ಬೆಂಗಳೂರಲ್ಲಿ ರೂ.20ಕ್ಕೆ 1 GB ಡೇಟಾ: 4G ವೇಗಕ್ಕಿಂತ ಜಾಸ್ತಿ, ಸಿಮ್‌ಕಾರ್ಡ್ ಬೇಕಿಲ್ಲ, ಮತ್ತೇ ಹೇಗೆ..?

'Wi-Fi ಡಬ್ಬ' ಡೇಟಾ ಆಫರ್ ಗಳು:

ವಿಶ್ವದಲ್ಲೇ ಮೊದಲ ಪ್ರಯತ್ನ ಎನ್ನಲಾಗಿರುವ 'Wi-Fi ಡಬ್ಬ' ರೂ. 2 ಕ್ಕೆ 100MB ಡೇಟಾವನ್ನು ನೀಡುತ್ತಿದ್ದು, ಇದೇ ಮಾದರಿಯಲ್ಲಿ ರೂ.10 ಕ್ಕೆ 500MB ಮತ್ತು ರೂ.20 ಕ್ಕೆ 1GB ಡೇಟಾವನ್ನುಮಾರಾಟ ಮಾಡುತ್ತಿದೆ. ಇದುವೇ 4G ಸ್ಪೀಡ್‌ಗಿಂತಲೂ ಅಧಿಕ ವೇಗದಲ್ಲಿ ಎನ್ನಲಾಗಿದೆ. ಈ ಮೂಲಕ ಹೊಸ ಸಾಧ್ಯತೆಯನ್ನು ಜಗತ್ತಿಗೆ ತೋರಿಸುವ ಪ್ರಯತ್ನಕ್ಕೆ ಕೈ ಹಾಕಿದೆ.

ಜಿಯೋ ಗಿಂತಲೂ ಕಡಿಮೆ ಬೆಲೆಗೆ ಸೇವೆ:

'Wi-Fi ಡಬ್ಬ' ದೇಶದ ಟೆಲಿಕಾಂ ಕ್ರಾಂತಿಗೆ ಕಾರಣವಾದ ಜಿಯೋಗಿಂತಲೂ ಅತೀ ಕಡಿಮೆ ಬೆಲೆಗೆ ಡೇಟಾ ಸೇವೆಯನ್ನು ದೊರೆಯುವಂತೆ ಮಾಡಿದೆ. ಜಿಯೋ 1GB ಗೆ ರೂ.51 ನಿಗಧಿ ಮಾಡಿದೆ. ಇದಕ್ಕಿಂತ ರೂ.31 ಕಡಿಮೆಗೆ 'Wi-Fi ಡಬ್ಬ' 1GB ಡೇಟಾವನ್ನು ರೂ.20ಕ್ಕೆ ಗ್ರಾಹಕರ ಬಳಕೆಗೆ ನೀಡುತ್ತಿದೆ .

'Wi-Fi ಡಬ್ಬ' ಸೇವೆ ಪಡೆಯುವುದು ಹೇಗೆ:

ಟೆಲಿಕಾಂ ಕಂಪನಿಗಳ ಮಾದರಿಯನ್ನು ಅನುಸರಿಸಲು ಮುಂದಾಗಿರುವ 'Wi-Fi ಡಬ್ಬ' ಕಿರಾಣಿ ಅಂಗಡಿಗಳಲ್ಲಿ ತನ್ನ ಡೇಟಾ ರಿಚಾರ್ಜ್ ಕೂಪನ್ ಗಳನ್ನು ಮಾರಾಟ ಮಾಡುತ್ತಿದೆ. ಇದು ಪ್ರೀ ಪೇಯ್ಡ್ ಟೋಕನ್ ಗಳಾಗಿದ್ದು, ಇದರ ಮೂಲಕ ರೀಚಾರ್ಜ್ ಮಾಡಿಕೊಳ್ಳಬಹುದಾಗಿದೆ.

ಯಾವುದೇ ಆಪ್ ಬೇಕಾಗಿಲ್ಲ:

'Wi-Fi ಡಬ್ಬ' ಸೇವೆಯನ್ನು ಪಡೆಯುವ ಸಲುವಾಗಿ ನೀವು ಯಾವುದೇ ಆಪ್‌ ಇನ್‌ಸ್ಟಾಲ್ ಮಾಡಿಕೊಳ್ಳುವ ಅಗತ್ಯತೆ ಇಲ್ಲ, ನಿಮ್ಮ ವೈಯಕ್ತಿಕ ಮಾಹಿತಿಯನ್ನು ಹಂಚಿಕೊಳ್ಳ ಬೇಕಾಗಿಲ್ಲ. ಇದಕ್ಕಾಗಿ ನೀವು www.wifidabba.comಗೆ ಭೇಟಿ ನೀಡಿ ನಿಮ್ಮ ಮೊಬೈಲ್ ನಂಬರ್ ನೊಂದಿಗೆ ಕೂಪನ್ ಕೀಯನ್ನು ಹಾಕಿದರೆ ಸಾಕು ನಂಬರ್ ಗೆ OTP ಬರಲಿದೆ. ಅದು ವರಿಫಿಕೇಷನ್ ಆದ ಮೇಲೆ ನೀವು ಸೇವೆಯನ್ನು ಪಡೆಯಬಹುದಾಗಿದೆ.

50 Mbps ವೇಗದ ಇಂಟರ್‌ನೆಟ್:

ಈಗಾಗಲೇ ಹೇಳಿದಂತೆ 4G ವೇಗಕ್ಕಿಂತ ಹೆಚ್ಚಿನ ವೇಗದ ಇಂಟರ್‌ನೆಟ್ ಬಳಕೆದಾರರಿಗೆ ದೊರೆಯಲಿದೆ. 50 Mbps ವೇಗದ ಇಂಟರ್‌ನೆಟ್ ಸೇವೆಯನ್ನು ನೀಡುವುದಾಗಿ 'Wi-Fi ಡಬ್ಬ' ತಿಳಿಸಿದೆ. ಇದಕ್ಕಾಗಿ ನಗರದಲ್ಲಿ 350 ರೌಟರ್ ಗಳನ್ನು ಅಳವಡಿಸಿದೆ ಎನ್ನಲಾಗಿದ್ದು, ಈಗಾಗಲೇ 1800 ಮಂದಿ ಈ ಸೇವೆಯನ್ನು ಬಳಕೆ ಮಾಡಿಕೊಳ್ಳುತ್ತಿದ್ದಾರೆ.