Itel: ಐಟೆಲ್‌ ಸೂಪರ್ ಗುರು 4G ಫೋನ್ ಲಾಂಚ್‌! ಯುಪಿಐ ಬೆಂಬಲ

ಐಟೆಲ್‌ ಫೋನ್‌ಗಳು (Itel phone) ಅಗ್ಗದ ದರದಲ್ಲಿ ಉತ್ತಮ ಫೀಚರ್ಸ್‌ ಆಯ್ಕೆ ನೀಡಲಿದ್ದು, ಈ ನಡುವೆ ಭಾರತದಲ್ಲಿ ಹೊಸ ಫೀಚರ್ ಫೋನ್‌ ಅನ್ನು ಅನಾವರಣ ಮಾಡಲಾಗಿದೆ. ಈ ಫೋನ್ ಯುಪಿಐ (UPI) ಬೆಂಬಲ ಪಡೆದುಕೊಂಡಿದೆ.

ಹೌದು, ಐಟೆಲ್‌ ಭಾರತದಲ್ಲಿ ಸೂಪರ್ ಗುರು 4G (Itel Super Guru 4G) ಹೆಸರಿನ ಹೊಸ ಫೀಚರ್ ಫೋನ್ ಅನ್ನು ಅನಾವರಣ ಮಾಡಿದೆ. ಈ ಫೋನ್ ಬಾಳಿಕೆ ಜೊತೆಗೆ ಪ್ರೀಮಿಯಂ ವಿನ್ಯಾಸವನ್ನು ಹೊಂದಿದ್ದು, ನಯವಾದ ಮೆಟಲ್ ಫಿನಿಶ್, ಅಲ್ಟ್ರಾ-ಸ್ಲಿಮ್ ವಿನ್ಯಾಸ ಮತ್ತು ಟ್ರೆಂಡಿ ಕ್ಯಾಮೆರಾ ಆಯ್ಕೆ ಪಡೆದುಕೊಂಡಿದೆ. ಹಾಗಿದ್ರೆ, ಈ ಅಗ್ಗದ ಹಾಗೂ ಆಕರ್ಷಕ ಫೋನ್‌ನ ಫೀಚರ್ಸ್‌ ಹಾಗೂ ಭಾರತದಲ್ಲಿ ಇದರ ಬೆಲೆ ಎಷ್ಟು ಅನ್ನೋ ಮಾಹಿತಿ ಇಲ್ಲಿದೆ ನೋಡಿ.

ಐಟೆಲ್‌ ಸೂಪರ್ ಗುರು 4G: ಈ ಫೋನ್ 2 ಇಂಚಿನ ಡಿಸ್‌ಪ್ಲೇ ಆಯ್ಕೆ ಪಡೆದಿದ್ದು, ಫೀಚರ್ ಫೋನ್ ಬಳಕೆದಾರರಿಗೆ ಯೂಟ್ಯೂಬ್ ಮತ್ತು ಶಾರ್ಟ್ಸ್ ಪ್ಲೇ ಮಾಡಲು ಸಹ ಅನುಮತಿಸುತ್ತದೆ. ಎಲ್ಲಕ್ಕಿಂತ ಮಿಗಿಲಾಗಿ ಈ ಫೋನ್‌ನಲ್ಲಿ ಪಾವತಿಗಳನ್ನು ಮಾಡಬಹುದಾಗಿದೆ. ಅಂದರೆ ಪಾವತಿಗಳಿಗಾಗಿ ಕ್ಯೂಆರ್‌ ಕೋಡ್‌ಗಳನ್ನು ಸ್ಕ್ಯಾನ್ ಮಾಡಲು ಈ ಫೋನ್‌ ಅನುಮತಿಸುತ್ತದೆ.

ಐಟೆಲ್ ಸೂಪರ್ ಗುರು ಫೀಚರ್ ಫೋನ್ ಡ್ಯುಯಲ್ 4G ಕನೆಕ್ಟಿವಿಟಿ ಬೆಂಬಲದೊಂದಿಗೆ ಬರಲಿದ್ದು, VoLTE, ವೆಬ್ ಬ್ರೌಸಿಂಗ್ ಮತ್ತು 13 ಭಾರತೀಯ ಭಾಷೆಗಳಿಗೆ ಬೆಂಬಲ ನೀಡಲಿದೆ. ಇದರ ಜೊತೆಗೆ ಟೆಟ್ರಿಸ್, ಸೊಕೊಬಾನ್ ಮತ್ತು ಮುಂತಾದವುಗಳಂತಹ ಕೆಲವು ಇನ್‌ಬಿಲ್ಟ್‌ ಗೇಮ್‌ಗಳನ್ನು ಈ ಫೋನ್‌ನಲ್ಲಿ ಕಾಣಬಹುದಾಗಿದ್ದು, ಬಳಕೆದಾರರ ಬೇಸರ ಕಳೆಯಲು ಇದು ಅನುಕೂಲ ಮಾಡಿಕೊಡಲಿದೆ.

ಬಿಡುಗಡೆಯ ಬಗ್ಗೆ ಪ್ರತಿಕ್ರಿಯಿಸಿದ ಐಟೆಲ್‌ ಇಂಡಿಯಾದ ಸಿಇಓ ಅಜೀತ್‌ ತಳಪತ್ರ ಅವರು, ಯೂಟ್ಯೂಬ್‌ ಬೆಂಬಲ ಮತ್ತು ಯುಪಿಐ ನಂತಹ ಸ್ಮಾರ್ಟ್‌ಫೋನ್-ರೀತಿಯ ಫೀಚರ್ಸ್‌ ಅನ್ನು ಈ ಕೀಪ್ಯಾಡ್ ಫೋನ್‌ಗಳಲ್ಲಿ ಮನಬಂದಂತೆ ಸಂಯೋಜಿಸುವ ಮೂಲಕ ನಾವು ಉದ್ಯಮದ ಗುಣಮಟ್ಟವನ್ನು ಮರುವ್ಯಾಖ್ಯಾನಿಸುವುದನ್ನು ಮುಂದುವರಿಸುತ್ತೇವೆ ಎಂದು ತಿಳಿಸಿದ್ದಾರೆ. ಆನ್-ದಿ-ಗೋ ಎಂಟರ್ಟೈನ್ಮೆಂಟ್‌ಗಾಗಿ ಯೂಟ್ಯೂಬ್‌ ಬೆಂಬಲ ಮತ್ತು ತಡೆರಹಿತ ಸಂಪರ್ಕವನ್ನು ಖಾತ್ರಿಪಡಿಸುವ ಡ್ಯುಯಲ್ 4G ಸಿಮ್ ಸ್ಲಾಟ್‌ಗಳೊಂದಿಗೆ, ಸೂಪರ್ ಗುರು 4G ನಿಜವಾಗಿಯೂ ಐಟೆಲ್‌ನ ನಾವೀನ್ಯತೆ ಮತ್ತು ವಿಶ್ವಾಸಾರ್ಹತೆಯ ಮನೋಭಾವವನ್ನು ಸಾಕಾರಗೊಳಿಸುತ್ತದೆ ಎಂದಿದ್ದಾರೆ.

ಇದರೊಂದಿಗೆ ಈ ಫೋನ್‌ನಲ್ಲಿ 1,000 mAh ಸಾಮರ್ಥ್ಯದ ಬ್ಯಾಟರಿ ಆಯ್ಕೆ ನೀಡಲಾಗಿದ್ದು, ಒಂದು ಬಾರಿ ಪೂರ್ಣವಾಗಿ ಚಾರ್ಜ್‌ ಮಾಡಿದರೆ 6 ದಿನಗಳವರೆಗೆ ಬ್ಯಾಟರಿ ಬ್ಯಾಕಪ್ ಅನ್ನು ಪಡೆಯಬಹುದಾಗಿದೆ. ಫೀಚರ್ ಫೋನ್‌ಗಳು ಈ ಕ್ಷಣಕ್ಕೂ ಸಹ ಬೇಡಿಕೆ ಹೊಂದಿದ್ದು, ಈ ಫೋನ್ 4G ಫೋನ್ 2G ಮತ್ತು 3G ಸಂಪರ್ಕವನ್ನು ಬೆಂಬಲಿಸುವುದರಿಂದ ಗ್ರಾಮೀಣ ಪ್ರದೇಶಗಳಲ್ಲಿ ವಾಸಿಸುವ ಜನರಿಗೆ ಸಹಾಯಕವಾಗಲಿದೆ. ಕರೆ ಮತ್ತು ಮೆಸೆಜ್‌ನಂತಹ ಸಾಮಾನ್ಯ ದೈನಂದಿನ ಬಳಕೆಗಾಗಿ ಈ ಫೋನ್‌ ಉತ್ತಮ ಆಯ್ಕೆ ಆಗಿರಲಿದೆ.

ಐಟೆಲ್‌ ಸೂಪರ್ ಗುರು 4G ಫೋನ್ ಬೆಲೆ ಮತ್ತು ಲಭ್ಯತೆ: ಈ ಸ್ಮಾರ್ಟ್‌ಫೋನ್‌ ಅನ್ನು 1,799 ರೂ.ಗಳ ಬೆಲೆಗೆ ಖರೀದಿ ಮಾಡಬಹುದಾಗಿದೆ. ಹಾಗೆಯೇ ಇದು ಗಾಢ ನೀಲಿ, ಹಸಿರು ಮತ್ತು ಕಪ್ಪು ಬಣ್ಣದ ಆಯ್ಕೆಯಲ್ಲಿ ಲಭ್ಯ ಇರಲಿದ್ದು, ಅಮೆಜಾನ್‌ ಹಾಗೂ ಇತರೆ ಆನ್‌ಲೈನ್‌ ಪ್ಲಾಟ್‌ಫಾರ್ಮ್‌ ಮೂಲಕ ಖರೀದಿ ಮಾಡಬಹುದಾಗಿದೆ.

ಐಟೆಲ್‌ P55+: ಈ ನಡುವೆ ಐಟೆಲ್‌ P55+ ಸ್ಮಾರ್ಟ್‌ಫೋನ್‌ನ ಕೆಲವು ಫೀಚರ್ಸ್‌ ಲೀಕ್‌ ಆಗಿವೆ. ಗೂಗಲ್‌ ಪ್ಲೇ ಕನ್‌ಸೋಲ್‌ನಲ್ಲಿ ಸ್ಪ್ರೆಡ್ಟ್ರಮ್ T606 ಪ್ರೊಸೆಸರ್‌ ಮತ್ತು ಆಂಡ್ರಾಯ್ಡ್‌ 13 ನೊಂದಿಗೆ ಈ ಫೋನ್‌ ಅನ್ನು ಗುರುತಿಸಲಾಗಿದೆ. ಮಾದರಿ ಸಂಖ್ಯೆ ಐಟೆಲ್‌ P663L ಅನ್ನು ಖಚಿತಪಡಿಸಿದ್ದು, ಕೆಲವು ಪ್ರಮುಖ ಹಾರ್ಡ್‌ವೇರ್ ಫೀಚರ್ಸ್‌ ಅನ್ನು ಸಹ ಬಹಿರಂಗಪಡಿಸುತ್ತದೆ. ಈಗ ಸಾಧನವು ಆನ್‌ಲೈನ್‌ನಲ್ಲಿ ಕಾಣಿಸಿಕೊಳ್ಳಲು ಪ್ರಾರಂಭಿಸಿದೆ.