ಇನ್ಮುಂದೆ ಲಾಂಚ್‌ ಆಗುವ ಫೋನ್‌ಗಳಲ್ಲಿ ಈ ವಿಷಯಗಳೇ ಟ್ರೆಂಡಿಂಗ್‌; ಯಾಕಂದ್ರೆ!?

ಸ್ಮಾರ್ಟ್‌ಫೋನ್‌ ಮಾರುಕಟ್ಟೆಯಲ್ಲಿ ಹೊಸದಾಗಿ ಲಾಂಚ್‌ ಆಗುತ್ತಿದ್ದ ಪೋನ್‌ಗಳು ಈವರೆಗೂ ಉತ್ತಮ ಕ್ಯಾಮೆರಾ ಆಯ್ಕೆ, ಬ್ಯಾಟರಿ ಸಾಮರ್ಥ್ಯ ಹಾಗೂ ಇನ್ನಿತರೆ ಫೀಚರ್ಸ್‌ಗಳ ಮೂಲಕ ಸದ್ದು ಮಾಡುತ್ತಿದ್ದವು. ಆದರೆ, ಇನ್ಮುಂದೆ ಹೆಚ್ಚಿನ RAM ವಿಚಾರದಲ್ಲಿ ಆರ್ಭಟಿಸಲಿವೆ.

ಹೌದು, ಸದ್ಯಕ್ಕೆ ಸ್ಮಾರ್ಟ್‌ಫೋನ್‌ಗಳು ಅದರಲ್ಲೂ ಉತ್ತಮ ಶ್ರೇಣಿಯ ಪ್ರೀಮಿಯಂ ಫೋನ್‌ಗಳು ಮಾತ್ರ 16GB RAM ಆಯ್ಕೆ ಹೊಂದುವ ಮೂಲಕ ಗ್ರಾಹಕರನ್ನು ಆಕರ್ಷಿಸುತ್ತಿವೆ. ಆದರೆ ಇದು ಕೆಲವೇ ದಿನಗಳಲ್ಲಿ ಬದಲಾಗಲಿದ್ದು, ಸ್ಮಾರ್ಟ್‌ಫೋನ್‌ ತಯಾರಕರು ಈ ವಿಚಾರದಲ್ಲಿ ತೀವ್ರ ಪೈಪೋಟಿ ಎದುರಿಸಲಿದ್ದಾರೆ ಎಂದು ತಿಳಿದುಬಂದಿದೆ. ಹಾಗಿದ್ರೆ, ಯಾಕೆ ಮೊಬೈಲ್‌ಗಳಲ್ಲಿ ಹೆಚ್ಚಿನ RAM ನೀಡಲಾಗುತ್ತಿದೆ?, ಇವುಗಳಿಂದ ಆಗುವ ಲಾಭ ಏನು ಎಂಬ ಇಂಟ್ರೆಸ್ಟಿಂಗ್‌ ಮಾಹಿತಿ ಇಲ್ಲಿದೆ ನೋಡಿ.

24GB RAM ಆಯ್ಕೆ: ಸ್ಮಾರ್ಟ್‌ಫೋನ್‌ಗಳು ಉತ್ತಮ ಕಾರ್ಯಕ್ಷಮತೆ ಹೊಂದಲು RAM ಪ್ರಮುಖ ಪಾತ್ರ ವಹಿಸುತ್ತದೆ. ಅದರಲ್ಲೂ ಇತ್ತೀಚಿನ ಕೆಲವು ಫೋನ್‌ಗಳಲ್ಲಿ ಇಂಟರ್ನಲ್‌ ಸ್ಟೋರೇಜ್‌ ಅನ್ನೇ ಹೆಚ್ಚುವರಿ RAM ಅನ್ನಾಗಿ ಪರಿವರ್ತಿಸಿಕೊಳ್ಳುವ ಸೌಲಭ್ಯ ಪಡೆದಿವೆ. ಅದಾಗ್ಯೂ ಇನ್ಮುಂದೆ ಲಾಂಚ್‌ ಆಗುವ ಫೋನ್‌ಗಳಲ್ಲಿ ನೇರವಾಗಿ 24GB RAM ಆಯ್ಕೆ ನೀಡಲಾಗುತ್ತದೆ ಎನ್ನಲಾಗಿದೆ.

ಯಾವೆಲ್ಲಾ ಫೋನ್‌ಗಳಲ್ಲಿ 24GB RAM: ಚೀನೀ ಕಂಪನಿಗಳಾದ ಒನ್‌ಪ್ಲಸ್, ಒಪ್ಪೋ ಮತ್ತು ರಿಯಲ್‌ಮಿಯ ಮುಂದಿನ ಫೋನ್‌ಗಳಲ್ಲಿ ಈ ಸೌಲಭ್ಯ ಲಭ್ಯ ಇರಲಿದೆ ಎನ್ನಲಾಗಿದೆ. ಅದರಂತೆ ಇವೆಲ್ಲವೂ BBK ಎಲೆಕ್ಟ್ರಾನಿಕ್ಸ್ ಒಡೆತನದಲ್ಲಿದ್ದು, ಈ ಸೌಲಭ್ಯ ಲಭ್ಯವಾದರೆ ಎಷ್ಟೇ ಆಪ್‌ಗಳನ್ನಾದರೂ ಸಹ ಇನ್‌ಸ್ಟಾಲ್‌ ಮಾಡಬಹುದು. ಇದರೊಂದಿಗೆ ಈ ವರ್ಧಿತ ಆನ್‌ಬೋರ್ಡ್ ಮೆಮೊರಿಯು ಗೇಮಿಂಗ್ ಮತ್ತು ಇತರೆ ಬಹುಕಾರ್ಯಕಕ್ಕೆ ಸಹಾಯ ಮಾಡಲಿದೆ.

ಪ್ರಸಿದ್ಧ ವೈಬೊ ಟಿಪ್ಪರ್ ಡಿಜಿಟಲ್ ಚಾಟ್ ಸ್ಟೇಷನ್ ಮಾಹಿತಿ ಪ್ರಕಾರ 24GB ವರೆಗಿನ LPDDR5X RAM ಆಯ್ಕೆ ಹೊಂದಿರುವ ಸ್ಮಾರ್ಟ್‌ಫೋನ್‌ಗಳು ಇದೀಗ ಅಭಿವೃದ್ಧಿಯಲ್ಲಿದ್ದು, ಅಗಾಧವಾದ ಆನ್‌ಬೋರ್ಡ್ ಸಾಮರ್ಥ್ಯದೊಂದಿಗೆ ಸ್ಮಾರ್ಟ್‌ಫೋನ್‌ಗಳು ಕಾಣಿಸಿಕೊಳ್ಳಲಿವೆ. ಇದು ಓಗಾ ಗ್ರೂಪ್ ಗೆ ಹೆಚ್ಚು ಹೆಚ್ಚು ಜನಪ್ರಿಯವಾಗಲು ಕಾರಣವಾಗುತ್ತದೆ ಎಂದು ತಿಳಿಸಲಾಗಿದ್ದು, ಒಪ್ಪೋ ಒನ್‌ಪ್ಲಸ್ ಮತ್ತು ರಿಯಲ್‌ಮಿಗಳಲ್ಲಿ ಕಾಣಿಸಿಕೊಳ್ಳಲಿದೆ ಎಂದು ಹೇಳಿದ್ದಾರೆ.

ಅದಾಗ್ಯೂ ಪ್ರಮುಖ ವರದಿಗಳ ಪ್ರಕಾರ BBK ಎಲೆಕ್ಟ್ರಾನಿಕ್ಸ್-ಮಾಲೀಕತ್ವದ ಕಂಪನಿಗಳ ಹೊಸ ಸ್ಮಾರ್ಟ್‌ಫೋನ್‌ಗಳು ಕನಿಷ್ಠ ಅಂದರೂ 16GB RAM ಹಾಗೂ ಉತ್ತಮ ಶ್ರೇಣಿಯ ಫೋನ್‌ಗಳಲ್ಲಿ 24GB RAM ಅನ್ನು ಹೊಂದಿರುತ್ತದೆ ಎಂದು ಮಾಹಿತಿ ತಿಳಿದುಬಂದಿದೆ. ಇಷ್ಟು ಮಾತ್ರವಲ್ಲದೆ ಓಸ್‌ನಲ್ಲೂ ಸುಧಾರಣೆ ಆಗಲಿದೆ ಎಂದು ಹೇಳಲಾಗುತ್ತಿದೆ. ಅದಾಗ್ಯೂ ಮೇಲೆ ತಿಳಿಸಿದ ಬ್ರ್ಯಾಂಡ್‌ಗಳು ಈ ಬಗ್ಗೆ ಯಾವುದೆ ನಿಖರ ಮಾಹಿತಿಯನ್ನು ನೀಡಿಲ್ಲ.

ಮೊದಲು ಯಾವ ಫೋನ್‌ನಲ್ಲಿ 24GB RAM ಇರಲಿದೆ?: 24GB RAM ಹೊಂದಿರುವ ಮೊದಲ ಸ್ಮಾರ್ಟ್‌ಫೋನ್ ಒನ್‌ಪ್ಲಸ್‌ ಏಸ್‌ 2 ಪ್ರೊ (OnePlus Ace 2 Pro) ಆಗಿರಬಹುದು ಎನ್ನಲಾಗಿದ್ದು, ಈ ಫೋನ್ ಜುಲೈ ಅಥವಾ ಆಗಸ್ಟ್‌ನಲ್ಲಿ ಲಾಂಚ್‌ ಆಗಲಿದೆ ಎನ್ನಲಾಗಿದೆ. ಹಾಗೆಯೇ ಈ ಫೋನ್ 1440Hz ಪಲ್ಸ್ ವಿಡ್ತ್ ಮಾಡ್ಯುಲೇಶನ್ (PWM) ಆವರ್ತನದೊಂದಿಗೆ 6.74 ಇಂಚಿನ ಡಿಸ್‌ಪ್ಲೇ ಹೊಂದಿರಲಿದೆ ಎನ್ನಲಾಗಿದೆ.

ಅಂದರೆ ಈ ಡಿಸ್‌ಪ್ಲೇ 1,240 x 2,772 ಪಿಕ್ಸೆಲ್ ಸ್ಕ್ರೀನ್ ರೆಸಲ್ಯೂಶನ್ ಸಾಮರ್ಥ್ಯ ಪಡೆದುಕೊಳ್ಳಲಿದ್ದು, ಡಿಸ್ಪ್ಲೇಯು ಕರ್ವ್ಡ ಶೈಲಿ ಹೊಂದಿರಬಹುದು ಎಂದೂ ಸಹ ಹೇಳಲಾಗುತ್ತಿದೆ. ಜತೆಗೆ ಸೆಲ್ಫಿಗಾಗಿ ಪಂಚ್ ಕಟೌಟ್ ಅನ್ನು ಹೊಂದಿರಬಹುದು ಎಂದು ಹೇಳಲಾಗಿದೆ. ಉಳಿದಂತೆ ಕ್ವಾಲ್ಕಾಮ್ ಸ್ನಾಪ್‌ಡ್ರಾಗನ್ 8+ ಜನ್‌ 2 ಆಕ್ಟಾ-ಕೋರ್ SoC ಬಲ ಪಡೆಯಲಿದ್ದು, 64-ಮೆಗಾಪಿಕ್ಸೆಲ್ ಮುಖ್ಯ ಸೆನ್ಸರ್‌, 8 ಮೆಗಾಪಿಕ್ಸೆಲ್ ಸೋನಿ IMX355 ಸೆನ್ಸರ್‌ ಹಾಗೂ 2-ಮೆಗಾಪಿಕ್ಸೆಲ್ ಕ್ಯಾಲಕ್ಸಿ ಕೋರ್‌ GC02M ಸೆನ್ಸರ್‌ನಲ್ಲಿ ಈ ಫೋನ್‌ ಪ್ಯಾಕ್‌ ಆಗಲಿದೆ ಎನ್ನಲಾಗಿದೆ.

ಹೆಚ್ಚಿನ RAM ಇದ್ದರೆ ಪ್ರಯೋಜನ ಏನು ?:
ಸುಧಾರಿತ ಬಹುಕಾರ್ಯ: RAM ನಿಮ್ಮ ಸಾಧನವನ್ನು ನಿಧಾನಗೊಳಿಸದೆ ಏಕಕಾಲದಲ್ಲಿ ಅನೇಕ ಕಾರ್ಯಗಳನ್ನು ನಿರ್ವಹಿಸಲು ಅನುಮತಿಸುತ್ತದೆ. ನಿಮ್ಮ ಫೋನ್‌ನಲ್ಲಿ ಹೆಚ್ಚು RAM ಇದ್ದಾಗ ನಿಮ್ಮ ಡಿವೈಸ್‌ ಮೆಮೊರಿಯಲ್ಲಿ ವಿವಿಧ ಆಪ್‌ಗಳನ್ನು ಸ್ಟೋರ್‌ ಮಾಡಬಹುದು. ಇದು ಸುಗಮ ಮತ್ತು ಹೆಚ್ಚು ಪರಿಣಾಮಕಾರಿ ಬಹುಕಾರ್ಯಕಕ್ಕೆ ಕಾರಣವಾಗುತ್ತದೆ. ಅಂದರೆ ಒಂದೇ ಸಮಯದಲ್ಲಿ ಹಲವು ಆಪ್‌ಗಳನ್ನು ಸರಳವಾಗಿ ಬಳಕೆ ಮಾಡಬಹುದು.

ವೇಗವಾದ ಆಪ್‌ ಕಾರ್ಯಕ್ಷಮತೆ: ಹೆಚ್ಚಿನ RAM ನೊಂದಿಗೆ ಆಪ್‌ಗಳು ಸುಲಭವಾಗಿ ಲೋಡ್ ಆಗುತ್ತವೆ. ಅಂದರೆ ನೀವು ಯಾವುದೇ ಆಪ್‌ ಅನ್ನು ಪ್ರಾರಂಭಿಸಿದಾಗ ಪ್ರೊಸೆಸರ್‌ನಿಂದ ತ್ವರಿತ ಪ್ರವೇಶಕ್ಕಾಗಿ ಅದನ್ನು RAM ಗೆ ಲೋಡ್ ಮಾಡಲಾಗುತ್ತದೆ. ಸಾಕಷ್ಟು RAM ಇಲ್ಲದಿದ್ದರೆ, ಆಪರೇಟಿಂಗ್ ಸಿಸ್ಟಮ್ ನಿಧಾನವಾದ ಶೇಖರಣಾ ಸಾಧನಗಳ ಒಳಗೆ ಮತ್ತು ಹೊರಗೆ ಡೇಟಾವನ್ನು ವಿನಿಮಯ ಮಾಡಿಕೊಳ್ಳುತ್ತದೆ.

ವರ್ಧಿತ ಗೇಮಿಂಗ್ ಅನುಭವ: ಗೇಮಿಂಗ್‌ ಆಡುವರಿಗೆ ಹೆಚ್ಚಿನ RAM ಆಯ್ಕೆ ಬಹಳಷ್ಟು ಅನುಕೂಲ. ಇದರಿಂದಾಗಿ ನೀವು ಹೆಚ್ಚು ಗೇಮ್‌ಗಳನ್ನು ಇನ್‌ಸ್ಟಾಲ್‌ ಮಾಡಬಹುದು. ಎಷ್ಟೇ ಗೇಮಿಂಗ್ ಆಪ್‌ ಇದ್ದರೂ ಸಹ ಸರಾಗವಾಗಿ ರನ್ ಆಗುತ್ತವೆ. ಈ ಮೂಲಕ ವಿಳಂಬ ಅಥವಾ ದೀರ್ಘ ಲೋಡ್ ಸಮಯವನ್ನು ಕಡಿಮೆ ಮಾಡುತ್ತದೆ. ಜೊತೆಗೆ ಹೆಚ್ಚಿನ ಗ್ರಾಫಿಕಲ್ ಸೆಟ್ಟಿಂಗ್‌ಗಳ ಸುಗಮವಾದ ಗೇಮಿಂಗ್‌ ಅನುಭವ ನೀಡುತ್ತವೆ.