Apple: ಆಪಲ್‌ ಡಿವೈಸ್‌ ಬಳಕೆದಾರರಿಗೆ ತುರ್ತು ಎಚ್ಚರಿಕೆ! ಈ ಗಂಭೀರ ಸಮಸ್ಯೆ ಸರಿಯಾಗಲು ಈಗಲೇ ಈ ಕೆಲಸ ಮಾಡಿ

ಆಪಲ್‌ (Apple) ಐಫೋನ್‌ ಹಾಗೂ ಇನ್ನಿತರೆ ಐಓಎಸ್‌ ಡಿವೈಸ್‌ಗಳು (iOS devices) ಬಳಕೆದಾರರಿಗೆ ಭಿನ್ನ ಅನುಭವ ನೀಡುತ್ತವೆ. ಈ ಡಿವೈಸ್‌ಗಳು ಉತ್ತಮ ಕಾರ್ಯಕ್ಷಮತೆ ಜೊತೆಗೆ ಅತ್ಯುತ್ತಮ ಭದ್ರತಾ ಫೀಚರ್ಸ್‌ ಆಯ್ಕೆಯನ್ನೂ ಸಹ ಪಡೆದುಕೊಂಡಿದೆ. ಅದಾಗ್ಯೂ ಸ್ಕ್ಯಾಮರ್‌ಗಳು (Scammers) ಈ ಫೋನ್‌ಗಳ ಮೇಲೆ ದಾಳಿ ಮಾಡಲು ನಿರಂತರವಾಗಿ ಕೆಲಸ ಮಾಡುತ್ತಲೇ ಇರುತ್ತಾರೆ.

ಹೌದು, ಹೆಚ್ಚಿನ ಭದ್ರತಾ ಫೀಚರ್ಸ್‌ ಆಯ್ಕೆ ಪಡೆದಿರುವ ಡಿವೈಸ್‌ಗಳು ಎಂದು ಕರೆಯಲಾಗುವ ಆಪಲ್‌ ಡಿವೈಸ್‌ಗಳಿಗೆ (Apple device) ಈಗ ಗಂಭೀರ ಎಚ್ಚರಿಕೆ ನೀಡಲಾಗಿದೆ. ಅಂದರೆ ಬಳಕೆದಾರರ ಡೇಟಾವನ್ನು ಹ್ಯಾಕರ್‌ಗಳಿಂದ ರಕ್ಷಣೆ ಮಾಡಲು ಹಾಗೂ ಡಿವೈಸ್‌ಗಳಲ್ಲಿನ ದೋಷವನ್ನು ಸರಿಪಡಿಸಲು ಆಪಲ್ ಐಫೋನ್‌ಗಳು, ಐಪ್ಯಾಡ್‌ಗಳಿಗೆ (iPhones, iPads) ತುರ್ತು ನವೀಕರಣಗಳನ್ನು ಬಿಡುಗಡೆ ಮಾಡಲಾಗಿದೆ. ಹಾಗಿದ್ರೆ, ಏನಿದು ದೋಷ?, ಯಾವೆಲ್ಲಾ ಡಿವೈಸ್‌ಗಳಿಗೆ ಸಮಸ್ಯೆ ಅನ್ನೋ ಮಾಹಿತಿ ಇಲ್ಲಿದೆ ನೋಡಿ.

ಆಪಲ್‌ ಡಿವೈಸ್‌ಗಳಲ್ಲಿ ಸಮಸ್ಯೆ: ಬಳಕೆದಾರರ ಡೇಟಾವನ್ನು ಹ್ಯಾಕರ್‌ಗಳಿಂದ ರಕ್ಷಣೆ ಮಾಡುವ ಸಲುವಾಗಿ ಶೂನ್ಯ-ದಿನದ ದೋಷಗಳನ್ನು(zero-day vulnerabilities) ಪರಿಹರಿಸಲು ಆಪಲ್ ನಿರ್ಣಾಯಕ ಭದ್ರತಾ ನವೀಕರಣಗಳನ್ನು ಬಿಡುಗಡೆ ಮಾಡಿದೆ. ಐಫೋನ್‌ಗಳು, ಐಪ್ಯಾಡ್‌ಗಳು ಮತ್ತು ಮ್ಯಾಕ್‌ಗಳ ಮೇಲೆ ಪರಿಣಾಮ ಬೀರುವ ಎರಡು ನಿರ್ಣಾಯಕ ಶೂನ್ಯ-ದಿನದ ದೋಷಗಳನ್ನು ಸರಿಪಡಿಸಲು ಆಪಲ್ ಈ ಗಂಭೀರ ಎಚ್ಚರಿಕೆ ನೀಡಿದೆ.

ವೆಬ್‌ಕಿಟ್ ಬ್ರೌಸರ್ ಎಂಜಿನ್‌ನಲ್ಲಿ ಕಂಡುಬರುವ ದುರ್ಬಲತೆಗಳು ದುರ್ಬಲ ಡಿವೈಸ್‌ಗಳಲ್ಲಿ ಸೂಕ್ಷ್ಮ ಮಾಹಿತಿಯನ್ನು ಪ್ರವೇಶಿಸಲು ಹ್ಯಾಕರ್‌ಗಳಿಗೆ ಅವಕಾಶ ಮಾಡಿಕೊಡಲಿವೆ ಎನ್ನಲಾಗಿದೆ. ಇವು 2023 ರಲ್ಲಿ ಆಪಲ್ ಕಂಡುಹಿಡಿದ ಮತ್ತು ಪರಿಹರಿಸಿದ 19 ನೇ ಮತ್ತು 20 ನೇ ಶೂನ್ಯ-ದಿನದ ದುರ್ಬಲತೆಗಳಾಗಿವೆ. ಆಪಲ್ ಎರಡು ನಿರ್ಣಾಯಕ ಭದ್ರತಾ ನ್ಯೂನತೆಗಳನ್ನು ಸರಿಪಡಿಸಲು ಭದ್ರತಾ ನವೀಕರಣಗಳನ್ನು ಬಿಡುಗಡೆ ಮಾಡುವ ಮೂಲಕ ತುರ್ತು ಕ್ರಮವನ್ನು ತೆಗೆದುಕೊಂಡಿದೆ.

ಈ ದೋಷಗಳು ಐಫೋನ್‌, ಐಪ್ಯಾಡ್‌ ಮತ್ತು ಮ್ಯಾಕ್‌ ಡಿವೈಸ್‌ಗಳ (iPhone, iPad and Mac devices) ಮೇಲೆ ಪರಿಣಾಮ ಬೀರುತ್ತವೆ. ಪ್ರಮುಖವಾಗಿ ಶೂನ್ಯ-ದಿನದ ದುರ್ಬಲತೆಗಳು ಸಾಫ್ಟ್‌ವೇರ್‌ನಲ್ಲಿನ ತೀವ್ರ ದೌರ್ಬಲ್ಯಗಳಾಗಿದ್ದು, ಸಾಫ್ಟ್‌ವೇರ್ ರಚನೆಕಾರರು ಈ ಬಗ್ಗೆ ತಿಳಿಯುವ ಮುನ್ನವೇ ಹ್ಯಾಕರ್‌ಗಳು ಈ ದೋಷವನ್ನು ದುರಪಯೋಗ ಮಾಡಿಕೊಳ್ಳುತ್ತಾರೆ ಎಂದು ಉಲ್ಲೇಖಿಸಲಾಗಿದೆ.

ಅದರಲ್ಲೂ ಆಪಲ್‌ನ ಡಿವೈಸ್‌ಗಳಲ್ಲಿ ಬಳಸಲಾಗುವ ವೆಬ್‌ಕಿಟ್ (WebKit) ಎಂಬ ವೆಬ್ ಬ್ರೌಸರ್ ಎಂಜಿನ್‌ನಲ್ಲಿ ಈ ನಿರ್ದಿಷ್ಟ ದೋಷಗಳು ಕಂಡುಬಂದಿವೆ. ಇದು ಆಕ್ರಮಣಕಾರರಿಗೆ ಸೂಕ್ಷ್ಮ ಮಾಹಿತಿಯನ್ನು ಪ್ರವೇಶಿಸಲು ಮತ್ತು ದುರುದ್ದೇಶಪೂರಿತ ವೆಬ್‌ಸೈಟ್‌ಗಳಿಗೆ ಭೇಟಿ ನೀಡುವಂತೆ ಬಳಕೆದಾರರನ್ನು ಮೋಸ ಮಾಡುವ ಕೆಲಸ ಮಾಡುತ್ತದೆ. ಈ ದುರ್ಬಲ ಡಿವೈಸ್‌ಗಳಲ್ಲಿ ಹಾನಿಕಾರಕ ಕೋಡ್ ಅನ್ನು ಕಾರ್ಯಗತಗೊಳಿಸಲು ಅವಕಾಶ ಮಾಡಿಕೊಡುತ್ತದೆ.

ಈ ಭದ್ರತಾ ಸಮಸ್ಯೆಗಳನ್ನು ಪರಿಹರಿಸಲು ಐಓಎಸ್‌ 17.1.2, ಐಪ್ಯಾಡ್‌ ಓಎಸ್ 17.1.2, ಮ್ಯಾಕ್‌ ಓಎಸ್‌ ಸೊನೊಮಾ 14.1.2, ಮತ್ತು ಸಫಾರಿ 17.1.2 ಚಾಲನೆಯಲ್ಲಿರುವ ಡಿವೈಸ್‌ಗಳಿಗೆ ಆಪಲ್‌ ತುರ್ತು ನವೀಕರಣಗಳನ್ನು ನೀಡಿದೆ. ಈ ಮೂಲಕ ಈ ಡಿವೈಸ್‌ಗಳಲ್ಲಿ ಕಂಡುಬಂದಿರುವ ಈ ದುರ್ಬಲತೆಗಳನ್ನು ಸ್ಕ್ಯಾಮರ್‌ಗಳು ಬಳಸಿಕೊಳ್ಳುವುದನ್ನು ತಡೆಯುವ ಗುರಿಯನ್ನು ಹೊಂದಲಾಗಿದೆ.

ಈ ಭದ್ರತಾ ಸಮಸ್ಯೆಯು ಐಫೋನ್‌ ಮಾಡೆಲ್‌ಗಳು ಎಕ್ಸ್‌ಎಸ್‌ ಮತ್ತು ನಂತರದ ಹಲವಾರು ಐಪ್ಯಾಡ್‌ ಮಾದರಿಗಳು ಅಂದರೆ ಐಪ್ಯಾಡ್‌ ಪ್ರೊ ಮತ್ತು ಐಪ್ಯಾಡ್‌ ಏರ್ ನಂತಹ ಡಿವೈಸ್‌ಗಳು ಹಾಗೂ ಮ್ಯಾಕ್‌ಒಎಸ್‌ನ ನಿರ್ದಿಷ್ಟ ಆವೃತ್ತಿಗಳನ್ನು ರನ್‌ ಮಾಡುವ ಮ್ಯಾಕ್‌ಗಳು ಸೇರಿದಂತೆ ವಿವಿಧ ಆಪಲ್‌ ಡಿವೈಸ್‌ಗಳ ಮೇಲೆ ಈಗಾಗಲೇ ಪರಿಣಾಮ ಬೀರಿದೆ ಎಂದು ತಿಳಿದುಬಂದಿದೆ.

ಇದನ್ನು ಪತ್ತೆ ಮಾಡಿದ್ದು ಯಾರು?: ಈ ಶೂನ್ಯ-ದಿನದ ದೋಷಗಳನ್ನು ಗೂಗಲ್‌ ನ ಥ್ರೆಟ್ ಅನಾಲಿಸಿಸ್ ಗ್ರೂಪ್ (TAG) ನಿಂದ ಭದ್ರತಾ ಸಂಶೋಧಕರಾದ ಕ್ಲೆಮೆಂಟ್ ಲೆಸಿಗ್ನೆ ಕಂಡುಹಿಡಿದಿದ್ದಾರೆ. ಈ ರೀತಿಯ ದಾಳಿಗಳನ್ನು ಆಪಲ್ ದೃಢೀಕರಿಸದಿದ್ದರೂ, ಈ ದಾಳಿಯನ್ನು ವಿಶೇಷವಾಗಿ ಪತ್ರಕರ್ತರು ಮತ್ತು ರಾಜಕಾರಣಿಗಳಂತಹ ಉನ್ನತ ವ್ಯಕ್ತಿಗಳ ವಿರುದ್ಧ ಮಾಡಲು ಬಳಕೆ ಮಾಡಲಾಗುತ್ತದೆ ಎಂದು ಉಲ್ಲೇಖಿಸಲಾಗಿದೆ.