ವಾಟ್ಸ್‌ಆಪ್ ಎರರ್ ಒಪ್ಪಿಕೊಂಡ ಶಿಯೋಮಿ, ಇಲ್ಲಿದೆ ಪರಿಹಾರ..!

ಕೆಲ ದಿನಗಳ ಹಿಂದೆ ವಾಟ್ಸಾಪ್ ಅನ್ನು ಒಬ್ಸೊಲೀಟ್ ಎರರ್ ಎಂಬ ಹೊಸತೊಂದು ಸಮಸ್ಯೆ ಕಾಡಿತ್ತು.ಈ ಎರರ್ ಹಲವು ಬಳಕೆದಾರರಿಗೆ ವಾಟ್ಸಾಪ್ ಸೇವೆಯನ್ನು ಬಳಸಬೇಕಾದರೆ ವಾಟ್ಸಾಪ್ ಅನ್ನು ನೂತನ ಆವೃತ್ತಿಗೆ ಅಪ್ಡೇಟ್ ಮಾಡುವಂತೆ ತಿಳಿಸುತ್ತಿತ್ತಾದರೂ , ಅದು ನೀಡುವ ಲಿಂಕ್ ಬಳಸಿ ಗೂಗಲ್ ಪ್ಲೇ ಸ್ಟೋರ್ ಗೆ ಹೋದರೆ ಅಲ್ಲಿ ಯಾವುದೇ ಅಪ್ಡೇಟ್ ಲಭ್ಯವಿರಲಿಲ್ಲ. ಈ ತೊಂದರೆ ಶಿಯೋಮಿ ಬಳಕೆದಾರರನ್ನು ಮಾತ್ರ ಕಾಡುತ್ತಿತ್ತು ಎಂಬ ವರದಿಗಳು ಆಗ ಕೇಳಿಬಂದಿತ್ತು. ಶಿಯೋಮಿ ಸಂಸ್ಥೆಯು ಈಗ ಈ ವಿಷಯವನ್ನು ನಿಜವೆಂದು ಒಪ್ಪಿಕೊಂಡಿದೆ.

ಶಿಯೋಮಿ ಸಂಸ್ಥೆಯು ತಾನು ಆಕಸ್ಮಿಕವಾಗಿ ವಾಟ್ಸಾಪ್ ನ ಬೀಟಾ ಆವೃತ್ತಿಯೊಂದನ್ನು ತನ್ನ ಆಪ್ ಸ್ಟೋರ್ನಲ್ಲಿ ಹಾಕಿದ್ದಾಗಿ ತಿಳಿಸಿದ್ದು, ಹಲವು ಬಳಕೆದಾರರು ಈ ಆವೃತ್ತಿಯನ್ನು ತಮ್ಮ ಮೊಬೈಲ್ ಗೆ ಡೌನ್ಲೋಡ್ ಮಾಡಿದ್ದರು ಎಂದು ಹೇಳಿದೆ. ಈಗ ಈ ತೊಂದರೆಯನ್ನು ಪರಿಹರಿಸಲು ತಮ್ಮ ಮೊಬೈಲ್ನಲ್ಲಿ ಮತ್ತೆ ಆಪ್ ಅನ್ನು ಅಪ್ಡೇಟ್ ಮಾಡುವಂತೆ ಕೇಳಿಕೊಂಡಿದೆ. ಹೀಗಾಗಿ ಈ ತೊಂದರೆಗೆ ಶಿಯೋಮಿಯ ಆಪ್ ಸ್ಟೋರ್ ಹೊಣೆಯಾಗಿದ್ದು, ಶಿಯೋಮಿಯ ಕೆಲವು ಇಂಜಿನಿಯರ್ಗಳು ಆಪ್ ಸ್ಟೋರ್ನಲ್ಲಿ ವಾಟ್ಸಾಪ್ ನ APK ಫೈಲ್ ನ ಬೀಟಾ ಆವೃತ್ತಿಯನ್ನು ಅಪ್ಲೋಡ್ ಮಾಡಿದ್ದೇ ಇಷ್ಟೆಲ್ಲಾ ತೊಂದರೆಗಳಿಗೆ ಕಾರಣವಾಗಿದೆ.

ಮಿ ಆಪ್ ಸ್ಟೋರ್ ನ ಆಟೋ ಅಪ್ಡೇಟ್ ಫೀಚರ್ ಹೊಣೆ

ಶಿಯೋಮಿಯ ಆಪ್ ಸ್ಟೋರ್ನಲ್ಲಿ ಆಟೋ ಅಪ್ಡೇಟ್ ಫೀಚರ್ ಇದ್ದು ಈ ಆಯ್ಕೆ ಪೂರ್ವನಿಯೋಜಿತವಾಗಿ ಸಕ್ರಿಯವಾಗಿರುತ್ತದೆ. ಈ ಆಯ್ಕೆ ಸಕ್ರಿಯವಾಗಿದ್ದ ಬಳಕೆದಾರರಲ್ಲಿ ಈ ಒಬ್ಸೊಲೀಟ್ ಎರರ್ ತೊಂದರೆ ತೋರಿಬಂದಿದ್ದು ಈ ಗೊಂದಲಕ್ಕೆ ಕಾರಣವಾಗಿದೆ. ಈಗ ಶಿಯೋಮಿ ಸಂಸ್ಥೆಯು ಈ ತೊಂದರೆಯನ್ನು ಪರಿಹರಿಸಿದ್ದು, ವಾಟ್ಸಾಪ್ ನ ಹೊಸ ಆವೃತ್ತಿಯನ್ನು ಮಿ ಆಪ್ ಸ್ಟೋರ್ ನಲ್ಲಿ ಅಪ್ಡೇಟ್ ಮಾಡಿದೆ. ಈ ಅಪ್ಡೇಟ್ ಈ ಎಲ್ಲಾ ತೊಂದರೆಗಳನ್ನು ಪರಿಹರಿಸಲು ಶಕ್ತವಾಗಿದೆ ಎಂದು ಶಿಯೋಮಿ ಹೇಳಿದೆ.

ವಾಟ್ಸಾಪ್ ಒಬ್ಸೊಲೀಟ್ ಎರರ್ ಪರಿಹಾರ

ಹಲವು ಬಳಕೆದಾರರು ಜನವರಿ 13 ರಂದು ಈ ಒಬ್ಸೊಲೀಟ್ ಎರರ್ ತೊಂದರೆ ಎದುರಿಸಿದ್ದರು. ಬಳೆಕೆದಾರರು ಈ ತೊಂದರೆಗೆ ವಾಟ್ಸಾಪ್ ಅನ್ನು ಅನ್-ಇನ್ಸ್ಟಾಲ್ ಮಾಡಿ ಗೂಗಲ್ ಪ್ಲೇ ನಿಂದ ರಿ-ಇನ್ಸ್ಟಾಲ್ ಮಾಡುವುದು, ಮೊಬೈಲ್ ನ ತಾರೀಕು ಬದಲಿಸುವುದು ಮೊದಲಾದ ಹಲವು ಪರಿಹಾರಗಳನ್ನು ತಾವಾಗೇ ಕಂಡುಕೊಂಡಿದ್ದಾರೆ. ಕೆಲವು ಬಳಕೆದಾರರು ಎದುರಿಸಿದ ವಾಟ್ಸಾಪ್ ಒಬ್ಸೊಲೀಟ್ ಎರರ್ ಗೆ ಪರಿಹಾರವನ್ನು ನಾವೂ ಕೂಡ ಸೂಚಿಸಿದ್ದೇವೆ.

ಈ ವಿಷಯದ ಕುರಿತಾಗಿ ಶಿಯೋಮಿ ಯು ಹೇಳಿಕೆಯನ್ನು ನೀಡಿದ್ದು, "ಕೆಲವು ಶಿಯೋಮಿ ಬಳಕೆದಾರರು ತಮ್ಮ ಫೋನ್ಗಳಲ್ಲಿ ವಾಟ್ಸಾಪ್ ಸಂಬಂಧಿ ತೊಂದರೆಯನ್ನು ಅನುಭವಿಸಿದ್ದಾರೆ. ಈ ಸಮಸ್ಯೆಯನ್ನು ಕೂಲಂಕುಶವಾಗಿ ಪರೀಕ್ಷಿಸಿದ ನಂತರ ಕೆಲ ದಿನಗಳ ಹಿಂದೆ ಆಕಸ್ಮಿಕವಾಗಿ ವಾಟ್ಸಾಪ್ ನ ಬೀಟಾ ಆವೃತ್ತಿಯೊಂದು ಮಿ ಆಪ್ ಸ್ಟೋರ್ ಗೆ ದೂಡಲ್ಪಟ್ಟು ಹಲವು ಬಳಕೆದಾರರು ಇದನ್ನು ಅಪ್ಡೇಟ್ ಮಾಡಿದ್ದೇ ಈ ಗೊಂದಲಕ್ಕೆ ಕಾರಣವಾಯಿತು ಎಂದು ತಿಳಿದುಬಂದಿದೆ. ನಾವೀಗ ವಾಟ್ಸಾಪ್ ಸಂಸ್ಥೆಯಿಂದ ಸ್ವೀಕೃತವಾಗಿರುವ ವಾಟ್ಸಾಪ್ ನ ಹೊಸ ಆವೃತ್ತಿಯೊಂದನ್ನು ಮಿ ಸ್ಟೋರ್ ನಲ್ಲಿ ಅಪ್ಡೇಟ್ ಮಾಡಿದ್ದೇವೆ.

ಈ ತೊಂದರೆಯನ್ನೆದುರಿಸಿದ ನಮ್ಮ ಬಳಕೆದಾರರಿಗೆ ತಮ್ಮ ಮೊಬೈಲ್ನಲ್ಲಿ ಈ ಹೊಸ ಆವೃತ್ತಿಯನ್ನು ಬಳಸಿ ವಾಟ್ಸಾಪ್ ಅನ್ನು ಅಪ್ಡೇಟ್ ಮಾಡುವಂತೆ ನಾವು ವಿನಂತಿಸುತ್ತೇವೆ. ನಮ್ಮ ಮಿ ಅಭಿಮಾನಿಗಳು ಎದುರಿಸಿದ ತೊಂದರೆಗೆ ನಾವು ಈ ಮೂಲಕ ಕ್ಷಮೆಯಾಚಿಸುತ್ತೇವೆ. ಅಲ್ಲದೆ ಭವಿಷ್ಯದಲ್ಲಿ ಇಂತಹ ಅಚಾತುರ್ಯಗಳು ನಡೆಯದಂತೆ ಜಾಗರೂಕತೆ ವಹಿಸುತ್ತೇವೆ" ಎಂದು ತಮ್ಮ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.