ಸಿಕ್ಕಸಿಕ್ಕಲ್ಲಿ ಮೊಬೈಲ್‌ ಅನ್ನು ಚಾರ್ಜಿಂಗ್‌ಗೆ ಇಟ್ರೆ ಅಷ್ಟೇ.. ನಿಮ್ಮ ಖಾತೆಯಲ್ಲಿರುವ ಹಣ ಖಾಲಿ! ಏನಿದು ಜ್ಯೂಸ್ ಜಾಕಿಂಗ್?

ಸ್ಮಾರ್ಟ್‌ಫೋನ್‌ ಸಂಬಂಧ ಅದೆಷ್ಟೋ ಭದ್ರತಾ ಸಲಹೆಗಳನ್ನು ನೀಡಲಾಗುತ್ತಿದ್ದರೂ ಜನ ಮೋಸ ಹೋಗುತ್ತಲೇ ಇದ್ದಾರೆ. ಅದರಲ್ಲೂ ಸ್ಕ್ಯಾಮರ್‌ಗಳು ಮೋಸ ಮಾಡಲು ಹೊಸ ಹೊಸ ಮಾರ್ಗದ ಮೂಲಕ ಮುನ್ನೆಲೆಗೆ ಬರುತ್ತಿದ್ದು, ಇದೀಗ ಜ್ಯೂಸ್ ಜಾಕಿಂಗ್ (Juice Jacking Scam) ಹಗರಣ ಹೆಚ್ಚಾಗಿದೆ. ಇದರಿಂದಾಗಿ ಬಹಳ ಎಚ್ಚರಿಕೆಯಿಂದ ಸ್ಮಾರ್ಟ್‌ಫೋನ್‌ (Smartphone) ಬಳಕೆ ಮಾಡಬೇಕಿದೆ.

ಹೌದು, ಜನರು ತಮ್ಮ ಬಳಿ ಇರುವ ಸ್ಮಾರ್ಟ್‌ಫೋನ್, ಲ್ಯಾಪ್‌ಟಾಪ್ ಅಥವಾ ಟ್ಯಾಬ್ಲೆಟ್ ಸೇರಿದಂತೆ ಅನೇಕ ಡಿವೈಸ್‌ಗಳಲ್ಲಿ ಬ್ಯಾಟರಿ ಸಾಮರ್ಥ್ಯ ಕಡಿಮೆಯಾದರೆ ತಕ್ಷಣವೇ ಅದನ್ನು ಮರುಭರ್ತಿ ಮಾಡಲು ಮುಂದಾಗುವುದು ಸಾಮಾನ್ಯವಾದ ವಿಷಯ. ಅದರಲ್ಲೂ ಎಲ್ಲಾದರೂ ಹೊರಗಡೆ ಇದ್ದಾಗ ಸ್ಮಾರ್ಟ್‌ಫೋನ್‌ನಲ್ಲಿ ಬ್ಯಾಟರಿ ಸಾಮರ್ಥ್ಯ ಕಡಿಮೆಯಾದರೆ ಸಿಕ್ಕ ಸಿಕ್ಕಲ್ಲಿ ಸಾರ್ವಜನಿಕ ಸ್ಥಳದಲ್ಲಿನ ಚಾರ್ಜಿಂಗ್‌ ವ್ಯವಸ್ಥೆ ಬಳಕೆ ಮಾಡಲು ಹಲವರು ಮುಂದಾಗುತ್ತಾರೆ.

ಜ್ಯೂಸ್ ಜಾಕಿಂಗ್ : ಮನೆ ಅಥವಾ ಕಛೇರಿಯಿಂದ ಹೊರಗಿದ್ದಾಗ ಸಾರ್ವಜನಿಕ ಚಾರ್ಜಿಂಗ್ ಪಾಯಿಂಟ್‌ಗಳ (Charging point) ಅವಲಂಬನೆ ಸಾಮಾನ್ಯವಾಗಿದ್ದು, ಇದು ಜ್ಯೂಸ್ ಜಾಕಿಂಗ್‌ಗೆ ಅವಕಾಶ ಮಾಡಿಕೊಡುತ್ತಿದೆ ಎಂದು ತಿಳಿದುಬಂದಿದೆ. ಈ ನಡುವೆ ಆರ್‌ಬಿಐ ಸಹ ಎಚ್ಚರಿಕೆ ನೀಡಿದ್ದು, ಈ ವಂಚಕರು ಹಲವಾರು ಮಾಹಿತಿಯನ್ನು ಈ ಮೂಲಕ ಕದಿಯುತ್ತಾರೆ ಹಾಗೂ ಇದು ಹಣಕಾಸಿನ ನಷ್ಟಕ್ಕೂ ಕಾರಣವಾಗಬಹುದು ಎಂದು ತಿಳಿಸಿದೆ.

ದುರುದ್ದೇಶಪೂರಿತ ವ್ಯಕ್ತಿಗಳು ಯುಎಸ್‌ಬಿ ಪೋರ್ಟ್‌ಗಳು ಅಥವಾ ಚಾರ್ಜಿಂಗ್ ಕಿಯೋಸ್ಕ್‌ಗಳಂತಹ ಸಾರ್ವಜನಿಕ ಚಾರ್ಜಿಂಗ್ ಸ್ಟೇಷನ್‌ಗಳನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿರುವುದು ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗುತ್ತಿದೆ. ಬಳಕೆದಾರರ ಡಿವೈಸ್‌ಗಳಿಂದ ಡೇಟಾವನ್ನು ಕದಿಯಲು ಅಥವಾ ಸೋಂಕು ಉಂಟು ಮಾಡುವ ಕೆಲಸವನ್ನು ಇವರು ಮಾಡುತ್ತಿದ್ದಾರೆ. ಇನ್ನು ಈ ಜ್ಯೂಸ್ ಜಾಕಿಂಗ್ ಎಂಬ ಪದವು ಜ್ಯೂಸ್ ಅನ್ನು ಸಂಯೋಜಿಸುವ ಪದಗಳ ಮೇಲೆಯೇ ಆಧಾರಿತವಾಗಿದೆ. ಅಂದರೆ ವಿದ್ಯುತ್ ಶಕ್ತಿ ಅಥವಾ ಶಕ್ತಿಯ ಗ್ರಾಮ್ಯವಾಗಿ ಕರೆಯಲಾಗುತ್ತದೆ.

ಇದರಲ್ಲಿ ಏನೆಲ್ಲಾ ಕದಿಯಬಹುದು? : ನೀವು ಸಾರ್ವಜನಿಕ ಪ್ರದೇಶದಲ್ಲಿ ನಿಮ್ಮ ಮೊಬೈಲ್‌ ಅನ್ನ ಚಾರ್ಜಿಂಗ್‌ಗೆ ಇಟ್ಟಾಗ ವಂಚಕರು ಅಲ್ಲಿ ಸಂಪರ್ಕಗೊಂಡಿರುವ ಫೋನ್‌ಗಳಿಗೆ ಮಾಲ್‌ವೇರ್ ಅನ್ನು ವರ್ಗಾಯಿಸಬಹುದಾಗಿದೆ. ಜೊತೆಗೆ ಮೊಬೈಲ್ ಫೋನ್‌ನಿಂದ ಇಮೇಲ್‌ಗಳು, ಎಸ್‌ಎಮ್‌ಎಸ್‌, ಉಳಿಸಿದ ಪಾಸ್‌ವರ್ಡ್‌ಗಳು ಇತ್ಯಾದಿಗಳಂತಹ ಡೇಟಾ ಸೂಕ್ಷ್ಮ ಡೇಟಾವನ್ನು ಇವರು ಕದಿಯುತ್ತಾರೆ.

ಅದೆಲ್ಲಕ್ಕೂ ಮಿಗಿಲಾಗಿ ಈ ಜ್ಯೂಸ್ ಜಾಕಿಂಗ್ ಸಂಭಾವ್ಯವಾಗಿ ಹಣದ ನಷ್ಟಕ್ಕೆ ಕಾರಣವಾಗಬಹುದು ಎನ್ನಲಾಗಿದೆ. ಪಾಸ್‌ವರ್ಡ್‌ಗಳು, ಕ್ರೆಡಿಟ್ ಕಾರ್ಡ್ ಸಂಖ್ಯೆಗಳು ಅಥವಾ ಬ್ಯಾಂಕಿಂಗ್ ರುಜುವಾತುಗಳಂತಹ ಮಾಹಿತಿಯನ್ನು ಕದಿಯುವುದರಿಂದ ಸುಲಭವಾಗಿ ನಿಮ್ಮ ಬ್ಯಾಂಕ್‌ ಖಾತೆಯಲ್ಲಿರುವ ಹಣವನ್ನು ಸ್ಕ್ಯಾಮರ್‌ಗಳು ಕದಿಯಬಹುದಾಗಿದೆ. ಅದರಲ್ಲೂ ಜ್ಯೂಸ್ ಜಾಕಿಂಗ್ ಮಾಡಲು ಮುಂದಾಗುವವರು ಮೊದಲು ಹಣದ ವಿಚಾರಕ್ಕೆ ಎಂಟ್ರಿ ಕೊಡುತ್ತಾರೆ.

ಅದರಲ್ಲೂ ಒಮ್ಮೆ ಆಕ್ರಮಣಕಾರರು ನಿಮ್ಮ ಆನ್‌ಲೈನ್ ಬ್ಯಾಂಕಿಂಗ್ ಅಥವಾ ಹಣಕಾಸು ಖಾತೆಗಳಿಗೆ ಒಮ್ಮೆ ಎಂಟ್ರಿ ಕೊಟ್ಟರೆ ಅವರು ಮೋಸದ ವಹಿವಾಟುಗಳನ್ನು ನಡೆಸಲು ಸುಲಭವಾಗುತ್ತದೆ. ಇದರೊಂದಿಗೆ ಅವರು ಖರೀದಿಗಳನ್ನು ಮಾಡಬಹುದು, ನಿಮ್ಮ ಖಾತೆಗಳಿಂದ ಹಣವನ್ನು ವರ್ಗಾಯಿಸಬಹುದು ಅಥವಾ ನಿಮ್ಮ ಹೆಸರಿನಲ್ಲಿ ಹೊಸ ಕ್ರೆಡಿಟ್ ಲೈನ್‌ಗಳನ್ನು ತೆರೆಯಬಹುದು. ಅಷ್ಟಕ್ಕೂ ಈ ಜ್ಯೂಸ್ ಜಾಕಿಂಗ್ ಹೇಗೆ ಕಳ್ಳರಿಗೆ ಸಹಾಯಕ ಎಂಬುದನ್ನು ತಿಳಿಯೋಣ ಬನ್ನಿ.

ಟ್ರ್ಯಾಪ್ ಹೊಂದಿಸುತ್ತಾರೆ: ರೈಲು ನಿಲ್ದಾಣಗಳು, ಹೋಟೆಲ್‌ಗಳು ಅಥವಾ ಇತರ ಜನನಿಬಿಡ ಪ್ರದೇಶಗಳಲ್ಲಿ ಜನರು ತಮ್ಮ ಡಿವೈಸ್‌ಗಳನ್ನು ಚಾರ್ಜಿಂಗ್ ಹಾಕುವ ಸಾಧ್ಯತೆ ಹೆಚ್ಚಾಗಿಯೇ ಇರುತ್ತದೆ. ಈ ಕಾರಣಕ್ಕೆ ಇಲ್ಲಿ ಆಕ್ರಮಣಕಾರರು ದುರುದ್ದೇಶಪೂರಿತ ಸಾಫ್ಟ್‌ವೇರ್ ಅಥವಾ ಹಾರ್ಡ್‌ವೇರ್ ಅನ್ನು ಸಾರ್ವಜನಿಕ ಚಾರ್ಜಿಂಗ್ ಸ್ಟೇಷನ್‌ನಲ್ಲಿ ಇನ್‌ಸ್ಟಾಲ್‌ ಮಾಡುತ್ತಾರೆ.

ಪ್ರಚೋದನೆಗೊಳಿಸಬಹುದು: ಕೆಲವು ಕಡೆ ನೀವು ಗಮನಿಸಿರಬಹುದು. 'ಇಲ್ಲಿ ಉಚಿತ ಚಾರ್ಜಿಂಗ್‌ ಸೌಲಭ್ಯ ಲಭ್ಯ ಇದೆ' ಎಂದು ಲೇಬಲ್‌ ಮಾಡಲಾಗಿರುತ್ತದೆ. ಅದರಲ್ಲೂ ಇದನ್ನು ಯಾರೇ ಆದರೂ ಬಳಕೆ ಮಾಡಲು ಮುಂದೆ ಬರುವಂತೆ ಪ್ರಲೋಭಿಸಲು ಅಧಿಕೃತ ಚಾರ್ಜಿಂಗ್ ಪಾಯಿಂಟ್‌ನಂತೆ ಕಾಣುವಂತೆ ಅದನ್ನು ಮಾಡಿರುತ್ತಾರೆ. ಈ ಸ್ಟೋರ್‌ಗಳ ಬಗ್ಗೆ ಎಚ್ಚರಿಕೆ ವಹಿಸುವುದು ಅನಿವಾರ್ಯ.

ಡೇಟಾ ಕಳ್ಳತನ, ಮಾಲ್‌ವೇರ್ ಇನ್‌ಸ್ಟಾಲ್‌: ಮೊದಲೇ ತಿಳಿಸಿದಂತೆ ಈ ಜ್ಯೂಸ್ ಜಾಕಿಂಗ್ ನ ಮೊದಲ ಕೆಲಸ ಯುಎಸ್‌ಬಿ ಕೇಬಲ್ ಮೂಲಕ ಸಂಪರ್ಕಿಸಿದಾಗ, ಸ್ಟೇಷನ್‌ನಲ್ಲಿರುವ ದುರುದ್ದೇಶಪೂರಿತ ಸಾಫ್ಟ್‌ವೇರ್ ಅಥವಾ ಹಾರ್ಡ್‌ವೇರ್ ಡಿವೈಸ್‌ಗಳಿಗೆ ಎಂಟ್ರಿ ಕೊಡುತ್ತದೆ. ಇದರಿಂದ ಪಾಸ್‌ವರ್ಡ್‌ಗಳು, ಫೋಟೋಗಳು, ಸಂಪರ್ಕಗಳು ಅಥವಾ ಇತರ ವೈಯಕ್ತಿಕ ಮಾಹಿತಿಯಂತಹ ಸೂಕ್ಷ್ಮ ಡೇಟಾವನ್ನು ಕದಿಯುತ್ತದೆ.

ಅದರಲ್ಲೂ ಮಾಲ್‌ವೇರ್‌ ಏನಾದರೂ ಫೋನ್‌ನಲ್ಲಿ ಇನ್‌ಸ್ಟಾಲ್‌ ಆದರೆ ಚಾರ್ಜಿಂಗ್ ಸ್ಟೇಷನ್‌ನಿಂದ ಸಂಪರ್ಕ ಕಡಿತಗೊಂಡ ನಂತರವೂ ಡಿವೈಸ್‌ ಅನ್ನು ದೂರದಿಂದಲೇ ಕಂಟ್ರೋಲ್‌ ಮಾಡುವ ಆಯ್ಕೆಯನ್ನು ಈ ಆಕ್ರಮಣಕಾರರಿಗೆ ಪಡೆದಿರುತ್ತಾರೆ. ಈ ಕಾರಣಕ್ಕೆ ನೀವು ಎಂದಿಗೂ ಸಾರ್ವಜನಿಕ ಚಾರ್ಜಿಂಗ್‌ ಸ್ಟೇಷನ್‌ಗಳಿಗೆ ಮೊದಲ ಆದ್ಯತೆ ನೀಡಬೇಡಿ. ಅಷ್ಟಕ್ಕೂ ಚಾರ್ಜಿಂಗ್‌ ಮಾಡಲೇಬೇಕು ಎಂದರೆ ನಿಮ್ಮದೇ ಚಾರ್ಜರ್‌ ಬಳಕೆ ಮಾಡಿ.

ಹೆಚ್ಚುವರಿ ರಕ್ಷಣೆ ಉದ್ದೇಶದಿಂದ ಪಾಸ್‌ಕೋಡ್‌ಗಳು, ಫಿಂಗರ್‌ಪ್ರಿಂಟ್‌ಗಳು ಅಥವಾ ಮುಖದ ಗುರುತಿಸುವಿಕೆಯಂತಹ ನಿಮ್ಮ ಡಿವೈಸ್‌ನ ಭದ್ರತಾ ಫೀಚರ್ಸ್‌ಗಳನ್ನು ಸಕ್ರಿಯಗೊಳಿಸಿ.ಸಾರ್ವಜನಿಕ ವೈ-ಫೈ ನೆಟ್‌ವರ್ಕ್‌ಗಳನ್ನು ಬಳಸುವಾಗ ಜಾಗರೂಕರಾಗಿರಿ, ಅವು ಭದ್ರತಾ ಅಪಾಯಗಳನ್ನು ಹೆಚ್ಚಾಗಿ ಉಂಟುಮಾಡಬಹುದು. ಇದರೊಂದಿಗೆ ಅಸುರಕ್ಷಿತ ನೆಟ್‌ವರ್ಕ್‌ಗಳಲ್ಲಿ ಸೂಕ್ಷ್ಮ ಮಾಹಿತಿಯನ್ನು ಪ್ರವೇಶಿಸುವುದನ್ನು ಅಥವಾ ಹಣಕಾಸಿನ ವಹಿವಾಟುಗಳನ್ನು ನಡೆಸುವುದನ್ನು ತಪ್ಪಿಸಿ.