುವುದು ಅನುಮಾನಕ್ಕೆ ಕಾರಣವಾಗಿದೆ.

ಆಪಲ್‌ ಕಂಪನಿ ಮತ್ತು ಆಪಲ್‌ನ ಅಧಿಕೃತ ಕೊರಿಯರ್‌ ಕಂಪನಿ ಎಕ್ಸ್‌ಪ್ರೆಸ್‌ ಮೇಲ್‌ ಐಫೋನ್‌ 12 ಪ್ರೋ ಮ್ಯಾಕ್ಸ್‌ ಅನ್ನು ಡೆಲಿವರಿ ಮಾಡಲಾಗಿದೆ ಎಂದು ಹೇಳಿದ್ದಾರೆ. ಕಳ್ಳತನ ಯಾವಾಗ ಸಂಭವಿಸಿದೆ ಎಂಬುದು ಯಾರಿಗೂ ತಿಳಿದಿಲ್ಲವಾದರೂ, ಸ್ಥಳೀಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರೆದಿದ್ದಾರೆ.

ಇನ್ನು, ಆಪಲ್‌ ಮತ್ತು ಕೊರಿಯರ್‌ ಕಂಪನಿಯು ಕೂಡ ತನಿಖೆಯನ್ನು ಮುಂದುವರೆಸಿವೆ. ಈ ಬಗ್ಗೆ ಸಿಬ್ಬಂದಿಯನ್ನು ನೇಮಿಸಿದ್ದು, ಐಫೋನ್ 12 ಪ್ರೊ ಮ್ಯಾಕ್ಸ್ ಪ್ರಕರಣವನ್ನು ಶೀಘ್ರದಲ್ಲೇ ಪರಿಹರಿಸಲಾಗುವುದು ಎಂದು ಕಂಪನಿ ಹೇಳಿದೆ. ಈ ಮೂಲಕ ವಂಚನೆ ಪ್ರಕರಣಕ್ಕೆ ತನಿಖೆಯ ಲೇಪನ ಬಳಿದಿದೆ.