ಅಮೆಜಾನ್‌ನಿಂದ ಹೊಸ ಪ್ಲ್ಯಾನ್‌: ನಕಲಿ ಉತ್ಪನ್ನಗಳಿಗೆ ಇನ್ಮುಂದೆ ಬ್ರೇಕ್‌!

ಪ್ರಮುಖ ಇ-ಕಾಮರ್ಸ್‌ ತಾಣಗಳಲ್ಲಿ ಒಂದಾದ ಅಮೆಜಾನ್‌ನಲ್ಲಿ ಅಗತ್ಯ ಸ್ಮಾರ್ಟ್‌ ಗ್ಯಾಜೆಟ್‌ಗಳು ಸೇರಿದಂತೆ ಇನ್ನಿತರೆ ವಸ್ತುಗಳನ್ನು ಆಫರ್‌ ಬೆಲೆಯಲ್ಲಿ ಖರೀದಿ ಮಾಡುವುದು ಸಾಮಾನ್ಯ. ಅದಾಗ್ಯೂ ಕೆಲವು ಸಂದರ್ಭದಲ್ಲಿ ಕೆಲವರು ನಕಲಿ ಪ್ರೊಡಕ್ಟ್‌ಗಳನ್ನು ಸ್ವೀಕರಿಸಿರುವ ವರದಿಗಳನ್ನು ಗಮನಿಸಿರಬಹುದು. ಆದರೆ, ಅಮೆಜಾನ್‌ ಇನ್ಮುಂದೆ ಈ ರೀತಿಯ ಪ್ರಕರಣಗಳಿಗೆ ಸಂಪೂರ್ಣವಾಗಿ ಕಡಿವಾಣ ಹಾಕಲಿದೆ.

ಹೌದು, ಅಮೆಜಾನ್ ನಕಲಿ ಉತ್ಪನ್ನಗಳನ್ನು ಗುರುತಿಸಲು ಮತ್ತು ಟ್ರ್ಯಾಕ್ ಮಾಡಲು ಹೊಸ ಪ್ಲ್ಯಾನ್‌ ಬಗ್ಗೆ ತಿಳಿಸಿದೆ ಅಂದರೆ ಅಮೆಜಾನ್ ಆಂಟಿ-ಕೌಂಟರ್‌ಫೀಟಿಂಗ್ ಎಕ್ಸ್‌ಚೇಂಜ್ (ACX) ಘೋಷಿಸಿದೆ. ಇದು ಉದ್ಯಮದ ಸಹಯೋಗವನ್ನು ಹೊಂದಿದ್ದು, ನಕಲಿ ಸರಕುಗಳು ಹಾಗೂ ನಕಲಿ ಮಾರಾಟಗಾರರ ವಿರುದ್ಧ ಸಮರ ಕ್ರಮ ತೆಗೆದುಕೊಂಡು ಗ್ರಾಹಕರಿಗೆ ಉತ್ತಮ ಸೇವೆ ನೀಡಲಿದೆ. ಹಾಗಿದ್ರೆ, ಅಮೆಜಾನ್‌ನ ಈ ಹೊಸ ಪ್ಲ್ಯಾನ್‌ ಏನು?, ಇದರಿಂದ ಗ್ರಾಹಕರಿಗೆ ಏನೆಲ್ಲಾ ಲಾಭ ಎಂಬಿತ್ಯಾದಿ ಮಾಹಿತಿಯನ್ನು ತಿಳಿದುಕೊಳ್ಳಿ.

ಈಗಂತೂ ಬಹುಸಂಖ್ಯಾತ ಜನರು ಏನೇ ಬೇಕಾದರೂ ಇ-ಕಾಮರ್ಸ್‌ ಸೈಟ್‌ಗಳ ಕಡೆ ಕಣ್ಣಾಯಿಸುತ್ತಾರೆ. ಆದರೆ, ಇದನ್ನೆ ಬಂಡವಾಳ ಮಾಡಿಕೊಂಡಿರುವ ಕೆಲವು ನಕಲಿ ವ್ಯಾಪಾರಿಗಳು ಕೆಟ್ಟ ಮಾರ್ಗದಲ್ಲಿ ಹಣ ಸಂಪಾದನೆ ಮಾಡುತ್ತಿರುವುದು ಹೆಚ್ಚಾಗಿದೆ. ಆದರೆ, ಈ ಉಪಕ್ರಮವು ಚಿಲ್ಲರೆ ಅಂಗಡಿಗಳಿಗೆ ಲೇಬಲ್ ಮಾಡಲು ಮತ್ತು ಮಾರುಕಟ್ಟೆಯ ನಕಲಿಗಳನ್ನು ಟ್ರ್ಯಾಕ್ ಮಾಡಲು ಸಹಾಯ ಮಾಡುತ್ತದೆ.

ಅದರಲ್ಲೂ ಯುನೈಟೆಡ್ ಸ್ಟೇಟ್ಸ್‌ನಲ್ಲಿನ ಆನ್‌ಲೈನ್ ಮಾರುಕಟ್ಟೆ ಸ್ಥಳಗಳು ತಮ್ಮ ಪ್ಲಾಟ್‌ಫಾರ್ಮ್‌ಗಳಿಂದ ನಕಲಿಗಳನ್ನು ಮತ್ತು ನಕಲಿ ಸರಕುಗಳನ್ನು ತಮ್ಮ ಗೋದಾಮುಗಳಿಗೆ ಪ್ರವೇಶಿಸದಂತೆ ತಡೆಯುವಲ್ಲಿ ಇದು ಪ್ರಮುಖ ಪಾತ್ರ ವಹಿಸುತ್ತದೆ. ಹೊಸ ಪ್ರೋಗ್ರಾಂ ಸ್ಕ್ಯಾಮರ್‌ಗಳನ್ನು ಹುಡುಕಲು ಮತ್ತು ಅವರ ತಂತ್ರಗಳನ್ನು ಗುರುತಿಸಲು ಇದು ಅತ್ಯಂತ ಸಹಾಯಕವಾಗಿದೆಯಂತೆ.

ಬಳಕೆದಾರರಿಗೆ ACX ಹೇಗೆ ಸಹಾಯ ಮಾಡುತ್ತದೆ?: ಸುರಕ್ಷಿತ ಆನ್‌ಲೈನ್ ಶಾಪಿಂಗ್‌ಗಾಗಿ ಖಾಸಗಿ ವಲಯದ ಪಾಲುದಾರಿಕೆಯನ್ನು ಯುಎಸ್‌ನಲ್ಲಿ ಆರಂಭಿಸಲಾಗಿದ್ದು, ಈ ಪಾಲುದಾರಿಕೆಯಲ್ಲಿ ಅನೇಕ ಖಾಸಗಿ ವಲಯದ ಕಂಪನಿಗಳು ನಕಲಿಗಳ ಬಗ್ಗೆ ನಿಯಮಿತವಾಗಿ ಮಾಹಿತಿಯನ್ನು ಹಂಚಿಕೊಳ್ಳುತ್ತವೆ. ಈ ಮೂಲಕ ಅವರು ಬೇರೆಲ್ಲಿಯೂ ಮಾರಾಟವನ್ನು ಮಾಡಲು ಸಾಧ್ಯವಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ಇದು ಸಹಾಯ ಮಾಡಲಿದೆ.

ಉದಾಹರಣೆಗೆ ಹೇಳುವುದಾದರೆ ಒಬ್ಬರು ನಕಲಿ ಜಾಲವನ್ನು ಪತ್ತೆ ಮಾಡಿದ ನಂತರ ತಕ್ಷಣವೇ ಆ ಖಾತೆಯ ಮಾಹಿತಿಯನ್ನು ಶೇರ್‌ ಮಾಡಿಕೊಳ್ಳಲಾಗುತ್ತದೆ. ಹಾಗೆಯೇ ACX ಭಾಗವಹಿಸುವ ಎಲ್ಲಾ ಇತರ ಅಂಗಡಿಗಳು ಆ ನಕಲಿ ಪ್ರೊಡಕ್ಟ್‌ ಬಗ್ಗೆ ತಿಳಿದುಕೊಳ್ಳಬಹುದು ಮತ್ತು ಅವುಗಳನ್ನು ತ್ವರಿತವಾಗಿ ತಡೆಹಿಡಿಯಬಹುದು. ಜೊತೆಗೆ ಪ್ರತಿಯೊಬ್ಬರೂ ಸಹ ACX ನಲ್ಲಿ ಮಾಹಿತಿಯನ್ನು ಹೇಗೆ ಬಳಸಬೇಕು ಎಂಬುದರ ಕುರಿತು ತಮ್ಮದೇ ಆದ ಸ್ವತಂತ್ರ ನಿರ್ಧಾರಗಳನ್ನು ತೆಗೆದುಕೊಳ್ಳಬಹುದಾಗಿದೆ ಎಂದು ಅಮೆಜಾನ್ ತಿಳಿಸಿದೆ.

ನಮ್ಮ ಗ್ರಾಹಕರು ತಮ್ಮ ಶಾಪಿಂಗ್ ಅನುಭವದಲ್ಲಿ ವಿಶ್ವಾಸ ಹೊಂದಬೇಕೆಂದು ಹಾಗೂ ಬ್ರ್ಯಾಂಡ್‌ಗಳು ನಕಲಿಗಳಿಂದ ರಕ್ಷಿಸಲ್ಪಟ್ಟಿವೆ ಎಂದೂ ಸಹ ತಿಳಿಯಬೇಕೆಂದು ನಾವು ಬಯಸುತ್ತೇವೆ. ಈ ಮೂಲಕ ACX ನಲ್ಲಿ ಭಾಗವಹಿಸುವವರು ತಮ್ಮದೇ ಆದ ಸ್ವತಂತ್ರ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಾರೆ ಎಂದು ಅಮೆಜಾನ್‌ನ ಪಾಲುದಾರ ಸೇವೆಗಳನ್ನು ಮಾರಾಟ ಮಾಡುವ ಉಪಾಧ್ಯಕ್ಷ ಧರ್ಮೇಶ್ ಮೆಹ್ತಾ ಹೇಳಿದ್ದಾರೆ.

ನಕಲಿ ಅಪರಾಧದ ವಿರುದ್ಧ ಹೋರಾಡಲು ಉದ್ಯಮದ ಸಾಮೂಹಿಕ ಸಾಮರ್ಥ್ಯವನ್ನು ಸುಧಾರಿಸಲು ಉತ್ಸುಕರಾಗಿದ್ದೇವೆ. ಗ್ರಾಹಕರು ಮತ್ತು ಹಕ್ಕುಗಳ ಮಾಲೀಕರ ಮನಸ್ಸಿನ ಹೆಚ್ಚಿನ ಶಾಂತಿಯನ್ನು ಈ ಮೂಲಕ ಒದಗಿಸುತ್ತೇವೆ ಎಂದು ಮೆಹ್ತಾ ತಿಳಿಸಿದ್ದು, ನಕಲಿ ಅಪರಾಧದ ವಿರುದ್ಧ ಹೋರಾಡಲು ಉದ್ಯಮದ ಸಾಮೂಹಿಕ ಸಾಮರ್ಥ್ಯವನ್ನು ಸುಧಾರಿಸಲು ನಾವು ಉತ್ಸುಕರಾಗಿದ್ದೇವೆ ಎಂದಿದ್ದಾರೆ.

ಇನ್ನು ಅಮೆಜಾನ್ ಇತರ ಚಿಲ್ಲರೆ ವ್ಯಾಪಾರಿಗಳು ಮತ್ತು ಮಾರುಕಟ್ಟೆ ಸೇವಾ ಪೂರೈಕೆದಾರರನ್ನು ACX ಗೆ ಸೇರಲು ಆಹ್ವಾನಿಸಿದ್ದು, ಅಮೆಜಾನ್‌ ಉಪಕ್ರಮವನ್ನು ಪ್ರಾಯೋಗಿಕವಾಗಿ 2021 ರಲ್ಲಿ ನಡೆಸಿದೆ. ಅದರಲ್ಲೂ ಉಡುಪುಗಳು, ಗೃಹೋಪಯೋಗಿ ವಸ್ತುಗಳು ಮತ್ತು ಸೌಂದರ್ಯವರ್ಧಕಗಳ ಅಂಗಡಿಗಳೊಂದಿಗೆ ಈ ಪರೀಕ್ಷೆಯನ್ನು ನಡೆಸಲಾಗಿದೆ. ಕಾರಣ ಈ ವಿಭಾಗಗಳಲ್ಲಿ ಹೆಚ್ಚು ನಕಲಿ ಮಾಡಲಾಗುತ್ತದಂತೆ.