ಬೌನ್ಸ್‌ EV ಸ್ಕೂಟರ್ ಡಿಸೆಂಬರ್ 2ಕ್ಕೆ ಲಾಂಚ್!..ಬ್ಯಾಟರಿ ಇಲ್ಲದೆ ಖರೀದಿಸಬಹುದು!

ಪ್ರಸ್ತುತ ಎಲೆಕ್ಟ್ರಿಕ್ ಸ್ಕೂಟರ್‌ಗಳು ಹೆಚ್ಚು ಜನಪ್ರಿಯತೆ ಪಡೆಯುತ್ತಿವೆ. ಈ ನಿಟ್ಟಿನಲ್ಲಿ ಸ್ಟಾರ್ಟ್‌ ಅಪ್‌ ಕಂಪನಿಗಳು ನೂತನವಾಗಿ ಎಲೆಕ್ಟ್ರಿಕ್ ಸ್ಕೂಟರ್‌ಗಳನ್ನು ಮಾರುಕಟ್ಟೆಗೆ ಪರಿಚಯಿಸುತ್ತಿವೆ. ಈ ಸಾಲಿಗೆ ಈಗ ಬೌನ್ಸ್‌ ಕಂಪನಿಯು ಸಹ ಸೇರ್ಪಡೆ ಆಗಿದೆ. ಬೌನ್ಸ್‌ ನೂತನವಾಗಿ ಬೌನ್ಸ್ ಇನ್ಫಿನಿಟಿ (Bounce Infinity) ಎಲೆಕ್ಟ್ರಿಕ್ ಸ್ಕೂಟರ್‌ (Electric Scooter)‌ ಅನ್ನು ಬಿಡುಗಡೆ ಮಾಡಲು ಸಜ್ಜಾಗಿದೆ. ಈ ಸ್ಕೂಟರ್ ಅನ್ನು ಭಾರತದಲ್ಲಿ ತಯಾರಿಸಲಾಗಿದೆ ಎಂದು ಕಂಪನಿ ಹೇಳಿಕೊಂಡಿದೆ.

ಬೌನ್ಸ್ ಸಂಸ್ಥೆಯು ಹೊಸ ಎಲೆಕ್ಟ್ರಿಕ್ ವಾಹನವನ್ನು ಇದೇ ಡಿಸೆಂಬರ್ 2 ರಂದು ದೇಶದಲ್ಲಿ ಬಿಡುಗಡೆ ಮಾಡಲಿದೆ. ಅದೇ ದಿನ ಮುಂಗಡ ಬುಕಿಂಗ್ ಸಹ ಪ್ರಾರಂಭವಾಗುತ್ತದೆ. ಹೊಸ ಬೌನ್ಸ್ EV ಸ್ಕೂಟರ್ ಖರೀದಿಸಲು ಇಚ್ಛಿಸುವ ಗ್ರಾಹಕರು ಕೇವಲ 499 ರೂ.ಗೆ ಬುಕ್ ಮಾಡಬಹುದು. ಇನ್ನು ಈ ಎಲೆಕ್ಟ್ರಿಕ್ ಸ್ಕೂಟರ್‌ನ ವಿತರಣೆ ಮುಂದಿನ ವರ್ಷ ಪ್ರಾರಂಭವಾಗುತ್ತವೆ. ಗ್ರಾಹಕರು ಈ ಎಲೆಕ್ಟ್ರಿಕ್ ಸ್ಕೂಟರ್ ಅನ್ನು ಬ್ಯಾಟರಿ ಇಲ್ಲದೇ ಖರೀದಿ ಮಾಡಬಹುದಾಗಿದೆ. ಅದೂ ಹೇಗೆ ಅಂತೀರಾ ಮುಂದೆ ಓದಿರಿ.

ಬ್ಯಾಟರಿ ಇಲ್ಲದೇ ಖರೀದಿಸಬಹುದು!
ಬೌನ್ಸ್ ಸಂಸ್ಥೆಯು ಈ ಎಲೆಕ್ಟ್ರಿಕ್ ಸ್ಕೂಟರ್‌ನಲ್ಲಿ 'Battery as a service' ಆಯ್ಕೆಯನ್ನು ಸಹ ನೀಡುತ್ತಿದೆ. ಗ್ರಾಹಕರು ಬ್ಯಾಟರಿ ಇಲ್ಲದೆಯೇ ಸ್ಕೂಟರ್ ಅನ್ನು ಖರೀದಿಸಬಹುದಾಗಿದೆ. ಇದರಿಂದ ಗ್ರಾಹಕರ ಬ್ಯಾಟರಿ ಹೊಂದಿರುವ ಸ್ಕೂಟರ್‌ಗಿಂತಲೂ ಶೇ.40 ರಷ್ಟು ಕಡಿಮೆ ವೆಚ್ಚದಲ್ಲಿ ಸ್ಕೂಟರ್ ಲಭ್ಯವಾಗಲಿದೆ. ಇನ್ನು ಬ್ಯಾಟರಿ ಇಲ್ಲದೆ ವಾಹನ ಖರೀದಿಸಿದರೆ ನಂತರ ಬೌನ್ಸ್‌ನ ಬ್ಯಾಟರಿ-ಸ್ವಾಪಿಂಗ್ ನೆಟ್‌ವರ್ಕ್ ಬಳಸಲು ಸಾಧ್ಯ. ಈ ಸೇವೆಯಲ್ಲಿ ಬೌನ್ಸ್‌ನ ಸ್ವಾಪಿಂಗ್ ನೆಟ್‌ವರ್ಕ್‌ನಿಂದ ಸಂಪೂರ್ಣವಾಗಿ ಚಾರ್ಜ್ ಮಾಡಿದ ಬ್ಯಾಟರಿಯೊಂದಿಗೆ ಖಾಲಿ ಬ್ಯಾಟರಿಯನ್ನು ವಿನಿಮಯ ಮಾಡಿಕೊಂಡಾಗ ಬ್ಯಾಟರಿ ಸ್ವಾಪ್‌ಗಳಿಗೆ ಮಾತ್ರ ಪಾವತಿಸಲು ಸಾಧ್ಯವಾಗುತ್ತದೆ.

ಬ್ಯಾಟರಿ ವಿಶೇಷ
ಬೌನ್ಸ್ ಸಂಸ್ಥೆಯ ಇನ್ಫಿನಿಟಿ ಎಲೆಕ್ಟ್ರಿಕ್ ಸ್ಕೂಟರ್ ಡಿಟ್ಯಾಚೇಬಲ್ ಲಿಥಿಯಂ-ಐಯಾನ್ ಬ್ಯಾಟರಿ ಅನ್ನು ಒಳಗೊಂಡಿರಲಿದೆ. ಗ್ರಾಹಕರು ಅಗತ್ಯವಿದ್ದರೆ ಈ ಬ್ಯಾಟರಿಯನ್ನು ಸ್ಕೂಟರ್‌ನಿಂದ ತೆಗೆಯಬಹುದು. ಅಲ್ಲದೇ ಅವರ ಅಗತ್ಯಕ್ಕೆ ಅನುಗುಣವಾಗಿ ಚಾರ್ಜ್ ಮಾಡಬಹುದು.

ಬೆಲೆಯ ಮಾಹಿತಿ
ಬೌನ್ಸ್ ಸಂಸ್ಥೆಯ ನೂತನ ಹೊಸ ಇನ್ಫಿನಿಟಿ ಎಲೆಕ್ಟ್ರಿಕ್ ಸ್ಕೂಟರ್ ಬೆಲೆಯ ಮಾಹಿತಿ ಅಧಿಕೃತವಾಗಿ ಬಹಿರಂಗಪಡಿಸಿಲ್ಲ. ಈ ಸ್ಕೂಟರ್ ಇದೇ ಡಿಸೆಂಬರ್ 2 ರಂದು ಭಾರತದಲ್ಲಿ ಅನಾವರಣ ಮಾಡಲಿದೆ. ಇನ್ನು ಬರಲಿರುವ ಈ ಹೊಸ ಇ ಸ್ಕೂಟರ್ ಓಲಾ ಇವಿ ಸ್ಕೂಟರ್ ಸೇರಿದಂತೆ ಕೆಲವು ಜನಪ್ರಿಯ ಇವಿ ಸ್ಕೂಟರ್‌ಗಳೊಂದಿಗೆ ಮಾರುಕಟ್ಟೆಯಲ್ಲಿ ಪೈಪೋಟಿ ಮಾಡಲಿದೆ ಎಂದು ಹೇಳಲಾಗುತ್ತಿದೆ.

ಹಾಗೆಯೇ ಓಲಾ ಕಂಪನಿಯ ಎಲೆಕ್ಟ್ರಿಕ್ ಸ್ಕೂಟರ್ ಸಹ ಗ್ರಾಹಕರ ಗಮನ ಸೆಳೆದಿದೆ. ಈ ಸ್ಕೂಟರ್ ಎರಡು ವೇರಿಯಂಟ್ ಆಯ್ಕೆಗಳಲ್ಲಿ ಸಿಗಲಿದೆ. ಓಲಾ ಇ-ಸ್ಕೂಟರ್‌ನ ಕೆಲವು ಫೀಚರ್ಸ್‌ ತಿಳಿಯೋಣ.

* ಓಲಾ ಇ-ಸ್ಕೂಟರ್‌ನ ಆಕರ್ಷಕ ಫೀಚರ್‌ ಎಂದರೇ ಇದನ್ನು ಹೋಮ್ ಚಾರ್ಜರ್‌ನೊಂದಿಗೆ ಬಿಡುಗಡೆ ಮಾಡಲಾಗುತ್ತಿದೆ. ಅಂದರೆ ಮನೆಯಲ್ಲಿ ಅಳವಡಿಸಲಾಗಿರುವ ಸಾಮಾನ್ಯ ಸಾಕೆಟ್ ನಿಂದ ಸ್ಕೂಟರ್ ಅನ್ನು ಚಾರ್ಜ್ ಮಾಡಬಹುದು.
* ಓಲಾ ಇ-ಸ್ಕೂಟರ್ ಗರಿಷ್ಠ ವೇಗ ಗಂಟೆಗೆ 90 ಕಿಮೀ ಆಗಿರುತ್ತದೆ.
* ಓಲಾ ಇ-ಸ್ಕೂಟರ್ ಅನ್ನು 18 ನಿಮಿಷಗಳಲ್ಲಿ 50% ವರೆಗೆ ಚಾರ್ಜ್ ಮಾಡಬಹುದು. ಅದಕ್ಕಾಗಿ ಇದು ವೇಗದ ಚಾರ್ಜಿಂಗ್ ಬೆಂಬಲದೊಂದಿಗೆ ಬರುತ್ತದೆ.
* ಸ್ಮಾರ್ಟ್ ಫೋನ್ ಸಂಪರ್ಕವು ಓಲಾ ಎಲೆಕ್ಟ್ರಿಕ್ ಸ್ಕೂಟರ್ ನಲ್ಲಿಯೂ ಲಭ್ಯವಿರುತ್ತದೆ.
* ಬೂಟ್ ಸ್ಥಳದ ದೃಷ್ಟಿಯಿಂದ ಇದು ಆಕರ್ಷಕವಾಗಿದೆ.
ಎರಡು ಹೆಲ್ಮೆಟ್‌ಗಳನ್ನು ಬೂಟ್ ಜಾಗದಲ್ಲಿ ಇಡುವ ಅವಕಾಶ ಹೊಂದಿರಲಿದೆ ಎಂದು ಹೇಳಲಾಗಿದೆ. ಸಾಮಾನ್ಯವಾಗಿ ಸ್ಕೂಟರ್‌ನ ಬೂಟ್ ಜಾಗದಲ್ಲಿ ಕೇವಲ ಒಂದು ಹೆಲ್ಮೆಟ್ ಅನ್ನು ಮಾತ್ರ ಇಡಲು ಸ್ಥಳಾವಕಾಶ ನೀಡಿರುತ್ತಾರೆ.