ಭಾಷೆ ಅನುವಾದಿಸುವ ಹಿಯರ್ ಪೀಸ್ ಮಾರುಕಟ್ಟೆಗೆ ಬರಲಿದೆ!

ಅಪರಿಚಿತ ಭಾಷೆಯ ಊರಿನಲ್ಲಿ ಏನು ಕೇಳಬೇಕಂತ ತಿಳಿಯದೆ ಏನು ಹೇಳಬೇಕಂತ ತಿಳಿಯದೆ ಒದ್ದಾಡಿದ ಸ್ಥಿತಿಯನ್ನು ನಾವೆಲ್ಲರೂ ಎದುರಿಸಿದ್ದೇವೆ. ನಿಯಮಿತವಾಗಿ ಪ್ರವಾಸದಲ್ಲಿರುವವರಿಗೆ ಇದು ಸರ್ವೇ ಸಾಮಾನ್ಯ ಸಮಸ್ಯೆ.

ಈ ರೀತಿಯ ಪರಿಸ್ಥಿತಿಯಿಂದ ಕಾಪಾಡಲು, ವೇವರ್ಲಿ ಲ್ಯಾಬ್ಸ್ ಒಂದು ಪರಿಹಾರ ಹುಡುಕಿದೆ, ಚಿಕ್ಕ ಹಿಯರ್ ಪೀಸ್ ನಿಮ್ಮ ಸೆಟ್ಟಿಂಗ್ಸಿನ ಅನುಸಾರ ಭಾಷೆಯನ್ನು ಅನುವಾದಿಸುತ್ತದೆ.

ಪೈಲಟ್ ಹೆಸರಿನ ಈ ಸಾಧನದಲ್ಲಿ ಎರಡು ಸಣ್ಣ ಸಣ್ಣ ಹಿಯರ್ ಪೀಸುಗಳಿವೆ, ಬ್ಲೂಟೂಥ್ ಮೂಲಕ ನಿಮ್ಮ ಮೊಬೈಲಿಗೆ ಸಂಪರ್ಕಿಸಬಹುದು. ಮೊದಲಿಗೆ, ಮೊಬೈಲಿನಲ್ಲಿ ಆ್ಯಪ್ ಡೌನ್ ಲೋಡ್ ಮಾಡಿಕೊಂಡು ನಿಮ್ಮ ನೆಚ್ಚಿನ ಭಾಷೆಯನ್ನು ಆಯ್ಕೆ ಮಾಡಿಕೊಳ್ಳಬೇಕು. ಜೊತೆಗೆ, ನಿಮ್ಮ ಸ್ಮಾರ್ಟ್ ಫೋನ್ ಸ್ಥಳೀಯ ಭಾಷಾ ಡಾಟಾವನ್ನು ಸಂಗ್ರಹಿಸಿಟ್ಟುಕೊಳ್ಳುತ್ತದೆ; ಹಾಗಾಗಿ ಈ ಆ್ಯಪ್ ಕಾರ್ಯನಿರ್ವಹಿಸಲು ಅಂತರ್ಜಾಲದ ಸಂಪರ್ಕ ಬೇಕಿಲ್ಲ.

ಓದಿರಿ: 'ವಿಂಡೋಸ್‌ 10'ನಲ್ಲಿ ಭಾಷೆ ಆಡ್‌ ಮಾಡುವುದು, ರಿಮೂವ್‌ ಮತ್ತು ಬದಲಾವಣೆ ಹೇಗೆ?

ನಿಮಗಿದರ ಬಗ್ಗೆ ಆಸಕ್ತಿಯಿದ್ದಲ್ಲಿ, indiegogo ಪುಟದಲ್ಲಿ $129ಗೆ ಈಗಲೇ ಪ್ರೀ ಆರ್ಡರ್ ಮಾಡಬಹುದು (ಅಂದಾಜು 8,600 ರುಪಾಯಿ). ಈ ಸಾಧನದ ಕೆಲವು ವೈಶಿಷ್ಟತೆಗಳನ್ನು ಇಲ್ಲಿ ಪಟ್ಟಿ ಮಾಡಿದ್ದೇವೆ.

ಮಾತನಾಡುತ್ತಿರುವವರು ಬೇರೆ ಬೇರೆ ಭಾಷೆಯಲ್ಲಿ ಮಾತನಾಡುತ್ತಿದ್ದರೂ ಈ ಸಣ್ಣ ಸಾಧನವು ಭಾಷಾನುವಾದ ಮಾಡಬಲ್ಲದು. ಸರಳವಾಗಿ ಹೇಳಬೇಕೆಂದರೆ, ಈ ಸಾಧನದ ಸ್ಪೀಕರ್ ಮೂಲಕ ನೀವು ನಿಮ್ಮ ಭಾಷೆಯಲ್ಲಿ ದನಿಯನ್ನು ಕೇಳುತ್ತೀರಿ.

ಪೈಲಟ್ ಸಾಧನಲ್ಲಿ ಸಂಗೀತವನ್ನು ಆಲಿಸುವುದಕ್ಕೆ ವೈರ್ ಲೆಸ್ ಸಾಧನವೂ ಅಡಕವಾಗಿದೆ. ಈ ಹಿಯರ್ ಪೀಸ್ ಗೆ ಒಂದು ಪ್ರತ್ಯೇಕ ಆ್ಯಪ್ ಲಭ್ಯವಿದೆ, ಅದರ ಮೂಲಕ ಬಳಕೆದಾರರು ತಮಗೆ ಬೇಕಾದ ಭಾಷೆಯನ್ನು ಆಯ್ಕೆ ಮಾಡಿಕೊಳ್ಳಬಹುದು ಮತ್ತು ತಮ್ಮ ಹಿಯರ್ ಪೀಸ್ ಗೆ ಅದನ್ನು ಅಪ್ ಲೋಡ್ ಮಾಡಿಕೊಂಡು ಅಂತರ್ಜಾಲ ಸೌಲಭ್ಯವಿಲ್ಲದೇ ಇದ್ದಾಗಲೂ ಉಪಯೋಗಿಸಬಹುದು.

ಜೊತೆಗೆ ಈ ಸಾಧನದಲ್ಲಿ ಕಾನ್ಫರೆನ್ಸ್ ಮೋಡ್ ಕೂಡ ಇದೆ; ಅನೇಕರು ಈ ಹೆಡ್ ಸೆಟ್ಟನ್ನು ಧರಿಸಿ ಮಾತುಕತೆಗೆ ತೊಡಗಬಹುದು.

ಅತ್ಯಾಧುನಿಕ ಸ್ಪೀಚ್ ರೆಕಗ್ನಿಶನ್ ತಂತ್ರಜ್ಞಾನ, ಮೆಷಿನ್ ಟ್ರಾನ್ಸ್ಲೇಶನ್ ತಂತ್ರಜ್ಞಾನವನ್ನು ಈ ಸಾಧನದಲ್ಲಿ ಉಪಯೋಗಿಸಿಕೊಳ್ಳಲಾಗಿದೆ.

ಮೇ 2017ರಲ್ಲಿ ಬಿಡುಗಡೆಯಾಗಲಿರುವ ಈ ಸಾಧನದಲ್ಲಿ ಮೊದಲಿಗೆ ಇಂಗ್ಲೀಷ್, ಸ್ಪ್ಯಾನಿಶ್, ಫ್ರೆಂಚ್, ಇಟಾಲಿಯನ್ ಹಾಗೂ ಪೋರ್ಚುಗೀಸ್ ಭಾಷೆಗಳಿರಲಿವೆ.

ನಂತರದ ದಿನಗಳಲ್ಲಿ ಜರ್ಮನ್, ಹೆಬ್ರೂ, ಅರೇಬಿಕ್, ರಷ್ಯನ್ ಭಾಷೆಗಳು, ಆಫ್ರಿಕಾ ಮತ್ತು ಏಷಿಯಾದ ಭಾಷೆಗಳನ್ನು ಕಂಪನಿಯು ಸೇರಿಸುತ್ತದೆ.