ಜನಪ್ರಿಯ ಶಿಯೋಮಿ ಮಿ ಬ್ಯಾಂಡ್‌ 6 ಬಿಡುಗಡೆ! ವಿಶೇಷತೆ ಏನು?

ಹೌದು, ಶಿಯೋಮಿ ತನ್ನ ಹೊಸ ಮಿ ಬ್ಯಾಂಡ್‌ 6 ಅನ್ನು ಲಾಂಚ್‌ ಮಾಡಿದೆ. ಇದು AMOLED ಡಿಸ್‌ಪ್ಲೇ , 15ಕ್ಕೂ ಹೆಚ್ಚುವರಿ ವರ್ಕೌಟ್‌ ಮೋಡ್‌ಗಳು, ಹೊಸ ಕಾರ್ಟೂನ್-ವಿಷಯವನ್ನು ಹೊಂದಿರುವ ವಾಚ್‌ ಫೇಸ್‌ಗಳನ್ನು ಹೊಂದಿದೆ. ಇದಲ್ಲದೆ ಹಲವು ಹೊಸ ಮಾದರಿಯ ಅಪ್ಡೇಟ್‌ಗಳನ್ನು ಪಡೆದುಕೊಂಡಿದೆ. ಇನ್ನುಳಿದಂತೆ ಈ ಹೊಸ ಫಿಟ್‌ನೆಸ್‌ ಬ್ಯಾಂಡ್‌ನ ವಿಶೇಷತೆ ಏನು ಅನ್ನೊದನ್ನ ಈ ಲೇಖನದಲ್ಲಿ ತಿಳಿಸಿಕೊಡ್ತೀವಿ ಓದಿರಿ.

ಶಿಯೋಮಿ ಸಂಸ್ಥೆಯ ಹೊಸ ಮಿ ಬ್ಯಾಂಡ್ 6 ಈಗ ಸ್ವಲ್ಪ ದೊಡ್ಡದಾದ AMOLED ಡಿಸ್‌ಪ್ಲೇಯನ್ನು ಹೊಂದಿದೆ. ಇದು ಮಿ ಬ್ಯಾಂಡ್ 5 ನಲ್ಲಿ ಕಂಡುಬರುವ 1.1-ಇಂಚಿನ AMOLED ಡಿಸ್‌ಪ್ಲೇ ಬದಲು 1.56-ಇಂಚಿನ ಫುಲ್‌-ಟಚ್‌ AMOLED ಸ್ಕ್ರೀನ್‌ ಅನ್ನು ಹೊಂದಿದೆ. ಇನ್ನು ಈ ಡಿಸ್‌ಪ್ಲೇ 326ppi ಪಿಕ್ಸೆಲ್ ಸಾಂದ್ರತೆಯನ್ನು ಹೊಂದಿದೆ. ಅಲ್ಲದೆ ಈ ಬ್ಯಾಂಡ್ 30 ಕ್ಕೂ ಹೆಚ್ಚು ವರ್ಕೌಟ್‌ ಮೋಡ್‌ಗಳನ್ನು ನೀಡುತ್ತದೆ.

ಇದಲ್ಲದೆ ಇನ್‌ಡೋರ್‌ ರನ್ನಿಂಗ್‌, ವಾಕಿಂಗ್, ಟ್ರೆಡ್‌ಮಿಲ್ ಚಾಲನೆಯಲ್ಲಿರುವ 6 ಸ್ವಯಂ-ಪತ್ತೆ ಫಿಟ್‌ನೆಸ್ ಟ್ರ್ಯಾಕಿಂಗ್ ಮೋಡ್‌ಗಳನ್ನು ನೀಡುತ್ತದೆ. ಇನ್ನು ಈ ಬ್ಯಾಂಡ್ 50 ಮೀ ನೀರಿನ ಪ್ರತಿರೋಧವನ್ನು ಹೊಂದಿದೆ. ಅಲ್ಲದೆ ರಕ್ತದ ಆಮ್ಲಜನಕದ ಮಟ್ಟವನ್ನು ಪತ್ತೆಹಚ್ಚಲು 24 × 7 ರಿಯಲ್‌-ಟೈಂ ಹೃದಯ ಬಡಿತ ಮಾನಿಟರ್ ಮತ್ತು SpO2 ಸೆನ್ಸಾರ್‌ ಅನ್ನು ಒಳಗೊಂಡಿದೆ. ಜೊತೆಗೆ 130+ ವಾಚ್‌ ಫೇಸ್‌ಗಳಿಗಿಂತ ಮಿ ಬ್ಯಾಂಡ್ 6 ಕ್ರೀಡೆಗಳು ಮತ್ತು ಮೂರು ಸ್ಪಾಂಗೆಬಾಬ್-ಥೀಮ್ಡ್‌ ವಾಚ್‌ಫೇಸ್‌ಗಳನ್ನು ಒಳಗೊಂಡಿದೆ. ಇನ್ನು ಬ್ಯಾಕಪ್ ವಿಷಯದಲ್ಲಿ, ಹೊಸ ಮಿ ಬ್ಯಾಂಡ್ 6 ಸಿಂಗಲ್‌ ಚಾರ್ಜ್‌ನಲ್ಲಿ 14 ದಿನಗಳ ಬ್ಯಾಟರಿ ಅವಧಿಯನ್ನು ತಲುಪಿಸಲು ಸಾಧ್ಯವಾಗುತ್ತದೆ ಎಂದು ಶಿಯೋಮಿ ಹೇಳಿಕೊಂಡಿದೆ.

ಇನ್ನು ಈ ಹೊಸ ಶಿಯೋಮಿ ಮಿ ಬ್ಯಾಂಡ್ 6 ಯುವಾನ್ 229 (ಸುಮಾರು 2,600 ರೂ) ಬೆಲೆಯನ್ನು ಹೊಂದಿದೆ. ಇದಲ್ಲದೆ ಶಿಯೋಮಿ ಎನ್‌ಎಫ್‌ಸಿ ಚಿಪ್‌ನೊಂದಿಗೆ ವಿಶೇಷ ಆವೃತ್ತಿಯನ್ನು ಪರಿಚಯಿಸಿದೆ, ಇದರ ಬೆಲೆ ಯುವಾನ್ 279 (ಸರಿಸುಮಾರು 3,100 ರೂ.) ಆಗಿದೆ. ಸದ್ಯ ಶಿಯೋಮಿ ಈ ಬ್ಯಾಂಡ್‌ನ ಮಾರಾಟದ ಸಮಯವನ್ನು ಹಂಚಿಕೊಂಡಿಲ್ಲ. ಆದರೆ ಈ ಹೊಸ ಫಿಟ್‌ನೆಸ್ ಬ್ಯಾಂಡ್‌ ಬಿಳಿ, ಕಂದು, ಕಪ್ಪು, ನೀಲಿ, ಕಿತ್ತಳೆ, ಹಳದಿ, ಹಸಿರು ಮತ್ತು ಬೆಳ್ಳಿ ಬಣ್ಣ ಎಂಬ ಎಂಟು ಬಣ್ಣ ಆಯ್ಕೆಗಳಲ್ಲಿ ಬರಲಿದೆ.