ವಿಜ್ಞಾನ ವಿಶೇಷ: ಸುನೀತಾ ವಿಲಿಯಮ್ಸ್ 9 ತಿಂಗಳು ಬಾಹ್ಯಾಕಾಶದಲ್ಲಿ ಬದುಕಿದ್ದು ಹೇಗೆ?

ಭಾರತೀಯ ಮೂಲದ ನಾಸಾ ಗಗನಯಾತ್ರಿ ಸುನೀತಾ ವಿಲಿಯಮ್ಸ್ ಮತ್ತು ಅವರ ಸಹೋದ್ಯೋಗಿ ಬುಚ್ ವಿಲ್ಮೋರ್ ಒಂಬತ್ತು ತಿಂಗಳ ನಂತರ ಬಾಹ್ಯಾಕಾಶದಲ್ಲಿ ಜೀವನ್ಮರಣ ಹೋರಾಟದ ಬಳಿಕ ಭೂಮಿಗೆ ಮರಳಿದ್ದಾರೆ. ಅವರು 8 ದಿನಗಳ ಬಾಹ್ಯಾಕಾಶ ಯಾತ್ರೆಗಾಗಿ ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ತೆರಳಿದ್ದರು, ಆದರೆ ನಿರೀಕ್ಷಿತ ಸಮಯಕ್ಕಿಂತ ಹೆಚ್ಚು, ಅಂದರೆ 9 ತಿಂಗಳು ಅಲ್ಲಿಯೇ ಸಿಲುಕಿಕೊಂಡು ಹೋರಾಟ ನಡೆಸಿದರು. ಇದೀಗ, ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್ ಅವರ ಹಿಂದಿರುಗುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಬುಧವಾರ ಬೆಳಗಿನ ಜಾವ, ಫ್ಲೋರಿಡಾ ಸಮುದ್ರದಲ್ಲಿ ಡ್ರ್ಯಾಗನ್ ಬಾಹ್ಯಾಕಾಶ ನೌಕೆ ಯಶಸ್ವಿಯಾಗಿ ಇಳಿದಾಗ, ಇಬ್ಬರು ಕ್ಯಾಪ್ಸುಲ್‌ನಿಂದ ಹೊರಬಂದಾಗ ನಗುತ್ತಾ ಕೈ ಬೀಸುವ ದೃಶ್ಯಗಳು ಗಮನ ಸೆಳೆದಿವೆ. ಈ ಸಂದರ್ಭದಲ್ಲಿ, ಅವರು 9 ತಿಂಗಳು ಬಾಹ್ಯಾಕಾಶ ನಿಲ್ದಾಣದಲ್ಲಿ ಹೇಗೆ ಬದುಕು ಉಳಿಸಿದರು?, ಅಲ್ಲಿ ಆಹಾರಕ್ಕಾಗಿ ಅವರು ಏನು ಮಾಡಿದರು?, ಮತ್ತು ಭೂಮಿಗೆ ವಾಪಸ್ ಬಂದ ನಂತರ ಅವರ ಆರೋಗ್ಯ ಪರಿಸ್ಥಿತಿ ಹೇಗಿದೆ ಎಂಬ ಪ್ರಶ್ನೆಗಳು ಉದ್ಭವವಾಗಿವೆ. ಆದ್ದರಿಂದ, ಇಂದಿನ ಲೇಖನದಲ್ಲಿ ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್ ಅವರು ಅಸಾಧಾರಣ ಪರಿಸ್ಥಿತಿಯಲ್ಲಿ ಒಂಬತ್ತು ತಿಂಗಳುಗಳ ಕಾಲ ಬಾಹ್ಯಾಕಾಶ ನಿಲ್ದಾಣದಲ್ಲಿ ಹೇಗೆ ಕಳೆದರು ಎಂಬುದನ್ನು ನೋಡೋಣ ಬನ್ನಿ.

ಸುನೀತಾ ವಿಲಿಯಮ್ಸ್ ಮತ್ತು ಅಬುಚ್ ವಿಲ್ಮೋರ್ ಅವರು ಬಾಹ್ಯಾಕಾಶದಲ್ಲಿ ಸಿಲುಕಿದ್ದು ಹೇಗೆ?
ಗಗನಯಾತ್ರಿ ಸುನೀತಾ ವಿಲಿಯಮ್ಸ್ ಮತ್ತು ಅವರ ಸಹೋದ್ಯೋಗಿ ಬುಚ್ ವಿಲ್ಮೋರ್ 8 ದಿನಗಳ ಪರೀಕ್ಷಾ ಕಾರ್ಯಾಚರಣೆಗಾಗಿ ಕಳೆದ ವರ್ಷ ಜೂನ್ 5ರಂದು ಬೋಯಿಂಗ್‌ನ ಸ್ಟಾರ್‌ಲೈನರ್ ಕ್ಯಾಪ್ಸುಲ್‌ನಲ್ಲಿ ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ(ISS)ಕ್ಕೆ ಹೋಗಿದ್ದರು. ಆದರೆ ಬೋಯಿಂಗ್ ಸ್ಟಾರ್‌ಲೈನರ್‌ನಲ್ಲಿ ತಾಂತ್ರಿಕ ಸಮಸ್ಯೆಗಳ ಕಾರಣದಿಂದ ಅವರು ಬಾಹ್ಯಾಕಾಶ ನಿಲ್ದಾಣದಲ್ಲಿ ಸಿಲುಕಿಕೊಂಡರು. ಅವರು ಕೇವಲ ಒಂದು ವಾರದ ನಂತರ ಭೂಮಿಗೆ ಮರಳಬೇಕಾಗಿತ್ತು, ಈ ವೇಳೆ ಬೋಯಿಂಗ್‌ನ ಎಂಜಿನಿಯರ್‌ಗಳು ಹೀಲಿಯಂ ಸೋರಿಕೆ ಮತ್ತು ಪ್ರೊಪಲ್ಷನ್ ಸಿಸ್ಟಮ್ ಸಮಸ್ಯೆಗಳನ್ನು ಪತ್ತೆಹಚ್ಚಿದ ಕಾರಣ, ಅವರ ವಾಪಸಾತಿಗೆ ವಿಳಂಬವಾಯಿತು. ಸುನೀತಾ ಮತ್ತು ಬುಚ್ ಒಂಬತ್ತು ತಿಂಗಳುಗಳಿಗಿಂತ ಹೆಚ್ಚು ಕಾಲ ಬಾಹ್ಯಾಕಾಶ ನಿಲ್ದಾಣದಲ್ಲಿ ಉಳಿಯಬೇಕಾಯಿತು, ಇದು ಅವರ ಮರಳುವಿಕೆಗೆ ತೊಂದರೆ ಉಂಟುಮಾಡಿತು. ಆದರೆ, ಈ ಅವಧಿಯಲ್ಲಿ ಬಾಹ್ಯಾಕಾಶದಲ್ಲಿ ನಡೆಸಿದ ಅವರ ಸಂಶೋಧನೆಗಳು ಸಾಕಷ್ಟು ಪ್ರಶಂಸೆಗೆ ಪಾತ್ರವಾಯಿತು. ಇದೀಗ ಇದೀಗ ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್ ಮಾರ್ಚ್ 19, 2025 ರಂದು ಬೆಳಿಗ್ಗೆ 3:30 ಕ್ಕೆ ಭೂಮಿಗೆ ಮರಳಿದ್ದಾರೆ. ಅವರನ್ನು ಡ್ರ್ಯಾಗನ್ ವಿಮಾನದ ಮೂಲಕ ಬಾಹ್ಯಾಕಾಶದಿಂದ ಭೂಮಿಗೆ ಕರೆತರಲಾಗಿದೆ.

ಇದೀಗ ಸುನೀತಾ ವಿಲಿಯಮ್ಸ್ ಮತ್ತು ಅಬುಚ್ ವಿಲ್ಮೋರ್ ಅವರ ಆರೋಗ್ಯ ಹೇಗಿದೆ?
ಸುನೀತಾ ವಿಲಿಯಮ್ಸ್ ಮತ್ತು ಬುಚ್, ಇಬ್ಬರು ಗಗನಯಾತ್ರಿಗಳು, ದೀರ್ಘಕಾಲ ಬಾಹ್ಯಾಕಾಶದಲ್ಲಿ ಕಳೆದ ನಂತರ ಭೂಮಿಗೆ ಹಿಂತಿರುಗಿದಾಗ ಗುರುತ್ವಾಕರ್ಷಣೆಗೆ ಹೊಂದಿಕೊಳ್ಳಲು ಕಷ್ಟವಾಗುತ್ತದೆ. ಅವರು ಒಂಬತ್ತು ತಿಂಗಳು ನಡೆಯದ ಕಾರಣ, ಇತರ ಗಗನಯಾತ್ರಿಗಳು ಅವರನ್ನು ಎತ್ತಿಕೊಂಡು ಸ್ಟ್ರೆಚರ್‌ನಲ್ಲಿ ಹೊರಗೆ ಕರೆದೊಯ್ಯುವ ದೃಶ್ಯ ಕಂಡುಬಂದಿತು. ಸುನೀತಾ ವಿಲಿಯಮ್ಸ್ ಕ್ಯಾಪ್ಸುಲ್‌ನಿಂದ ಹೊರಬಂದ ನಂತರ, ಅವರನ್ನು ಸ್ಪೇಸ್‌ಎಕ್ಸ್‌ನ ಚೇತರಿಕೆ ಹಡಗಿಗೆ ಕರೆದೊಯ್ಯಲಾಯಿತು, ಅಲ್ಲಿ ಅವರ ಆರೋಗ್ಯ ತಪಾಸಣೆ ನಡೆಯಿತು. ನಂತರ, ಅವರನ್ನು ಹೂಸ್ಟನ್‌ಗೆ ಕರೆದೊಯ್ಯಲಾಯಿತು, ಅಲ್ಲಿ ಫ್ಲೈಟ್ ಸರ್ಜನ್ ಅವರ ವೈದ್ಯಕೀಯ ಪರೀಕ್ಷೆ ನಡೆಸಿದರು. ತಜ್ಞ ವೈದ್ಯರ ತಂಡ ಅವರು ಸಾಮಾನ್ಯ ಸ್ಥಿತಿಗೆ ಬರುವವರೆಗೆ ಕೆಲವು ದಿನಗಳ ಕಾಲ ಅವರ ಮೇಲೆ ನಿಗಾ ಇಡುತ್ತದೆ. ನಾಸಾದ ವಾಣಿಜ್ಯ ಸಿಬ್ಬಂದಿ ವ್ಯವಸ್ಥಾಪಕ ಸ್ಟೀವ್ ಸ್ಟಿಚ್ ಅವರು, "ಸುನೀತಾ ವಿಲಿಯಮ್ಸ್ ಸೇರಿದಂತೆ ಕ್ರೂ 9 ಮತ್ತು ಕ್ರೂ 10 ರ ಎಲ್ಲಾ ಗಗನಯಾತ್ರಿಗಳು ಭೂಮಿಗೆ ಮರಳಿದ ನಂತರ ಸಂಪೂರ್ಣವಾಗಿ ಸುರಕ್ಷಿತ ಮತ್ತು ಆರೋಗ್ಯವಾಗಿದ್ದಾರೆ. ಅವರು ಚೇತರಿಕೆ ಹಡಗಿನಲ್ಲಿದ್ದಾರೆ ಮತ್ತು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಲಾಗಿದ್ದಾರೆ. ನಂತರ, ಅವರನ್ನು ಹೂಸ್ಟನ್‌ಗೆ ಕರೆದೊಯ್ಯಲಾಗುವುದು, ಅಲ್ಲಿ ವಿವರವಾದ ಆರೋಗ್ಯ ತಪಾಸಣೆ ಮತ್ತು ಎಲ್ಲಾ ಪರೀಕ್ಷೆಗಳನ್ನು ನಡೆಸಲಾಗುವುದು ಮತ್ತು ಮಿಷನ್ ವಿವರಣೆಯನ್ನು ಮಾಡಲಾಗುವುದು." ಎಂದು ತಿಳಿಸಿದ್ದಾರೆ.

ಏನಿದು ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (ISS)
ಸುನೀತಾ ವಿಲಿಯಮ್ಸ್ ಮತ್ತು ಅವರ ಸಹೋದ್ಯೋಗಿ ಬುಚ್ ವಿಲ್ಮೋರ್ ಅವರು 9 ತಿಂಗಳು ಬಾಹ್ಯಾಕಾಶ ನಿಲ್ದಾಣದಲ್ಲಿ ಹೇಗೆ ಬದುಕು ಉಳಿಸಿದರು ಎಂಬುದನ್ನು ತಿಳಿಯುವುದಕ್ಕೂ ಮೊದಲು, ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (ISS) ಎಂದರೆ ಏನು ಎಂಬುದನ್ನು ತಿಳಿಯೋಣ. ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (ISS)ವೆಂಬುದು ಅಂತರರಾಷ್ಟ್ರೀಯವಾಗಿ ಅಭಿವೃದ್ಧಿಪಡಿಸಲಾದ ವಾಸಯೋಗ್ಯ ಉಪಗ್ರಹವಾಗಿದ್ದು, ಇದನ್ನು ಪ್ರಸ್ತುತದಲ್ಲಿ ಭೂಮಿಯ ನಿಕಟವರ್ತಿ ಕಕ್ಷೆಯಲ್ಲಿ ಜೋಡಿಸಿ ಸ್ಥಾಪಿಸಲಾಗಿದೆ. ಈ ಉಪಗ್ರಹವು ಅಮೇರಿಕಾದ ಫ್ರೀಡಮ್, ಸೋವಿಯತ್ ರಷ್ಯಾ /ರಷ್ಯಾದ ಮಿರ್ -2, ಯುರೋಪಿನ ಕೊಲಂಬಸ್ ಮತ್ತು ಜಪಾನೀಯರಕಿಬೋ ವನ್ನು ಒಳಗೊಂಡ ಅನೇಕ ಬಾಹ್ಯಾಕಾಶ ನಿಲ್ದಾಣ ಯೋಜನೆಗಳ ಸಮನ್ವಯವಾಗಿದೆ. ಅಂದರೆ, ಇದು ಒಂದು ದೇಶದ ಸ್ವತ್ತಲ್ಲ. ವಿಶ್ವದ ಬಹುತೇಕ ಬಾಹ್ಯಾಕಾಶ ಸಂಸ್ಥೆಗಳು ಈ ಉಪಗ್ರಹದ ಭಾಗವಾಗಿವೆ. ಹಾಗಾಗಿ, ಇಲ್ಲಿ ವ್ಯಾಪಕವಾದ ಅಧ್ಯಯನಗಳನ್ನು ಕೈಗೊಳ್ಳಲಾಗುತ್ತದೆ. ಕಾಯಂ ಸಿಬ್ಬಂದಿಯ ಉಪಸ್ಥಿತಿಗೆ ಬೇಕಾದ ಸೌಲಭ್ಯಗಳು ಇದರಲ್ಲಿವೆ. ಬಾಹ್ಯಾಕಾಶನೌಕೆಗೆ ಅದರ ಪ್ರಯೋಗಗಳನ್ನು ಮತ್ತು ಘಟಕಗಳನ್ನು ಸ್ವತಃ ಎಚ್ಚರಿಕೆಯಿಂದ ನೋಡಿಕೊಳ್ಳುವ, ಅಗತ್ಯವಾದದ್ದನ್ನು ಪುನಃ ಭರ್ತಿಮಾಡಿಕೊಳ್ಳುವ, ಸರಿಮಾಡುವ ಮತ್ತು ಬದಲಾಯಿಸುವ ಸಾಮರ್ಥ್ಯ ಒದಗಿಸುತ್ತದೆ. ಭೂಮಿಯ ಮೇಲಿರುವ ವಿಜ್ಞಾನಿಗಳು ಸಿಬ್ಬಂದಿ ವರ್ಗ ರವಾನಿಸುವ ದತ್ತಾಂಶವನ್ನು ಅತಿ ವೇಗವಾಗಿ ಪರಿಶೀಲಿಸುತ್ತಾರೆ. ಒಟ್ಟಾರೆಯಾಗಿ, ಇದನ್ನು ಬಾಹ್ಯಾಕಾಶದಲ್ಲಿ ಹಾರಾಡುತ್ತಿರುವ ವಿಶ್ವದ ವಿಜ್ಞಾನಿಗಳ ಮನೆ ಎಂದು ಹೇಳಬಹುದು.

ಸುನೀತಾ ವಿಲಿಯಮ್ಸ್ 9 ತಿಂಗಳು ಬಾಹ್ಯಾಕಾಶ ನಿಲ್ದಾಣದಲ್ಲಿ ಹೇಗೆ ಬದುಕು ಉಳಿದರು?
ಮೊದಲೇ ಹೇಳಿದಂತೆ, ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣವು ಬಾಹ್ಯಾಕಾಶದಲ್ಲಿ ಕಾರ್ಯನಿರ್ವಹಿಸುತ್ತಿರುವ ವಿಜ್ಞಾನಿಗಳ ಮನೆ. ಇಲ್ಲಿ ಸಂಶೋಧನೆಯ ಮೂಲಕ ತಯಾರಿಸಲಾದ ಆಹಾರ ಪದಾರ್ಥಗಳನ್ನು ಸಂಗ್ರಹಿಸಲಾಗಿದೆ. ಈ ಆಹಾರವನ್ನು ಸಾಮಾನ್ಯವಾಗಿ ಪ್ಯಾಕ್ ಮಾಡಲಾಗುತ್ತದೆ ಅಥವಾ ಫ್ರೀಜ್-ಒಣಗಿಸಲಾಗುತ್ತದೆ, ಮತ್ತು ಊಟದ ಬೆಚ್ಚಗಿನ ವಸ್ತುವನ್ನು ಬಳಸಿಕೊಂಡು ಪುನಃ ಬಿಸಿ ಮಾಡಬಹುದು. ಪ್ರತಿಯೊಬ್ಬ ಗಗನಯಾತ್ರಿಯ ದೈನಂದಿನ ಅಗತ್ಯಗಳಿಗೆ ಅನುಗುಣವಾಗಿ ಈ ಆಹಾರವನ್ನು ಕಸ್ಟಮೈಸ್ ಮಾಡಲಾಗುತ್ತದೆ. ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್ ಅವರಿಗೆ ತಾಜಾ ಹಣ್ಣುಗಳು ಮತ್ತು ತರಕಾರಿಗಳು ಆರಂಭದಲ್ಲಿ ಲಭ್ಯವಿದ್ದವು ಆದರೆ ಮೂರು ತಿಂಗಳೊಳಗೆ ಖಾಲಿಯಾದವು. ನಂತರ ಬಹಳಷ್ಟು ಪಿಜ್ಜಾ, ಹುರಿದ ಕೋಳಿಮಾಂಸ ಮತ್ತು ಸೀಗಡಿ ಕಾಕ್‌ಟೈಲ್‌ಗಳನ್ನು ಸೇವಿಸಿದ್ದಾರೆ ಎಂದು ದಿ ನ್ಯೂಯಾರ್ಕ್ ಪೋಸ್ಟ್ ವರದಿ ಮಾಡಿದೆ. ಪ್ರತಿ ಗಗನಯಾತ್ರಿಯ ದೈನಂದಿನ ಆಹಾರ ಭತ್ಯೆ ಸುಮಾರು 3.8 ಪೌಂಡ್‌ಗಳಲ್ಲಿ ಎಚ್ಚರಿಕೆಯಿಂದ ಯೋಜಿಸಲಾಗಿದೆ, ಮತ್ತು ಕಾರ್ಯಾಚರಣೆಯನ್ನು ವಿಸ್ತರಿಸಲು ಹೆಚ್ಚುವರಿ ಸರಬರಾಜುಗಳನ್ನು ಇಡಲಾಗುತ್ತದೆ. ಇಲ್ಲಿ ಪ್ರತಿ ಮೂರು ತಿಂಗಳಿಗೊಮ್ಮೆ ಸರಕುಗಳನ್ನು ಮರುಪೂರಣ ಮಾಡಲಾಗುತ್ತದೆ. ಮತ್ತೊಂದು ಆಸಕ್ತಿಯ ವಿಷಯವೆಂದರೆ, ಸುನೀತಾ ವಿಲಿಯಮ್ಸ್ ಅವರು ತಮ್ಮ ಮೂತ್ರ ಮತ್ತು ಬೆವರನ್ನು ತಾಜಾ ನೀರಿನಂತೆ ಮರುಬಳಕೆ ಮಾಡಿದ್ದಾರೆ. ಇಬ್ಬರು ಗಗನಯಾತ್ರಿಗಳು ತಮ್ಮದೇ ಆದ ಆಹಾರವನ್ನು ತಯಾರಿಸಿ ಕಾಂತೀಯಗೊಳಿಸಿದ ಲೋಹದ ಟ್ರೇಗಳಲ್ಲಿ ತಿನ್ನುತ್ತಿದ್ದರು ಎಂದು ವರದಿಯಲ್ಲಿದೆ.

ಸುನೀತಾ ವಿಲಿಯಮ್ಸ್ ಅವರ ಆರೋಗ್ಯ ಸುಧಾರಣೆಗೆ ಎಷ್ಟು ಸಮಯ ಬೇಕು?
ಸುನೀತಾ ವಿಲಿಯಮ್ಸ್ ಮತ್ತು ಅವರ ಸಹೋದ್ಯೋಗಿ ಬುಚ್ ವಿಲ್ಮೋರ್ ಬಾಹ್ಯಾಕಾಶದಲ್ಲಿ ದೀರ್ಘಕಾಲ ಕಳೆದಿರುವುದರಿಂದ ಭೂಮಿಯ ಗುರುತ್ವಾಕರ್ಷಣೆಗೆ ಹೊಂದಿಕೊಳ್ಳಲು ಅವರಿಗೆ ಕೆಲವು ಸಮಯ ಬೇಕಾಗುತ್ತದೆ. ಇವರಿಬ್ಬರು ಹೆಚ್ಚುಕಾಲ ಬಾಹ್ಯಾಕಾಶದಲ್ಲಿ ಇರುವುದರಿಂದ ಅವರ ಮೂಳೆಗಳು ಕುಗ್ಗುತ್ತವೆ , ಪಾದಗಳ ಅಡಿಭಾಗಗಳು ಮೃದುವಾಗುತ್ತವೆ, ಇದರಿಂದಾಗಿ ಅವರ ಪಾದಗಳು ಮಗುವಿನ ಪಾದಗಳಂತೆ ಆಗುತ್ತವೆ. ಈ ಕಾರಣದಿಂದ, ಅವರು ಕೆಲವು ದಿನಗಳ ಕಾಲ ಸಾಮಾನ್ಯ ವ್ಯಕ್ತಿಯಂತೆ ನೆಲದ ಮೇಲೆ ನಡೆಯಲು ಕಷ್ಟಪಡುತ್ತಾರೆ. ಇಷ್ಟೇ ಅಲ್ಲದೆ, ಸ್ನಾಯುಗಳ ನಷ್ಟ, ಮೂತ್ರಪಿಂಡದ ಕಲ್ಲುಗಳು, ದೃಷ್ಟಿ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ. ಹೀಗಾಗಿ, ಹೂಸ್ಟನ್‌ನಲ್ಲಿ ಚೇತರಿಸಿಕೊಂಡ ನಂತರ, ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವೈದ್ಯರ ಅನುಮತಿ ಪಡೆದು ಮನೆಗೆ ಹಿಂತಿರುಗಲು ಯೋಜಿಸುತ್ತಿದ್ದಾರೆ. ಇದಕ್ಕಾಗಿ ಅವರಿಗೆ ಕನಿಷ್ಠ ಒಂದರಿಂದ ಎರಡು ತಿಂಗಳ ಕಾಲ ಬೇಕಾಗುತ್ತದೆ ಎಂದು ತಿಳಿಸಲಾಗಿದೆ.