Honor: ಕಣ್ ಕಣ್ಣ ಸಲಿಗೆ... ಈ ಹಾನರ್‌ ಫೋನ್‌ನಲ್ಲಿ ಕಣ್ಣಿಂದಲೇ ಸಂವಹನ ಮಾಡಬಹುದು!

ಕೆಲವು ದಿನಗಳ ಹಿಂದಷ್ಟೇ ಸ್ನಾಪ್‌ಡ್ರಾಗನ್ 8 ಜನ್ 3 SoC (Snapdragon 8 Gen 3 SoC) ಪ್ರೊಸೆಸರ್‌ ಅನ್ನು ಪರಿಚಯಿಸಲಾಗಿದೆ. ಈ ಮೂಲಕ ಇನ್ಮುಂದೆ ಲಾಂಚ್ ಆಗುವ ಸ್ಮಾರ್ಟ್‌ಫೋನ್‌ಗಳು ಈ ಹೊಸ ಪ್ರೊಸೆಸರ್ ಹೊಂದಲಿವೆ ಎಂದು ತಿಳಿದುಬಂದಿದೆ. ಆದರೆ, ಕೆಲವು ಮಾಹಿತಿ ಪ್ರಕಾರ ಸದ್ಯಕ್ಕೆ ಬೆರಳೆಣಿಕೆಯ ಸ್ಮಾರ್ಟ್‌ಫೋನ್‌ಗಳಲ್ಲಿ ಮಾತ್ರ ಇದು ಕಂಡುಬರಲಿದ್ದು, ಈ ವಿಭಾಗದಲ್ಲಿ ಹಾನರ್ (Honor)‌ ಫೋನ್‌ ಸಹ ಇದೆ.

ಹೌದು, ಹೊಸ ಪ್ರೊಸೆಸರ್‌ನೊಂದಿಗೆ ಯಾವ ಸ್ಮಾರ್ಟ್‌ಫೋನ್‌ಗಳು ಮಾರುಕಟ್ಟೆಗೆ ಎಂಟ್ರಿ ನೀಡಲಿವೆ ಎಂಬ ಕುತೂಹಲ ಸಾಕಷ್ಟು ಗ್ರಾಹಕರಲ್ಲಿ ಮನೆ ಮಾಡಿದೆ. ಈ ನಡುವೆ ಶಿಯೋಮಿ 14 ಸರಣಿಯ ಫೋನ್‌ಗಳಲ್ಲಿ ಈ ಹೊಸ ಪ್ರೊಸೆಸರ್‌ ಬಗ್ಗೆ ಎಲ್ಲರಿಗೂ ತಿಳಿದಿದೆ. ಈ ನಡುವೆ ಹಾನರ್‌ ಫೋನ್‌ನಲ್ಲೂ ಈ ಪ್ರೊಸೆಸರ್‌ ಇರಲಿದೆ ಎಂದು ಹೇಳಲಾಗುತ್ತಿದೆ. ಹಾಗಿದ್ರೆ ಈ ಪ್ರೊಸೆಸರ್‌ ಹೊಂದಿರುವ ಫೋನ್‌ನ ವಿಶೇಷತೆ ಏನು? ಯಾವಾಗ ಈ ಫೋನ್‌ ಅನ್ನು ಲಾಂಚ್ ಮಾಡಲಾಗುತ್ತದೆ ಎಂಬ ಮಾಹಿತಿ ಇಲ್ಲಿದೆ ನೋಡಿ.

ಹಾನರ್‌ ಫೋನ್‌ನಲ್ಲಿ ಹೊಸ ಪ್ರೊಸೆಸರ್‌: ಹಾನರ್‌ ಇದೀಗ ತನ್ನ ಹಾನರ್ ಮ್ಯಾಜಿಕ್ 6 ಸ್ಮಾರ್ಟ್‌ಫೋನ್‌ನಲ್ಲಿ (Honor Magic 6 Smartphone) ಸ್ನಾಪ್‌ಡ್ರಾಗನ್ 8 ಜನ್ 3 ಚಿಪ್‌ಸೆಟ್‌ ಅನ್ನು ಪರಿಚಯಿಸಲಿದೆ. ಈ ಬಗ್ಗೆ ಹಾನರ್‌ ಸ್ವತಃ ಮಾಹಿತಿ ದೃಢಪಡಿಸಿದೆ. ಈ ಸ್ಮಾರ್ಟ್‌ಫೋನ್ ಮ್ಯಾಜಿಕ್ ಕ್ಯಾಪ್ಸುಲ್ (magic capsule) ಎಂಬ ಐ ಟ್ರ್ಯಾಕಿಂಗ್‌ಗೆ (Eye tracking) ಸಂಬಂಧಿಸಿದ ಪ್ರಮುಖ ಫೀಚರ್ಸ್ ಹೊಂದಿರುವುದು ವಿಶೇಷವಾದ ಸಂಗತಿಯಾಗಿದೆ.

ಈ ಮ್ಯಾಜಿಕ್ ಕ್ಯಾಪ್ಸುಲ್ ಎನ್ನುವುದು ಬಳಕೆದಾರರಿಗೆ ತಮ್ಮ ಕಣ್ಣುಗಳನ್ನು ಬಳಕೆ ಮಾಡಿಕೊಂಡು ಈ ಸ್ಮಾರ್ಟ್‌ಫೋನ್‌ನೊಂದಿಗೆ ಸಂವಹನ ನಡೆಸಬಹುದಾಗಿದೆ. ಈ ಫೀಚರ್ಸ್‌ ಆಪಲ್‌ನ ಡೈನಾಮಿಕ್ ಐಲ್ಯಾಂಡ್‌ನಂತೆಯೇ ಕಾಣುತ್ತಿದ್ದು, ಆಂಡ್ರಾಯ್ಡ್‌ ಬಳಕೆದಾರರಿಗೆ ಭಿನ್ನ ಅನುಭವ ನೀಡಲಿದೆ. ಇನ್ನು ಡಿಸ್ಪ್ಲೇನಲ್ಲಿ ಯಾವುದೇ ಕಂಟೆಂಟ್‌ನೊಂದಿಗೆ ತೊಡಗಿಸಿಕೊಳ್ಳಲು ಇದು ನಿಮ್ಮನ್ನು ಅನುಮತಿಸುತ್ತದೆ.

ಈಗಾಗಲೇ ಹಾನರ್ ಈ ತಂತ್ರಜ್ಞಾನ ಹೇಗಿದೆ ಎಂಬುದರ ಡೆಮೊ ವಿಡಿಯೋವನ್ನೂ ಸಹ ಶೇರ್ ಮಾಡಿಕೊಂಡಿದೆ. ಇದರಲ್ಲಿ ಹಾನರ್ ಮ್ಯಾಜಿಕ್ 6 ಸ್ಮಾರ್ಟ್‌ಫೋನ್ ಅನ್ನು ಕೈಯಲ್ಲಿ ಹಿಡಿದುಕೊಂಡು ಮ್ಯಾಜಿಕ್ ಕ್ಯಾಪ್ಸುಲ್ ಅನ್ನು ನೋಡುತ್ತಿರುವ ಮಹಿಳೆಯನ್ನು ಕಾಣಬಹುದು. ಅವರು ದೃಷ್ಟಿಗೋಚರವಾಗಿ ಸ್ಮಾರ್ಟ್‌ಫೋನ್‌ ಡಿಸ್‌ಪ್ಲೇಯನ್ನು ಬಳಕೆ ಮಾಡುತ್ತಿದ್ದಾರೆ. ಆದರೆ ಹಾನರ್‌ ತನ್ನ ಮ್ಯಾಜಿಕ್ 6s ಸ್ಮಾರ್ಟ್‌ಫೋನ್ ಬಿಡುಗಡೆ ದಿನಾಂಕವನ್ನು ಇನ್ನೂ ಸಹ ಬಹಿರಂಗಪಡಿಸಿಲ್ಲ. ಹಾನರ್ ಮ್ಯಾಜಿಕ್ 5 ಸರಣಿಯಂತೆಯೇ ಇದು 2024 ರ ಮೊದಲ ತ್ರೈಮಾಸಿಕದಲ್ಲಿ ಲಾಂಚ್‌ ಆಗುವ ನಿರೀಕ್ಷೆ ಇದೆ.

ಇದರೊಂದಿಗೆ ಈ ವಿಶೇಷ ಸ್ಮಾರ್ಟ್‌ಫೋನ್‌ ದೊಡ್ಡ ಭಾಷಾ ಮಾದರಿಯಿಂದ (LLM) ಚಾಲಿತವಾಗಿರುವ ಆನ್‌ಬೋರ್ಡ್ ಕೃತಕ ಬುದ್ಧಿಮತ್ತೆಯೊಂದಿಗೆ ಕಾಣಿಸಿಕೊಳ್ಳಲಿದೆಯಂತೆ. ಇದನ್ನು ಹೊರತುಪಡಿಸಿ ಈ ಸ್ಮಾರ್ಟ್‌ಫೋನ್ ಕುರಿತು ಯಾವುದೇ ಇತರೆ ಮಾಹಿತಿ ಬಹಿರಂಗವಾಗಿಲ್ಲ. ಆದರೆ ಮುಂದಿನ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಸ್ಮಾರ್ಟ್‌ಫೋನ್ ಅಧಿಕೃತವಾಗಿ ಬಿಡುಗಡೆಯಾಗಲಿದೆ ಎಂದಷ್ಟೇ ನಿರೀಕ್ಷೆ ಮಾಡಬಹುದಾಗಿದೆ.

ಇನ್ನು ಹಾನರ್ ಮ್ಯಾಜಿಕ್ 5 ಸ್ಮಾರ್ಟ್‌ಫೋನ್‌ ಮತ್ತು ಹಾನರ್ ಮ್ಯಾಜಿಕ್ 5 ಪ್ರೊ ಸ್ಮಾರ್ಟ್‌ಫೋನ್‌ ಅನ್ನು ಕಳೆದ ಫೆಬ್ರವರಿಯಲ್ಲಿ ಲಾಂಚ್‌ ಮಾಡಲಾಗಿತ್ತು. ಈ ಎರಡೂ ಸ್ಮಾರ್ಟ್‌ಫೋನ್‌ಗಳು ಸ್ನಾಪ್‌ಡ್ರಾಗನ್ 8 ಜನ್ 2 SoC ಪ್ರೊಸೆಸರ್‌ ಬಲ ಪಡೆದುಕೊಂಡಿದೆ. ಈ ಮೂಲಕ ಬಳಕೆದಾರರು ಈ ಫೋನ್‌ ನಲ್ಲಿ ಉತ್ತಮ ಅನುಭವವನ್ನು ಪಡೆದುಕೊಳ್ಳುವಂತಾಗಿದೆ. ಅಷ್ಟೇ ಅಲ್ಲದೆ ಹೊಸ ರೀತಿಯ ಫೀಚರ್ಸ್‌ ಸಹ ಈ ಫೋನ್‌ನಲ್ಲಿದೆ.

ಉಳಿದಂತೆ ಸ್ನಾಪ್‌ಡ್ರಾಗನ್ 8 ಜನ್ 3 ಚಿಪ್‌ಸೆಟ್‌ನೊಂದಿಗೆ ಮೊದಲ ಶಿಯೋಮಿ 14 ಸರಣಿಯ ಬೆಲೆಗೆ ಸಂಬಂಧಿಸಿದಂತೆ, ಶಿಯೋಮಿ 14 ಪ್ರೊ ನ ಮೂಲ ರೂಪಾಂತರವನ್ನು ಭಾರತೀಯ ರೂಪಾಯಿಗಳಲ್ಲಿ ಸುಮಾರು 56,500 ಕ್ಕೆ ಲಾಂಚ್‌ ಮಾಡಲಾಗಿದೆ. ಜೊತೆಗೆ ಶಿಯೋಮಿ 14 ಸ್ಮಾರ್ಟ್‌ಫೋನ್‌ನ ಮೂಲ ರೂಪಾಂತರಕ್ಕೆ 50,000 ರೂ.ಗಳನ್ನು ನಿಗದಿ ಮಾಡಲಾಗಿದೆ. ಇದರೊಂದಿಗೆ ಹೊಸ ಚಿಪ್‌ಸೆಟ್‌ ಭಾರತಕ್ಕೆ ಕಾಲಿಡಲಿದೆ.