ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ಅನ್‌ಪ್ಯಾಕ್ಡ್‌ 2024 ಕಾರ್ಯಕ್ರಮ ಯಾವಾಗ?..ನಿರೀಕ್ಷೆಗಳು ಏನು?

ಸ್ಯಾಮ್‌ಸಂಗ್‌ ಸಂಸ್ಥೆಯ ಬಹುನಿರೀಕ್ಷಿತ ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ಅನ್‌ಪ್ಯಾಕ್ಡ್‌ ಈವೆಂಟ್‌ (Samsung Galaxy Unpacked 2024) ಇದೇ ಜುಲೈ 10 ರಂದು ಪ್ರಾರಂಭವಾಗಲಿದೆ ಎಂದು ಲೀಕ್‌ ಮಾಹಿತಿಗಳಿಂದ ತಿಳಿದುಬಂದಿದೆ. ಅಂದಹಾಗೆ ಈ ಬಾರಿಯ ಕಾರ್ಯಕ್ರಮ ಪ್ಯಾರಿಸ್‌ನಲ್ಲಿ ನಡೆಯಲಿದೆ ಎಂದು ಹೇಳಲಾಗಿದೆ.

ಹೌದು, ಸ್ಯಾಮ್‌ಸಂಗ್‌ ಕಂಪನಿಯ ಸ್ಯಾಮ್‌ಸಂಗ್‌ ಅನ್‌ಪ್ಯಾಕ್ಡ್‌ ಈವೆಂಟ್‌ 2024 ಕಾರ್ಯಕ್ರಮವು ಜುಲೈ 10 ರಂದು ವರದಿಗಳಾಗಿವೆ. ಇನ್ನು ಈ ಬಹುನಿರೀಕ್ಷಿತ ಕಾರ್ಯಕ್ರಮದಲ್ಲಿ ಫೋಲ್ಡೆಬಲ್‌ ಫೋನ್‌ಗಳು, ಹೊಸ ವಾಚ್‌ಗಳು, ಗ್ಯಾಲಕ್ಸಿ ರಿಂಗ್‌ ಸೇರಿದಂತೆ ಮತ್ತಷ್ಟು ಕುತೂಹಲಕಾರಿ ಉತ್ಪನ್ನಗಳು ಅನಾವರಣ ಆಗುವ ನಿರೀಕ್ಷೆಗಳು ಹೆಚ್ಚಿವೆ.

ಸ್ಯಾಮ್‌ಸಂಗ್‌ ಕಂಪನಿಯ ಈ ಈವೆಂಟ್‌ನಲ್ಲಿ ಹೊಸ ಗ್ಯಾಲಕ್ಸಿ Z ಫೋಲ್ಡ್‌ 6 ಮತ್ತು Z ಫ್ಲಿಪ್‌ 6 ಫೋಲ್ಡೆಬಲ್‌ ಮಾದರಿಯ ಫೋನ್‌ಗಳು ಲಾಂಚ್‌ ಆಗಲಿವೆ. ಅಲ್ಲದೇ ಹೊಸ ಗ್ಯಾಲಕ್ಸಿ ವಾಚ್‌ 7 ಸರಣಿಗಳು ಮತ್ತು ಬಹು ನಿರೀಕ್ಷಿತ ಗ್ಯಾಲಕ್ಸಿ ರಿಂಗ್‌ ಡಿವೈಸ್‌ ಅನಾವರಣಕ್ಕೆ ಈ ಕಾರ್ಯಕ್ರಮ ವೇದಿಕೆ ಆಗಲಿದೆ. ಹಾಗಾದರೇ ಈ ಕಾರ್ಯಕ್ರಮದಲ್ಲಿ ಯಾವೆಲ್ಲಾ ಡಿವೈಸ್‌ಗಳ ಲಾಂಚ್‌ ಆಗಲಿವೆ? ಅವುಗಳ ನಿರೀಕ್ಷಿತ ಫೀಚರ್ಸ್‌ ಏನು ಎನ್ನುವ ಬಗ್ಗೆ ಮುಂದೆ ತಿಳಿಯೋಣ ಬನ್ನಿರಿ.

ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ವಾಚ್‌ 7

ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ವಾಚ್‌ 7 ಕ್ಲಾಸಿಕ್‌, ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ವಾಚ್‌ 7 ಪ್ರೊ ಮತ್ತು ಹೊಸ ಆವೃತ್ತಿಯನ್ನು ನಿರೀಕ್ಷಿಸುತ್ತಿದ್ದೇವೆ. ಈ ಹೊಸ ಮಾದರಿಯನ್ನು ಗ್ಯಾಲಕ್ಸಿ ವಾಚ್ ಫ್ಯಾನ್ ಆವೃತ್ತಿ (FE) ಅಥವಾ ಗ್ಯಾಲಕ್ಸಿ ವಾಚ್ 4 (2024) ಎಂದು ನಾಮಕರಣ ಮಾಡುವ ಸಾಧ್ಯತೆಗಳು ಇವೆ ಎನ್ನಲಾಗಿದೆ.

ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ವಾಚ್‌ 7 ಸರಣಿಯು 3nm ಚಿಪ್‌ನ ಪವರ್‌ನಲ್ಲಿ ಕೆಲಸ ನಿರ್ವಹಿಸಲಿದೆ ಎಂದು ನಿರೀಕ್ಷಿಸಲಾಗಿದೆ. ಇದು ಗ್ಯಾಲಕ್ಸಿ ವಾಚ್‌ 6 ಸರಣಿಯಲ್ಲಿನ ಚಿಪ್‌ಗಿಂತ ಶೇ 50% ಹೆಚ್ಚು ಶಕ್ತಿಯ ದಕ್ಷತೆಯನ್ನು ಒದಗಿಸಲಿದೆ. ಹಾಗೆಯೇ ಸ್ಟೋರೇಜ್‌ ಸಾಮರ್ಥ್ಯವನ್ನು 32GB ಗೆ ಅಪ್‌ಗ್ರೇಡ್ ಮಾಡಬಹುದು ಎನ್ನಲಾಗಿದೆ ಜೊತೆಗೆ ಇದು ವೈ ಫೈ ಓನ್ಲಿ ಮತ್ತು ವೈ ಫೈ+ eSIM (ಸೆಲ್ಯುಲಾರ್) ಆವೃತ್ತಿಗಳಲ್ಲಿ ಮಾರುಕಟ್ಟೆಗೆ ಲಗ್ಗೆ ಇಡಬಹುದು.

ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ Z ಫ್ಲಿಪ್ 6 ಹಾಗೂ ಗ್ಯಾಲಕ್ಸಿ Z ಫೋಲ್ಡ್ 6

ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ Z ಫ್ಲಿಪ್ 6 ಫೋನ್‌ ಲೈಟ್‌ ಬ್ಲೂ, ಲೈಟ್‌ ಗ್ರೀನ್, ಸಿಲ್ವರ್ ಶ್ಯಾಡೋ, ಯಲ್ಲೋ, ಬ್ಲ್ಯಾಕ್‌, ಪೀಚ್ ಮತ್ತು ವೈಟ್‌ ಕಲರ್‌ ಆಯ್ಕೆಗಳಲ್ಲಿ ಮಾರುಕಟ್ಟೆ ಎಂಟ್ರಿ ಕೊಡಲಿದೆ ಎಂದು ಹೇಳಲಾಗುತ್ತಿದೆ. ಇನ್ನು ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ Z ಫ್ಲಿಪ್ 6 ವಿಶಾಲ ಕವರ್ ಡಿಸ್‌ಪ್ಲೇ, ಅಪ್‌ಡೇಟ್‌ ಹಿಂಜ್ ಮತ್ತು ಇತರ ನವೀಕರಣಗಳನ್ನು ಪಡೆದಿರಲಿದೆ.

ಹಾಗೆಯೇ ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ Z ಫ್ಲಿಪ್ 6 ಹಾಗೂ ಗ್ಯಾಲಕ್ಸಿ Z ಫೋಲ್ಡ್ 6 ಫೋನ್‌ಗಳು ಎರಡೂ ಒಂದೇ ಸ್ಟೋರೇಜ್‌ ವೇರಿಯಂಟ್‌ ಆಯ್ಕೆಗಳಲ್ಲಿ ಲಾಂಚ್‌ ಆಗವ ನಿರೀಕ್ಷೆಗಳು ಹೆಚ್ಚಿವೆ. ಇದಲ್ಲದೇ ಸಾಮಾನ್ಯ Z ಫೋಲ್ಡಬಲ್‌ ಫೋನ್‌ಗಳ ಜೊತೆಗೆ ಎರಡು ಹೊಸ ಫ್ಯಾನ್ ಆವೃತ್ತಿ ಮಾದರಿಗಳನ್ನು (FE ಸರಣಿ) ಸಹ ನಿರೀಕ್ಷಿಸಲಾಗುತ್ತಿದೆ.

ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ Z ಫ್ಲಿಪ್ 6 FE ಫೋನ್‌ ಕ್ವಾಲ್ಕಮ್‌ ಸ್ನ್ಯಾಪ್‌ಡ್ರಾಗನ್‌ 7s ಜೆನ್‌ 2 SoC ಚಿಪ್‌ಸೆಟ್‌ ಪ್ರೊಸೆಸರ್‌ ಸೌಲಭ್ಯ ಪಡೆದಿರಲಿದೆ ಎಂದು ಹೇಳಲಾಗುತ್ತಿದೆ. ಇನ್ನು ಗ್ಯಾಲಕ್ಸಿ Z ಫೋಲ್ಡ್‌ 6 FE ಸ್ನಾಪ್‌ಡ್ರಾಗನ್ ಮತ್ತು Exynos (Exynos 2300 ಅಥವಾ 2200) ಚಿಪ್‌ಸೆಟ್‌ ಪ್ರೊಸೆಸರ್‌ಗಳಿಂದ ಕೆಲಸ ಮಾಡಲಿದೆ ಎಂದು ನಿರೀಕ್ಷಿಸಲಾಗಿದೆ.

ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ಬಡ್ಸ್‌ 3

ಈ ಕಾರ್ಯಕ್ರಮದಲ್ಲಿ ಸಂಸ್ಥೆಯು ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ ಬಡ್ಸ್‌ 3 (Galaxy Buds 3) (SM-R630) ಮತ್ತು ಗ್ಯಾಲಕ್ಸಿ ಬಡ್ಸ್ 3 ಪ್ರೊ (SM-R530) ಡಿವೈಸ್‌ಗಳನ್ನು ಸಹ ಅನಾವರಣ ಮಾಡುವ ಸಾಧ್ಯತೆಗಳು ಅಧಿಕ ಎನ್ನಲಾಗಿದೆ. ಅಲ್ಲದೇ ಗ್ಯಾಲಕ್ಸಿ AI ಫೀಚರ್ಸ್‌ಗಳ ಅನಾವರಣ ಸಹ ಮಾಡಲಿದೆ ಎನ್ನಲಾಗಿದೆ.