Paytm: ಪೇಟಿಎಮ್‌ ಪೇಮೆಂಟ್ಸ್ ಬ್ಯಾಂಕ್‌ ವಿರುದ್ಧ ಆರ್‌ಬಿಐ ಕಠಿಣ ಕ್ರಮ: ಬಳಕೆದಾರರಿಗೆ ಸಮಸ್ಯೆ ಆಗಲಿದೆಯೇ?

ಪೇಟಿಎಮ್‌ (Paytm) ಭಾರತೀಯ ಬಹುರಾಷ್ಟ್ರೀಯ ಹಣಕಾಸು ತಂತ್ರಜ್ಞಾನ ಕಂಪನಿಯಾಗಿದ್ದು, ವಿವಿಧ ರೀತಿಯಲ್ಲಿ ಆನ್‌ಲೈನ್‌ ಆರ್ಥಿಕ ವ್ಯವಹಾರಕ್ಕೆ ದೊಡ್ಡ ಮಟ್ಟದ ಕೊಡುಗೆ ನೀಡುತ್ತಿದೆ. ಅಲ್ಲದೆ ಕೆಲವು ದಿನಗಳ ಹಿಂದಷ್ಟೇ ರಾಮಮಂದಿರ ಪ್ರವಾಸಕ್ಕೆ ಹೋಗುವವರಿಗೆ ಭರ್ಜರಿ ಕ್ಯಾಶ್‌ಬ್ಯಾಕ್‌ ಆಫರ್ ಅನ್ನೂ ಸಹ ಘೋಷಣೆ ಮಾಡಿತ್ತು. ಆದರೆ, ಈಗ ದೊಡ್ಡ ಸಂಕಷ್ಟ ಎದುರಿಸುವಂತೆ ಆಗಿದೆ.

ಹೌದು, ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಜನವರಿ 31 ರಂದು ಪೇಟಿಎಮ್‌ ಪಾವತಿಗಳ ಬ್ಯಾಂಕ್ (Paytm Payments Bank) ಮೇಲೆ ಪ್ರಮುಖ ವ್ಯಾಪಾರ ನಿರ್ಬಂಧಗಳನ್ನು ವಿಧಿಸಿದೆ. ಇದು ತಾಜಾ ಠೇವಣಿಗಳನ್ನು ಸ್ವೀಕರಿಸಲು ಮತ್ತು ಕ್ರೆಡಿಟ್ ವ್ಯವಹಾರಗಳನ್ನು ಮಾಡುವುದರ ಮೇಲೆ ನಿಷೇಧವನ್ನು ಹೊಂದಿದೆ. ಹಾಗಿದ್ರೆ, ಏನಿದು ಹೊಸ ರೀತಿಯ ನಿರ್ಬಂಧ, ಇದನ್ನು ಯಾವ ಕಾರಣಕ್ಕೆ ಮಾಡಲಾಗಿದೆ ಎಂಬಿತ್ಯಾದಿ ಮಾಹಿತಿ ಇಲ್ಲಿದೆ ನೋಡಿ.

ಪೇಟಿಎಮ್‌ ವಿರುದ್ಧ ಆರ್‌ಬಿಐ ಕ್ರಮ: ತಕ್ಷಣದಿಂದಲೇ ಜಾರಿಗೆ ಬರುವಂತೆ ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್‌ಗೆ ಹೊಸ ಗ್ರಾಹಕರನ್ನು ಸೇರಿಸದಂತೆ ನಿಷೇಧಿಸಿದೆ. ಆರ್‌ಬಿಐ ಈ ಆದೇಶವನ್ನು 31 ಜನವರಿ 2024 ರಂದು ಹೊರಡಿಸಿದ್ದು, ಫೆಬ್ರವರಿ 29 ರ ನಂತರ ಅಸ್ತಿತ್ವದಲ್ಲಿರುವ ಗ್ರಾಹಕರ ಖಾತೆಗೆ ಮೊತ್ತವನ್ನು ಸೇರಿಸುವುದನ್ನು ನಿಲ್ಲಿಸುವಂತೆ ಪೇಟಿಎಮ್‌ಗೆ ಆದೇಶ ನೀಡಲಾಗಿದೆ.

ಅಧಿಸೂಚನೆಯ ಪ್ರಕಾರ, ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್ ತಾಜಾ ಠೇವಣಿಗಳನ್ನು ಸ್ವೀಕರಿಸಲು, ಕ್ರೆಡಿಟ್ ವಹಿವಾಟುಗಳನ್ನು ಕೈಗೊಳ್ಳಲು ಅಥವಾ ಯಾವುದೇ ಗ್ರಾಹಕ ಖಾತೆಗಳಲ್ಲಿ ಟಾಪ್-ಅಪ್‌ಗಳನ್ನು ಮಾಡುವಂತಿಲ್ಲ. ಇದು ಪ್ರಿಪೇಯ್ಡ್ ಟೂಲ್ಸ್‌ಗಳು, ವ್ಯಾಲೆಟ್‌ಗಳು, ಫಾಸ್ಟ್ಯಾಗ್‌ಗಳು ಮತ್ತು NCMC ಕಾರ್ಡ್‌ಗಳನ್ನು ಸಹ ಹೊಂದಿರುತ್ತದೆ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.

ಆರ್‌ಬಿಐ ಯಾಕೆ ಈ ಕ್ರಮ ತೆಗೆದುಕೊಂಡಿದೆ?: ಸಿಸ್ಟಂ ಆಡಿಟ್ ವರದಿ ಮತ್ತು ನಂತರದ ಅನುಸರಣೆ ಮೌಲ್ಯೀಕರಣ ವರದಿಯು ಕಂಪನಿಯು ಅನುಸರಣೆ ಮಾನದಂಡಗಳನ್ನು ನಿರಂತರವಾಗಿ ಉಲ್ಲಂಘಿಸಿದೆ ಎಂದು ಬಹಿರಂಗಪಡಿಸಿದೆ ಎಂದು ಕೇಂದ್ರ ಬ್ಯಾಂಕ್ ತಿಳಿಸಿದೆ. ಅಲ್ಲದೆ, ಪೇಟಿಎಮ್‌ ಬ್ಯಾಂಕ್‌ಗಳಿಗೆ ಸಂಬಂಧಿಸಿದ ಇನ್ನೂ ಹಲವು ನ್ಯೂನತೆಗಳು ಬೆಳಕಿಗೆ ಬಂದಿದ್ದು, ಭವಿಷ್ಯದಲ್ಲಿ ಅವುಗಳ ವಿರುದ್ಧ ಹೆಚ್ಚಿನ ಅಗತ್ಯ ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು ಎಂದೂ ಸಹ ತಿಳಿಸಲಾಗಿದೆ.

ಗ್ರಾಹಕರು ತಮ್ಮ ಲಭ್ಯವಿರುವ ಬಾಕಿಗಳನ್ನು ಬಳಕೆ ಮಾಡಲು ಸಾಧ್ಯವಾಗುತ್ತದೆಯೇ?: ಈ ಆದೇಶದಿಂದ ಗ್ರಾಹಕರಿಗೆ ಯಾವುದೇ ಸಮಸ್ಯೆ ಇರುವುದಿಲ್ಲ. ಯಾಕೆಂದರೆ ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್‌ನ ಅಸ್ತಿತ್ವದಲ್ಲಿರುವ ಗ್ರಾಹಕರು ತಮ್ಮ ಅಸ್ತಿತ್ವದಲ್ಲಿರುವ ಮೊತ್ತವನ್ನು ಸಂಪೂರ್ಣವಾಗಿ ಬಳಕೆ ಮಾಡಿಕೊಳ್ಳಬಹುದು ಎಂದು ಆರ್‌ಬಿಐ ಮಾಹಿತಿ ನೀಡಿದೆ. ಅಂದರೆ ಉಳಿತಾಯ ಖಾತೆ, ಚಾಲ್ತಿ ಖಾತೆ, ಪ್ರಿಪೇಯ್ಡ್ ಉಪಕರಣ, ಫಾಸ್ಟ್‌ಟ್ಯಾಗ್, ರಾಷ್ಟ್ರೀಯ ಅಥವಾ ಸಾಮಾನ್ಯ ಮೊಬಿಲಿಟಿ ಕಾರ್ಡ್‌ನಲ್ಲಿ ಹಣವನ್ನು ಬಳಕೆ ಮಾಡಬಹುದಾಗಿದೆ. ಇದಕ್ಕೆ ಯಾವುದೇ ದಿನಾಂಕದ ನಿರ್ಬಂಧವಿಲ್ಲ.

ಇತರೆ ಯಾವ ಸೇವೆಗಳಿಗೆ ನಿರ್ಬಂಧ? ಫೆಬ್ರವರಿ 29 ರ ನಂತರ ಪೇಟಿಎಮ್‌ ಗ್ರಾಹಕರು ತಮ್ಮ ಖಾತೆಗಳು, ಪ್ರಿಪೇಯ್ಡ್ ಟೂಲ್ಸ್‌, ವ್ಯಾಲೆಟ್‌ಗಳು, ಫಾಸ್ಟ್ಯಾಗ್ ಮತ್ತು ನ್ಯಾಷನಲ್ ಮೊಬಿಲಿಟಿ ಕಾರ್ಡ್‌ಗಳಲ್ಲಿ ಹಣವನ್ನು ಠೇವಣಿ ಮಾಡಲು ಸಾಧ್ಯವಾಗುವುದಿಲ್ಲ ಎಂದು ಆರ್‌ಬಿಐ ಹೇಳಿದೆ. ಆದಾಗ್ಯೂ, ಬಡ್ಡಿ, ಕ್ಯಾಶ್‌ಬ್ಯಾಕ್ ಮತ್ತು ಮರುಪಾವತಿ ಅವರ ಖಾತೆಗೆ ಬರಬಹುದು. ಫೆಬ್ರವರಿ 29 ರ ನಂತರ ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್‌ನಿಂದ ಯಾವುದೇ ಬ್ಯಾಂಕಿಂಗ್ ಸೇವೆಯನ್ನು ಒದಗಿಸುವುದಿಲ್ಲ ಎಂದು ಈ ಮೂಲಕ ತಿಳಿಸಲಾಗಿದೆ.

ಇದರೊಂದಿಗೆ ಮತ್ತೊಂದು ಆದೇಶ ನೀಡಿರುವ ಕೇಂದ್ರ ಬ್ಯಾಂಕ್‌ One97 ಕಮ್ಯುನಿಕೇಷನ್ಸ್ ಲಿಮಿಟೆಡ್ ಮತ್ತು ಪೇಟಿಮ್‌ ಪೇಮೆಂಟ್ಸ್ ಸರ್ವಿಸಸ್ ಲಿಮಿಟೆಡ್‌ನ ನೋಡಲ್ ಖಾತೆಗಳನ್ನು ಫೆಬ್ರವರಿ 29, 2024 ರ ನಂತರದಲ್ಲಿ ಮುಚ್ಚಬೇಕು ಎಂದು ಒತ್ತಿ ಹೇಳಿದೆ.