ಇನ್ಮುಂದೆ 10 ಮೊಬೈಲ್‌ ಅಂಕಿಗಳಲ್ಲ ಬದಲಾಗಿ 11-13: ಯಾಕಾಗಿ ಈ ನಿರ್ಧಾರ!?

ಭಾರತದಲ್ಲಿ ಇತ್ತೀಚೆಗೆ ಆನ್‌ಲೈನ್‌ ವಂಚನೆಗಳು ಹೆಚ್ಚಾಗುತ್ತಿವೆ. ಈ ಮೊದಲು ಸಾಮಾನ್ಯ ಕರೆಗಳ ಮೂಲಕ ವಂಚನೆ ಮಾಡುತ್ತಿದ್ದವರು ಇದೀಗ ಒಂದು ಹೆಜ್ಜೆ ಮುಂದೆ ಹೋಗಿದ್ದು, ಮೆಸೆಜಿಂಗ್‌ ಪ್ಲಾಟ್‌ಫಾರ್ಮ್ ಆಗಿರುವ ವಾಟ್ಸಾಪ್‌, ಸಿಗ್ನಲ್‌, ಟೆಲಿಗ್ರಾಮ್‌ ಸೇರಿದಂತೆ ಇನ್ನಿತರೆ ಇತರೆ ಆಪ್‌ ಬಳಕೆದಾರರಿಗೆ ಪಂಗನಾಮ ಹಾಕುತ್ತಿದ್ದಾರೆ. ಈ ನಡುವೆ ಭಾರತದ ಸರ್ಕಾರ ಮಹತ್ವದ ನಿರ್ಧಾರಕ್ಕೆ ಮುಂದಾಗಿದೆ.

ಹೌದು, ನಾವು ಇಲ್ಲಿಯವರೆಗೂ 10 ಅಂಕೆಯ ಮೊಬೈಲ್‌ ನಂಬರ್‌ ಬಳಕೆ ಮಾಡುತ್ತಿದ್ದೆವು.ಆದರೆ, ಇನ್ಮುಂದೆ ಈ ಸಂಖ್ಯೆಯಲ್ಲಿ ಹೆಚ್ಚಳವಾಗಲಿದೆ. ಹಾಗಿದ್ರೆ, ಎಷ್ಟು ಸಂಖ್ಯೆ ಹೆಚ್ಚಳವಾಗಲಿದೆ. ಟೆಲಿಕಾಂ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾ ಯಾಕೆ ಈ ನಿರ್ಧಾರ ಮಾಡಿದೆ, ಈ ನಿಯಮ ಎಂದಿನಿಂದ ಜಾರಿ ಹಾಗೂ ಯಾರ್ಯಾರಿಗೆ ಈ ಸಂಖ್ಯೆಗಳನ್ನು ನೀಡಲಾಗುತ್ತದೆ ಎಂಬಿತ್ಯಾದಿ ಇಂಟ್ರೆಸ್ಟಿಂಗ್‌ ಮಾಹಿತಿಗಾಗಿ ಈ ಲೇಖನ ಓದಿರಿ.

ಹೆಚ್ಚಾಗಲಿವೆ ಮೊಬೈಲ್‌ ಅಂಕೆಗಳು: ಇದೀಗ ಭಾರತದಾದ್ಯಂತ 10 ಮೊಬೈಲ್ ಸಂಖ್ಯೆಗಳು ಬಳಕೆಯಲ್ಲಿದ್ದು, ಹೊಸ ಮೊಬೈಲ್ ಸಂಖ್ಯೆಗಳಿಗೆ ನಿರಂತರ ಬೇಡಿಕೆಯಿದೆ. ಈ ನಡುವೆ ಟೆಲಿಕಾಂ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾ(TRAI) ಹೊಸ ಮೊಬೈಲ್ ಸಂಖ್ಯೆ ನೀಡಲು ಸಿದ್ಧತೆ ನಡೆಸಿದ್ದು, ಈ ಮೂಲಕ ಬಳಕೆದಾರರು 10 ಮೊಬೈಲ್ ಸಂಖ್ಯೆಗಳ ಬದಲಾಗಿ ಇನ್ನೂ ಒಂದು ಅಥವಾ ಎರಡು ಸಂಖ್ಯೆಗಳನ್ನು ಹೆಚ್ಚಾಗಿ ಪಡೆದುಕೊಳ್ಳಲಿದ್ದಾರೆ.

11 ಹಾಗೂ 13 ಸಂಖ್ಯೆಯ ಡಿಜಿಟಲ್ ಮೊಬೈಲ್ ಸಂಖ್ಯೆಗಳು: ಈ ಮೊಬೈಲ್‌ ಸಂಖ್ಯೆ ವಿಚಾರವಾಗಿ ಈ ಹಿಂದೆಯೂ ಟ್ರಾಯ್ ಪ್ರಸ್ತಾವನೆಯನ್ನು ಸಲ್ಲಿಕೆ ಮಾಡಿತ್ತು. ಅಂದರೆ 10 ರ ಬದಲಿಗೆ 11 ಅಂಕಿಯ ಮೊಬೈಲ್ ಸಂಖ್ಯೆಯನ್ನು ನೀಡಲು ಸಿದ್ಧತೆ ನಡೆಸಿತ್ತು. ಅದರ ಪ್ರಕಾರ ಸ್ಥಿರ ಲೈನ್ ಮತ್ತು ಮೊಬೈಲ್ ಸೇವಾ ಸಂಖ್ಯೆಗಳು ಹೆಚ್ಚಿನ ಸಂಖ್ಯೆಯಲ್ಲಿ ಅಗತ್ಯವಿದೆ ಎಂದು ಉಲ್ಲೇಖ ಮಾಡಲಾಗಿತ್ತು.ಆದರೆ,ಈ ಪ್ರಸ್ತಾವನೆಗೆ ಇನ್ನೂ ಅಂತಿಮ ಮುದ್ರೆ ಸಿಕ್ಕಿಲ್ಲ.

ಏನೆಲ್ಲಾ ಬದಲಾವಣೆ ಆಗಲಿದೆ?: ಟ್ರಾಯ್ ಪ್ರಕಾರ 11 ಅಂಕಿಯ ಮೊಬೈಲ್ ಸಂಖ್ಯೆಯನ್ನು 9 ರಿಂದ ಪ್ರಾರಂಭಿಸಬಹುದು ಎನ್ನಲಾಗಿದೆ. ಈ ಮೂಲಕ 10 ಬಿಲಿಯನ್ ಹೊಸ ಮೊಬೈಲ್ ಸಂಖ್ಯೆಗಳನ್ನು ಉತ್ಪಾದಿಸಲು ಸಹಕಾರ ಆಗಲಿದೆ ಎಂದು ಹೇಳಲಾಗುತ್ತಿದೆ. ಸದ್ಯಕ್ಕೆ 10 ಅಂಕಿಗಳ 70 ಪ್ರತಿಶತ ಮೊಬೈಲ್ ಸಂಖ್ಯೆಗಳನ್ನು ಬಳಕೆ ಮಾಡಲಾಗುತ್ತುದ್ದು, ಈ ನಡುವೆ ಸುಮಾರು 3 ಬಿಲಿಯನ್ ಮೊಬೈಲ್ ಸಂಖ್ಯೆಗಳು ಮಾತ್ರ ಸ್ಟಾಕ್‌ನಲ್ಲಿ ಉಳಿದಿವೆ.

ಅದರಲ್ಲೂ ಭಾರತದಲ್ಲಿ ಹೆಚ್ಚುತ್ತಿರುವ ಡಿಜಿಟಲೀಕರಣ ವ್ಯವಸ್ಥೆ ಶೀಘ್ರದಲ್ಲೇ ಮೊಬೈಲ್ ಸಂಖ್ಯೆಗಳ ಕ್ಷಾಮಕ್ಕೆ ಕಾರಣವಾಗಬಹುದು. ಈ ಕಾರಣಕ್ಕಾಗಿಯೇ ಟ್ರಾಯ್ ಈ ನಿರ್ಧಾರಕ್ಕೆ ಬಂದಿದೆ. ಇದರೊಂದಿಗೆ ಸ್ಥಿರ ಲೈನ್ ಮೊಬೈಲ್ ಸಂಖ್ಯೆಯ ಮೊದಲು ಸೊನ್ನೆ ಬಳಕೆ ಮಾಡಲು ಟ್ರಾಯ್ ಪ್ರಸ್ತಾಪಿಸಿದೆ. ಜೊತೆಗೆ ಮೊಬೈಲ್ ಮತ್ತು ಸ್ಥಿರ ದೂರವಾಣಿ ಸಂಖ್ಯೆಗಳನ್ನು ಸುಲಭವಾಗಿ ಗುರುತಿಸಲು ಅನುವು ಮಾಡಿಕೊಡಲಿದೆ. ಇದಲ್ಲದೆ ಡಾಂಗಲ್‌ಗೆ 10 ರ ಬದಲಿಗೆ 13 ಅಂಕಿಯ ಸಂಖ್ಯೆಯನ್ನು ನೀಡಲು ಸಹ ಎಲ್ಲಾ ತಯಾರಿ ನಡೆದಿದೆ.

ಇತ್ತೀಚಿನ ಬೆಳವಣಿಗೆಯಲ್ಲಿ ಪ್ರಚಾರ ಮತ್ತು ಸ್ಪ್ಯಾಮ್ ಕರೆಗಳ ಸಮಸ್ಯೆಯನ್ನು ನಿಭಾಯಿಸಲು ಸಹ ಈ ನಿರ್ಧಾರ ಪ್ರಮುಖವಾಗಿದೆ ಎನ್ನಲಾಗಿದೆ. ಈ ಮೂಲಕ ಟೆಲಿಕಾಂ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾ ಕಂಪನಿಗಳು ಪ್ರಚಾರದ ಕರೆಗಳಿಗಾಗಿ ವಿಶಿಷ್ಟ ಸಂಖ್ಯೆಗಳನ್ನು ಪಡೆಯುವುದನ್ನು ಕಡ್ಡಾಯಗೊಳಿಸಿದೆ. ಆದರೆ, ಈ ವಿಶೇಷ ಪ್ರಸ್ತಾವನೆಗೆ ಸಂಬಂಧಿಸಿದಂತೆ ಟ್ರಾಯ್ ನಿಂದ ಯಾವುದೇ ಅಧಿಕೃತ ಪ್ರತಿಕ್ರಿಯೆ ಸಿಕ್ಕಿಲ್ಲ.

ಏನಿದು ಟ್ರಾಯ್?: ಟೆಲಿಕಾಂ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾವು ಟೆಲಿಕಾಂ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾ ಆಕ್ಟ್, 1997ರ ಸೆಕ್ಷನ್ 3 ರ ಅಡಿಯಲ್ಲಿ ಭಾರತ ಸರ್ಕಾರದಿಂದ ಸ್ಥಾಪಿಸಲ್ಪಟ್ಟ ಒಂದು ನಿಯಂತ್ರಕ ಸಂಸ್ಥೆಯಾಗಿದೆ. ಇದು ಭಾರತದಲ್ಲಿ ದೂರಸಂಪರ್ಕ ವಲಯವನ್ನು ಕಂಟ್ರೋಲ್ ಮಾಡುತ್ತದೆ. ಜೊತೆಗೆ ಗ್ರಾಹಕರ ಹಿತಾಸಕ್ತಿಗಳನ್ನು ರಕ್ಷಿಸುತ್ತದೆ. ಮತ್ತು ಉದಯೋನ್ಮುಖ ಜಾಗತಿಕ ಮಾಹಿತಿ ಸಮಾಜದಲ್ಲಿ ಭಾರತವು ಪ್ರಮುಖ ಪಾತ್ರವನ್ನು ವಹಿಸಲು ಅನುವು ಮಾಡಿಕೊಡುತ್ತದೆ.