ನಕಲಿ IRCTC ವೆಬ್‌ಸೈಟ್‌ ಹಾವಳಿ!..ಯಾಮಾರಿದ್ರೆ ದುಡ್ಡು ಹರೋಹರ!

ಹೌದು, IRCTC ವೆಬ್‌ಸೈಟ್‌ ಹೋಲುವ ನಕಲಿ ವೆಬ್‌ಸೈಟ್‌ಗಳನ್ನು ವಂಚಕರು ರಚಿಸಿದ್ದು, ಟೂರ್ ಪ್ಯಾಕೇಜ್ ಬುಕ್ಕಿಂಗ್ ಆಫರ್ ಘೋಷಿಸಿರುವ ಘಟನೆಗಳು ನಡೆದಿವೆ. ಈ ನಿಟ್ಟಿನಲ್ಲಿ ಭಾರತೀಯ ರೈಲ್ವೆ ಟಿಕೆಟ್ ಬುಕ್ಕಿಂಗ್ ಪೋರ್ಟಲ್ ಐಆರ್‌ಸಿಟಿಸಿ-IRCTC ಸಂಸ್ಥೆಯು ‌ಪ್ರಯಾಣಿಕರು ಟೂರ್ ಪ್ಯಾಕೇಜ್ ಬುಕ್ಕಿಂಗ್ ಮಾಡುವಾಗ ನಕಲಿ ವೆಬ್‌ಸೈಟ್‌ಗಳ ಬಗ್ಗೆ ಜಾಗೃತವಾಗಿರಬೇಕು ಎಂದು ಹೇಳಿದೆ.

ನಕಲಿ ವೆಬ್‌ಸೈಟ್‌ಗಳ ಮೂಲಕ ವಂಚಕರು ನೀಡುವ ವಿಶೇಷ ಟೂರ್/ಪ್ರವಾಸದ ಪ್ಯಾಕೇಜ್ ಆಫರ್‌ಗಳ ಆಸೆಗೊಳಗಾಗಬಾರದು ಎಂದು IRCTC ಸಂಸ್ಥೆಯು ಈಗಾಗಲೇ ತನ್ನ ಬಳಕೆದಾರರಿಗೆ ಇ-ಮೇಲ್ ಮೂಲಕ ಎಚ್ಚರಿಕೆಯ ಸಂದೇಶ ಕಳುಹಿಸಿದೆ. ವಂಚಕರು ರಚಿಸಿರುವ ನಕಲಿ ವೆಬ್‌ಸೈಟ್‌ ಬಹುತೇಕ ಪೋರ್ಟಲ್ ಹೋಲುವಂತೆ ಇದೆ. ಹೀಗಾಗಿ ಟೂರ್ ಪ್ಯಾಕೇಜ್ ಬುಕ್ ಮಾಡುವಾಗ ಎಚ್ಚರವಹಿಸಬೇಕಿದೆ.

ನಕಲಿ ವೆಬ್‌ಸೈಟ್

ಆನ್‌ಲೈನ್ ವಂಚಕರು ‘www.irctctour.com' ಹೆಸರಿನಲ್ಲಿ ನಕಲಿ ವೆಬ್‌ಸೈಟ್‌ ರಚಿಸಿದ್ದು, ಇದು ಬಹುತೇಕ ಅಧಿಕೃತ IRCTC ವೆಬ್‌ಸೈಟ್ (www.irctctourism.com) ಹೋಲಿಕೆಯನ್ನು ಪಡೆದಿದೆ. ಸದ್ಯ ಈ ನಕಲಿ ವೆಬ್‌ಸೈಟ್ ಚಾಲ್ತಿಯಲ್ಲಿ ಇಲ್ಲ(This Account has been suspended). ಹೀಗಾಗಿ IRCTC ಹೆಸರನ್ನು ಬಳಸಿ ಇಂತಹ ಯಾವುದೇ ನಕಲಿ ವೆಬ್‌ಸೈಟ್‌ಗಳು ನೀಡುವ ಟೂರ್ ಪ್ಯಾಕೇಜ್‌ಗಳಿಗೆ ಪ್ರಯಾಣಿಕರು ಮಾರು ಹೋಗಬಾರದು.

ಆಫರ್‌ಗಳ ಆಸೆ ತೋರಿಸ್ತಾರೆ

ಅಧಿಕೃತ IRCTC ವೆಬ್‌ಸೈಟ್ ಹೊಸ ಆಫರ್, ಕೊಡುಗೆಗಳ ಬಗ್ಗೆ ತನ್ನ ಗ್ರಾಹಕರಿಗೆ ಮೇಲಿಂದ ಮೇಲೆ ಇ-ಮೇಲ್ ಮೂಲಕ ಮಾಹಿತಿ ತಲುಪಿಸುತ್ತದೆ. ಇದೇ ರೀತಿಯಲ್ಲಿ ವಂಚಕರು ಸಹ ತಮ್ಮ ನಕಲಿ ವೆಬ್‌ಸೈಟ್‌ ಮೂಲಕ ಗ್ರಾಹಕರಿಗೆ ಆಫರ್‌ಗಳ ಮೆಸೆಜ್ ಕಳುಹಿಸುವ ತಂತ್ರ ಕಂಡು‌ಕೊಂಡಿದ್ದಾರೆ. ಹೀಗಾಗಿ ಬುಕ್ ಮಾಡುವಾಗ ಜಾಗೃತರಾಗಿರಿ.

IRCTC ಸೇವೆಗಳು

ಪ್ರಸ್ತುತ IRCTC, ರೈಲ್ವೆ ನಿಲ್ದಾಣಗಳಲ್ಲಿ ಮತ್ತು ರೈಲುಗಳಲ್ಲಿ ಆಹಾರ ಮತ್ತು ಪ್ಯಾಕ್ ಮಾಡಿದ ಕುಡಿಯುವ ನೀರಿನ ಸೇವೆ ಒದಗಿಸುತ್ತಿದೆ. ಹಾಗೆಯೇ ಆನ್‌ಲೈನ್ ರೈಲ್ವೆ ಟಿಕೆಟ್‌ಗಳು ಬುಕ್ಕಿಂಗ್ ಮಾಡಲು ಅನುಕೂಲ ಮಾಡಿರುವ ಒಂದು ಘಟಕವಾಗಿದೆ. IRCTC, ವಿವಿಧ ಪ್ರವಾಸೋದ್ಯಮ ವಿಭಾಗಗಳಲ್ಲಿ ಐಷಾರಾಮಿ ರೈಲು ಪ್ರವಾಸಗಳು, ಭಾರತ್ ದರ್ಶನ ವಿಶೇಷ ಪ್ರವಾಸಿ ರೈಲುಗಳು, ರೈಲು ಪ್ರವಾಸ ಪ್ಯಾಕೇಜುಗಳು, ಅಂತರರಾಷ್ಟ್ರೀಯ ಮತ್ತು ದೇಶೀಯ ವಿಮಾನ ಪ್ಯಾಕೇಜುಗಳು, ಲ್ಯಾಂಡ್ ಟೂರ್ ಪ್ಯಾಕೇಜುಗಳು, ಹೋಟೆಲ್ ಬುಕಿಂಗ್ ಇತ್ಯಾದಿಗಳು ಸೇರಿವೆ. ಇದರ ಅಧಿಕೃತ ಪೋರ್ಟಲ್ irctctourism.com ಆಗಿದೆ.