Redmi: ಶೀಘ್ರದಲ್ಲೇ ರೆಡ್ಮಿ K80 ಸರಣಿ ಲಾಂಚ್‌!... ಫೀಚರ್ಸ್ ಏನಿರಲಿವೆ?

ರೆಡ್ಮಿ ಫೋನ್‌ಗಳಿಗೆ (Redmi phone) ವಿಶೇಷವಾದ ಬೇಡಿಕೆ ಇದ್ದು, ಈ ನಡುವೆ ಕೆಲವೇ ದಿನಗಳಲ್ಲಿ ರೆಡ್ಮಿ K80 ಸರಣಿ (Redmi K80 series) ಫೋನ್‌ಗಳು ಅನಾವರಣ ಆಗಲಿವೆ ಎಂದು ತಿಳಿದುಬಂದಿದೆ. ಈ ಫೋನ್ ಸ್ನಾಪ್‌ಡ್ರಾಗನ್ 8 ಜನ್ 4, ಪೆರಿಸ್ಕೋಪ್ ಟೆಲಿಫೋಟೋ ಕ್ಯಾಮೆರಾ ಸೇರಿದಂತೆ ಇನ್ನಷ್ಟು ಆಕರ್ಷಕ ಫೀಚರ್ಸ್‌ ಅನ್ನು ಪಡೆದಿರಲಿವೆ ಎನ್ನಲಾಗಿದೆ.

ಹೌದು, ರೆಡ್ಮಿ K80 ಸರಣಿ ಸ್ಮಾರ್ಟ್‌ಫೋನ್‌ ವಲಯದಲ್ಲಿ ಈಗಾಗಲೇ ಭಾರಿ ಕುತೂಹಲ ಉಂಟು ಮಾಡಿದೆ. ಈ ಬಗ್ಗೆ ನಿರೀಕ್ಷೆಯು ಹೆಚ್ಚಾಗುತ್ತಿದ್ದಂತೆ, ಮುಂಬರುವ ಸ್ಮಾರ್ಟ್‌ಫೋನ್ ಶ್ರೇಣಿಯ ವಿವರಗಳು ಆನ್‌ಲೈನ್‌ನಲ್ಲಿ ಕಾಣಿಸಿಕೊಳ್ಳುತ್ತಿವೆ. ವಿಶ್ವಾಸಾರ್ಹ ಟಿಪ್‌ಸ್ಟರ್ ಸ್ಮಾರ್ಟ್ ಪಿಕಾಚು ಪ್ರಕಾರ, ರೆಡ್ಮಿ K80 ಸರಣಿಯನ್ನು ಈ ವರ್ಷದ ನವೆಂಬರ್‌ನಲ್ಲಿ ಬಿಡುಗಡೆ ಮಾಡಲು ನಿರ್ಧರಿಸಲಾಗಿದೆ. ಹಾಗಿದ್ರೆ, ಬನ್ನಿ ಈ ಫೋನ್‌ನಲ್ಲಿ ಏನೆಲ್ಲಾ ನಿರೀಕ್ಷಿತ ಫೀಚರ್ಸ್‌ ಇವೆ ಗಮನಿಸೋಣ.

ರೆಡ್ಮಿ K80 ಸರಣಿ: ಪಿಕಾಚು ಲೀಕ್‌ ಪ್ರಕಾರ ರೆಡ್ಮಿ K80 ಸರಣಿಯು ಹೆಚ್ಚು ನಿರೀಕ್ಷಿತ ಸ್ನಾಪ್‌ಡ್ರಾಗನ್ 8 ಜನ್ 4 ಪ್ರೊಸೆಸರ್‌ನಿಂದ ಕಾರ್ಯನಿರ್ವಹಿಸಲಿದೆ ಎಂದು ತಿಳಿದುಬಂದಿದೆ. ಇದು ಈ ಅತ್ಯಾಧುನಿಕ ಚಿಪ್‌ಸೆಟ್ ಅನ್ನು ಒಳಗೊಂಡಿರುವ ಮೊದಲ ಸ್ಮಾರ್ಟ್‌ಫೋನ್‌ಗಳಲ್ಲಿ ಒಂದಾಗಿರಲಿದೆ ಎನ್ನಲಾಗಿದ್ದು, ಈ ಸರಣಿಯು ಹೆಚ್ಚಿನ ರೆಸಲ್ಯೂಶನ್ 2K ಡಿಸ್‌ಪ್ಲೇ ಮತ್ತು ಪೆರಿಸ್ಕೋಪ್ ಟೆಲಿಫೋಟೋ ಲೆನ್ಸ್ ಅನ್ನು ಸಂಯೋಜಿಸುತ್ತದೆ ಎಂದು ವದಂತಿಗಳಿವೆ.

ವಿಶೇಷ ಚಿಪ್‌ಸೆಟ್ ಮತ್ತು ಮಾಡೆಲ್ ಡಿಫರೆನ್ಷಿಯೇಶನ್ ಸ್ನಾಪ್‌ಡ್ರಾಗನ್ 8 ಜನ್ 4 ಚಿಪ್‌ಸೆಟ್ ರೆಡ್ಮಿ K80 ಪ್ರೊ ವೇರಿಯಂಟ್‌ಗೆ ಪ್ರತ್ಯೇಕವಾಗಿರಬಹುದೆಂದು ನಿರೀಕ್ಷಿಸಲಾಗಿದೆ. ಸರಣಿಯ ಪ್ರಮಾಣಿತ ಮಾದರಿಗಳು ಸ್ನಾಪ್‌ಡ್ರಾಗನ್ 8 ಜನ್ 3 ಚಿಪ್‌ಸೆಟ್ ಅನ್ನು ಹೊಂದಿರಬಹುದು ಎಂದು ನಂಬಲಾಗಿದೆ. ಈ ಮೂಲಕ ರೆಡ್ಮಿ ತನ್ನ ಕಾರ್ಯತಂತ್ರವನ್ನು K80 ಸರಣಿಯೊಂದಿಗೆ ಬದಲಾಯಿಸುತ್ತಿದೆ. ಕೇವಲ ಪ್ರಮುಖ ಮಾದರಿಗಳ ಮೇಲೆ ಕೇಂದ್ರೀಕರಿಸಲು ರೆಡ್ಮಿ K80e ನಂತಹ ಮಿಡ್‌ ರೇಂಜ್‌ ವೇರಿಯಂಟ್‌ ಅನ್ನು ಬಿಡುತ್ತದೆ ಎಂದು ತಿಳಿದುಬಂದಿದೆ.

ವಿನ್ಯಾಸ ಮತ್ತು ಬ್ಯಾಟರಿ ವಿಚಾರಕ್ಕೆ ಬಂದರೆ ರೆಡ್ಮಿ K80 ಸರಣಿಯು ಗ್ಲಾಸ್‌ ಪ್ಯಾನಲ್‌ ಹೊಂದಿರಲಿದ್ದು, ಇದಕ್ಕೆ ಪೂರಕವಾದ ಲೋಹದ ಚೌಕಟ್ಟನ್ನು ಹೊಂದಿರಲಿದೆ ಎಂದು ಅಂದಾಜಿಸಲಾಗಿದೆ. ಇದು ಪ್ರೀಮಿಯಂ ಸೌಂದರ್ಯದ ಆಕರ್ಷಣೆಯನ್ನು ನೀಡುತ್ತದೆ. ಇದಲ್ಲದೆ, ದೃಢವಾದ 5,500mAh ಸಾಮರ್ಥ್ಯದ ಬ್ಯಾಟರಿಯನ್ನು ಹೊಂದಬಹುದು ಎಂದು ಊಹಿಸಲಾಗಿದ್ದು, ಆಗಾಗ್ಗೆ ರೀಚಾರ್ಜ್ ಮಾಡುವ ಅಗತ್ಯವಿಲ್ಲದೇ ದೀರ್ಘಾವಧಿಯ ಬ್ಯಾಕಪ್‌ ಅನ್ನು ಈ ಮೂಲಕ ಖಚಿತಪಡಿಸುತ್ತದೆ.

ರೆಡ್ಮಿ K80 ಸರಣಿಯ ಅಧಿಕೃತ ಚೊಚ್ಚಲ ಪ್ರವೇಶಕ್ಕೆ ಹಲವಾರು ತಿಂಗಳುಗಳು ಉಳಿದಿರುವ ಹಿನ್ನೆಲೆ ಮುಂಬರುವ ಈ ಫೋನ್‌ನ ಕುರಿತು ಹೆಚ್ಚಿನ ಬಹಿರಂಗಪಡಿಸುವಿಕೆಗಳು ಮತ್ತು ಒಳನೋಟಗಳನ್ನು ನಿರೀಕ್ಷಿಸಬಹುದು. ಕ್ವಾಲ್ಕಾಮ್ ಅಕ್ಟೋಬರ್‌ನಲ್ಲಿ ಸ್ನಾಪ್‌ಡ್ರಾಗನ್ 8 ಜನ್ 4 ಚಿಪ್‌ಸೆಟ್ ಅನ್ನು ಅನಾವರಣಗೊಳಿಸಲು ಸಜ್ಜಾಗುತ್ತಿದ್ದಂತೆ, ತಯಾರಕರು ತಮ್ಮ ಮುಂಬರುವ ಸ್ಮಾರ್ಟ್‌ಫೋನ್‌ಗಳಲ್ಲಿ ಚಿಪ್ ಅನ್ನು ಸೇರಿಸಲು ಸಜ್ಜಾಗುತ್ತಿದ್ದಾರೆ.

ರೆಡ್ಮಿ K40 ಮೊಬೈಲ್ ಫೋನ್‌ಗಾಗಿ ಅಪ್‌ಡೇಟ್‌: ಶಿಯೋಮಿ ಇತ್ತೀಚೆಗೆ ರೆಡ್ಮಿ K40 ಮೊಬೈಲ್ ಫೋನ್‌ಗಾಗಿ ಶಿಯೋಮಿ ಹೈಫರ್‌ ಓಎಸ್‌ ಅಪ್‌ಡೇಟ್‌ನ ಅಧಿಕೃತ ಆವೃತ್ತಿಯನ್ನು ಹೊರತಂದಿದೆ. ಬಳಕೆದಾರರ ಅನುಭವ ಮತ್ತು ಕಾರ್ಯಕ್ಷಮತೆಯನ್ನು ಸುಧಾರಿಸಲು ಗಮನಾರ್ಹವಾದ ವರ್ಧನೆಗಳು ಮತ್ತು ಫೀಚರ್ಸ್‌ ಅನ್ನು ಪರಿಚಯಿಸಿದೆ. ನವೀಕರಣ ಪ್ಯಾಕೇಜ್ ಆವೃತ್ತಿಯು 1.5GB ಯ ಗಣನೀಯ ಗಾತ್ರದೊಂದಿಗೆ 1.0.3.0.TKHCNXM ಆಗಿ ಉಳಿದಿದೆ.ಹೀಗಾಗಿ ಬಳಕೆದಾರರು ವೈ-ಫೈ ಸಂಪರ್ಕ ಮತ್ತು ಅಪ್‌ಗ್ರೇಡ್ ಅನ್ನು ನಿರ್ವಹಿಸಲು ಸಾಕಷ್ಟು ಮೆಮೊರಿಯನ್ನು ಹೊಂದಿದ್ದಾರೆ ಎಂದು ಖಚಿತಪಡಿಸಿಕೊಳ್ಳಬೇಕಿದೆ.

ರೆಡ್ಮಿ K40 ಸ್ಟ್ಯಾಂಡರ್ಡ್ ಆವೃತ್ತಿ ಮತ್ತು K40 ಗೇಮ್ ವರ್ಧಿತ ಆವೃತ್ತಿಯ ಹೈಪರ್‌ಓಎಸ್‌ ಅಪ್‌ಡೇಟ್ ಆಂಡ್ರಾಯ್ಡ್‌ 13 ಆಪರೇಟಿಂಗ್ ಸಿಸ್ಟಮ್ ಅನ್ನು ಆಧರಿಸಿದೆ. ಆದರೆ, ಇತರೆ ರೆಡ್ಮಿ K40 ಸರಣಿಯ ಫೋನ್‌ಗಳು ಆಂಡ್ರಾಯ್ಡ್‌ 14 ಆಪರೇಟಿಂಗ್ ಸಿಸ್ಟಮ್ ಆಧಾರಿತ ಹೈಪರ್‌ಓಎಸ್‌ ಅನ್ನು ಸ್ವೀಕರಿಸಲಿದೆ.