Whatsapp ಗೆ ಸೇರಲಿದೆ ಸೂಪರ್ ಫೀಚರ್ಸ್‌; ಖಂಡಿತಾ ನಿಮಗೆ ಇಷ್ಟ ಆಗುತ್ತೆ!

ವಾಟ್ಸಾಪ್‌ (Whatsapp) ಇಂದಿನ ದಿನಗಳಲ್ಲಿ ಅಗತ್ಯ ಆಪ್‌ಆಗಿದೆ. ಈ ಮೂಲಕ ಜನರು ನಿರಂತರವಾಗಿ ಸಂಪರ್ಕದಲ್ಲಿ ಇರಲಿದ್ದಾರೆ. ಅಷ್ಟೇ ಅಲ್ಲದೆ ಬ್ಯಾಂಕಿಗ್‌ ಹಾಗೂ ಇನ್ನಿತರೆ ಸೇವೆಗಳೂ ಸಹ ಇದರಲ್ಲಿ ಲಭ್ಯ ಆಗುತ್ತಿದ್ದು, ದಿನೇ ದಿನೇ ಇದರ ಬಳಕೆ ಹೆಚ್ಚಾಗುತ್ತಲೇ ಇದೆ. ಈ ನಡುವೆ ವಾಟ್ಸಾಪ್‌ ಹೊಸ ಫೀಚರ್ಸ್‌ ಪರಿಚಯಿಸಲು ಸಜ್ಜಾಗಿದೆ.

ಹೌದು, ವಾಟ್ಸಾಪ್‌ನಲ್ಲಿ ಈಗಾಗಲೇ ಸಾಕಷ್ಟು ಫೀಚರ್ಸ್‌ಗಳಿದ್ದು, ಈ ಮೂಲಕ ಬಳಕೆದಾರರು ಭಿನ್ನ ಸೌಲಭ್ಯ ಪಡೆದುಕೊಳ್ಳುತ್ತಿದ್ದಾರೆ. ಅದಾಗ್ಯೂ ವಾಟ್ಸಾಪ್‌ ಮಾತ್ರ ಹೊಸ ಹೊಸ ಫೀಚರ್ಸ್‌ ಪರಿಚಯಿಸುವುದನ್ನು ಮಾತ್ರ ನಿಲ್ಲಿಸಿಲ್ಲ. ಅದರಂತೆ ಇನ್ನೇನು ಕೆಲವೇ ದಿನಗಳಲ್ಲಿ ಹೊಸ ಫೀಚರ್ಸ್‌ ಬಹಳ ಸದ್ದು ಮಾಡಲು ಸಜ್ಜಾಗಿದೆ. ಹಾಗಿದ್ರೆ ಏನಿದು ಹೊಸ ಫೀಚರ್ಸ್‌?, ಇದರಿಂದ ಏನೆಲ್ಲಾ ಲಾಭ ಎಂಬ ಮಾಹಿತಿಯನ್ನು ಈ ಲೇಖನದಲ್ಲಿ ತಿಳಿಸಿಕೊಡಲಾಗಿದೆ ಓದಿರಿ.

ವಾಟ್ಸಾಪ್‌ನಲ್ಲಿ ಹೊಸ ಫೀಚರ್ಸ್: ವಾಟ್ಸಾಪ್‌ ಈಗಾಗಲೇ ಹಲವಾರು ಅಗತ್ಯ ಫೀಚರ್ಸ್‌ ಪರಿಚಯಿಸಿದ್ದು, ಅದರಲ್ಲಿ ಪ್ರಮುಖವಾದುದು ಎಂದರೆ ಸ್ಟೇಟಸ್‌. ಅಂದರೆ ಬಳಕೆದಾರರು ಟೆಕ್ಸ್ಟ್‌ ಸ್ಟೇಟಸ್‌ಗಳ ಸಮಯದ ಅವಧಿಯನ್ನು ಹೊಂದಿಸುವ ಸಾಮರ್ಥ್ಯವನ್ನು ಶೀಘ್ರದಲ್ಲೇ ನೀಡಲಾಗುತ್ತದೆ ಎನ್ನಲಾಗಿದೆ. ಆದಾಗ್ಯೂ, ಈ ಫೀಚರ್ಸ್‌ ಫೋಟೋಗಳು ಅಥವಾ ವಿಡಿಯೋಗಳಿಗೂ ಲಭ್ಯ ಆಗಲಿದೆಯಾ ಎಂಬ ಬಗ್ಗೆ ಮಾಹಿತಿ ತಿಳಿದುಬಂದಿಲ್ಲ.

ಇನ್ನು 2 ಬಿಲಿಯನ್ ಜಾಗತಿಕ ಬಳಕೆದಾರರನ್ನು ಹೊಂದಿರುವ ಮೆಟಾ ಒಡೆತನದ ವ್ಯಾಪಕವಾಗಿ ಬಳಸಲಾಗುವ ಇನ್‌ಸ್ಟಂಟ್‌ ಮೆಸೆಜಿಂಗ್‌ ಆಪ್ ವಾಟ್ಸಾಪ್‌ ಅದರ ಸ್ಟೇಟಸ್‌ ಫೀಚರ್ಸ್‌ಗೆ ಗಮನಾರ್ಹವಾದ ನವೀಕರಣವನ್ನು ಪರಿಚಯಿಸಲು ಈ ಮೂಲಕ ಮುಂದಾಗಿದೆ. ಪ್ರಸ್ತುತ ಬಳಕೆದಾರರು 24 ಗಂಟೆಗಳವರೆಗೆ ಇರುವ ಸ್ಟೇಟಸ್‌ ಅನ್ನು ಪೋಸ್ಟ್ ಮಾಡಬಹುದಾಗಿದೆ. ಆದರೆ ಮುಂದಿನ ದಿನಗಳಲ್ಲಿ ಈ ಅವಧಿ ವಿಸ್ತರಣೆ ಆಗಲಿದೆ ಎನ್ನಲಾಗಿದೆ.

ವಾಟ್ಸಾಪ್ ಅಪ್‌ಡೇಟ್‌ಗಳ ವಿಶ್ವಾಸಾರ್ಹ ಮೂಲವಾದ WABetaInfo ಈ ಸಂಬಂಧ ವರದಿ ಮಾಡಿದೆ. ವರದಿ ಪ್ರಕಾರ, ಕಂಪನಿಯು ಬಳಕೆದಾರರು ತಮ್ಮ ಸ್ಟೇಟಸ್‌ ಅನ್ನು ಎರಡು ವಾರಗಳವರೆಗೆ ಲೈವ್ ಆಗಿ ಇರಿಸಲು ಅನುಮತಿಸುವ ಫೀಚರ್ಸ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಇದರರ್ಥ ಬಳಕೆದಾರರು ತಮ್ಮ ಸ್ಟೇಟಸ್‌ ಅನ್ನು ಗೋಚರಿಸುವ ಅವಧಿಯನ್ನು ಆಯ್ಕೆ ಮಾಡುವ ಆಯ್ಕೆಯನ್ನು ಶೀಘ್ರದಲ್ಲೇ ಪಡೆಯಲಿದ್ದಾರೆ ಎನ್ನಲಾಗಿದೆ.

ಹಾಗೆಯೇ ವಾಟ್ಸಾಪ್‌ ನ ಬೀಟಾ ಆವೃತ್ತಿ 2.23.20.12 ರಲ್ಲಿ ಗಮನಿಸಲಾದ ಅತ್ಯಂತ ವಿಶೇಷ ಬದಲಾವಣೆಯೆಂದರೆ ಸ್ಟೇಟಸ್‌ ಫೀಚರ್ಸ್‌ನಲ್ಲಿ ಇದನ್ನು ಸಾಮಾನ್ಯವಾಗಿ ಬಳಕೆದಾರರ ಪ್ರೊಫೈಲ್‌ಗಳಲ್ಲಿ ಬಳಸಲಾಗುತ್ತದೆ. ಮುಂಬರುವ ಅಪ್‌ಡೇಟ್‌ನಲ್ಲಿ, ಬಳಕೆದಾರರಿಗೆ ಅವರ ಸ್ಟೇಟಸ್‌ ನವೀಕರಣಗಳಿಗಾಗಿ ನಾಲ್ಕು ಅವಧಿಯ ಆಯ್ಕೆಗಳನ್ನು ನೀಡಲಾಗುತ್ತದೆ ಎದು ಹೇಳಲಾಗಿದೆ.

ಅಂದರೆ 24 ಗಂಟೆಗಳು, 3 ದಿನಗಳು, 1 ವಾರ ಮತ್ತು 2 ವಾರಗಳ ಆಯ್ಕೆ ಬಳಕೆದಾರರಿಗೆ ಲಭ್ಯ ಇರಲಿದೆ. ಈ ಮೂಲಕ ಒಂದು ಬಾರಿ ಏನಾದರೂ ಸ್ಟೇಟಸ್‌ ಹಾಕಿದರೆ ಅದು ದೀರ್ಘಕಾಲದ ವರೆಗೆ ಅಸ್ತಿತ್ವದಲ್ಲಿ ಇರಲಿದೆ. ಈಗಾಗಲೇ ಕೆಲವು ಬಳಕೆದಾರರು ಒಂದೇ ಮಾಹಿತಿಯನ್ನು ಮತ್ತೆ ಮತ್ತೆ ಹಾಕುವುದನ್ನು ನೋಡಬಹುದು. ಅಂತಹವರು ಈ ಫೀಚರ್ಸ್‌ ನಿಂದ ಸಂತಸಪಡಬಹುದಾಗಿದೆ.

ಇದರ ಜೊತೆಗೆ ವಾಟ್ಸಾಪ್‌ ತನ್ನ ಚಾಟ್ ಇಂಟರ್‌ಫೇಸ್‌ನ ಮರುವಿನ್ಯಾಸವನ್ನು ಆಪ್‌ನ ಆಂಡ್ರಾಯ್ಡ್ ಆವೃತ್ತಿಯಲ್ಲಿ ನಡೆಸುತ್ತಿದೆ ಎಂದು ತಿಳಿದುಬಂದಿದೆ. ಈ ಮರುವಿನ್ಯಾಸವು ಆಪ್‌ನ ಬಣ್ಣಗಳಿಗೆ ಬದಲಾವಣೆಗಳನ್ನು ಒಳಗೊಂಡಿರುತ್ತದೆ, ಇದು ಬೆಳಕು ಮತ್ತು ಗಾಢ ವಿಧಾನಗಳಲ್ಲಿ ಹೇಗೆ ಕಾಣುತ್ತದೆ ಎಂಬುದರ ಮೇಲೆ ಪರಿಣಾಮ ಬೀರುತ್ತದೆ ಎಂದು ಹೇಳಲಾಗಿದೆ. ಅಷ್ಟೇ ಅಲ್ಲದೆ ಆಪ್‌ನಲ್ಲಿರುವ ಐಕಾನ್‌ಗಳು ಮತ್ತು ಬಟನ್‌ಗಳು ಸಹ ನವೀಕರಣಗಳನ್ನು ಪಡೆಯಲಿವೆ ಎಂದು ಹೇಳಲಾಗಿದೆ.

ವರದಿಯ ಪ್ರಕಾರ, ಕಂಪನಿಯು ಆಪಲ್‌ ಐಪ್ಯಾಡ್‌ ಬಳಕೆದಾರರಿಗಾಗಿ ತನ್ನ iOS ಅಪ್ಲಿಕೇಶನ್‌ನ ಆಪ್ಟಿಮೈಸ್ಡ್ ಆವೃತ್ತಿಯನ್ನು ಪರೀಕ್ಷಿಸುವ ಪ್ರಕ್ರಿಯೆಯಲ್ಲಿದೆ ಎಂದೂ ಸಹ ಮಾಹಿತಿ ತಿಳಿದುಬಂದಿದೆ. ಐಪ್ಯಾಡ್‌ಗಾಗಿ ವಾಟ್ಸಾಪ್‌ನ ಬೀಟಾ ಆವೃತ್ತಿಯನ್ನು ಈಗಾಗಲೇ ತಮ್ಮ ಐಫೋನ್‌ಗಳಲ್ಲಿ ಬೀಟಾ ಆಪ್‌ ಅನ್ನು ಬಳಸುತ್ತಿರುವ ಬೀಟಾ ಪರೀಕ್ಷಕರು ಟೆಸ್ಟ್‌ಫ್ಲೈಟ್ ಆಪ್‌ ಮೂಲಕ ಪ್ರವೇಶಿಸಬಹುದಾಗಿದೆ ಎಂದು ವಾಟ್ಸಾಪ್‌ ತಿಳಿಸಿದೆ.