ವ್ಯಾಲಿಡಿಟಿ ಮುಗಿದ್ರೂ ಮೇ 3ರ ವರೆಗೂ ನಿಮ್ಮ ಫೋನ್ ಬಂದ್ ಆಗಲ್ಲ!

ಹೌದು, ದೇಶದ ಖಾಸಗಿ ಟೆಲಿಕಾಂ ಸಂಸ್ಥೆಗಳಾದ ಜಿಯೋ, ಏರ್‌ಟೆಲ್ ಮತ್ತು ವೊಡಾಫೋನ್ ಸಂಸ್ಥೆಗಳು ಲಾಕ್‌ಡೌನ್ ಮುಗಿಯುವವರೆಗೂ ಅಂದರೇ ಮೇ 3, 2020ರ ವರೆಗೂ ಪ್ರೀಪೇಯ್ಡ್‌ ಬಳಕೆದಾರರ ವ್ಯಾಲಿಡಿಟಿ ಅವಧಿಯನ್ನು ವಿಸ್ತರಿಸುವುದಾಗಿ ಘೋಷಿಸಿವೆ. ಹೀಗಾಗಿ ಜಿಯೋ, ಏರ್‌ಟೆಲ್ ಅಥವಾ ವೊಡಾಫೋನ್ ಚಂದಾದಾರರು ತಮ್ಮ ವ್ಯಾಲಿಡಿಟಿ ಮುಗಿದರೂ ಸಹ ಒಳ ಬರುವ ಕರೆಗಳು ಯಾವುದೇ ಕಾರಣಕ್ಕೂ ಬಂದ್ ಆಗುವುದಿಲ್ಲ.

ಈ ಸಂದರ್ಭದಲ್ಲಿ ಅನೇಕರು ಆನ್‌ಲೈನ್ ಮೂಲಕವೇ ತಮ್ಮ ಫೋನ್ ನಂಬರ್ ರೀಚಾರ್ಜ್ ಮಾಡಿಕೊಳ್ಳುತ್ತಾರೆ. ಆದ್ರೆ ಇನ್ನೂ ಅನೇಕರಿಗೆ ರೀಚಾರ್ಜ್ ಮಾಡಿಕೊಳ್ಳಲು ಅನಾನುಕೂಲದ ಸ್ಥಿತಿ ಇರುವುದರಿಂದ ತಮ್ಮ ಚಂದಾದಾರರಿಗೆ ನೆರವಾಗಲು ಟೆಲಿಕಾಂ ಸಂಸ್ಥೆಗಳು ಪ್ರೀಪೇಯ್ಡ್‌ ವ್ಯಾಲಿಡಿಟಿ ವಿಸ್ತರಿಸಿವೆ. ಹೀಗಾಗಿ ಲಾಕ್‌ಡೌನ್ ಅವಧಿಯಲ್ಲಿ ನಿಮ್ಮ ಫೋನ್ ನಂಬರ್ ವ್ಯಾಲಿಡಿಟಿ ಮುಗಿದರೂ, ನೀವು ರೀಚಾರ್ಜ್ ಮಾಡಿಕೊಳ್ಳದಿದ್ದರೂ ಮೇ 3ರ ವರೆಗೂ ವ್ಯಾಲಿಡಿಟಿ ಮುಂದುವರೆಯುತ್ತದೆ.

ಫೀಚರ್ ಫೋನ್ ಬಳಕೆ ಮಾಡುವ ಸುಮಾರು 90 ಮಿಲಿಯನ್ ವೊಡಾಪೋನ್ ಪ್ರಿಪೇಯ್ಡ್ ಚಂದಾದಾರರಿಗೆ ವ್ಯಾಲಿಡಿಟಿ ವಿಸ್ತರಣೆಯ ಸೌಲಭ್ಯ ಸಹಾಯಕವಾಗಲಿದೆ ಎಂದು ವೊಡಾಫೋನ್ ಹೇಳಿದೆ. ಹಾಗೆಯೇ ಲಾಕ್‌ಡೌನ್‌ ನಿಂದಾಗಿ ಸುಮಾರು 30 ಮಿಲಿಯನ್ ಏರ್‌ಟೆಲ್‌ ಚಂದಾದಾರರಿಗೆ ಅವರ ಮೊಬೈಲ್ ರೀಚಾರ್ಜ್ ಮಾಡಿಕೊಳ್ಳಲು ಅನಾನುಕೂಲ ಆಗಿದೆ. ಅಂತಹ ಚಂದಾದಾರರಿಗೆ ಮೇ 3ರ ವರೆಗೂ ಒಳಬರುವ ಕರೆಗಳ ಸೌಲಭ್ಯ ಇರಲಿದೆ.

ಜಿಯೋ, ಏರ್‌ಟೆಲ್ ಹಾಗೂ ವೊಡಾಫೋನ್ ಟೆಲಿಕಾಂ ಸಂಸ್ಥೆಗಳು ಇತ್ತೀಚಿಗಷ್ಟೆ ಗ್ರಾಹಕರಿಗೆ ಅನುಕೂಲವಾಗಲೆಂದು ATM ಸೆಂಟರ್‌ ರೀಚಾರ್ಜ್ ಮಾಡುವ ಸೌಲಭ್ಯವನ್ನು ಪರಿಚಯಿಸಿವೆ. ಹಾಗೆಯೇ ಜಿಯೋ ಸಂಸ್ಥೆಯು ಇತ್ತೀಚಿಗೆ POS ಲೈಟ್‌ ರೀಚಾರ್ಜ್ ಅಪ್ಲಿಕೇಶನ್ ಅನ್ನು ಲಾಂಚ್ ಮಾಡಿದ್ದು, ಈ ಆಪ್ ಮೂಲಕ ಬಳಕೆದಾರರು ಇತರೆ ಜಿಯೋ ಚಂದಾದಾರರ ಮೊಬೈಲ್‌ ರೀಚಾರ್ಜ್ ಮಾಡುವ ಆಯ್ಕೆ ನೀಡಿದೆ. ರೀಚಾರ್ಜ್‌ಗೆ ಪ್ರತಿಯಾಗಿ ಕ್ಯಾಶ್‌ಬ್ಯಾಕ್ ನೀಡುವ ಸೌಲಭ್ಯ ಪಡೆದಿದೆ.