ಜಾಗತಿಕ ಸ್ಮಾರ್ಟ್‌ವಾಚ್ ಮಾರುಕಟ್ಟೆ: ಆಪಲ್ ಹಿಂದಿಕ್ಕಿದ ಶಿಯೋಮಿಗೆ ಅಗ್ರಸ್ಥಾನ!

2025 ರ ಮೊದಲ ತ್ರೈಮಾಸಿಕದಲ್ಲಿ ಶಿಯೋಮಿ ಸಂಸ್ಥೆಯು ಧರಿಸಬಹುದಾದ ಜಾಗತಿಕ ಬ್ಯಾಂಡ್ ಮಾರುಕಟ್ಟೆಯಲ್ಲಿ ಅಗ್ರಸ್ಥಾನ ಪಡೆದಿದೆ. ಮಿ ಬ್ಯಾಂಡ್ ಮತ್ತು ರೆಡ್ಮಿ ವಾಚ್‌ನಂತಹ ಹೊಸ ಮಾದರಿಗಳ ಬಿಡುಗಡೆಯು ಶಿಯೋಮಿಯ ಈ ಯಶಸ್ಸಿಗೆ ಕಾರಣವಾಗಿದ್ದು, ಬೀಜಿಂಗ್ ಮೂಲದ ಈ ತಂತ್ರಜ್ಞಾನ ಸಂಸ್ಥೆಯು ಆಪಲ್ ಅನ್ನು ಹಿಂದಿಕ್ಕಿ ಮತ್ತೆ ನಂಬರ್ ಒನ್ ಸ್ಥಾನವನ್ನು ಪಡೆದುಕೊಂಡಿದೆ ಎಂದು ಇತ್ತೀಚಿನ ಕ್ಯಾನಲಿಸ್ ವರದಿಯು ತಿಳಿಸಿದೆ. ಇದರೊಂದಿಗೆ, ಹುವಾವೇ, ಸ್ಯಾಮ್‌ಸಂಗ್ ಮತ್ತು ಗಾರ್ಮಿನ್ ಕ್ರಮವಾಗಿ ಮೂರನೇ, ನಾಲ್ಕನೇ ಮತ್ತು ಐದನೇ ಸ್ಥಾನಗಳನ್ನು ಪಡೆದುಕೊಂಡಿವೆ.

2025ರ ಮೊದಲ ತ್ರೈಮಾಸಿಕದಲ್ಲಿ ಜಾಗತಿಕ ಧರಿಸಬಹುದಾದ ಬ್ಯಾಂಡ್ ಸಾಗಣೆಗಳು 46.6 ಮಿಲಿಯನ್‌ಗೆ ಏರಿದೆ ಎಂದು ಕ್ಯಾನಲಿಸ್‌ನ ವಿಶ್ಲೇಷಣಾ ವರದಿಯು ಹೇಳಿದೆ. ಇದು ವರ್ಷದಿಂದ ವರ್ಷಕ್ಕೆ (YoY) 13% ರಷ್ಟು ಬೆಳವಣಿಗೆಯನ್ನು ತೋರಿಸುತ್ತದೆ. ಈ ಬೆಳವಣಿಗೆಯಲ್ಲಿ ಮೂಲಭೂತ ಧರಿಸಬಹುದಾದ ಸಾಧನಗಳು ಪ್ರಮುಖ ಪಾತ್ರ ವಹಿಸಿವೆ. ಸ್ಮಾರ್ಟ್‌ವಾಚ್‌ಗಳನ್ನು ಖರೀದಿಸುವಾಗ ಗ್ರಾಹಕರು ಕೈಗೆಟುಕುವಿಕೆ, ದೀರ್ಘ ಬ್ಯಾಟರಿ ಬಾಳಿಕೆ ಮತ್ತು ಆರೋಗ್ಯ ಟ್ರ್ಯಾಕಿಂಗ್‌ಗೆ ಬೆಂಬಲವನ್ನು ಪ್ರಮುಖ ವೈಶಿಷ್ಟ್ಯಗಳಾಗಿ ನೋಡುತ್ತಾರೆ ಎಂದು ಈ ಇತ್ತೀಚಿನ ಅಧ್ಯಯನವು ಬಹಿರಂಗಪಡಿಸಿದೆ.

ಮೊದಲ ತ್ರೈಮಾಸಿಕದಲ್ಲಿ ಶಿಯೋಮಿಯ ಧರಿಸಬಹುದಾದ ಸಾಗಣೆಗಳು ವಾರ್ಷಿಕವಾಗಿ 44% ರಷ್ಟು ಹೆಚ್ಚಾಗಿದ್ದು, ಮೊದಲ ಸ್ಥಾನವನ್ನು ಪಡೆದುಕೊಂಡಿದೆ. ಶಿಯೋಮಿ ಈ ಮೊದಲ ತ್ರೈಮಾಸಿಕದಲ್ಲಿ ಶಿಯೋಮಿ ಸ್ಮಾರ್ಟ್ ಬ್ಯಾಂಡ್ 9 ಮತ್ತು ರೆಡ್ಮಿ ಬ್ಯಾಂಡ್ 5 ನಂತಹ ಎರಡು ಹೊಸ ಮಾದರಿಗಳನ್ನು ಬಿಡುಗಡೆ ಮಾಡಿತು. ರೆಡ್ಮಿ ಬ್ಯಾಂಡ್ 5 ಕಂಪನಿಯ ಹೆಚ್ಚು ಮಾರಾಟವಾದ ಧರಿಸಬಹುದಾದ ಸಾಧನವಾಗಿ ಹೊರಹೊಮ್ಮಿದೆ ಎಂದು ವರದಿಯು ಹೇಳಿದೆ. ಇತ್ತ ಆಪಲ್ ಸಾಗಣೆಯಲ್ಲಿ ಕೇವಲ 5% ಬೆಳವಣಿಗೆಯೊಂದಿಗೆ, 7.6 ಮಿಲಿಯನ್ ಯೂನಿಟ್‌ಗಳೊಂದಿಗೆ ಎರಡನೇ ಸ್ಥಾನವನ್ನು ಪಡೆದುಕೊಂಡಿದೆ.

ಹುವಾವೇ ಮೂರನೇ ಸ್ಥಾನವನ್ನು ಉಳಿಸಿಕೊಂಡಿದ್ದು, ಸಾಗಣೆಯು 36% ರಷ್ಟು ಹೆಚ್ಚಾಗಿ 7.1 ಮಿಲಿಯನ್ ಯುನಿಟ್‌ಗಳಿಗೆ ತಲುಪಿವೆ, ಇದಕ್ಕೆ ಫಿಟ್ ಮತ್ತು ಜಿಟಿ ಧರಿಸಬಹುದಾದ ಸಾಧನಗಳ ಉತ್ತಮ ಕಾರ್ಯಕ್ಷಮತೆ ಕಾರಣವಾಗಿದೆ.ಸ್ಯಾಮ್‌ಸಂಗ್ ಕೂಡ ಗಮನಾರ್ಹ ಬೆಳವಣಿಗೆಯನ್ನು ಸಾಧಿಸಿದ್ದು, ಈ ತ್ರೈಮಾಸಿಕದಲ್ಲಿ 74% ರಷ್ಟು ಭಾರಿ ಬೆಳವಣಿಗೆಯೊಂದಿಗೆ ಅದರ ಸಾಗಣೆಗಳು 4.9 ಮಿಲಿಯನ್ ಯುನಿಟ್‌ಗಳಿಗೆ ಏರಿವೆ. ಕಂಪನಿಯು ಉದಯೋನ್ಮುಖ ಮತ್ತು ಶ್ರೀಮಂತ ಮಾರುಕಟ್ಟೆಗಳಲ್ಲಿ ಕ್ರಮವಾಗಿ ಗ್ಯಾಲಕ್ಸಿ ಫಿಟ್ ಮತ್ತು ಗ್ಯಾಲಕ್ಸಿ ವಾಚ್ ನಂತಹ ಸಾಧನಗಳ ಮೇಲೆ ಗಮನಹರಿಸಿದೆ.

ಐದನೇ ಸ್ಥಾನದಲ್ಲಿರುವ ಗಾರ್ಮಿನ್ ತನ್ನ ಅಸ್ತಿತ್ವದಲ್ಲಿರುವ ಬಳಕೆದಾರರಿಗೆ ವೈವಿಧ್ಯಮಯ ಉತ್ಪನ್ನ ಪೋರ್ಟ್‌ಫೋಲಿಯೊದಲ್ಲಿ ಹೊಸ ಮಾದರಿಗಳಿಗೆ ಅಪ್‌ಗ್ರೇಡ್ ಮಾಡಲು ಪ್ರೋತ್ಸಾಹಿಸಿದೆ. ಇದರ ಸಾಗಣೆಗಳು 10% ರಷ್ಟು ಹೆಚ್ಚಾಗಿ 1.8 ಮಿಲಿಯನ್ ಯುನಿಟ್‌ಗಳಿಗೆ ತಲುಪಿದ್ದು, ಜಾಗತಿಕ ಸಾಗಣೆ ಮಾರುಕಟ್ಟೆ ಪಾಲಿನಲ್ಲಿ ಐದನೇ ಸ್ಥಾನದಲ್ಲಿದೆ. ಇನ್ನು ಈ ಡೇಟಾವನ್ನು ಮೂಲ ಬ್ಯಾಂಡ್‌ಗಳು, ಮೂಲ ಕೈಗಡಿಯಾರಗಳು ಮತ್ತು ಸ್ಮಾರ್ಟ್‌ವಾಚ್‌ಗಳು ಮೂರು ವಿಭಾಗಗಳ ಆಧಾರದ ಮೇಲೆ ಲೆಕ್ಕಹಾಕಲಾಗಿದೆ. ಹಾಗೂ ಆಪಲ್ 2024 ರ ದ್ವಿತೀಯಾರ್ಧದ ವೇಳೆಗೆ ತನ್ನ ಸ್ಥಾನವನ್ನು ಮರಳಿ ಪಡೆಯುವ ನಿರೀಕ್ಷೆಯಿದೆ.

ಕ್ಯಾನಲಿಸ್‌ನ ಸಂಶೋಧನಾ ವ್ಯವಸ್ಥಾಪಕಿ ಸಿಂಥಿಯಾ ಚೆನ್ ಅವರು ಹೇಳುವಂತೆ, "ಹಾರ್ಡ್‌ವೇರ್ ಲಾಭದಾಯಕತೆಯು ಒತ್ತಡದಲ್ಲಿರುವುದರಿಂದ, ಧರಿಸಬಹುದಾದ ವಸ್ತುಗಳ ಮಾರುಕಟ್ಟೆಯು ಹಾರ್ಡ್‌ವೇರ್-ನೇತೃತ್ವದಿಂದ ಪರಿಸರ ವ್ಯವಸ್ಥೆ-ಚಾಲಿತಕ್ಕೆ ಬದಲಾಗುತ್ತಿದೆ." ಮರುಕಳಿಸುವ ಆದಾಯ ಮತ್ತು ಬಳಕೆದಾರರ ಧಾರಣವನ್ನು ಹೆಚ್ಚಿಸಲು ಮಾರಾಟಗಾರರು ವೇದಿಕೆ ಮತ್ತು ಸೇವಾ ಅಭಿವೃದ್ಧಿಯನ್ನು ವೇಗಗೊಳಿಸುತ್ತಿದ್ದಾರೆ ಎಂದು ಅವರು ತಿಳಿಸಿದ್ದಾರೆ. ಈ ಪ್ರವೃತ್ತಿಯು ಧರಿಸಬಹುದಾದ ತಂತ್ರಜ್ಞಾನದ ಭವಿಷ್ಯದ ದಿಕ್ಕನ್ನು ಸೂಚಿಸುತ್ತದೆ. ಈ ಕುರಿತಂತೆ ನಿಮ್ಮ ಅಭಿಪ್ರಾಯ ಏನು ಎಂಬುದನ್ನು ಕಾಮೆಂಟ್ ಮಾಡಿ ತಿಳಿಸಿ.