ಬ್ರೇಕಿಂಗ್..ಇನ್ಮುಂದೆ ಮೊಬೈಲ್ ಕದ್ದರೆ ಕ್ಷಣಾರ್ಧದಲ್ಲಿ ಸಿಕ್ಕಿಬೀಳ್ತಾರೆ ಕಳ್ಳರು!

ಹೊಸ ದತ್ತಾಂಶ ತಯಾರಾಗಲಿದೆ

ಮೊಬೈಲ್‌ನಲ್ಲಿರುನ 15 ಅಂಕಿಗಳ ವಿಶಿಷ್ಟ ಸಂಖ್ಯೆ IMEI ಗುರುತು ಸಂಖ್ಯೆ ಬಗ್ಗೆ ನಿಮಗೆ ತಿಳಿದಿರಬಹುದು. ಇದರಿಂದ ಯಾವುದೇ ಮೊಬೈಲ್‌ನ ಸಂಪೂರ್ಣ ಮಾಹಿತಿಯನ್ನು ಪಡೆಯಬಹುದು. ಹಾಗಾಗಿ, ಸರ್ಕಾರ ಇದರ ಹೊಸ ದತ್ತಾಂಶ ತಯಾರಿಸಲು ಮುಂದಾಗಿದೆ. ಇದರಿಂದ ಮೊಬೈಲ್ ಕಳೆದುಕೊಂಡವರು ನೇರವಾಗಿ ಟೆಲಿಕಾಂ ಇಲಾಖೆಗೆ ಈ ಬಗ್ಗೆ ಮಾಹಿತಿ ನೀಡಬಹುದಾಗಿದೆ.

ಇದರಿಂದ ಆಗುವ ಲಾಭ ಏನು?

ಮೊಬೈಲ್ ಕಳ್ಳತನವಾದ ಅಥವಾ ಕಳೆದುಕೊಂಡವರು ಸ್ಥಳೀಯ ಪೊಲೀಸರಿಗೆ ದೂರು ನೀಡಬೇಕು. ನಂತರ ಸಹಾಯವಾಣಿ ಬಳಸಿ ಟೆಲಿಕಾಂ ಇಲಾಖೆಗೆ ಮಾಹಿತಿ ನೀಡಬಹುದು. ಸೂಕ್ತ ಮಾಹಿತಿ ಪಡೆಯುವ ಟೆಲಿಕಾಂ ಇಲಾಖೆ ಮೊಬೈಲ್ ಐಎಂಇಐ ಸಂಖ್ಯೆಯನ್ನು ಬ್ಲಾಕ್ ಲಿಸ್ಟ್‌ಗೆ ಸೇರಿಸಲಿದೆ ಮತ್ತು ಆ ಮೊಬೈಲ್ ಅನ್ನು ಟ್ರ್ಯಾಕ್ ಮಾಡಿ ಪೊಲೀಸರಿಗೆ ಮಾಹಿತಿ ನೀಡಲಿದೆ.

ಕಳ್ಳರಿನ್ನೂ ಕದ್ದರೂ ವೇಸ್ಟ್!

ಟೆಲಿಕಾಂ ಇಲಾಖೆಯಿಂದ ಕಳೆದುಹೋದ ಯಾವುದೇ ಮೊಬೈಲ್ ಸಂಖ್ಯೆಯ ಐಎಂಇಐ ಬ್ಲಾಕ್ ಲಿಸ್ಟ್‌ಗೆ ಸೇರಿಸಲಾಗುತ್ತದೆ. ಇದರಿಂದ ಮೊಬೈಲ್ ಕಸಿದುಕೊಂಡವರು ಕದ್ದ ಮೊಬೈಲಿನಿಂದ ಯಾವುದೇ ಸೆಲ್ಯುಲಾರ್ ನೆಟ್ವರ್ಕ್ ಬಳಸಲು ಸಾಧ್ಯವಾಗದಂತೆ ಮಾಡಬಹುದು ಅಥವಾ ಅವರು ಮೊಬೈಲ್ ಬಳಸಿದರೂ ಆ ಬಗ್ಗೆ ಪೊಲೀಸರಿಗೆ ಮಾಹಿತಿ ಸಿಗುವಂತೆ ಮಾಡಲಾಗುತ್ತಿದೆ.

ಕಳ್ಳರ ಟ್ರ್ಯಾಪ್ ಸುಲಭ!

ಪ್ರಮುಖ ಮಾಧ್ಯಮ ಮಾಹಿತಿಗಳಂತೆ ಟೆಲಿಕಾಂ ಇಲಾಖೆಯು ಬ್ಲಾಕ್ ಲಿಸ್ಟ್‌ಗೆ ಸೇರಿಸಲಿರುವ ಮೊಬೈಲ್ ಅನ್ನು ಟ್ರ್ಯಾಕ್ ಮಾಡಲು ಇನ್ಮುಂದೆ ಸುಲಭವಾಗಲಿದೆಯಂತೆ. ಮೊಬೈಲ್ ಕಳ್ಳರನ್ನು ಹಿಡಿಯುವ ಸಲುವಾಗಿ ಪೊಲೀಸರಿಗೆ ಟೆಲಿಕಾಂ ಇಲಾಖೆ ಸಮಗ್ರ ಮಾಹಿತಿ ಒದಗಿಸಲಿದೆ. ಇದರಿಂದ ಕಳೆದ ಮೊಬೈಲ್‌ ಮತ್ತೆ ಸಿಗುವ ಸಾಧ್ಯತೆ ಹೆಚ್ಚಿರುತ್ತದೆ ಎಂದು ವರದಿಗಲ್ಲಿ ಹೇಳಲಾಗಿದೆ.

ಕೆಲ ವಾರಗಳಲ್ಲೇ ಈ ಹೊಸ ದತ್ತಾಂಶ

2012ರ ರಾಷ್ಟ್ರೀಯ ಟೆಲಿಕಾಂ ನೀತಿಯ ಅನ್ವಯ ಈ ಯೋಜನೆ ಅನುಷ್ಠಾನಗೊಳಿಸಲಾಗುತ್ತಿದ್ದು, ಕಳೆದ ಬಜೆಟ್ ನಲ್ಲಿ ಸಿಇಐಆರ್ ಯೋಜನೆಗೆ 15 ಕೋಟಿ ರು ಅನುದಾನ ನೀಡಲಾಗಿದೆ. ಇದರ ಸಹಾಯದಿಂದ ಮೊಬೈಲ್ ಗುರುತು ಪತ್ತೆ ಸಂಖ್ಯೆಯ ನೋಂದಣಿ ಪಟ್ಟಿ ತಯಾರಿಸುವ ಯೋಜನೆ ಜಾರಿಯಲ್ಲಿದೆ. ಇನ್ನು ಕೆಲ ವಾರಗಳಲ್ಲೇ ಈ ಹೊಸ ದತ್ತಾಂಶ ತಯಾರಾಗಲಿದೆ.