ಸ್ಮಾರ್ಟ್‌ಫೋನ್‌ ಕ್ಯಾಮೆರಾ ಲೆನ್ಸ್‌ಗಳಿಗೂ ಇನ್ನು ಕಾರ್ನಿಂಗ್ ಗೊರಿಲ್ಲಾ ಗ್ಲಾಸ್‌!

ಸ್ಮಾರ್ಟ್‌ಫೋನ್‌ಗಳ ಡಿಸ್‌ಪ್ಲೇಗಳನ್ನು ರಕ್ಷಿಸಲು ಬಳಸುವ ರಕ್ಷಣಾತ್ಮಕ ಗೊರಿಲ್ಲಾ ಗ್ಲಾಸ್‌ಗೆ ಹೆಸರುವಾಸಿಯಾದ ಕಾರ್ನಿಂಗ್ ಈಗ ಸ್ಮಾರ್ಟ್‌ಫೋನ್‌ ಕ್ಯಾಮೆರಾ ಲೆನ್ಸ್‌ಗಳಿಗೂ ಗೊರಿಲ್ಲಾ ಗ್ಲಾಸ್ ರಕ್ಷಣೆಯನ್ನು ಪರಿಚಯಿಸಿದೆ. ಗೊರಿಲ್ಲಾ ಗ್ಲಾಸ್ DX ಮತ್ತು ಗೊರಿಲ್ಲಾ ಗ್ಲಾಸ್ DX+ ಎಂದು ಕರೆಯಲ್ಪಡುವ ಕಾರ್ನಿಂಗ್ ಸುಧಾರಿತ ಆಪ್ಟಿಕಲ್ ಕಾರ್ಯಕ್ಷಮತೆ, ಉತ್ತಮ ಸ್ಕ್ರ್ಯಾಚ್ ಪ್ರತಿರೋಧ ಮತ್ತು ಬಾಳಿಕೆಗೆ ಭರವಸೆ ನೀಡುತ್ತದೆ.

ಕಂಪನಿಯ ಪ್ರಕಾರ, ಗೊರಿಲ್ಲಾ ಗ್ಲಾಸ್ ಡಿಎಕ್ಸ್ ಗಾಜಿನ ಸಂಯೋಜನೆಗಳು ಕ್ಯಾಮೆರಾ ಲೆನ್ಸ್‌ಗಾಗಿ ಶೇಕಡಾ 98 ರಷ್ಟು ಬೆಳಕನ್ನು ಸೆರೆಹಿಡಿಯುತ್ತವೆ. ಧರಿಸಬಹುದಾದ ಡಿವೈಸ್‌ಗಳಿಗೆ ಗೊರಿಲ್ಲಾ ಗ್ಲಾಸ್ ಡಿಎಕ್ಸ್ ಸ್ವಲ್ಪ ಸಮಯದವರೆಗೆ ಇದೆ. ಆದರೆ ಕಾರ್ನಿಂಗ್ ಸ್ಮಾರ್ಟ್‌ಫೋನ್ ಕ್ಯಾಮೆರಾ ಲೆನ್ಸ್ ಕವರ್‌ಗಳಿಗೆ ಅದೇ ತಂತ್ರಜ್ಞಾನವನ್ನು ತರುತ್ತಿರುವುದು ಇದೇ ಮೊದಲು.

ಬೆಳಕಿನ ಸೆರೆಹಿಡಿಯುವಿಕೆಯನ್ನು ಸುಧಾರಿಸಲು ಸಾಂಪ್ರದಾಯಿಕ ಕ್ಯಾಮೆರಾಗಳಲ್ಲಿ ಆಂಟಿ ರೆಫ್ಲೆಕ್ಟಿವ್ ಲೇಪನಗಳನ್ನು ದೀರ್ಘಕಾಲ ಬಳಸಲಾಗಿದೆ ಎಂದು ಕಾರ್ನಿಂಗ್ ಗೊರಿಲ್ಲಾ ಗ್ಲಾಸ್ ಉಪಾಧ್ಯಕ್ಷ ಮತ್ತು ಜನರಲ್ ಮ್ಯಾನೇಜರ್ ಜೇಮಿನ್ ಅಮೀನ್ ಹೇಳಿದರು. ಆದಾಗ್ಯೂ, ಈ ಲೇಪನಗಳು ಸುಲಭವಾಗಿ ಸ್ಕ್ರಾಚ್ ಮಾಡುವ ಪ್ರವೃತ್ತಿಯನ್ನು ಹೊಂದಿರುತ್ತವೆ. ಇದು ಫೋಟೊ ಗುಣಮಟ್ಟದ ಮೇಲೆ ಖುಣಾತ್ಮಕ ಪರಿಣಾಮ ಬೀರುತ್ತದೆ.

ಕಾರ್ನಿಂಗ್‌ನ ಗೊರಿಲ್ಲಾ ಗ್ಲಾಸ್ ಸಂಯೋಜನೆಗಳು ಸಾಂಪ್ರದಾಯಿಕ ಲೇಪನಗಳಿಗೆ ಹೋಲಿಸಿದರೆ ಮೊಬೈಲ್ ಡಿವೈಸ್‌ಗಳ ಕ್ಯಾಮೆರಾ ಲೆನ್ಸ್ ಕವರ್‌ಗಳನ್ನು ವರ್ಧಿತ ಸ್ಕ್ರಾಚ್ ಪ್ರತಿರೋಧ ಮತ್ತು ಬಾಳಿಕೆ ಒದಗಿಸುತ್ತವೆ. ಈ ಸಾಧನಗಳಿಗೆ ಅಗತ್ಯವಾದ ಸುಧಾರಿತ ಆಪ್ಟಿಕಲ್ ಕಾರ್ಯಕ್ಷಮತೆಯನ್ನು ಸಹ ಒದಗಿಸುತ್ತದೆ. ಗೊರಿಲ್ಲಾ ಗ್ಲಾಸ್ ಡಿಎಕ್ಸ್ + ನಲ್ಲಿ ನೀಲಮಣಿಗೆ ಹತ್ತಿರವಾದ ರಕ್ಷಣೆಯನ್ನು ಕಾರ್ನಿಂಗ್ ಭರವಸೆ ನೀಡುತ್ತದೆ.

ಸ್ಯಾಮ್‌ಸಂಗ್ ತನ್ನ ಉತ್ಪನ್ನಗಳಲ್ಲಿ ಗೊರಿಲ್ಲಾ ಗ್ಲಾಸ್ ಡಿಎಕ್ಸ್ ಅನ್ನು ಅಳವಡಿಸಿಕೊಂಡ ಮೊದಲ ಪ್ರಮುಖ ಸ್ಮಾರ್ಟ್‌ಫೋನ್ ಬ್ರಾಂಡ್ ಆಗಲಿದೆ. ಮುಂದಿನ ತಿಂಗಳು ಸ್ಯಾಮ್‌ಸಂಗ್ ಗ್ಯಾಲಕ್ಸಿ Z ಫೋಲ್ಡ್ 3 ಮತ್ತು ಸ್ಯಾಮ್‌ಸಂಗ್ ಗ್ಯಾಲಕ್ಸಿ Z ಫ್ಲಿಪ್ 3 ನಲ್ಲಿ ಈ ಗ್ಲಾಸ್‌ ಬಳಕೆಯನ್ನು ನಿರೀಕ್ಷಿಸಲಾಗಿದೆ ಎಂದು ಹೇಳಲಾಗಿದೆ. ಇತರ ಫೋನ್ ತಯಾರಕರು ಭವಿಷ್ಯದಲ್ಲಿ ಗೊರಿಲ್ಲಾ ಗ್ಲಾಸ್ ಡಿಎಕ್ಸ್ ಅನ್ನು ತಮ್ಮ ನೂತನ ಸ್ಮಾರ್ಟ್‌ಫೋನ್ ಕ್ಯಾಮೆರಾಗಳಲ್ಲಿ ಬಳಸುತ್ತಾರೆ ಎಂದು ನಾವು ಕಾದು ನೋಡಬೇಕಿದೆ.