WhatsApp: ಸೋನು ಸೂದ್ ಅವರ ವಾಟ್ಸಾಪ್‌ ಖಾತೆಗೆ ಅಂತಹುದ್ದೇನಾಗಿತ್ತು? ಜನರ ಬಗ್ಗೆ ಚಿಂತಿತರಾಗಿದ್ದ ನಟ

ಸೋನು ಸೂದ್‌ (Sonu Sood) ಯಾರಿಗೆ ತಾನೆ ಗೊತ್ತಿಲ್ಲ ಹೇಳಿ. ಕೊರೊನಾ (Corona) ಸಂದರ್ಭದಲ್ಲಿ ಭಾರತ ಮಾತ್ರವಲ್ಲದೆ ಜಾಗತಿವಾಗಿ ಜನಪ್ರಿಯತೆ ಪಡೆದ ನಟ. ಆದರೆ ಈಗ ಈ ನಟನ ವಾಟ್ಸಾಪ್‌ ಖಾತೆಯಲ್ಲಿ ಶಾಕಿಂಗ್‌ ಬೆಳವಣಿಗೆ ಕಂಡುಬಂದಿದ್ದು, 61 ಗಂಟೆಗಳ ನಂತರ ಅದನ್ನು ಮರುಸ್ಥಾಪಿಸಲಾಗಿದೆ.

ಹೌದು, 61 ಗಂಟೆಗಳ ಕಾಲ ನಿರ್ಬಂಧಿಸಲಾಗಿದ್ದ ಸೋನು ಸೂದ್ ಅವರ ವಾಟ್ಸಾಪ್ ಖಾತೆಯನ್ನು ಮರುಸ್ಥಾಪಿಸಲಾಗಿದೆ (Restored). ಈ ವೇಳೆ ಅವರಿಗೆ ಬರೋಬ್ಬರಿ 9483 ಮೆಸೆಜ್‌ಗಳು ಬಂದಿದ್ದು, ಪಾಪ ಯಾರ್ಯಾರೋ ಸಹಾಯಕ್ಕಾಗಿ ಮನವಿ ಮಾಡುತ್ತಿದ್ದರು, ಅವರಿಗೆ ಏನಾಗಿದೆಯೋ ಏನೋ ಎಂದು ನೋವು ತೋಡಿಕೊಂಡಿದ್ದಾರೆ. ಅಷ್ಟಕ್ಕೂ ಆಗಿದ್ದೇನು?, ಸೋನು ಸೂದ್‌ ಸಾಮಾಜಿಕ ಮಾಧ್ಯಮದಲ್ಲಿ ಈ ಸಂಬಂಧ ಹೇಗೆಲ್ಲಾ ಮನವಿ ಮಾಡಿಕೊಂಡಿದ್ದಾರೆ ಅನ್ನೋ ಮಾಹಿತಿ ಇಲ್ಲಿದೆ ನೋಡಿ.

ಸೋನು ಸೂದ್‌ ವಾಟ್ಸಾಪ್ ಖಾತೆ ನಿರ್ಬಂಧ: ಭಾರತೀಯ ನಟ, ಚಲನಚಿತ್ರ ನಿರ್ಮಾಪಕ ಮತ್ತು ಲೋಕೋಪಕಾರಿ ಸೋನು ಸೂದ್ ಅವರ ವಾಟ್ಸಾಪ್ (Whatsapp) ಖಾತೆಯನ್ನು 61 ಗಂಟೆಗಳ ಅವಧಿಗೆ ನಿರ್ಬಂಧಿಸಿದಾಗ ಅನಿರೀಕ್ಷಿತ ಅಡಚಣೆಯನ್ನು ಎದುರಿಸಿದ್ದಾರೆ. ಇದಾದ ನಂತರ ಏಪ್ರಿಲ್ 28 ರ ಭಾನುವಾರದಂದು ಸಮಸ್ಯೆಯನ್ನು ಪರಿಹರಿಸಲಾಗಿದೆ ಮತ್ತು ಅವರ ಖಾತೆಯನ್ನು ಮರುಸ್ಥಾಪಿಸಲಾಗಿದೆ.

ಈ ಸಂಬಂಧ ಸೋನು ಸೂದ್‌ ಅವರು ಇನ್‌ಸ್ಟಾಗ್ರಾಮ್‌ (Instagram) ಮೂಲಕ ಮಾಹಿತಿ ಹಂಚಿಕೊಂಡಿದ್ದಾರೆ. ವಾಟ್ಸಾಪ್‌ ಮರುಸ್ಥಾಪನೆಯ ನಂತರ ದಿಗ್ಭ್ರಮೆಗೊಳಿಸುವ 9483 ಮೆಸೆಜ್‌ಗಳು ಬಂದಿವೆ ಎಂದು ತಿಳಿಸಿದ್ದಾರೆ. ಸಾಮಾನ್ಯವಾಗಿ ಮೊದಲೇ ತಿಳಿಸಿದಂತೆ ಜನರು ಇವರ ವಾಟ್ಸಾಪ್‌ ಖಾತೆಗೆ ಮೆಸೆಜ್‌ ಹಾಕಿ ಸಹಾಯ ಕೋರುತ್ತಿದ್ದರು. ಆದರೆ, ಈ ನಿರ್ಣಾಯಕ ಅವಧಿಯಲ್ಲಿ ಅಗತ್ಯವಿರುವ ಅನೇಕ ವ್ಯಕ್ತಿಗಳು ಅವರನ್ನು ತಲುಪಲು ಸಾಧ್ಯವಾಗುತ್ತಿಲ್ಲ ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಮೊದಲು ಇನ್‌ಸ್ಟಾಗ್ರಾಮ್ ಪೋಸ್ಟ್‌ಗಳು ಮತ್ತು ಸ್ಟೋರಿಗಳ ಮೂಲಕ ವಾಟ್ಸಾಪ್‌ಗೆ ಸಮಸ್ಯೆಯನ್ನು ತ್ವರಿತವಾಗಿ ಪರಿಹರಿಸಲು ಒತ್ತಾಯಿಸಿದ್ದಾರೆ. ಅಲ್ಲದೆ ಈ ವೇಳೆ ಸಹಾಯಕ್ಕಾಗಿ ಅವರನ್ನು ಸಂಪರ್ಕಿಸಲು ಪ್ರಯತ್ನಿಸುತ್ತಿರುವ ಜನರ ತುರ್ತುಸ್ಥಿತಿಯನ್ನು ಸಹ ಒತ್ತಿಹೇಳಿದ್ದಾರೆ. ಅವರ ಆರಂಭಿಕ ವಿನಂತಿಗಳಿಗೆ ವಾಟ್ಸಾಪ್‌ ಉತ್ತರಿಸದ ಕಾರಣ, ಸೋನು ಸೂದ್ ಸಾಮಾಜಿಕ ಮಾಧ್ಯಮದಲ್ಲಿ ನೇರ ಮನವಿಗಳೊಂದಿಗೆ ವಿಷಯವನ್ನು ಬಹಿರಂಗಪಡಿಸಿದ್ದಾರೆ.

ಸೋನು ಸೂದ್‌ ಅವರು ಈ ಸಂಬಂಧ ಹಲವಾರು ಪೋಸ್ಟ್‌ಗಳನ್ನು ಮಾಡಿದ್ದು, ಏನಾಗಿದೆ... ವಾಟ್ಸಾಪ್‌? ಎದ್ದೇಳು!!! ಸಾವಿರಾರು ನಿರ್ಗತಿಕರು ಸಹಾಯಕ್ಕಾಗಿ ತಲುಪಲು ಹತಾಶವಾಗಿ ಪ್ರಯತ್ನಿಸುತ್ತಿದ್ದಾರೆ. ದಯವಿಟ್ಟು ಇದನ್ನು ನೋಡು. ಖಾತೆಯನ್ನು ನಿರ್ಬಂಧಿಸಲಾಗಿದೆ ಎಂದು ಬರೆದುಕೊಂಡಿದ್ದಾರೆ. ಅಲ್ಲದೆ ಮತ್ತೊಂದು ಪೋಸ್ಟ್‌ನಲ್ಲಿ ಇನ್ನೂ, ನನ್ನ ಖಾತೆ ಕೆಲಸ ಮಾಡುತ್ತಿಲ್ಲ. ಎಚ್ಚರಗೊಳ್ಳುವ ಸಮಯ, 36 ಗಂಟೆಗಳಿಗಿಂತ ಹೆಚ್ಚು ಸಮಯವಾಗಿದೆ. ಆದಷ್ಟು ಬೇಗ ನನ್ನ ಖಾತೆ ಸರಿ ಮಾಡಿ, ನೂರಾರು ನಿರ್ಗತಿಕರು ನನ್ನನ್ನು ಸಂಪರ್ಕಿಸಲು ಪ್ರಯತ್ನಿಸುತ್ತಿರಬೇಕು ಸಹಾಯಕ್ಕಾಗಿ ತಲುಪಲು ದಯವಿಟ್ಟು ನಿಮ್ಮ ಕೈಲಾದಷ್ಟು ಮಾಡಿ ಎಂದು ಪರಿಪರಿಯಾಗಿ ಮನವಿ ಮಾಡಿಕೊಂಡಿದ್ದಾರೆ.

ಇದೇ ಮೊದಲಲ್ಲ: ಇನ್ನು ಈ ರೀತಿಯ ಸಮಸ್ಯೆಗಳನ್ನು ಸೋನು ಸೂದ್ ತೊಂದರೆ ಎದುರಿಸುತ್ತಿರುವುದು ಇದೇ ಮೊದಲಲ್ಲ. ಈ ಹಿಂದೆ, ಅವರು ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳಲ್ಲಿ ಇದೇ ರೀತಿಯ ಕಳವಳಗಳನ್ನು ವ್ಯಕ್ತಪಡಿಸಿದ್ದರು. ಅದರ ಸೇವೆಗಳನ್ನು ಸುಧಾರಿಸಲು ವಾಟ್ಸಾಪ್‌ಗೆ ಕರೆ ನೀಡಿದ್ದರು.2020 ರಲ್ಲಿ ಕೊರೊನಾ ಪ್ರಾರಂಭವಾದಾಗಿನಿಂದ ಸೋನು ಸೂದ್ ಸಕ್ರಿಯವಾಗಿ ಪರೋಪಕಾರಿ ಕೆಲಸದಲ್ಲಿ ತೊಡಗಿಸಿಕೊಂಡಿದ್ದಾರೆ.

ವಲಸೆ ಕಾರ್ಮಿಕರು ಸುರಕ್ಷಿತವಾಗಿ ಮನೆಗೆ ಮರಳಲು ಸಹಾಯ ಮಾಡುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದಾರೆ ಮತ್ತು ಅಗತ್ಯವಿರುವವರಿಗೆ ವೈದ್ಯಕೀಯ ನೆರವು ಮತ್ತು ಆಸ್ಪತ್ರೆಯ ಹಾಸಿಗೆಗಳನ್ನು ಒದಗಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ಇವರ ಈ ರೀತಿಯ ಸಹಾಯಕ್ಕೆ ಜಾಗತಿಕವಾಗಿ ಮೆಚ್ಚುಗೆ ಸಹ ವ್ಯಕ್ತವಾಗಿದೆ. ಅಲ್ಲದೆ. ಜಾಗತಿಕವಾಗಿ ಸಾಕಷ್ಟು ಅಭಿಮಾನಿಗಳನ್ನು ಪಡೆದಿದ್ದಾರೆ.