Samsung: ಐಫೋನ್ ಅನ್ನು ಹಿಂದೆ ತಳ್ಳಿದ ಸ್ಯಾಮ್‌ಸಂಗ್! ನಂ.1 ಸ್ಮಾರ್ಟ್‌ಫೋನ್ ಬ್ರಾಂಡ್ ಆದ ಸ್ಯಾಮ್‌ಸಂಗ್

ಸ್ಮಾರ್ಟ್‌ಫೋನ್‌ಗಳ ವಿಭಾಗದಲ್ಲಿ ಟಾಪ್‌ ಫೋನ್‌ಗಳು ಎಂದು ಹೆಸರು ಪಡೆದಿದ್ದ ಐಫೋನ್‌ಗಳು (iPhones) ಇನ್ಮುಂದೆ ಬದಿಗೆ ಸರಿಯಲಿವೆ. ಯಾಕೆಂದರೆ ಐಡಿಸಿಯ ವರದಿಯ ಪ್ರಕಾರ ಸ್ಯಾಮ್‌ಸಂಗ್ (Samsung) ಅಗ್ರಸ್ಥಾನದಲ್ಲಿದ್ದು, ವಿಶ್ವದ ನಂಬರ್ ಒನ್ ಸ್ಮಾರ್ಟ್‌ಫೋನ್ ಬ್ರ್ಯಾಂಡ್‌ ಆಪಲ್‌ನ ಆಳ್ವಿಕೆಯನ್ನು ಕೊನೆಗೊಳಿಸಿದೆ.

ಹೌದು, ಐಡಿಸಿಯ ವರದಿಯ ಪ್ರಕಾರ ಸ್ಯಾಮ್‌ಸಂಗ್ ಅಗ್ರ ಸ್ಥಾನ ಪಡೆದಿದ್ದು, ವಿಶ್ವದ ನಂಬರ್ ಒನ್ ಸ್ಮಾರ್ಟ್‌ಫೋನ್ ಬ್ರ್ಯಾಂಡ್ ಎಂದು ಕರೆಸಿಕೊಂಡಿದ್ದ ಆಪಲ್‌ನ ಆಳ್ವಿಕೆಯನ್ನು ಈ ಮೂಲಕ ಕೊನೆಗಾಣಿಸಿದೆ. ಜಾಗತಿಕ ಸ್ಮಾರ್ಟ್‌ಫೋನ್ ಸಾಗಣೆಗಳು 2024 ರ ಮೊದಲ ತ್ರೈಮಾಸಿಕದಲ್ಲಿ 289.4 ಮಿಲಿಯನ್ ಯುನಿಟ್‌ಗಳಿಗೆ ವರ್ಷದಿಂದ ವರ್ಷಕ್ಕೆ 7.8% ಹೆಚ್ಚಾಗಿದೆ ಎಂದು ಈ ವರದಿಯಲ್ಲಿ ಉಲ್ಲೇಖ ಮಾಡಲಾಗಿದೆ. ಹಾಗಿದ್ರೆ, ಬನ್ನಿ ಸ್ಯಾಮ್‌ಸಂಗ್‌ ಸ್ಮಾರ್ಟ್‌ಫೋನ್‌ ವಲಯದಲ್ಲಿ ಮಾಡಿದ ಮಹಾನ್‌ ಸಾಧನೆ ಏನು ಅನ್ನೋದನ್ನು ನೋಡೋಣ.

ಅಗ್ರ ಸ್ಥಾನ ಪಡೆದ ಸ್ಯಾಮ್‌ಸಂಗ್‌: ಸ್ಯಾಮ್‌ಸಂಗ್ 2024 ರ ಮೊದಲ ತ್ರೈಮಾಸಿಕದಲ್ಲಿ 20.8% ಮಾರುಕಟ್ಟೆ ಪಾಲನ್ನು ಹೊಂದಿರುವ 60.1 ಮಿಲಿಯನ್ ಯುನಿಟ್‌ಗಳನ್ನು ರವಾನಿಸಿದೆ . ಆದರೆ ಆಪಲ್‌ನ ಸಾಗಣೆಗಳು 10% ರಷ್ಟು ಕಡಿಮೆಯಾಗಿದೆ ಮತ್ತು 50.1 ಮಿಲಿಯನ್ ಯುನಿಟ್‌ಗಳನ್ನು ರವಾನಿಸಲಾಗಿದೆ. ಕಳೆದ ವರ್ಷದ ಇದೇ ತ್ರೈಮಾಸಿಕದಲ್ಲಿ, ಆಪಲ್ 55.4 ಮಿಲಿಯನ್ ಐಫೋನ್‌ಗಳನ್ನು ರವಾನಿಸಿತ್ತು. 2024 ರ ಮೊದಲ ತ್ರೈಮಾಸಿಕದಲ್ಲಿ ಆಪಲ್‌ನ ಮಾರುಕಟ್ಟೆ ಪಾಲು 17.3% ರಷ್ಟಿತ್ತು.

ಅಲ್ಲದೆ ಮೂರನೇ ಸ್ಥಾನದಲ್ಲಿ ಶಿಯೋಮಿ 14.1% ಮಾರುಕಟ್ಟೆ ಪಾಲನ್ನು ಹೊಂದಿದ್ದು, Q1 2024 ರಲ್ಲಿ 40 ಮಿಲಿಯನ್ ಯುನಿಟ್‌ಗಳನ್ನು ರವಾನಿಸಿದೆ. ಆದರೆ, ಟ್ರಾನ್ಸ್‌ಷನ್ ಸಾಗಣೆಗಳು 85% ರಷ್ಟು ಜಿಗಿದು 28.5 ಮಿಲಿಯನ್‌ಗೆ ತಲುಪಿದರೆ. ಒಪ್ಪೋ ಮೊದಲ ತ್ರೈಮಾಸಿಕದಲ್ಲಿ ಐದನೇ ಸ್ಥಾನವನ್ನು ಪಡೆದು ವಿವೋವನ್ನು ಅನ್ನು ಹಿಂದಿಕ್ಕಿದೆ. ಐಫೋನ್ ತಯಾರಕ ಆಪಲ್ ಕಳೆದ ವರ್ಷದ ಡಿಸೆಂಬರ್ ತ್ರೈಮಾಸಿಕದಲ್ಲಿ ಉತ್ತಮ ಪ್ರದರ್ಶನವನ್ನು ನೀಡಿತ್ತು. ಸ್ಯಾಮ್‌ಸಂಗ್ ಅನ್ನು ಸೋಲಿಸುವ ಮೂಲಕ ನಂಬರ್ 1 ಸ್ಥಾನವನ್ನು ಪಡೆದಿತ್ತು.

ಕಳೆದ ಎರಡು ವರ್ಷಗಳ ಪ್ರಕ್ಷುಬ್ಧತೆಯಿಂದ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯು ಇದೀಗ ಪ್ರಬಲವಾಗಿದೆ ಮತ್ತು ಬದಲಾಗಿದೆ ಎಂದು ಐಡಿಸಿ ಯ ವರ್ಲ್ಡ್‌ವೈಡ್ ಟ್ರ್ಯಾಕರ್ ತಂಡದ ಸಂಶೋಧನಾ ನಿರ್ದೇಶಕಿ ನಬಿಲಾ ಪೋಪಾಲ್ ಮಾಹಿತಿ ನೀಡಿದ್ದಾರೆ. ಪೋಪಾಲ್ ಅವರ ಪ್ರಕಾರ, ದೊಡ್ಡ ಕೊಡುಗೆ ನೀಡುವ ಕಂಪನಿಗಳಲ್ಲಿನ ಅಧಿಕಾರದಲ್ಲಿ ಬದಲಾವಣೆ ಉಂಟಾಗಿದೆ. ಕಂಪೆನಿಗಳು ಜಾಗತಿಕವಾಗಿ ತಮ್ಮ ತಂತ್ರಗಳನ್ನು ಸರಿಹೊಂದಿಸುವುದರಿಂದ ಈ ಕಾರ್ಯ ಸಾಧುವಾಗಿದೆ ಎಂದಿದ್ದಾರೆ.

ಅದರಲ್ಲೂ ಕಳೆದ ಎರಡು ವರ್ಷಗಳಲ್ಲಿ ದೊಡ್ಡ ಕುಸಿತವನ್ನು ಅನುಭವಿಸಿದ ನಂತರ ಶಿಯೋಮಿ ಈಗ ದೊಡ್ಡ ಮಟ್ಟದಲ್ಲಿ ಹಿಂತಿರುಗಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಆಕ್ರಮಣಕಾರಿ ಬೆಳವಣಿಗೆಯೊಂದಿಗೆ ಟಾಪ್ 5 ರ ವಿಭಾಗದಲ್ಲಿ ಟ್ರಾನ್ಸ್‌ಷನ್ ಸ್ಥಿರವಾಗಿದೆ ಎಂದು ವಿವರಿಸಿದ್ದಾರೆ. ಇನ್ನು ಅದರ ಸಾಗಣೆಗಳು ಬರೋಬ್ಬರಿ 84.5% ರಷ್ಟು ಏರಿಕೆಯಾದ ಕಾರಣ ಟ್ರಾನ್ಸ್‌ಷನ್ ವೇಗವಾಗಿ ಬೆಳೆಯುತ್ತಿರುವ ಬ್ರ್ಯಾಂಡ್ ಆಗಿ ಗುರುತಿಸಿಕೊಂಡಿದೆ. ಚೀನೀ ಸಂಘಟಿತ ಸಂಸ್ಥೆಯು 28.5 ಮಿಲಿಯನ್ ಘಟಕಗಳನ್ನು ರವಾನಿಸಿದ್ದು, ಅದರ ಮಾರುಕಟ್ಟೆ ಪಾಲು ಕೇವಲ 10% ಕ್ಕಿಂತ ಕಡಿಮೆ ಇದೆ.

ಸ್ಯಾಮ್‌ಸಂಗ್‌ ಅಗ್ರ ಸ್ಥಾನ ಪಡೆಯಲು ಕಾರಣ ಏನು?: ದಕ್ಷಿಣ ಕೊರಿಯಾದ ಕಂಪನಿ ಸ್ಯಾಮ್‌ಸಂಗ್ ಈ ವರ್ಷದ ಆರಂಭದಲ್ಲಿ ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ S24 ಸರಣಿ (Samsung Galaxy S24 series) ಬಿಡುಗಡೆ ಮಾಡಿತ್ತು. ವರ್ಷದ ಮೊದಲ ತ್ರೈಮಾಸಿಕದಲ್ಲಿ, ಕಂಪನಿಯು 60 ಮಿಲಿಯನ್ ಫೋನ್‌ಗಳನ್ನು ರವಾನಿಸಿದೆ. ಕಳೆದ ವರ್ಷ ಬಿಡುಗಡೆಯಾದ ಗ್ಯಾಲಕ್ಸಿ S23 (Galaxy S23) ಗೆ ಹೋಲಿಸಿದರೆ ಸ್ಯಾಮ್‌ಸಂಗ್‌ ಗ್ಯಾಲಕ್ಸಿ S24 ಸ್ಮಾರ್ಟ್‌ಫೋನ್‌ನ ಜಾಗತಿಕ ಮಾರಾಟವು 8 ಪ್ರತಿಶತದಷ್ಟು ಹೆಚ್ಚಾಗಿದೆ.