Samsung: 2 ಹೊಸ ಟ್ಯಾಬ್‌ ಬಿಡುಗಡೆ; ಎಐ ಫೀಚರ್ಸ್‌, ಬಿಗ್ ಬ್ಯಾಟರಿ.. ಬೆಲೆ ನೋಡಿ

ಟೆಕ್ ದೈತ್ಯ ಸ್ಯಾಮ್‌ಸಂಗ್ ತನ್ನ ಬಹುನಿರೀಕ್ಷಿತ ಸ್ಯಾಮ್‌ಸಂಗ್ ಗ್ಯಾಲಕ್ಸಿ Tab S10 (Samsung Galaxy Tab S10) ಸರಣಿಯನ್ನು ಭಾರತದಲ್ಲಿ ಬಿಡುಗಡೆ ಮಾಡಿದೆ. ಇದರಲ್ಲಿ ಕಂಪನಿಯು Samsung Galaxy Tab S10 Ultra ಮತ್ತು Samsung Galaxy S10+ ಎಂಬ ಎರಡು ಟ್ಯಾಬ್‌ಗಳನ್ನು ಪರಿಚಯಿಸಿದೆ. ಹಲವು ಅಪ್ಡೇಟ್‌ಗಳೊಂದಿಗೆ ಇವು ಮಾರುಕಟ್ಟೆಗೆ ಲಗ್ಗೆ ಇಟ್ಟಿವೆ. ಕಂಪನಿಯು ಈ ಎರಡೂ ಟ್ಯಾಬ್ಲೆಟ್‌ಗಳನ್ನು ಎಐ ವೈಶಿಷ್ಟ್ಯಗಳೊಂದಿಗೆ ಅನಾವರಣಗೊಳಿಸಿದೆ. ಈ ನೂತನ ಟ್ಯಾಬ್‌ಗಳ ಬೆಲೆ ಮತ್ತು ಲಭ್ಯತೆ ಬಗ್ಗೆ ತಿಳಿಯೋಣ ಬನ್ನಿ.

ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಟ್ಯಾಬ್ S10 ಪ್ಲಸ್‌ ಬೆಲೆ 90,999 ರೂ.ಗಳಿಂದ ಪ್ರಾರಂಭವಾಗುತ್ತದೆ. ಈ ಬೆಲೆಯು ಅದರ ವೈ-ಫೈ, 12GB + 256GB ರೂಪಾಂತರದ ಬೆಲೆಯಾಗಿದೆ. ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಟ್ಯಾಬ್ S10 ಪ್ಲಸ್‌ 5G ಟ್ಯಾಬ್‌ನ 12GB + 256GB ಬೆಲೆ 1,04,999 ರೂ. ಆಗಿದೆ. ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಟ್ಯಾಬ್ S10 ಅಲ್ಟ್ರಾ ಟ್ಯಾಬ್‌ನ ವೈ-ಫೈ, 12GB + 256GB ರೂಪಾಂತರದ ಬೆಲೆ 1,08,999 ರೂ ಇದೆ. ಮತ್ತು ಟಾಪ್ ರೂಪಾಂತರದ ಬೆಲೆ 1,33,999 ರೂ. ಆಗಿದೆ.

ಎರಡೂ ಟ್ಯಾಬ್ಲೆಟ್‌ಗಳ ಲಭ್ಯತೆ ಮತ್ತು ಆಫರ್‌ಗಳು

ಈ ಎರಡೂ ಟ್ಯಾಬ್ಲೆಟ್‌ಗಳು ಅಕ್ಟೋಬರ್ 3 ರಿಂದ ಎಲ್ಲಾ ಮಾರುಕಟ್ಟೆಗಳಲ್ಲಿ ಖರೀದಿಗೆ ಲಭ್ಯವಿರುತ್ತವೆ. ಈ ಟ್ಯಾಬ್ಲೆಟ್ ಮೂನ್‌ಸ್ಟೋನ್ ಗ್ರೇ ಮತ್ತು ಪ್ಲಾಟಿನಂ ಸಿಲ್ವರ್ ಬಣ್ಣದ ಆಯ್ಕೆಗಳಲ್ಲಿ ಲಭ್ಯವಿದೆ. ಈಗಾಗಲೇ ಮುಂಗಡ ಬುಕಿಂಗ್ (ಸೆಪ್ಟೆಂಬರ್ 27) ಪ್ರಾರಂಭವಾಗಿದೆ. ಸ್ಯಾಮ್‌ಸಂಗ್‌ನ ಅಧಿಕೃತ ವೆಬ್‌ಸೈಟ್‌ನಿಂದ ಬುಕ್ ಮಾಡಬಹುದು. ಮುಂಗಡ ಬುಕಿಂಗ್ ಮಾಡುವ ಮೂಲಕ, ನೀವು 35,100 ರೂ. ವರೆಗೆ ಪ್ರಯೋಜನಗಳನ್ನು ಪಡೆಯಬಹುದು. ಜೊತೆಗೆ, 15,000 ರೂ. ವರೆಗೆ ರಿಯಾಯಿತಿ ಪಡೆಯಬಹುದು.

ಎರಡೂ ಟ್ಯಾಬ್ಲೆಟ್‌ಗಳ ಪ್ರಮುಖ ವೈಶಿಷ್ಟ್ಯಗಳು

ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಟ್ಯಾಬ್ S10 ಅಲ್ಟ್ರಾ ಟ್ಯಾಬ್‌ 14.6 ಇಂಚಿನ ಅಮೋಲೆಡ್ 2x ಡಿಸ್ಪ್ಲೇಯನ್ನು ಹೊಂದಿದೆ. ಇದು 120Hz ರಿಫ್ರೆಶ್ ದರವನ್ನು ಬೆಂಬಲಿಸುತ್ತದೆ. ಮತ್ತು ಡಿಸ್ಪ್ಲೇ HDR 10+ ಬೆಂಬಲವನ್ನು ಹೊಂದಿದೆ. ಈ ಟ್ಯಾಬ್ಲೆಟ್ ಆಂಡ್ರಾಯ್ಡ್ 14 ಆಧಾರಿತ One UI 6.1 ನಲ್ಲಿ ಕಾರ್ಯನಿರ್ವಹಿಸುತ್ತದೆ. ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಟ್ಯಾಬ್ S10 ಪ್ಲಸ್‌ 12.4 ಇಂಚಿನ ಅಮೋಲೆಡ್ 2x ಡಿಸ್ಪ್ಲೇಯನ್ನು ಹೊಂದಿದೆ. ಇದು 1752x2800 ಪಿಕ್ಸೆಲ್ ರೆಸಲ್ಯೂಶನ್ ಹೊಂದಿದೆ. ಈ ಟ್ಯಾಬ್ಲೆಟ್ ಆಂಡ್ರಾಯ್ಡ್ 14 ಆಧಾರಿತ One UI 6.1 ನಲ್ಲಿ ಕಾರ್ಯನಿರ್ವಹಿಸುತ್ತದೆ.

ಎರಡೂ ಟ್ಯಾಬ್ಲೆಟ್‌ಗಳನ್ನು 4 ವರ್ಷಗಳ ನವೀಕರಣಗಳೊಂದಿಗೆ ಪರಿಚಯಿಸಲಾಗಿದೆ. ಇವು ಎಐ ವೈಶಿಷ್ಟ್ಯಗಳನ್ನು ಹೊಂದಿವೆ. ಇವುಗಳಲ್ಲಿ ಗ್ಯಾಲಕ್ಸಿ ಎಐ ಚಾಲಿತ ನೋಟ್ ಅಸಿಸ್ಟ್, ಡ್ರಾಯಿಂಗ್ ಅಸಿಸ್ಟ್, ಜೆಮಿನಿ ಎಐ, ಬಿಕ್ಸ್ಬಿ ಎಐ, ಸರ್ಕಲ್ ಟು ಸರ್ಚ್ ಸೇರಿವೆ. ಈ ಟ್ಯಾಬ್ಲೆಟ್‌ಗಳಲ್ಲಿ, ಬುಕ್ ಕವರ್ ಕೀಬೋರ್ಡ್‌ನಲ್ಲಿ ಗ್ಯಾಲಕ್ಸಿ ಎಐ ಅನ್ನು ಸಕ್ರಿಯಗೊಳಿಸಲು ಬಟನ್ ಅನ್ನು ಸಹ ಒದಗಿಸಲಾಗಿದೆ. ಇದನ್ನು ಎಐ ಕೀ ಎಂದು ಕರೆಯಲಾಗುತ್ತದೆ.

ಎರಡೂ ಟ್ಯಾಬ್‌ಗಳು ಡೈಮೆನ್ಸಿಟಿ 9300+ ಪ್ರೊಸೆಸರ್‌ ಅನ್ನು ಹೊಂದಿವೆ. ಕಂಪನಿಯು ಗ್ಯಾಲಕ್ಸಿ ಟ್ಯಾಬ್ S10+ ಅನ್ನು 12GB RAM ಮತ್ತು 512GB ಸ್ಟೋರೇಜ್‌ನೊಂದಿಗೆ ಬಿಡುಗಡೆ ಮಾಡಿದೆ. ಗ್ಯಾಲಕ್ಸಿ ಟ್ಯಾಬ್‌ S10 ಅಲ್ಟ್ರಾ 16 GB RAM ಮತ್ತು 1 TB ಸ್ಟೋರೇಜ್‌ ರೂಪಾಂತರದಲ್ಲಿ ಬರುತ್ತದೆ.

ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಟ್ಯಾಬ್ S10 ಅಲ್ಟ್ರಾ ಟ್ಯಾಬ್ 11,200mAh ಸಾಮರ್ಥ್ಯದ ಬ್ಯಾಟರಿಯನ್ನು ಹೊಂದಿದೆ. ಇದು 45W ವೇಗದ ಚಾರ್ಜಿಂಗ್ ಬೆಂಬಲ ಇದೆ. ಗ್ಯಾಲಕ್ಸಿ ಟ್ಯಾಬ್ S10+ ಟ್ಯಾಬ್‌ 10,090mAh ಸಾಮರ್ಥ್ಯದ ಬ್ಯಾಟರಿಯನ್ನು ಹೊಂದಿದೆ. ಎರಡೂ ಟ್ಯಾಬ್ಲೆಟ್‌ಗಳು 13 ಮೆಗಾಪಿಕ್ಸೆಲ್ ಮುಖ್ಯ ಕ್ಯಾಮೆರಾ ಮತ್ತು 8 ಮೆಗಾಪಿಕ್ಸೆಲ್ ಅಲ್ಟ್ರಾ-ವೈಡ್ ಕ್ಯಾಮೆರಾವನ್ನು ಹೊಂದಿವೆ.