ಸರ್ಕಾರೇತರ ಸಂಸ್ಥೆಗಳಿಗೆ ಆಧಾರ್ ದೃಢೀಕರಣ ಪವರ್‌ ನೀಡಲು ಮುಂದಾದ ಸರ್ಕಾರ: ನಿಮ್ಮ ಸಲಹೆ ಏನು?

ಆಧಾರ್ ಕಾರ್ಡ್ ಅನ್ನು ಪ್ಯಾನ್ ಕಾರ್ಡ್‌ಗೆ ಲಿಂಕ್‌ ಮಾಡುವಲ್ಲಿ ದೇಶದ ಜನರು ಬ್ಯೂಸಿ ಆಗಿರುವಾಗಲೇ ಈಗ ಆಧಾರ್‌ ಸಂಬಂಧ ಸರ್ಕಾರ ಮಹತ್ವದ ಮಾಹಿತಿ ನೀಡಿದೆ. ಅಂದರೆ ಇನ್ಮುಂದೆ ಖಾಸಗಿ ಸಂಸ್ಥೆಗಳಿಗೆ ಆಧಾರ್‌ ಈ ಪ್ರಯೋಜನ ಲಭ್ಯವಾಗುವಂತೆ ಮಾಡಲಾಗುತ್ತಿದೆ. ಇದಕ್ಕಾಗಿಯೇ ಆಧಾರ್‌ನಲ್ಲಿನ ನಿಯಮಗಳಲ್ಲಿ ಸರ್ಕಾರ ಕೆಲವು ಬದಲಾವಣೆ ಮಾಡಲು ಸಜ್ಜಾಗಿದೆ.

ಹೌದು, ಆಧಾರ್ ದೃಢೀಕರಣಕ್ಕೆ ಆಧಾರ್‌ ಕಾರ್ಡ್‌ ಅನ್ನು ಬಳಕೆ ಮಾಡಲು ಸರ್ಕಾರೇತರ ಸಂಸ್ಥೆಗಳಿಗೆ ಅವಕಾಶ ನೀಡಲು ಕೇಂದ್ರ ಸರ್ಕಾರ ಪ್ರಸ್ತಾಪಿಸಿದೆ. ಈ ಮೂಲಕ ಖಾಸಗಿ ಸಂಸ್ಥೆಗಳು ಸಹ ಆಧಾರ್ ದೃಢೀಕರಣ ಮಾಡಬಹುದಾಗಿದೆ. ಹಾಗಿದ್ರೆ, ಸರ್ಕಾರ ಯಾಕೆ ನಿರ್ಧಾರ ಮಾಡಿದೆ?, ಇದರಿಂದ ದೇಶದ ಜನರಿಗೆ ಆಗುವ ಅನುಕೂಲ ಏನು?, ಈ ರೀತಿ ಮಾಡಿದ್ರೆ ಸರ್ಕಾರದ ಭದ್ರತೆಗೆ ಸಮಸ್ಯೆ ಉಂಟಾಗುವುದಿಲ್ಲವೇ ಎಂಬಿತ್ಯಾದಿ ಮಾಹಿತಿಯನ್ನು ತಿಳಿದುಕೊಳ್ಳಿ.

ಆಧಾರ್ ದೃಢೀಕರಣ: ಸರ್ಕಾರದ ಯಾವುದೇ ಯೋಜನೆಯ ಲಾಭ ಪಡೆಯಲು ಆಧಾರ್ ಕಾರ್ಡ್ ಅಗತ್ಯವಿದೆ. ಆದರೆ, ಈಗ ಸರ್ಕಾರಿ ಕಚೇರಿಯ ಹೊರತಾಗಿ ಖಾಸಗಿ ಸಂಸ್ಥೆಗಳಿಂದ ದೃಢೀಕರಣಕ್ಕಾಗಿ ಆಧಾರ್ ಬಳಸುವ ನಿಯಮಗಳನ್ನು ರೂಪಿಸುವ ಕೆಲಸ ನಡೆಯುತ್ತಿದೆ. ಈ ಸಂಬಂಧ ಎಲೆಕ್ಟ್ರಾನಿಕ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಮೇ 5, 2023 ರವರೆಗೆ ಈ ವಿಷಯದ ಬಗ್ಗೆ ಜನರಿಂದ ಸಲಹೆಗಳನ್ನು ಕೇಳಿದೆ.

ಇನ್ನು ದೇಶದ ಜನರ ಅಗತ್ಯ ಮಾಹಿತಿಗಳೆಲ್ಲಾ ಆಧಾರ್‌ಗೆ ಲಿಂಕ್‌ ಆಗಿದ್ದು, ಈ ಮೂಲಕ ಆಧಾರ್‌ ಹೆಚ್ಚಿನ ಮಹತ್ವ ಪಡೆದುಕೊಂಡಿದೆ. ಈ ಕಾರಣಕ್ಕೆ ಆಧಾರ್ ದೃಢೀಕರಣವನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಮಾತ್ರ ಬಳಕೆ ಮಾಡುತ್ತವೆ. ಆದರೆ, ಇನ್ಮುಂದೆ ಖಾಸಗಿ ಸಂಸ್ಥೆಗಳು ಸಹ ಇದನ್ನು ಬಳಕೆ ಮಾಡುವಂತೆ ಅನುವು ಮಾಡಿಕೊಡಲು ಸರ್ಕಾರ ಮುಂದಾಗಿದೆ.

ಸರ್ಕಾರ ಯಾಕೆ ಈ ನಿರ್ಧಾರ ಮಾಡಿದೆ?: ಸರ್ಕಾರದ ಮಾಹಿತಿಯಂತೆ ದೇಶದ ಜನಜೀವನವನ್ನು ಸುಲಭಗೊಳಿಸುವುದು, ಸೇವೆಗಳನ್ನು ಪ್ರತಿಯೊಬ್ಬರಿಗೂ ತಲುಪಿಸುವುದಂತೆ. ಈ ಮೂಲಕ ಜನರ ಜೀವನ ಉತ್ತಮವಾಗಿರುತ್ತದೆ ಎಂದಿದೆ. ಇದಕ್ಕಾಗಿಯೇ ಆಧಾರ್ ದೃಢೀಕರಣವನ್ನು ಬಳಸಲು ಬಯಸುವ ಎಲ್ಲಾ ಸರ್ಕಾರೇತರ ಸಂಸ್ಥೆಗಳಿಗೆ ಕೇಂದ್ರ ಸರ್ಕಾರವು ಈ ಕರಡನ್ನು ಕಳುಹಿಸಿದ್ದು, ಈ ಕುರಿತು ಅವರಿಂದ ಸಲಹೆಗಳನ್ನು ಸ್ವೀಕಾರ ಮಾಡಲು ಮುಂದಾಗಿದೆ. ಇದಾದ ನಂತೆ ಮತ್ತೆ ಮಾಹಿತಿ ತಂತ್ರಜ್ಞಾನ ಸಚಿವಾಲಯಕ್ಕೆ ಈ ಮಾಹಿತಿ ರವಾನೆ ಆಗಲಿದೆ.

ಈ ಸಂಬಂಧ ನೀವು ನಿಮ್ಮ ಅಭಿಪ್ರಾಯ ಹಂಚಿಕೊಳ್ಳಿ: ಇನ್ನು ಖಾಸಗಿ ಸಂಸ್ಥೆಗಳು, ಎನ್‌ಜಿಓಗಳು ಸೇರಿದಂತೆ ಸಾರ್ವಜನಿಕರು ಸಹ ಈ ವಿಷಯದ ಬಗ್ಗೆ ಪ್ರತಿಕ್ರಿಯೆ ನೀಡಲು ಅವಕಾಶ ಕಲ್ಪಿಸಿಕೊಡಲಾಗಿದೆ. ಇದಕ್ಕೆ ಮೇ 2023 ರ ವರೆಗಿನ ದಿನಾಂಕವನ್ನು ನಿಗದಿ ಪಡಿಸಲಾಗಿದೆ. ಈ ಸಲಹೆಗಳನ್ನು ಸರ್ಕಾರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯಕ್ಕೆ ಕಳುಹಿಸಲಾಗುತ್ತಿದ್ದು, ಆಧಾರ್‌ನ ಪ್ರಸ್ತಾವಿತ ಬದಲಾವಣೆಗಳನ್ನು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ ಅಧಿಕೃತ ವೆಬ್‌ಸೈಟ್‌ನಲ್ಲಿ ನೀವು ಗಮನಿಸಬಹುದು.

ಆಧಾರ್ ಕಾರ್ಡ್ ಯಾಕೆ ಮುಖ್ಯ: ಆಧಾರ್‌ ಎಂಬುದು ದೇಶದ ಪ್ರತಿಯೊಬ್ಬರ ಪ್ರಜೆಯ ಬಳಿ ಇರಬೇಕಾದ ಅಗತ್ಯ ದಾಖಲೆಯಾಗಿದ್ದು, ಈ ಆಧಾರ್‌ ಮೂಲಕ ಬಳಕೆದಾರರು ಶಾಲೆ, ಕಾಲೇಜು ಪ್ರವೇಶದಿಂದ ಹಿಡಿದು ಪ್ರಯಾಣದವರೆಗಿನ ಎಲ್ಲ ಕೆಲಸಗಳಿಗೂ ಬಳಕೆ ಮಾಡಿಕೊಳ್ಳಬಹುದಾಗಿದೆ. ಇದಿಷ್ಟು ಮಾತ್ರವಲ್ಲದೆ ಸರ್ಕಾರದ ಹಾಗೂ ಖಾಸಗಿ ಸಂಸ್ಥೆಗಳ ಸೇವೆಯನ್ನು ಈ ಮೂಲಕ ಸುಲಭವಾಗಿ ಪಡೆದುಕೊಳ್ಳಬಹುದು.

ನಿಯಮ ಬದಲಾದ ನಂತರ ಆಗುವ ಬದಲಾವಣೆ ಏನು?: ಪಾಸ್‌ವರ್ಡ್‌ ಅಥವಾ ಓಟಿಪಿ ಮೂಲಕ ಆಧಾರ್ ದೃಢೀಕರಣ ಮಾಡಲು ಸರ್ಕಾರಿ ಸಂಸ್ಥೆಗಳಿಗೆ ಮಾತ್ರ ಅನುಕೂಲ ನೀಡಲಾಗಿತ್ತು. ಆದರೆ, ಜನರು ಖಾಸಗಿ ಸಂಸ್ಥೆಗಳಿಂದಲೂ ಹಲವು ಸೇವೆ ಪಡೆಯುತ್ತಿರುವ ಕಾರಣ ಈ ಅಧಿಕಾರವನ್ನು ಅವರಿಗೂ ನೀಡುವುದು ಸರ್ಕಾರದ ಗುರಿ.ಆದರೆ, ಖಾಸಗಿ ಸಂಸ್ಥೆಗಳು ಯಾವೆಲ್ಲಾ ವಿಷಯಗಳಿಗೆ ಆಧಾರ್‌ ದೃಡೀಕರಣವನ್ನು ಪಡೆದುಕೊಳ್ಳುತ್ತವೆ ಎಂಬ ಬಗ್ಗೆ ನಿಖರವಾಗಿ ತಿಳಿದಿಲ್ಲ. ಜೊತೆಗೆ ಭದ್ರತಾ ವಿಚಾರಕ್ಕೆ ಏನೆಲ್ಲಾ ನಿಯಮಗಳನ್ನು ಪಾಲನೆ ಮಾಡಲಾಗುತ್ತದೆ ಎಂಬುದನ್ನೂ ತಿಳಿಸಿಲ್ಲ.