Samsung: ಸ್ಯಾಮ್‌ಸಂಗ್‌ನಿಂದ ಹೊಸ ಲ್ಯಾಪ್‌ಟಾಪ್ ಸರಣಿ ! ಹೇಗಿದೆ ಡಿಸೈನ್? ಫೀಚರ್ಸ್‌ ಏನು?

ಸ್ಯಾಮ್‌ಸಂಗ್‌ (Samsung) ತನ್ನ ಸ್ಮಾರ್ಟ್‌ಫೋನ್‌ಗಳಿಂದಲೇ ಹೆಚ್ಚಾಗಿ ಚಿರಪರಿಚಿತವಾಗಿದೆ. ಈ ಫೋನ್‌ಗಳು ಉತ್ತಮ ಕಾರ್ಯಕ್ಷಮತೆ ಹಾಗೂ ದೀರ್ಘ ಬಾಳಿಕೆ ಮೂಲಕ ಜನಪ್ರಿಯತೆ ಪಡೆದುಕೊಂಡಿವೆ. ಈ ನಡುವೆ ಸ್ಯಾಮ್‌ಸಂಗ್‌ ಐದು ಲ್ಯಾಪ್‌ಟಾಪ್ ಮಾದರಿಗಳೊಂದಿಗೆ ಕಾಣಿಸಿಕೊಳ್ಳಲಿದೆ. ಈ ಮೂಲಕ ಲ್ಯಾಪ್‌ಟಾಪ್‌ ವಲಯದಲ್ಲಿ ಸ್ಯಾಮ್‌ಸಂಗ್ ತನ್ನದೇ ಆದ ಸ್ಪರ್ಧೆ ನೀಡಲಿದೆ.

ಹೌದು, ಸ್ಯಾಮ್‌ಸಂಗ್‌ ಹೊಸ ಹಾಗೂ ವಿಶೇಷ ಶೈಲಿಯ ಲ್ಯಾಪ್‌ಟಾಪ್‌ಗಳನ್ನು (Laptop) ಅನಾವರಣ ಮಾಡಲು ಮುಂದಾಗಿದೆ. ಈ ಲ್ಯಾಪ್‌ಟಾಪ್‌ಗಳನ್ನು ಗ್ಯಾಲಕ್ಸಿ ಅನ್‌ಪ್ಯಾಕ್ಡ್ 2024 ಈವೆಂಟ್‌ನಲ್ಲಿ(Galaxy Unpacked 2024 event) ಅಧಿಕೃತವಾಗಿ ಲಾಂಚ್‌ ಮಾಡಲಾಗುತ್ತದೆ ಎನ್ನುವ ಮಾತುಗಳು ಸಹ ಕೇಳಿಬಂದಿವೆ. ಈ ನಡುವೆ ಈ ಲ್ಯಾಪ್‌ಟಾಪ್‌ ಬಗ್ಗೆ ಕೆಲವು ಮಾಹಿತಿಗಳು ಲೀಕ್‌ ಆಗಿದ್ದು, ಅದರಂತೆ ಇವು ಏನೆಲ್ಲಾ ಫೀಚರ್ಸ್ ಆಯ್ಕೆ ಪಡೆದಿವೆ ನೋಡೋಣ ಬನ್ನಿ.

ಸ್ಯಾಮ್‌ಸಂಗ್‌ ಲ್ಯಾಪ್‌ಟಾಪ್‌: ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ಬುಕ್‌ 4 ಸರಣಿಯನ್ನು (Samsung Galaxy Book 4 Series) ಮುಂದಿನ ವರ್ಷದ ಆರಂಭದಲ್ಲಿ ಗ್ಯಾಲಕ್ಸಿ ಅನ್‌ಪ್ಯಾಕ್ಡ್ 2024 ಈವೆಂಟ್‌ನಲ್ಲಿ ಅಧಿಕೃತವಾಗಿ ಬಿಡುಗಡೆ ಮಾಡಲಾಗುವುದು ಎಂಬ ಮಾಹಿತಿ ಲಭ್ಯವಾಗಿದೆ. ಬಿಡುಗಡೆಗೆ ಇನ್ನೂ ಕೆಲವು ತಿಂಗಳುಗಳು ಬಾಕಿ ಇದ್ದರೂ ಸಹ ಈ ಲ್ಯಾಪ್‌ಟಾಪ್‌ ಬಗ್ಗೆ ಅಚ್ಚರಿ ಮಾಹಿತಿ ಲೀಕ್‌ ಆಗಿವೆ. ಅದರಂತೆ ಗ್ಯಾಲಕ್ಸಿ ಬುಕ್‌ 4 360, ಗ್ಯಾಲಕ್ಸಿ ಬುಕ್‌ 4 360 ಪ್ರೊ, ಗ್ಯಾಲಕ್ಸಿ ಬುಕ್‌ 4 ಪ್ರೊ ಮತ್ತು ಗ್ಯಾಲಕ್ಸಿ ಬುಕ್ 4 ಅಲ್ಟ್ರಾ ಅಮೋಲೆಡ್ ಡಿಸ್‌ಪ್ಲೇಗಳೊಂದಿಗೆ ಬರಲಿವೆ ಎಂದು ಹೇಳಲಾಗಿದೆ

ಈ ಸರಣಿಯ ಲ್ಯಾಪ್‌ಟಾಪ್‌ನ ಮೂಲ ಮಾದರಿಯಾದ ಗ್ಯಾಲಕ್ಸಿ ಬುಕ್‌ 4 ಫುಲ್‌ ಹೆಚ್‌ಡಿ ಎಲ್‌ಇಡಿ ಡಿಸ್‌ಪ್ಲೇ ಪಡೆಯಬಹುದು ಎಂದು ತಿಳಿದುಬಂದಿದೆ. ಜೊತೆಗೆ ಈ ಲೀಕ್‌ ಮಾಹಿತಿಯಲ್ಲಿ ಗ್ಯಾಲಕ್ಸಿ ಬುಕ್‌ 3 ಸರಣಿಯ ವಿನ್ಯಾಸವನ್ನು ಸಹ ತಿಳಿದುಕೊಳ್ಳಬಹುದಾಗಿದೆ. ಗ್ಯಾಲಕ್ಸಿ ಬುಕ್‌ 4 360 ಮತ್ತು ಗ್ಯಾಲಕ್ಸಿ ಬುಕ್‌ 4 360 ಪ್ರೊ ಡಿವೈಸ್‌ 360 ಡಿಗ್ರಿ ಕೀಗಳು ಮತ್ತು ಪೆನ್ ಬೆಂಬಲವನ್ನು ಹೊಂದಿವೆ ಎಂದು ತೋರುತ್ತದೆ. ಇದರೊಂದಿಗೆ ಆಂಟಿ-ರಿಫ್ಲೆಕ್ಟಿವ್ ಡಿಸ್‌ಪ್ಲೇ ಲೇಯರ್‌ ಆಯ್ಕೆಯನ್ನೂ ಸಹ ಪಡೆದುಕೊಂಡಿರಲಿವೆ ಎಂದು ತಿಳಿದುಬಂದಿದೆ.

ಗ್ಯಾಲಕ್ಸಿ ಬುಕ್‌ 4 ಸರಣಿಯ ಲ್ಯಾಪ್‌ಟಾಪ್‌ಗಳು ಇಂಟೆಲ್ ಪ್ರೊಸೆಸರ್‌ಗಳಿಂದ ಕಾರ್ಯನಿರ್ವಹಿಸಲಿದೆ ಎನ್ನಲಾಗಿದ್ದು, ಇವು ವಿಂಡೋಸ್ 11 ಓಎಸ್‌ನಲ್ಲಿ ರನ್‌ ಆಗಲಿವೆ. ಅದರಲ್ಲಿ ಸಾಮಾನ್ಯ ಗ್ಯಾಲಕ್ಸಿ ಬುಕ್‌ 4 ಇಂಟೆಲ್ ಕೋರ್ 5 ಪ್ರೊಸೆಸರ್‌ನಲ್ಲಿ ಕಾರ್ಯನಿರ್ವಹಿಸಿದ್ರೆ ಗ್ಯಾಲಕ್ಸಿ ಬುಕ್‌ 4 ಅಲ್ಟ್ರಾ ಇಂಟೆಲ್ ಕೋರ್ 9 ಸಿಪಿಯು ಅನ್ನು ಪ್ಯಾಕ್ ಮಾಡಬಹುದು. ಬೇಸ್ ಗ್ಯಾಲಕ್ಸಿ ಬುಕ್‌ 4 ಹೊರತುಪಡಿಸಿ ಎಲ್ಲಾ ಮಾದರಿಗಳು ಅಮೋಲೆಡ್‌ ಡಿಸ್‌ಪ್ಲೇ ಮತ್ತು ಬ್ಲೂಟೂತ್ ಆವೃತ್ತಿ 5.3 ಸಂಪರ್ಕವನ್ನು ಪಡೆದುಕೊಂಡಿರಲಿವೆ ಎಂದು ತಿಳಿದುಬಂದಿದೆ.

ಈ ಲ್ಯಾಪ್‌ಟಾಪ್‌ಗಳು ಯುಎಸ್‌ಬಿ 3.2 ಪೋರ್ಟ್, ಎರಡು ಥಂಡರ್‌ಬೋಲ್ಟ್ 4 ಪೋರ್ಟ್‌ಗಳು, ಹೆಚ್‌ಡಿಎಮ್‌ಐ, ಮೈಕ್ರೊ ಎಸ್‌ಡಿ ಕಾರ್ಡ್ ರೀಡರ್ ಮತ್ತು ಹೆಡ್‌ಫೋನ್‌ಗಳು ಅಥವಾ ಮೈಕ್ರೊಫೋನ್‌ಗಾಗಿ ಸಂಯೋಜಿತ ಪೋರ್ಟ್ ಅನ್ನು ಸಹ ಹೊಂದಿವೆ. ಇದರೊಂದಿಗೆ ಗ್ರಾಫಿಕ್ಸ್ ವಿವರಗಳನ್ನು ಗಮನಿಸಿದ್ರೆ ಗ್ಯಾಲಕ್ಸಿ ಬುಕ್‌ 4 ಮತ್ತು ಗ್ಯಾಲಕ್ಸಿ ಬುಕ್‌ 4 360 ಇಂಟೆಲ್ ಗ್ರಾಫಿಕ್ಸ್ ಅನ್ನು ಹೊಂದಿರಲಿದ್ದು, ಗ್ಯಾಲಕ್ಸಿ ಬುಕ್‌ 4 ಪ್ರೊ ಮತ್ತು ಗ್ಯಾಲಕ್ಸಿ ಬುಕ್‌ 4 360 ಪ್ರೊ ಇಂಟೆಲ್ ಆರ್ಕ್ ಗ್ರಾಫಿಕ್ಸ್‌ನೊಂದಿಗೆ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ.

ಇದರೊಂದಿಗೆ ಗ್ಯಾಲಕ್ಸಿ ಬುಕ್‌ 4 ಅಲ್ಟ್ರಾ ಶ್ರೇಣಿಯಲ್ಲಿನ ಟಾಪ್-ಎಂಡ್ ಮಾಡೆಲ್ ಎನ್ವಿಡಿಯಾ ಜಿಫೋರ್ಸ್ 4070 ಜಿಪಿಯು ಬಲದಲ್ಲಿ ಬರಲಿದೆ ಎಂದು ಹೇಳಲಾಗಿದೆ. ಹಾಗೆಯೇ ಅನ್‌ಪ್ಯಾಕ್ಡ್ 2024 ಈವೆಂಟ್ ಜನವರಿ 17, 2024 ರಂದು ಯುಎಸ್‌ ನ ಸ್ಯಾನ್ ಜೋಸ್‌ನಲ್ಲಿ ನಡೆಯಲಿದ್ದು, ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ S24 ಸರಣಿಯ ಜೊತೆಗೆ ಗ್ಯಾಲಕ್ಸಿ ಬುಕ್‌ 4 ಸರಣಿಯನ್ನು ಅನಾವರಣಗೊಳಿಸುವ ಸಾಧ್ಯತೆಯಿದೆ. ಪ್ರಮುಖ ಮಾಹಿತಿ ಏನೆಂದರೆ ಸ್ಯಾಮ್‌ಸಂಗ್‌ ಈ ಸಂಬಂಧ ಯಾವುದೇ ಅಧಿಕೃತ ಮಾಹಿತಿ ಬಹಿರಂಗಗೊಳಿಸಿಲ್ಲ.