ಜೊಮಾಟೋದಲ್ಲಿ ಡೆಲಿವರಿ ಬಾಯ್ ಹಿಂದುವೇ ಆಗಿರಬೇಕು ಎಂದ ಗ್ರಾಹಕ

ಜೊಮಾಟೋ ಟ್ವೀಟ್:

ಈ ಘಟನೆ ನಡೆದ ನಂತರ ಈ ಗ್ರಾಹಕನ ಟ್ವೀಟ್ ನ್ನು ಕೋಟ್ ಮಾಡಿರುವ ಜೊಮಾಟೋ ತನ್ನ ಅಧಿಕೃತ ವೆಬ್ ಸೈಟ್ ನಲ್ಲಿ " ಆಹಾರಕ್ಕೆ ಯಾವುದೇ ಧರ್ಮವಿಲ್ಲ. ಧರ್ಮ ಧರ್ಮವಷ್ಟೇ" ಎಂದು ಬರೆದಿದೆ.

ದೀಪೆಂದರ್ ಘೋಯಲ್ ಹೇಳಿದ್ದೇನು?

ಕುತೂಹಲಕಾರಿ ವಿಚಾರವೆಂದರೆ ಜೊಮಾಟೋ ಸಂಸ್ಥಾಪಕ ದೀಪೆಂದರ್ ಘೋಯಲ್ ಕೂಡ ಈ ಚರ್ಚೆಯಲ್ಲಿ ಭಾಗವಹಿಸಿದ್ದಾರೆ.ಧಾರ್ಮಿಕ ತಾರತಮ್ಯಕ್ಕೆ ಜೊಮಾಟೋದಲ್ಲಿ ಅವಕಾಶವಿಲ್ಲ. ಧರ್ಮದ ಆಧಾರದಲ್ಲಿ ಯಾವುದೇ ಗ್ರಾಹಕ ಡೆಲಿವರಿಯಲ್ಲಿ ಬಯಸುವುದೇ ಆದಲ್ಲಿ ಅಂತವರಿಗೆ ಜೊಮಾಟೋ ಬಾಗಿಲು ಯಾವಾಗಲೂ ಮುಚ್ಚಿರುತ್ತದೆ ಎಂಬುದಾಗಿ ಹೇಳಿದ್ದಾರೆ.

ಘೋಯಲ್ ಅವರ ಟ್ವೀಟ್ ಈ ರೀತಿಯಾಗಿ ಇದೆ. "ಭಾರತದ ಕಲ್ಪನೆ ಮತ್ತು ಗೌರವಾನ್ವಿತ ಪಾಲುದಾರರು ಮತ್ತು ಗ್ರಾಹಕರ ವೈವಿದ್ಯತೆಯ ಬಗ್ಗೆ ನಮಗೆ ಹೆಮ್ಮೆ ಇದೆ. ನಮ್ಮ ಮೌಲ್ಯಗಳಿಗೆ ವಿರುದ್ಧವಾಗಿ ಬರುವ ಯಾವುದೇ ವ್ಯವಹಾರವನ್ನು ಕಳೆದುಕೊಳ್ಳುವುದಕ್ಕೆ ನಮಗೆ ಬೇಸರವಿಲ್ಲ. ಅಂತಹ ವ್ಯವಹಾರದ ವಿರುದ್ಧ ನಮಗೆ ಕ್ಷಮೆಇರಲಿ" ಎಂದಿದ್ದಾರೆ.

ಓಲಾದಲ್ಲೂ ನಡೆದಿತ್ತು:

ಕಳೆದ ವರ್ಷ ಇಂತಹದ್ದೇ ಘಟನೆ ಟ್ಯಾಕ್ಸಿ ಆಪ್ ಓಲಾದಲ್ಲಿ ನಡೆದಿತ್ತು. ವಿಶ್ವ ಹಿಂದೂ ಪರಿಷತ್ ನ ಯುಪಿ ಮೂಲದ ಸಾಮಾಜಿಕ ಜಾಲತಾಣದ ಸಲಹೆಗಾರರೊಬ್ಬರು ಓಲಾದಲ್ಲಿ ಮುಸ್ಲೀಂ ಚಾಲಕನಾಗಿದ್ದಲ್ಲಿ ನಾನು ಪ್ರಯಾಣಿಸುವುದಿಲ್ಲ ಎಂದು ಹೇಳಿದ್ದು ಭಾರೀ ಚರ್ಚೆಗೆ ಗ್ರಾಸವಾಗಿತ್ತು. ಅವರ ಓಲಾ ಮತ್ತು ಟ್ವೀಟರ್ ಖಾತೆಯನ್ನು ಅಮಾನತುಗೊಳಿಸಬೇಕೆಂದು ನಾಗರೀಕರು ಒತ್ತಾಯಿಸಿದಾಗ ಸಾಮಾಜಿಕ ಮಾಧ್ಯಮದಲ್ಲಿ ದೊಡ್ಡ ಬಿರುಗಾಳಿಯನ್ನೇ ಎಬ್ಬಿಸಿತ್ತು.

ಜೊಮಾಟೋ ಮಾಡಿದಂತೆಯೇ ಓಲಾ ಕೂಡ ಗ್ರಾಹಕರ ಬೇಡಿಕೆಯನ್ನು ನಿರಾಕರಿಸಿತ್ತು. ಧರ್ಮದ ಆಧಾರದಲ್ಲಿ ಡ್ರೈವರ್ ನ್ನು ಆಯ್ಕೆ ಮಾಡುವುದಕ್ಕೆ ಸಾಧ್ಯವಿಲ್ಲ ಎಂದು ಹೇಳಿತ್ತು. ತನ್ನ ಅಧಿಕೃತ ಟ್ವೀಟರ್ ಖಾತೆಯಲ್ಲಿ ಓಲಾ ಕೂಡ ಟ್ವೀಟ್ ಮಾಡಿತ್ತು. "ನಮ್ಮ ದೇಶದಂತೆಯೇ ಓಲಾ ಕೂಡ ಒಂದು ಜಾತ್ಯಾತೀತ ವೇದಿಕೆಯಾಗಿದೆ. ನಾವು ಚಾಲಕರು ಅಥವಾ ಗ್ರಾಹಕರನ್ನು ಜಾತಿ,ಧರ್ಮ, ಲಿಂಗದ ಆಧಾರದಲ್ಲಿ ತಾರತಮ್ಯ ಮಾಡುವುದಿಲ್ಲ. ನಮ್ಮ ಎಲ್ಲಾ ಚಾಲಕರು ಮತ್ತು ಗ್ರಾಹಕರು ಯಾವಾಗಲೂ ಗೌರವದಿಂದ ವರ್ತಿಸುವಂತೆ ಕೋರುತ್ತೇವೆ" ಎಂದು ಟ್ವೀಟ್ ಮಾಡಲಾಗಿತ್ತು.

ಒಟ್ಟಿನಲ್ಲಿ ಧರ್ಮದ ಮನಸ್ಥಿತಿಯ ಚೌಕಟ್ಟು ಆಹಾರದ ಡೆಲಿವರಿಯಲ್ಲೂ ಕಾಣಿಸಿದ್ದು ಎಷ್ಟು ಸರಿ ಎಂಬುದು ಇದೀಗ ಎದ್ದಿರುವ ಪ್ರಶ್ನೆ!ಇದಕ್ಕೆ ನಿಮ್ಮ ಅಭಿಪ್ರಾಯವೇನು? ಕಮೆಂಟ್ ಮಾಡಿ ತಿಳಿಸಿ.