Apple Event 2023: ಆಪಲ್ ಲಾಂಚ್‌ ಈವೆಂಟ್ ಲೈವ್‌ಸ್ಟ್ರೀಮ್ ಅನ್ನು ಹೇಗೆ ವೀಕ್ಷಿಸುವುದು? ಏನೆಲ್ಲಾ ಲಾಂಚ್‌ ಆಗಲಿವೆ?

ಆಪಲ್‌ನ (Apple) ಹೊಸ ಡಿವೈಸ್‌ಗಳ ಲಾಂಚ್‌ ಸಮಾರಂಭ ಇಂದು ನಡೆಯಲಿದ್ದು, ಈ ಕ್ಷಣಕ್ಕಾಗಿ ಒಂದು ವರ್ಷದಿಂದ ಕಾಯುತ್ತಿದ್ದ ಅದೆಷ್ಟೋ ಆಪಲ್‌ ಪ್ರಿಯರಿಗೆ ಇಂದು ಸಂತಸದ ಸುದ್ದಿಯಾಗಿರಲಿದೆ. ಈ ವಂಡರ್ಲಸ್ಟ್ ಈವೆಂಟ್‌ನಲ್ಲಿ (Apple Wonderlust event) ಕನಿಷ್ಠ ನಾಲ್ಕು ಹೊಸ ಐಫೋನ್‌ಗಳು ಮತ್ತು ಎರಡು ವಾಚ್ ಮಾದರಿಗಳನ್ನು ನೋಡಬಹುದಾಗಿದೆ.

ಹೌದು, ಇಡೀ ಜಗತ್ತೇ ಕಾತುರದಿಂದ ಕಾಯುತ್ತಿದ್ದ ಆಪಲ್ ವಂಡರ್ಲಸ್ಟ್ ಈವೆಂಟ್‌ಗೆ ಕ್ಷಣಗಣನೆ ಆರಂಭ ಆಗಿದೆ. ಈವರೆಗೂ ಐಫೋನ್‌ನ ಮುಂದಿನ ಸರಣಿಯ ಸ್ಮಾರ್ಟ್‌ಫೋನ್‌ಗಳ ಬಗ್ಗೆ ಕೇವಲ ವದಂತಿ ವರದಿಗಳನ್ನು ಮಾತ್ರ ನೋಡುತ್ತಿದ್ದೆವು. ಆದರೆ, ಈಗ ಮುಂದಿನ ಸರಣಿಯ ಐಫೋನ್‌ಗಳು ಏನೆಲ್ಲಾ ವಿಶೇಷ ಫೀಚರ್ಸ್‌ ಹೊಂದಿವೆ?, ಬೆಲೆ ಎಷ್ಟು, ಆಪಲ್‌ ಏನೆಲ್ಲಾ ಹೊಸ ಗ್ಯಾಜೆಟ್‌ ವಿಚಾರಗಳನ್ನು ಘೋಷಣೆ ಮಾಡಲಿದೆ ಎಂಬುದನ್ನು ತಿಳಿಯಬಹುದಾಗಿದೆ. ಹಾಗಿದ್ರೆ, ತಡಯಾಕೆ ಬನ್ನಿ ಈ ವಿಶೇಷ ಲಾಂಚ್‌ ಈವೆಂಟ್‌ ಅನ್ನು ವೀಕ್ಷಣೆ ಮಾಡುವುದು ಹೇಗೆ ಎಂದು ತಿಳಿದುಕೊಳ್ಳಿ.

WWDC 2023 ರ ನಂತರ, ಆಪಲ್ ಮತ್ತೊಂದು ಈವೆಂಟ್‌ನೊಂದಿಗೆ ಇಂದು ಸದ್ದು ಮಾಡಲಿದೆ. ಈ ಈವೆಂಟ್‌ ನಲ್ಲಿ ಹಾರ್ಡ್‌ವೇರ್ ಮೇಲೆ ಹೆಚ್ಚು ಗಮನಹರಿಸಲಾಗಿದ್ದು, ಹಿಂದಿನ ಲಾಂಚ್ ಟೈಮ್‌ಲೈನ್‌ಗಳ ಪ್ರಕಾರ, ಇಂದು ರಾತ್ರಿ ನಾಲ್ಕು ಹೊಸ ಐಫೋನ್‌ಗಳನ್ನು ಆಪಲ್‌ ವಂಡರ್‌ಲಸ್ಟ್ ಈವೆಂಟ್‌ನಲ್ಲಿ ಕಾಣಬಹುದಾಗಿದೆ. ಅಂದರೆ ಐಫೋನ್ 15, ಐಫೋನ್ 15, ಐಫೋನ್ 15 ಪ್ರೊ, ಮತ್ತು ಐಫೋನ್ 15 ಪ್ರೊ ಮ್ಯಾಕ್ಸ್‌ ಫೋನ್‌ಗಳು ಲಾಂಚ್‌ ಆಗಲಿವೆ.

ಕೆಲವು ಮಾಹಿತಿಗಳ ಪ್ರಕಾರ ಉನ್ನತ ರೂಪಾಂತರವನ್ನು ಐಫೋನ್ 15 ಪ್ರೊ ಮ್ಯಾಕ್ಸ್‌ ಅಥವಾ ಐಫೋನ್ 15 ಅಲ್ಟ್ರಾ ಎಂದು ಕರೆಯಲಾಗುತ್ತದೆ ಎನ್ನಲಾಗಿದೆ. ಅಷ್ಟೇ ಅಲ್ಲದೆ ಹೆಚ್ಚುವರಿಯಾಗಿ ಆಪಲ್ ಎರಡು ಸ್ಮಾರ್ಟ್ ವಾಚ್ ಮಾದರಿಗಳನ್ನು ಈ ವೇಳೆ ಅನಾವರಣ ಮಾಡಲಾಗಿದೆ. ಆ ವಾಚ್‌ಗಳೆಂದರೆ ಆಪಲ್‌ ವಾಚ್‌ ಸೀರಿಸ್ 9 ಮತ್ತು ಐಫೋನ್‌ ವಾಚ್‌ ಅಲ್ಟ್ರಾ 2.

ಆಪಲ್ ವಂಡರ್ಲಸ್ಟ್ ಈವೆಂಟ್ ಅನ್ನು ವೀಕ್ಷಣೆ ಮಾಡುವುದು ಹೇಗೆ? : ಪ್ರತಿ ವರ್ಷವೂ ಸಹ ಈ ವಿಶೇಷ ಸಂಭ್ರಮ ಹಲವಾರು ಜನರಿಗೆ ಹಬ್ಬದ ವಾತಾವರಣ ಉಂಟು ಮಾಡುತ್ತದೆ. ಹಾಗಂದ ಮಾತ್ರಕ್ಕೆ ಲಾಂಚ್‌ ಈವೆಂಟ್‌ನಲ್ಲಿಯೇ ಭಾಗವಹಿಸಬೇಕು ಅಂತೇನಿಲ್ಲ. ಬದಲಾಗಿ ನೀವು ಆನ್‌ಲೈನ್‌ ಮೂಲಕವೇ ನೇರವಾಗಿ ಈ ಈವೆಂಟ್‌ ಅನ್ನು ವೀಕ್ಷಣೆ ಮಾಡಬಹುದು. ಇದಕ್ಕಾಗಿ ನೀವು ಅಧಿಕೃತ ಆಪಲ್‌ ಯೂಟ್ಯೂಬ್‌ಚಾನಲ್‌ (Apple YouTube Channel) ನೋಡಿದರೆ ಸಾಕು. ಈ ಈವೆಂಟ್‌ 10:30 PM ನಿಂದ ಆರಂಭ ಆಗಲಿದೆ.

ಇದರೊಂದಿಗೆ ಗಿಜ್‌ಬಾಟ್‌ ಕನ್ನಡದಲ್ಲೂ (GizBot Kannada) ಸಹ ಎಲ್ಲಾ ಆಪಲ್‌ನ ಡಿವೈಸ್‌ಗಳ ಬಗ್ಗೆ ಸವಿವರವನ್ನು ನೀಡಲಾಗುತ್ತದೆ. ಅಂದರೆ ಹೊಸದಾಗಿ ಲಾಂಚ್‌ ಆದ ಫೋನ್‌ಗಳ ಬೆಲೆ ವಿವರ, ಫೀಚರ್ಸ್‌, ಜೊತೆಗೆ ವಾಚ್‌ಗಳ ಸವಿವರ ಹಾಗೂ ಇನ್ನಿತರೆ ಅಗತ್ಯ ಮಾಹಿತಿಯನ್ನು ಈ ವೇಳೆ ನೀಡಲಾಗುತ್ತದೆ. ಈ ಮೂಲಕ ಯಾರಿಗೆಲ್ಲಾ ಮುಂದಿನ ಸರಣಿಯ ಆಪಲ್‌ ಡಿವೈಸ್‌ಗಳ ಬಗ್ಗೆ ಆಸಕ್ತಿ ಇದೆಯೋ ಅವರು ಸುಲಭವಾಗಿ ಮಾಹಿತಿ ಪಡೆದುಕೊಳ್ಳಬಹುದು.

ಈ ಈವೆಂಟ್‌ನಲ್ಲಿ ಏನನ್ನು ನಿರೀಕ್ಷಿಸಬಹುದು? : ಕಳೆದ ವರ್ಷದ ಐಫೋನ್ 14 ಮಾದರಿಗಳಂತೆಯೇ ಈಗ ಐಫೋನ್ 15 ಫೋನ್‌ಗಳು ಲಾಂಚ್ ಆಗಲಿವೆ. ಆದರೆ, ಈ ವಿಭಾಗದಲ್ಲಿ ಕೆಲವು ಬದಲಾವಣೆ ಆಗಲಿದೆ ಎಂದು ತಿಳಿದುಬಂದಿದೆ. ಅಂದರೆ ಐಫೋನ್‌ಗಳ ಗಾತ್ರದಲ್ಲಿ ಬದಲಾವಣೆ ಕಂಡುಬರಲಿದೆ ಎಂದು ನಿರೀಕ್ಷೆ ಮಾಡಲಾಗಿದೆ. ಐಫೋನ್ 15 ಮತ್ತು ಐಫೋನ್ 15 ಪ್ರೊ 6.1 ಇಂಚಿನ ಡಿಸ್‌ಪ್ಲೇ ಆಯ್ಕೆ ಹೊಂದಿರಲಿವೆ ಎನ್ನಲಾಗಿದೆ.

ಜೊತೆಗೆ ಐಫೋನ್ 15 ಪ್ಲಸ್‌ ಮತ್ತು ಐಫೋನ 15 ಪ್ರೊ ಮ್ಯಾಕ್ಸ್‌ ಅಥವಾ ಐಫೋನ್‌ 15 ಅಲ್ಟ್ರಾ 6.7 ಇಂಚಿನ ಡಿಸ್‌ಪ್ಲೇ ಹೊಂದಿರಲಿದೆ ಎಂದು ತಿಳಿದುಬಂದಿದೆ. ಈ ಮೂಲಕ ಈವರೆಗೂ ಲಾಂಚ್‌ ಆಗಿರುವ ಐಫೋನ್‌ಗಳಲ್ಲಿ ಮಹತ್ವದ ಬದಲಾವಣೆ ಎನ್ನಬಹುದು. ಇದರೊಂದಿಗೆ ಆಪಲ್ ಎರಡು ವರ್ಷಗಳ ಕಾಲ ಐಫೋನ್ ಮಿನಿ ಜೊತೆ ಪ್ರಯೋಗ ಸಹ ಮಾಡಿದೆ. ಆದರೆ ಕಳಪೆ ಮಾರಾಟದ ಹಿನ್ನೆಲೆ ಕಳೆದ ವರ್ಷ ಪ್ಲಸ್ ರೂಪಾಂತರವನ್ನು ಪರಿಚಯಿಸಿತ್ತು.

ಇನ್ನು ಐಫೋನ್‌ 15 ಹೊಸ ದರ್ಜೆಯನ್ನು ಒಳಗೊಂಡಿರುತ್ತದೆ ಎಂದು ನಿರೀಕ್ಷಿಸಲಾಗಿದೆ. ಐಫೋನ್‌ 15 ಮತ್ತು ಐಫೋನ್‌ 15 ಪ್ಲಸ್‌ ನಲ್ಲಿ ಡೈನಾಮಿಕ್ ನಾಚ್‌ನ ಚೊಚ್ಚಲ ಪ್ರವೇಶವನ್ನು ಕಾಣಬಹುದಾಗಿದ್ದು, ಈ ನಿರ್ದಿಷ್ಟ ದರ್ಜೆಯ ವಿನ್ಯಾಸವನ್ನು ಐಫೋನ್ 14 ಪ್ರೊ ಶ್ರೇಣಿಯಲ್ಲಿ ಈ ಹಿಂದೆ ಪರಿಚಯಿಸಲಾಗಿದೆ. ಇದು ನೋಟಿಫಿಕೇಶನ್ ಆಧಾರದ ಮೇಲೆ ಆಕಾರ ಮತ್ತು ಗಾತ್ರವನ್ನು ಸರಿಹೊಂದಿಸಿಕೊಳ್ಳುತ್ತದೆ.

ಜೊತೆಗೆ ಕೆಲವು ವದಂತಿಗಳ ಪ್ರಕಾರ ಐಫೋನ್ 15 ಪ್ರೋ ಹೊಸ ದರ್ಜೆಯನ್ನು ಸಹ ಹೊಂದಿದೆ. ಆದರೂ ಇದು ಅಸ್ತಿತ್ವದಲ್ಲಿರುವ ಡೈನಾಮಿಕ್ ಐಲ್ಯಾಂಡ್ ನಾಚ್‌ನಲ್ಲಿ ಬದಲಾಣೆ ಹೊಂದಬಹುದು ಎಂದು ನಿರೀಕ್ಷೆ ಮಾಡಲಾಗಿದೆ. ಉಳಿದಂತೆ ಈ ಎಲ್ಲಾ ಹೊಸ ಐಫೋನ್‌ಗಳು ಹೊಸ SoC ಅನ್ನು ಪಡೆಯುತ್ತವೆ. ಸಾಮಾನ್ಯ ಮಾದರಿಗಳು A16 ಬಯೋನಿಕ್ SoC ಅನ್ನು ಹೊಂದಿರಲಿದ್ದು, ಪ್ರೋ ಮಾದರಿ ಹೊಸ 3nm ಫ್ಯಾಬ್ರಿಕೇಶನ್ ಪ್ರಕ್ರಿಯೆಯ ಆಧಾರದ ಮೇಲೆ A17 SoC ಅನ್ನು ಹೊಂದಿರುತ್ತದೆ ಎಂದು ಹೇಳಲಾಗಿದೆ.

ಇದಿಷ್ಟು ಮಾತ್ರವಲ್ಲದೆ ಹೊಸ ಕ್ಯಾಮರಾ ಸಾಮರ್ಥ್ಯಗಳನ್ನು ಅನ್‌ಲಾಕ್‌ ಮಾಡಬಹುದು ಎಂದು ನಿರೀಕ್ಷೆ ಮಾಡಲಾಗಿದೆ. ಐಫೋನ್ 15 ಮತ್ತು ಐಫೋನ್ 15 ಪ್ಲಸ್‌ 12 ಮೆಗಾಪಿಕ್ಸೆಲ್ ಸೆನ್ಸರ್‌ ಬದಲಾಗಿ 48 ಮೆಗಾಪಿಕ್ಸೆಲ್ ಪ್ರಾಥಮಿಕ ಸೆನ್ಸರ್‌ ಹೊಂದಿರಬಹುದು ಎನ್ನಲಾಗಿದೆ. ಜೊತೆಗೆ ಪ್ರೊ ಮಾದರಿಗಳು ಉತ್ತಮ ಪೋಟ್ರೇಟ್ ಶಾಟ್‌ಗಳಿಗಾಗಿ ಪೆರಿಸ್ಕೋಪ್ ಕ್ಯಾಮೆರಾವನ್ನು ಒಳಗೊಂಡಿರುವ ನಿರೀಕ್ಷೆಯಿದೆ.

ಇದೆಲ್ಲಕ್ಕಿಂತ ಪ್ರಮುಖ ಬದಲಾವಣೆ ಎಂದರೆ ಎಲ್ಲಾ ಐಫೋನ್ 15 ಮಾದರಿಗಳಲ್ಲಿ USB-C ಪೋರ್ಟ್‌ನ ಸೇರ್ಪಡೆಯನ್ನು ಕಾಣಬಹುದಾಗಿದೆ. ಮತ್ತೊಂದೆಡೆ, ಆಪಲ್ ವಾಚ್ ಸರಣಿ 9 ಮತ್ತು ಆಪಲ್ ವಾಚ್ ಅಲ್ಟ್ರಾ 2 ಹೊಸ ಸೆನ್ಸರ್‌ ಆಯ್ಕೆ ಪಡೆಯಬಹುದು ಎಂದು ನಿರೀಕ್ಷ ಮಾಡಲಾಗಿದೆ. ಹೊಸ ಆಪಲ್ ವಾಚ್‌ಗಳು ಐಫೋನ್‌ಗಳು ಮತ್ತು ಇತರ ಆಪಲ್ ಡಿವೈಸ್‌ಗಳೊಂದಿಗೆ ಉತ್ತಮ ಸಂಪರ್ಕಕ್ಕಾಗಿ ನವೀಕರಿಸಿದ ಹಾರ್ಟ್‌ ಸೆನ್ಸರ್‌ ಮತ್ತು U2 ಚಿಪ್‌ಸೆಟ್ ಅನ್ನು ಪಡೆಯುವ ನಿರೀಕ್ಷೆಯಿದೆ.

ಇಲ್ಲಿ ಗಮನಿಸಬೇಕಾದ ವಿಷಯ ಏನೆಂದರೆ ಹೊಸ ಐಫೋನ್‌ಗಳು ಮತ್ತು ವಾಚ್‌ಗಳು ಈ ವರ್ಷ ಹೆಚ್ಚು ದುಬಾರಿಯಾಗುವ ನಿರೀಕ್ಷೆಯಿದೆ. ಮತ್ತೊಂದು ಕಡೆ ಜಾಗತಿಕ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯ ಕಳಪೆ ಸ್ಥಿತಿಯಿಂದ ಕೂಡಿದ್ದು, ಇದರ ಆಧಾರದ ಮೇಲೆ ಬೆಲೆ ನಿರ್ಧರಿಸಿದರೆ ಬೆಲೆ ಕಡಿಮೆಯೇ ಇರಬಹುದು ಎಂದೂ ಸಹ ಹೇಳಲಾಗುತ್ತದೆ. ಅದರಲ್ಲೂ ಧರಿಸಬಹುದಾದ ಗ್ಯಾಜೆಟ್‌ಗಳ ಮಾರುಕಟ್ಟೆ ಕನಿಷ್ಠ ಭಾರತದಲ್ಲಿ ಸ್ಥಿರವಾಗಿ ಹೆಚ್ಚುತ್ತಿದೆ.