Google Maps: ಗೂಗಲ್‌‌ ಮ್ಯಾಪ್ಸ್‌ ನಲ್ಲಿ ಹೊಸ ಸೌಲಭ್ಯ! ಹತ್ತಿರದ EV ಚಾರ್ಜಿಂಗ್ ಸ್ಟೇಷನ್ ಸರ್ಚ್‌ ಬಲು ಸುಲಭ

ಗೂಗಲ್‌ ‌ಮ್ಯಾಪ್ಸ್ (Google Maps) ಇಂದು ವಿವಿಧ ರೀತಿಯಲ್ಲಿ ಬಳಕೆದಾರರಿಗೆ ಎಲ್ಲಾ ರೀತಿಯ ಅನುಕೂಲ ಮಾಡಿಕೊಡುತ್ತದೆ. ಈ ಮೂಲಕ ತಲುಪಬೇಕಾದ ಸ್ಥಳವನ್ನು ಸರಳವಾಗಿ ಯಾವುದೇ ಸಮಸ್ಯೆ ಇಲ್ಲದೆ ತಲುಪಬಹುದಾಗಿದೆ. ಈ ನಡುವೆ ಗೂಗಲ್‌‌ ‌ಮ್ಯಾಪ್ಸ್ ಬಳಕೆದಾರರಿಗೆ ಗುಡ್ ನ್ಯೂಸ್ ನೀಡಲಾಗಿದೆ.

ಹೌದು, ಎಲೆಕ್ಟ್ರಿಕ್ ವಾಹನಗಳ ಬಳಕೆ ಹೆಚ್ಚಾಗುತ್ತಿದ್ದು, ಈ ನಡುವೆ ಅವರಿಗೆ ಅನುಕೂಲ ಆಗುವ ಹಾಗೆ ಮಾಡಲು ಹಾಗೂ ಚಾರ್ಜ್‌ ಖಾಲಿಯಾಗಿ ಯಾವುದೇ ಸಮಸ್ಯೆಗಳನ್ನು ಅನುಭವಿಸಬಾರದು ಎಂದು ಗೂಗಲ್‌‌ ಮ್ಯಾಪ್‌ನಲ್ಲಿ ವಿಶೇಷ ಸೌಲಭ್ಯ ಕಲ್ಪಿಸಿಕೊಡಲಾಗುತ್ತಿದೆ. ಇದರಿಂದ ಎಲೆಕ್ಟ್ರಿಕ್ ವಾಹನ ಮಾಲೀಕರಿಗೆ ಚಾರ್ಜಿಂಗ್ ಸ್ಟೇಷನ್‌ಗಳನ್ನು ಸುಲಭವಾಗಿ ಹುಡುಕುವ ಗುರಿಯನ್ನು ಹೊಂದಲಾಗಿದೆ. ಹಾಗಿದ್ರೆ, ಇದು ಹೇಗೆ ಕೆಲಸ ಮಾಡಲಿದೆ ಬನ್ನಿ ನೋಡೋಣ.

ಇವಿ ವಾಹನಗಳಿಗೆ ಹೊಸ ಸೌಲಭ್ಯ: ಎಲೆಕ್ಟ್ರಿಕ್ ವಾಹನಗಳ ಸೇಲ್‌ ಹೆಚ್ಚಾಗುತ್ತಿದ್ದು, ಹೆಚ್ಚು ಹೆಚ್ಚು ಜನರು ಪರಿಸರ ಸ್ನೇಹಿ ಎಲೆಕ್ಟ್ರಿಕ್ ಕಾರುಗಳಿಗೆ (Eco-friendly electric car) ಬದಲಾಗುತ್ತಿದ್ದಾರೆ. ಈ ಬದಲಾವಣೆಯೊಂದಿಗೆ, ಇವಿ ಡ್ರೈವರ್‌ಗಳ ಸಂಬಂಧ ಪ್ರಮುಖ ಕಾಳಜಿ ವಹಿಸಲಾಗಿದ್ದು, ದೀರ್ಘ ಪ್ರಯಾಣದ ಸಮಯದಲ್ಲಿ ಹತ್ತಿರದ ಚಾರ್ಜಿಂಗ್ ಸ್ಟೇಷನ್ ಅನ್ನು ಪತ್ತೆ ಮಾಡುವುದು ಸೇರಿದಂತೆ ವಿವಿಧ ಸೌಲಭ್ಯ ಕಲ್ಪಿಸಿಕೊಡಲಿದೆ. ಇದಕ್ಕಾಗಿ ಸಹಾಯ ಮಾಡಲು ಗೂಗಲ್‌ ಮ್ಯಾಪ್ಸ್‌ ಹೊಸ ಫೀಚರ್ಸ್ ಅನ್ನು ನೀಡಲಾಗುತ್ತಿದೆ.

ನಿರ್ದಿಷ್ಟ ಚಾರ್ಜರ್ ಸ್ಥಳಗಳನ್ನು ಗುರುತಿಸುವುದರಿಂದ ಹಿಡಿದು ಆಯಕಟ್ಟಿನ ಚಾರ್ಜಿಂಗ್ ಸ್ಟಾಪ್‌ಗಳೊಂದಿಗೆ ರಸ್ತೆ ಪ್ರವಾಸಗಳನ್ನು ಯೋಜಿಸುವವರೆಗೆ ಗೂಗಲ್‌ ತನ್ನ ಇತ್ತೀಚಿನ ಬ್ಲಾಗ್ ಪೋಸ್ಟ್‌ನಲ್ಲಿ ಗೂಗಲ್‌ ಮ್ಯಾಪ್ ಮತ್ತು ಹುಡುಕಾಟಕ್ಕಾಗಿ ಇವಿ ಮಾಲೀಕತ್ವವನ್ನು ಎಂದಿಗಿಂತಲೂ ಸುಗಮಗೊಳಿಸಲು ವಿನ್ಯಾಸಗೊಳಿಸಲಾದ ಹೊಸ ಫೀಚರ್ಸ್‌ ಅನ್ನು ಘೋಷಣೆ ಮಾಡಿದೆ. ಹಾಗಿದ್ರೆ ಬನ್ನಿ ಯಾವೆಲ್ಲಾ ಫೀಚರ್ಸ್‌ ಹೇಗೆ ಅನುಕೂಲ ಆಗಲಿದೆ ನೋಡೋಣ.

ಎಐ ಚಾಲಿತ ಸಾರಾಂಶಗಳು: ಚಾರ್ಜಿಂಗ್ ಸ್ಟೇಷನ್‌ಗಳನ್ನು ಪತ್ತೆಹಚ್ಚುವುದು ಇವಿ ಮಾಲೀಕರಿಗೆ, ವಿಶೇಷವಾಗಿ ಪರಿಚಯವಿಲ್ಲದ ಪ್ರದೇಶಗಳು ಅಥವಾ ಬಹು-ಹಂತದ ಪಾರ್ಕಿಂಗ್ ಸ್ಥಳಗಳಂತಹ ಸಂಕೀರ್ಣ ಪರಿಸರಗಳಲ್ಲಿ ಸಾಮಾನ್ಯವಾಗಿ ಸವಾಲನ್ನು ಒಡ್ಡುತ್ತದೆ. ಈ ಸಮಸ್ಯೆಯನ್ನು ಪರಿಹರಿಸಲು, ಗೂಗಲ್‌‌ ಮ್ಯಾಪ್ಸ್ ಈಗ ಚಾರ್ಜರ್‌ಗಳ ಸ್ಥಳವನ್ನು ನಿಖರವಾಗಿ ಗುರುತಿಸಲು ಬಳಕೆದಾರರ ವಿಮರ್ಶೆಗಳಿಂದ ಪಡೆದ ಎಐ-ಚಾಲಿತ ಸಾರಾಂಶಗಳನ್ನು ತೋರಿಸುತ್ತದೆ. ಈ ಸಾರಾಂಶಗಳು ವಿವರವಾದ ಸೂಚನೆಗಳನ್ನು ನೀಡುತ್ತವೆ, ಬಳಕೆದಾರರು ಚಾರ್ಜಿಂಗ್ ಪಾಯಿಂಟ್‌ಗೆ ಸಲೀಸಾಗಿ ನ್ಯಾವಿಗೇಟ್ ಮಾಡಬಹುದು ಅನ್ನೋದನ್ನು ಖಚಿತಪಡಿಸುತ್ತದೆ.

ಇನ್-ಕಾರ್ ಮ್ಯಾಪ್‌: ಗೂಗಲ್‌ ಮ್ಯಾಪ್ ಇವಿ ಡ್ರೈವರ್‌ಗಳಿಗೆ ಹತ್ತಿರದ ಚಾರ್ಜಿಂಗ್ ಸ್ಟೇಷನ್‌ಗಳನ್ನು ನೇರವಾಗಿ ನಕ್ಷೆಯಲ್ಲಿ ಪ್ರದರ್ಶಿಸುವ ಮೂಲಕ ಕಾರಿನಲ್ಲಿ ನ್ಯಾವಿಗೇಷನ್ ಅನುಭವವನ್ನು ಹೆಚ್ಚಿಸುತ್ತಿದೆ. ಈ ಫೀಚರ್ಸ್‌ ಪೋರ್ಟ್ ಲಭ್ಯತೆ ಮತ್ತು ಚಾರ್ಜಿಂಗ್ ವೇಗದಲ್ಲಿ ನೈಜ-ಸಮಯದ ಡೇಟಾವನ್ನು ನೀಡಲಿದೆ. ಇದರಿಂದಾಗಿ ತಿಳುವಳಿಕೆಯುಳ್ಳ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಬಳಕೆದಾರರಿಗೆ ಅನುವು ಮಾಡಿಕೊಡುತ್ತದೆ. ಮುಂಬರುವ ತಿಂಗಳುಗಳಲ್ಲಿ ಜಾಗತಿಕ ರೋಲ್‌ಔಟ್ ಅನ್ನು ಯೋಜಿಸಲಾಗಿದ್ದು, ಈ ಅಪ್‌ಡೇಟ್ ಗೂಗಲ್‌ ಇನ್‌ಬಿಲ್ಟ್‌ ವಾಹನಗಳೊಂದಿಗೆ ಚಾಲಕರಿಗೆ ಹೆಚ್ಚಿನ ಅನುಕೂಲತೆಯನ್ನು ನೀಡಲಿದೆ.

ಸೂಚಿಸಲಾದ ಚಾರ್ಜಿಂಗ್ ಸ್ಟಾಪ್‌ಗಳು: ಗೂಗಲ್‌ ಮ್ಯಾಪ್‌ ಅದರ ಅಸ್ತಿತ್ವದಲ್ಲಿರುವ ಫೀಚರ್ಸ್‌ ಅನ್ನು ವರ್ಧಿಸುತ್ತದೆ. ಅದು ಗೂಗಲ್‌ ಇನ್‌ಬಿಲ್ಟ್‌ ವಾಹನಗಳಿಗೆ ಸೂಕ್ತವಾದ ಚಾರ್ಜಿಂಗ್ ಸ್ಥಳಗಳನ್ನು ಶಿಫಾರಸು ಮಾಡಲಿದ್ದು, ಈ ಕಾರ್ಯವು ಈಗ ಬಹು-ನಿಲುಗಡೆ ಪ್ರಯಾಣಗಳಿಗೆ ವಿಸ್ತರಿಸಿದೆ. ನೀವು ರಾಷ್ಟ್ರೀಯ ಉದ್ಯಾನವನಗಳಾದ್ಯಂತ ಬೇಸಿಗೆ ಸಾಹಸವನ್ನು ಮಾಡಬಹುದಾಗಿದೆ. ಗೂಗಲ್‌ ಮ್ಯಾಪ್‌ ನಿಮ್ಮ ಕಾರಿನ ಬ್ಯಾಟರಿ ಮಟ್ಟವನ್ನು ವಿಶ್ಲೇಷಿಸಲಿದ್ದು, ಬುದ್ಧಿವಂತಿಕೆಯಿಂದ ದಾರಿಯುದ್ದಕ್ಕೂ ಚಾರ್ಜಿಂಗ್ ಸ್ಟಾಪ್‌ಗಳನ್ನು ಸೂಚಿಸುತ್ತದೆ. ಸುಗಮ ಮತ್ತು ಚಿಂತೆ-ಮುಕ್ತ ಪ್ರವಾಸವನ್ನು ಖಚಿತಪಡಿಸುತ್ತದೆ.

ಇವಿ ಫಿಲ್ಟರ್: ಗೂಗಲ್‌.ಕಾಮ್/ಟ್ರಾವಲ್‌ ನಲ್ಲಿ ಗೂಗಲ್‌ ಹೊಸ ಇವಿ ಫಿಲ್ಟರ್ ಅನ್ನು ಸಹ ಪರಿಚಯಿಸುತ್ತಿದೆ. ಈ ಫಿಲ್ಟರ್ ಆನ್-ಸೈಟ್ ಇವಿ ಚಾರ್ಜಿಂಗ್ ಸ್ಟೇಷನ್‌ಗಳನ್ನು ಹೊಂದಿರುವ ಹೋಟೆಲ್‌ಗಳನ್ನು ಹುಡುಕಲು ಬಳಕೆದಾರರನ್ನು ಅನುಮತಿಸುತ್ತದೆ. ರೋಡ್ ಟ್ರಿಪ್‌ನಿಂದ ಆರಾಮದಾಯಕ ವಾಸ್ತವ್ಯಕ್ಕೆ ತಡೆರಹಿತ ಪರಿವರ್ತನೆಯನ್ನು ನೀಡಲಿದ್ದು, ಇದನ್ನು ಗೂಗಲ್‌ ಸರ್ಚ್‌ ಇಂಟರ್‌ಫೇಸ್‌ನಲ್ಲಿ ಕಾಣಬಹುದಾಗಿದೆ.

ಗೂಗಲ್‌ ಹೇಳಿಕೆ ಪ್ರಕಾರ, ಈ ಹೊಸ ಅಪ್‌ಡೇಟ್‌ಗಳು ಇವಿ ಮಾಲೀಕರಿಗೆ ಸುಲಭವಾಗಿ ಚಾರ್ಜಿಂಗ್ ಸ್ಟೇಷನ್‌ಗಳನ್ನು ಹುಡುಕಲು ಮತ್ತು ಪ್ರವೇಶಿಸಲು, ರಸ್ತೆ ಪ್ರವಾಸಗಳನ್ನು ಯೋಜಿಸಲು ಮತ್ತು ಚಾರ್ಜಿಂಗ್ ಸ್ಟೇಷನ್‌ಗಳ ಕುರಿತು ಸಹಾಯಕವಾದ ಮಾಹಿತಿಯನ್ನು ನೀಡಲಿವೆ. ಮುಂಬರುವ ತಿಂಗಳುಗಳಲ್ಲಿ ಗೂಗಲ್‌ ಇನ್‌ಬಿಲ್ಟ್‌ ವಾಹನಗಳೊಂದಿಗೆ ಪ್ರಾರಂಭವಾಗುವ ಫೀಚರ್ಸ್‌ಗಳು ಜಾಗತಿಕವಾಗಿ ಲಭ್ಯವಿರುತ್ತವೆ ಎಂದು ತಿಳಿದುಬಂದಿದೆ.