MWC 2024: ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ರಿಂಗ್‌ ಅನಾವರಣ! ಏನೆಲ್ಲಾ ಫೀಚರ್ಸ್‌ ಪಡೆದಿದೆ?

ಸ್ಯಾಮ್‌ಸಂಗ್‌ (Samsung) ಈಗಾಗಲೇ ಭಿನ್ನ ಫೀಚರ್ಸ್ ಇರುವ ಹಾಗೂ ಇತರೆ ಸ್ಮಾರ್ಟ್‌ ಗ್ಯಾಜೆಟ್‌ ತಯಾರಕರು ಅನಾವರಣ ಮಾಡದ ವಿನೂತನ ಡಿವೈಸ್‌ಗಳನ್ನು ಅನಾವರಣ ಮಾಡಿಕೊಂಡು ಬರುತ್ತಿದೆ. ಅದರಂತೆ ಈಗ ಮೊಬೈಲ್ ವರ್ಲ್ಡ್ ಕಾಂಗ್ರೆಸ್‌ನಲ್ಲಿ ಬಹುನಿರೀಕ್ಷಿತ ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ರಿಂಗ್‌ (Samsung Galaxy Ring) ಅನಾವರಣ ಮಾಡಿದೆ.

ಹೌದು, ಸ್ಯಾಮ್‌ಸಂಗ್ ತನ್ನ ಇತ್ತೀಚಿನ ಉತ್ಪನ್ನವಾದ ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ರಿಂಗ್‌ ಅನ್ನು ಬಾರ್ಸಿಲೋನಾದಲ್ಲಿ ನಡೆಯುತ್ತಿರುವ ಮೊಬೈಲ್ ವರ್ಲ್ಡ್ ಕಾಂಗ್ರೆಸ್ (MWC) 2024 ನಲ್ಲಿ ಅನಾವರಣ ಮಾಡಿದೆ. ಸ್ಯಾಮ್‌ಸಂಗ್ ಹೆಲ್ತ್ ಪ್ಲಾಟ್‌ಫಾರ್ಮ್ ಅನ್ನು ಇದು ಕಂಟ್ರೋಲ್ ಮಾಡುತ್ತದೆ. ಹಾಗಿದ್ರೆ, ಇದರ ಫೀಚರ್ಸ್‌ ಏನು? ಇದರಲ್ಲೂ ಎಐ ಪ್ರಯೋಜನ ಇದೆಯಾ ಎಂಬಿತ್ಯಾದಿ ಮಾಹಿತಿಯನ್ನು ತಿಳಿಸಿಕೊಡಲಾಗಿದೆ ಓದಿರಿ.

ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ರಿಂಗ್‌: ಮೊಬೈಲ್ ವರ್ಲ್ಡ್ ಕಾಂಗ್ರೆಸ್ (MWC) 2024 ರಲ್ಲಿ ಸ್ಯಾಮ್‌ಸಂಗ್ ಗ್ಯಾಲಕ್ಸಿ ರಿಂಗ್ ಅನ್ನು ಮೊದಲ ಬಾರಿಗೆ ಅನಾವರಣಗೊಳಿಸಲಾಗಿದೆ. ರಿಂಗ್ ಮಾದರಿಯ ಡಿಜಿಟಲ್ ಹೆಲ್ತ್‌ಕೇರ್ ಡಿವೈಸ್‌ (Digital healthcare device) ಅನ್ನು ಸ್ಯಾಮ್‌ಸಂಗ್‌ ಮೂರು ಬಣ್ಣಗಳಲ್ಲಿ ಮತ್ತು ಒಂಬತ್ತು ಗಾತ್ರಗಳಲ್ಲಿ ಪ್ರದರ್ಶಿಸಿದೆ. ಈ ಗ್ಯಾಲಕ್ಸಿ ರಿಂಗ್ ಅನ್ನು ಮಲಗುವಾಗ ಧರಿಸಲು ಆರಾಮದಾಯಕವಾಗಿದೆ ಮತ್ತು ವಿವರವಾದ ಆರೋಗ್ಯ ಡೇಟಾವನ್ನು ನೀಡುತ್ತದೆ.

ಆದರೆ ಸ್ಯಾಮ್‌ಸಂಗ್ ಎಲೆಕ್ಟ್ರಾನಿಕ್ಸ್ ಅಧಿಕೃತ ಲಾಂಚ್‌ ವರೆಗೂ ಈ ವಿಶೇಷ ಡಿವೈಸ್‌ನ ವಿವರಗಳನ್ನು ಬಹಿರಂಗಪಡಿಸುವ ಯಾವುದೇ ಪ್ಲ್ಯಾನ್‌ ಅನ್ನು ಹೊಂದಿಲ್ಲ ಎಂಬಂತೆ ತೋರುತ್ತದೆ. ಅದಾಗ್ಯೂ ಈ ರಿಂಗ್‌ ಬಗ್ಗೆ ಸಾಕಷ್ಟು ಮಾಹಿತಿ ಲೀಕ್‌ ಆಗಿವೆ. ಈ ರಿಂಗ್‌ ಅನ್ನು ಸಮಾರಂಭದಲ್ಲಿ ಟ್ರಾನ್ಫರೆಂಟ್‌ ಪೆಟ್ಟಿಗೆಗಳಲ್ಲಿ ಪ್ರಸ್ತುತಪಡಿಸಲಾಗಿದ್ದು, ಸಂದರ್ಶಕರಿಗೆ ಪ್ರಾಯೋಗಿಕ ಅನುಭವವನ್ನು ಸೀಮಿತಗೊಳಿಸಿದೆ.

ಕಳೆದ ತಿಂಗಳು ಕ್ಯಾಲಿಫೋರ್ನಿಯಾದಲ್ಲಿ ನಡೆದ ಅನ್ಪ್ಯಾಕ್ಡ್ ಈವೆಂಟ್‌ನಲ್ಲಿ (Unpacked event) ಸ್ಯಾಮ್‌ಸಂಗ್ ಎಲೆಕ್ಟ್ರಾನಿಕ್ಸ್ ಹೊಸ ರಿಂಗ್ ಅನ್ನು ಲೇವಡಿ ಮಾಡಿತ್ತು. ಇದಾದ ಒಂದು ತಿಂಗಳ ನಂತರ ಗ್ಯಾಲಕ್ಸಿ ರಿಂಗ್‌ ಅನ್ನು ಬಹಿರಂಗಪಡಿಸಿದೆ. ಈ ವಿಶೇಷ ರಿಂಗ್‌ ಈ ವರ್ಷ ಮುಗಿಯುವುದರ ಒಳಗಾಗಿ ಲಭ್ಯವಾಗಲಿದೆ ಎಂದು ಕೆಲವು ಮಾಧ್ಯಮಗಳು ವರದಿ ಮಾಡಿವೆ.

ಈ ರಿಂಗ್‌ನ ಒಳ ಭಾಗದಲ್ಲಿ ಸೆನ್ಸರ್‌ ಆಯ್ಕೆ ನೀಡಲಾಗಿದ್ದು, ನಯವಾದ ಡಾರ್ಕ್ ಮೆಟಾಲಿಕ್ ಬಾಡಿಯನ್ನು ಹೊಂದಿದೆ. ಇದರೊಂದಿಗೆ ಲೀಕ್‌ ಮಾಹಿತಿ ಆಧರಿಸಿ 24x7 ಹೃದಯ ಬಡಿತ ಮಾನಿಟರ್, SpO2 ಸೆನ್ಸರ್‌, ನಿದ್ರೆ ಮಾನಿಟರಿಂಗ್ ಟ್ರ್ಯಾಕರ್ ಮತ್ತು ಇತರ ಫಿಟ್‌ನೆಸ್ ಸಾಮರ್ಥ್ಯಗಳನ್ನು ಒಳಗೊಂಡಂತೆ ಹಲವಾರು ಆರೋಗ್ಯ ಟ್ರ್ಯಾಕಿಂಗ್ ಫೀಚರ್ಸ್‌ ಅನ್ನು ಈ ರಿಂಗ್‌ ನೀಡಲಿದೆ ಎನ್ನಲಾಗಿದೆ.

ಸ್ಯಾಮ್‌ಸಂಗ್ ಗ್ಯಾಲಕ್ಸಿ ರಿಂಗ್ ಆರಂಭದಲ್ಲಿ ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಸ್ಮಾರ್ಟ್‌ಫೋನ್‌ಗಳೊಂದಿಗೆ ಪ್ರತ್ಯೇಕವಾಗಿ ಹೊಂದಿಕೊಳ್ಳುತ್ತದೆ ಎಂದು ತಿಳಿದುಬಂದಿದ್ದು, ಭವಿಷ್ಯದಲ್ಲಿ ಹೆಚ್ಚಿನ ಆಂಡರಾಯ್ಡ್‌ ಡಿವೈಸ್‌ಗಳಿಗೆ ಹೊಂದಾಣಿಕೆಯನ್ನು ವಿಸ್ತರಿಸಲು ಯೋಜಿಸಿದೆ ಎನ್ನಲಾಗಿದೆ. ಜೊತೆಗೆ ಸ್ಯಾಮ್‌ಸಂಗ್ ಗ್ಯಾಲಕ್ಸಿ ರಿಂಗ್ ಅನ್ನು ಹೊಸ ಹೆಲ್ತ್ ಫಾರ್ಮ್ ಫ್ಯಾಕ್ಟರ್ ಆಗಿ ಇರಿಸುತ್ತದೆ ಎನ್ನಲಾಗಿದೆ.

ಇದನ್ನು ನವೀಕರಿಸಿದ ಸ್ಯಾಮ್‌ಸಂಗ್‌ ಹೆಲ್ತ್ ಪ್ಲಾಟ್‌ಫಾರ್ಮ್‌ನೊಂದಿಗೆ ಸಂಯೋಜಿಸಲಾಗಿದ್ದು, ನಿದ್ರೆಯ ಗುಣಮಟ್ಟ, ದೈನಂದಿನ ಚಟುವಟಿಕೆ, ಹೃದಯ ಬಡಿತ ಮತ್ತು ಹೆಚ್ಚಿನವುಗಳ ಮೇಲೆ ಸಂಭಾವ್ಯ ಗಮನವನ್ನು ನೀಡಲಿದೆ ಎನ್ನಲಾಗಿದೆ. ಜೊತೆಗೆ ಮೈ ವೈಟಲಿಟಿ ಸ್ಕೋರ್ (My Vitality Score) ಆಯ್ಕೆ ಇರಲಿದ್ದು ಇದರಲ್ಲಿ ವಿವಿಧ ಮೆಟ್ರಿಕ್‌ಗಳ ಆಧಾರದ ಮೇಲೆ ವೈಯಕ್ತಿಕಗೊಳಿಸಿದ ಆರೋಗ್ಯ ಒಳನೋಟಗಳನ್ನು ಪಡೆಯಬಹುದಾಗಿದೆ ಹಾಗೆಯೇ ಪೂರ್ವನಿರ್ಧರಿತ ಆರೋಗ್ಯ ಗುರಿಗಳನ್ನು ಟ್ರ್ಯಾಕ್ ಮಾಡಲು ಮತ್ತು ಸಾಧಿಸಲು ಬೂಸ್ಟರ್ ಕಾರ್ಡ್ (Booster Card) ಪ್ರಯೋಜನ ಪಡೆಯಬಹುದಾಗಿದೆ.

ಹೆಚ್ಚುವರಿಯಾಗಿ, MWC ಸಮಾರಂಭದಲ್ಲಿ ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ಎಐ ಮೇಲೆ ಗಮನಾರ್ಹ ಒತ್ತು ನೀಡಿದೆ. ಈಗಾಗಲೇ ಗ್ಯಾಲಕ್ಸಿ S23 ಸರಣಿ ಮತ್ತು ಟ್ಯಾಬ್‌ S9 ಸರಣಿಯಂತಹ (Galaxy S23 series and Tab S9 series) ಸ್ಮಾರ್ಟ್‌ಫೋನ್‌ಗಳಿಗಾಗಿ ಎಐ ಅನ್ನು ಘೋ‍ಷಣೆ ಮಾಡಲಾಗಿದ್ದು, ಈ ಎಐ ಸೂಟ್ ಈಗ ಗ್ಯಾಲಕ್ಸಿ ಬುಕ್‌ 4 ಸರಣಿ ಮತ್ತು ಗ್ಯಾಲಕ್ಸಿ ವಾಚ್‌ 6 ಸರಣಿಗಳನ್ನು ಒಳಗೊಂಡಂತೆ ವೈವಿಧ್ಯಮಯ ಉತ್ಪನ್ನಗಳ ಸಾಲುಗಳಿಗೆ ಎಐ (AI) ವಿಸ್ತರಣೆ ಮಾಡಲಾಗುತ್ತದೆ ಎಂದು ತಿಳಿಸಿದೆ.