ಕ್ವಾಲ್‌ಕಾಮ್‌ ವೆಂಚರ್ಸ್‌ನಿಂದ ಜಿಯೋ ಪ್ಲಾಟ್‌ಫಾರ್ಮ್‌ನಲ್ಲಿ 730 ಕೋಟಿ ಹೂಡಿಕೆ!

ಕ್ವಾಲ್‌ಕಾಮ್ ವೆಂಚರ್ಸ್‌ನ ಹೂಡಿಕೆಯು ಫುಲ್ಲಿ ಡೈಲ್ಯೂಟೆಡ್ ಬೇಸಿಸ್‌ನಲ್ಲಿ ಜಿಯೋ ಪ್ಲಾಟ್‌ಫಾರ್ಮ್ಸ್‌ನ 0.15% ಈಕ್ವಿಟಿ ಪಾಲುದಾರಿಕೆಗೆ ಸಮಾನವಾಗಿರಲಿದೆ. ಮುಂದುವರಿದ 5G ಮೂಲಸೌಕರ್ಯ ಹಾಗೂ ಸೇವೆಗಳನ್ನು ಭಾರತೀಯ ಗ್ರಾಹಕರಿಗೆ ಪರಿಚಯಿಸುವ ಪಯಣದಲ್ಲಿ ಜಿಯೋ ಪ್ಲಾಟ್‌ಫಾರ್ಮ್ಸ್‌ ಅನ್ನು ಬೆಂಬಲಿಸಲು, ಈ ಹೂಡಿಕೆಯು ಕ್ವಾಲ್‌ಕಾಮ್ ಮತ್ತು ಜಿಯೋ ಪ್ಲಾಟ್‌ಫಾರ್ಮ್ಸ್ ನಡುವಿನ ಸಂಬಂಧವನ್ನು ಇನ್ನಷ್ಟು ಗಾಢವಾಗಿಸಲಿದೆ.

ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್‌ನ ಅಧಿಕಾಂಶ-ಸ್ವಾಮ್ಯದ ಅಂಗಸಂಸ್ಥೆಯಾದ ಜಿಯೋ ಪ್ಲಾಟ್‌ಫಾರ್ಮ್ಸ್, ಭಾರತದಾದ್ಯಂತ ಉನ್ನತ ಗುಣಮಟ್ಟದ ಹಾಗೂ ಕೈಗೆಟುಕುವ ದರದ ಡಿಜಿಟಲ್ ಸೇವೆಗಳನ್ನು ಒದಗಿಸುವತ್ತ ತನ್ನ ಗಮನವನ್ನು ಕೇಂದ್ರೀಕರಿಸಿರುವ ಮುಂದಿನ ತಲೆಮಾರಿನ ತಂತ್ರಜ್ಞಾನ ವೇದಿಕೆಯಾಗಿದ್ದು ಅದಕ್ಕೆ 388 ದಶಲಕ್ಷಕ್ಕೂ ಹೆಚ್ಚಿನ ಚಂದಾದಾರರಿದ್ದಾರೆ. ಬ್ರಾಡ್‌ಬ್ಯಾಂಡ್ ಸಂಪರ್ಕ, ಸ್ಮಾರ್ಟ್ ಸಾಧನಗಳು, ಕ್ಲೌಡ್ ಮತ್ತು ಎಡ್ಜ್ ಕಂಪ್ಯೂಟಿಂಗ್, ಬಿಗ್ ಡೇಟಾ ಅನಲಿಟಿಕ್ಸ್, ಆರ್ಟಿಫಿಶಿಯಲ್ ಇಂಟಲಿಜೆನ್ಸ್, ಇಂಟರ್‌ನೆಟ್ ಆಫ್ ಥಿಂಗ್ಸ್, ಆಗ್ಮೆಂಟೆಡ್ ಮತ್ತು ಮಿಕ್ಸೆಡ್ ರಿಯಾಲಿಟಿ ಹಾಗೂ ಬ್ಲಾಕ್‌ಚೈನ್‌ನಂತಹ ಮುಂಚೂಣಿ ತಂತ್ರಜ್ಞಾನಗಳಿಂದ ಚಾಲಿತವಾಗಿರುವ ತನ್ನ ಡಿಜಿಟಲ್ ಇಕೋಸಿಸ್ಟಂನಾದ್ಯಂತ ಜಿಯೋ ಪ್ಲಾಟ್‌ಫಾರ್ಮ್ಸ್ ಗಮನಾರ್ಹ ಹೂಡಿಕೆಗಳನ್ನು ಮಾಡಿದೆ. ಒಳಗೊಳ್ಳುವ ಬೆಳವಣಿಗೆಯ ಫಲಗಳನ್ನು ಎಲ್ಲರೂ ಆನಂದಿಸುವಂತೆ ಮಾಡಲು, ಸಣ್ಣ ವರ್ತಕರು, ಅತಿಸಣ್ಣ ಉದ್ಯಮಗಳು ಹಾಗೂ ರೈತರೂ ಸೇರಿದಂತೆ ಭಾರತದಾದ್ಯಂತ 1.3 ಶತಕೋಟಿ ಜನರು ಹಾಗೂ ಉದ್ಯಮಗಳಿಗೆ ಡಿಜಿಟಲ್ ಇಂಡಿಯಾವನ್ನು ಸಾಧ್ಯವಾಗಿಸುವುದು ಜಿಯೋದ ದೂರದೃಷ್ಟಿಯಾಗಿದೆ.

ವೈರ್‌ಲೆಸ್ ತಂತ್ರಜ್ಞಾನದಲ್ಲಿ ಹೊಸತನ ತರುತ್ತಿರುವ ವಿಶ್ವದ ಪ್ರಮುಖ ಸಂಸ್ಥೆಯಾದ ಕ್ವಾಲ್‌ಕಾಮ್, 5G ಅಭಿವೃದ್ಧಿ, ಪ್ರಾರಂಭ ಮತ್ತು ವಿಸ್ತರಣೆಯ ಹಿಂದಿನ ಪ್ರೇರಕ ಶಕ್ತಿಯೂ ಆಗಿದೆ. 62 ಶತಕೋಟಿ ಡಾಲರುಗಳಿಗಿಂತಲೂ ಹೆಚ್ಚಿನ ಸಂಚಿತ ಸಂಶೋಧನೆ ಮತ್ತು ಅಭಿವೃದ್ಧಿ ವೆಚ್ಚ, 35 ವರ್ಷಗಳ ಹೊಸತನ ತರುವಿಕೆ ಹಾಗೂ 140,000ಕ್ಕೂ ಹೆಚ್ಚು ಪೇಟೆಂಟ್‌ಗಳು ಮತ್ತು ಪೇಟೆಂಟ್ ಅರ್ಜಿಗಳೊಂದಿಗೆ, ಹೊಸತನವನ್ನು ಉತ್ತೇಜಿಸಲು ಮತ್ತು ಭಾರತೀಯ ತಂತ್ರಜ್ಞಾನದ ಪ್ರಗತಿಗೆ ಪ್ರೋತ್ಸಾಹ ನೀಡಲು ಕ್ವಾಲ್‌ಕಾಮ್ ಬದ್ಧವಾಗಿದೆ. ಜಾಗತಿಕ ನಿಧಿಯಾಗಿರುವ ಕ್ವಾಲ್‌ಕಾಮ್ ವೆಂಚರ್ಸ್, ವೈರ್‌ಲೆಸ್ ಇಕೋಸಿಸ್ಟಂ‌ನಾದ್ಯಂತ 5G, ಎಐ, ಐಓಟಿ, ಆಟೋಮೋಟಿವ್, ನೆಟ್‌ವರ್ಕಿಂಗ್ ಹಾಗೂ ಎಂಟರ್‌ಪ್ರೈಸ್‌ನಂತಹ ಕ್ಷೇತ್ರಗಳ ಪ್ರವರ್ತಕ ಸಂಸ್ಥೆಗಳಲ್ಲಿ ಹೂಡಿಕೆ ಮಾಡುತ್ತದೆ. ಭಾರತದಲ್ಲಿ, ಕ್ವಾಲ್‌ಕಾಮ್ ವೆಂಚರ್ಸ್ ಹೈನುಗಾರಿಕೆ, ಸಾರಿಗೆಯಿಂದ ಪ್ರಾರಂಭಿಸಿ ರಕ್ಷಣಾ ಕ್ಷೇತ್ರದವರೆಗೆ ಪ್ರಮುಖ ದೇಶೀಯ ಸಮಸ್ಯೆಗಳನ್ನು ಪರಿಹರಿಸುವ ಮತ್ತು ಭಾರತ ಹಾಗೂ ವಿಶ್ವ ಮಾರುಕಟ್ಟೆಗೆ ವಿಶ್ವ ದರ್ಜೆಯ ಉತ್ಪನ್ನಗಳನ್ನು ನಿರ್ಮಿಸುವ ಸಂಸ್ಥೆಗಳಲ್ಲಿ ಹೂಡಿಕೆ ಮಾಡಿದೆ.

ರಿಲಯನ್ಸ್ ಇಂಡಸ್ಟ್ರೀಸ್‌ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಮುಖೇಶ್ ಅಂಬಾನಿ, "ಇಂದು, ಜಿಯೋ ಪ್ಲಾಟ್‌ಫಾರ್ಮ್ಸ್‌ನಲ್ಲಿ ಹೂಡಿಕೆದಾರರಾಗಿ ಕ್ವಾಲ್‌ಕಾಮ್ ವೆಂಚರ್ಸ್ ಅನ್ನು ಸ್ವಾಗತಿಸಲು ನನಗೆ ಸಂತೋಷವಾಗಿದೆ. ಕ್ವಾಲ್‌ಕಾಮ್ ಹಲವಾರು ವರ್ಷಗಳಿಂದ ನಮ್ಮ ಮೌಲ್ಯಯುತ ಪಾಲುದಾರರಾಗಿದ್ದು, ಸದೃಢ ಮತ್ತು ಸುರಕ್ಷಿತವಾದ ವೈರ್‌ಲೆಸ್ ಹಾಗೂ ಡಿಜಿಟಲ್ ಜಾಲವನ್ನು ನಿರ್ಮಿಸುವ ಮೂಲಕ ಮತ್ತು ಡಿಜಿಟಲ್ ಸಂಪರ್ಕದ ಪ್ರಯೋಜನಗಳನ್ನು ಭಾರತದಲ್ಲಿ ಎಲ್ಲರಿಗೂ ವಿಸ್ತರಿಸುವ ಮೂಲಕ ಎಲ್ಲವನ್ನೂ ಸಂಪರ್ಕಿಸುವ ಸಮಾನ ದೂರದೃಷ್ಟಿ ನಮ್ಮದಾಗಿದೆ. ವೈರ್‌ಲೆಸ್ ತಂತ್ರಜ್ಞಾನಗಳಲ್ಲಿ ವಿಶ್ವ ನಾಯಕರಾಗಿ, ಕ್ವಾಲ್‌ಕಾಮ್ ತಂತ್ರಜ್ಞಾನದ ಆಳವಾದ ಅರಿವು ಮತ್ತು ಒಳನೋಟಗಳನ್ನು ಒದಗಿಸುತ್ತದೆ, ಮತ್ತು ಅದು ನಮ್ಮ 5G ದೂರದೃಷ್ಟಿ ಹಾಗೂ ಸಾರ್ವಜನಿಕರು ಮತ್ತು ಉದ್ಯಮಗಳಿಗೆ ಭಾರತದ ಡಿಜಿಟಲ್ ರೂಪಾಂತರವನ್ನು ತಲುಪಿಸಲು ನೆರವಾಗುತ್ತದೆ." ಎಂದು ಹೇಳಿದ್ದಾರೆ.

ಕ್ವಾಲ್‌ಕಾಮ್ ಇನ್‌ಕಾರ್ಪೊರೇಟೆಡ್‌ನ ಸಿಇಓ ಸ್ಟೀವ್ ಮಾಲೆನ್‌ಕಾಫ್, "ಡಿಜಿಟಲ್ ಸಂಪರ್ಕದ ಪ್ರಯೋಜನಗಳನ್ನು ಎಲ್ಲರಿಗೂ ಮತ್ತು ಎಲ್ಲದಕ್ಕೂ ವಿಸ್ತರಿಸುವ ನಮ್ಮ ಸಮಾನ ಗುರಿಯೊಂದಿಗೆ, ಭಾರತೀಯ ಗ್ರಾಹಕರಿಗೆ ಜಿಯೋ ಪ್ಲಾಟ್‌ಫಾರ್ಮ್ಸ್ ಹೊಸ ಸೇವೆ ಮತ್ತು ಅನುಭವಗಳನ್ನು ನೀಡುತ್ತದೆಂದು ನಾವು ನಿರೀಕ್ಷಿಸುತ್ತೇವೆ. ಸಾಟಿಯಿಲ್ಲದ ವೇಗ ಮತ್ತು ಹೊಸದಾದ ಬಳಕೆಯ ಸನ್ನಿವೇಶಗಳೊಡನೆ, ಮುಂದಿನ ವರ್ಷಗಳಲ್ಲಿ 5G ಪ್ರತಿ ಉದ್ಯಮವನ್ನೂ ಪರಿವರ್ತಿಸುವ ನಿರೀಕ್ಷೆಯಿದೆ. ತನ್ನ ವ್ಯಾಪಕ ಡಿಜಿಟಲ್ ಮತ್ತು ತಾಂತ್ರಿಕ ಸಾಮರ್ಥ್ಯಗಳ ಮೂಲಕ ಜಿಯೋ ಪ್ಲಾಟ್‌ಫಾರ್ಮ್ಸ್ ಭಾರತದಲ್ಲಿ ಡಿಜಿಟಲ್ ಕ್ರಾಂತಿಯನ್ನು ಮುನ್ನಡೆಸಿದೆ. ದೀರ್ಘಕಾಲದಿಂದ ಭಾರತದಲ್ಲಿ ಉಪಸ್ಥಿತರಿರುವ ಸಕ್ರಿಯ ಹೂಡಿಕೆದಾರರಾಗಿ, ಭಾರತದ ಡಿಜಿಟಲ್ ಆರ್ಥಿಕತೆಯಲ್ಲಿ ಇನ್ನಷ್ಟು ಮೂಲಭೂತ ಬದಲಾವಣೆಗಳನ್ನು ತರುವ ಜಿಯೋ ದೂರದೃಷ್ಟಿಯಲ್ಲಿ ಪಾತ್ರವಹಿಸುವುದನ್ನು ನಾವು ಎದುರು ನೋಡುತ್ತೇವೆ." ಎಂದು ಹೇಳಿದ್ದಾರೆ.