ಟ್ವಿಟ್ಟರ್‌ ನಿಷೇಧಕ್ಕೆ ಮುಂದಾಯ್ತು ಪಾಕಿಸ್ತಾನ ಸರ್ಕಾರ!!

ಆಕ್ಷೇಪಾರ್ಹ, ಹಾನಿಕಾರಕ ಮತ್ತು ಸಾರ್ವಜನಿಕ ಸ್ವಾಸ್ಥ್ಯ ಕೆಡಿಸುವ ಸಂದೇಶಗಳನ್ನು ತೆಗೆಯದೇ ಹೋದರೆ ದೇಶದಲ್ಲಿ ಟ್ವಿಟರ್​ನ್ನು ನಿಷೇಧಿಸಲಾಗುವುದು ಎಂದು ಪಾಕಿಸ್ತಾನದ ಟೆಲಿಕಾಂ ಪ್ರಾಧಿಕಾರ ಮೈಕ್ರೋ ಬ್ಲಾಗಿಂಗ್ ವೆಬ್‌ಸೈಟ್‌ ಟ್ವಿಟರ್​ಗೆ ಎಚ್ಚರಿಕೆ ನೀಡಿದೆ. ಪಾಕ್‌ ಸರಕಾರ ಟ್ವಿಟ್ಟರ್‌ಗೆ ಕಟ್ಟುನಿಟ್ಟಿನ ಸೂಚನೆ ನೀಡಿರುವ ಬಗ್ಗೆ ಡಾನ್ ದೈನಿಕ ವರದಿ ಮಾಡಿದೆ.

ಫೇಸ್​ಬುಕ್​, ಯೂಟ್ಯೂಬ್​ ಮತ್ತು ಇತರ ಸಾಮಾಜಿಕ ತಾಣಗಳು ದೇಶದ ನಿಯಮಗಳನ್ನು ಪಾಲಿಸುತ್ತಿವೆ. ಆದರೆ, ಸಾರ್ವಜನಿಕರಿಗೆ ಅತ್ಯಂತ ಹಾನಿಕಾರವಾಗಿರುವ ಹೂರಣವನ್ನು ತಡೆಯುವಲ್ಲಿ ಟ್ವಿಟರ್ ವಿಫಲವಾಗಿದೆ ಎಂದು ಹೇಳಿರುವ ಪಾಕ್‌ ಸರಕಾರ, ಆ ಕಾರಣಕ್ಕೆ ಈ ಮೈಕ್ರೋ ಬ್ಲಾಗಿಂಗ್ ಸೈಟಿನ ಮೇಲೆ ತೀವ್ರ ನಿಗಾ ಇರಿಸಿದೆ ಎಂದು ತಿಳಿದುಬಂದಿದೆ.

ಸರಕಾರ ಪದೇ ಪದೇ ಎಚ್ಚರಿಕೆ ನೀಡಿದ ಹೊರತಾಗಿಯೂ ಆಕ್ಷೇಪಾರ್ಹ ಮತ್ತು ಹಾನಿಕಾರಕ ಹೂರಣಗಳನ್ನು ತಡೆಯುವಲ್ಲಿ ಟ್ವಿಟ್ಟರ್ ವಿಫಲವಾಗಿದೆ. ಸುಮಾರು 100ಕ್ಕೂ ಹೆಚ್ಚು ಆಕ್ಷೇಪಾರ್ಹ ಸಂಗತಿಗಳು ಟ್ವಿಟರ್​ನಲ್ಲಿದ್ದು, ಅವುಗಳನ್ನು ತೆಗೆದು ಹಾಕುವಂತೆ ನಾವು ನೀಡಿದ ಪ್ರಸ್ತಾಪವನ್ನು ಟ್ವಿಟರ್​ ಸೂಕ್ತ ರೀತಿಯಲ್ಲಿ ಪರಿಗಣಿಸಿಲ್ಲ ಎಂದು ಪ್ರಾಧಿಕಾರ ಸ್ಥಾಯೀ ಸಮಿತಿಗೆ ಹೇಳಿದೆ.

ಆಕ್ಷೇಪಾರ್ಹ ಮತ್ತು ಹಾನಿಕಾರಕ ಹೂರಣಗಳ ಬಗ್ಗೆ ನಾವು ನೀಡಿದ ದೂರಿನಲ್ಲಿ ಶೇ.5ರಷ್ಟು ಪ್ರಕರಣಗಳನ್ನು ಮಾತ್ರ ಇತ್ಯರ್ಥ ಮಾಡಿರುವ ಟ್ವಿಟರ್​ ಇನ್ನುಳಿದಿರುವ ಪ್ರಕರಣಗಳನ್ನು ಹಾಗೆಯೇ ಉಳಿಸಿಕೊಂಡಿದೆ ಎಂದು ಪಾಕಿಸ್ತಾನದ ಟೆಲಿಕಾಂ ಪ್ರಾಧಿಕಾರ (ಪಿಟಿಎ) ಗುರುವಾರ ಪಾಕಿಸ್ತಾನದ ಸಂಪುಟದ ಸೆನೆಟ್‌ ಸ್ಥಾಯಿ ಸಮಿತಿಗೆ ಈ ವಿಚಾರವನ್ನು ತಿಳಿಸಿದೆ ಎಂದು ವರದಿಯಾಗಿದೆ.

ಫೇಸ್‌ಬುಕ್‌ ಮತ್ತು ಯೂಟ್ಯೂಬ್ ಸೇರಿದಂತೆ ಇತರ ಸಾಮಾಜಿಕ ಮಾಧ್ಯಮಗಳಿಗೆ ಮೊದಲೇ ಮೂಗುದಾರ ಹಾಕಿರುವ ಪಾಕಿಸ್ತಾನದಲ್ಲಿ ಈಗ ಟ್ವಿಟ್ಟರ್ ನಿಷೇಧಕ್ಕೆ ಗುರಿಯಾಗುವ ಸರದಿಯಲ್ಲಿದೆ. 2008 ಮತ್ತು 2010ರಲ್ಲಿ ಫೇಸ್​ಬುಕ್​ ಎರಡು ಬಾರಿ ನಿಷೇಧಗೊಂಡಿದ್ದರೆ, 2012ರಲ್ಲಿ ಯೂಟ್ಯೂಬ್​ ಎರಡು ವರ್ಷಗಳ ಕಾಲ ನಿಷೇಧಕ್ಕೆ ಗುರಿಯಾಗಿದ್ದನ್ನು ನಾವು ನೋಡಬಹುದು.

ಓದಿರಿ: ನಿಮ್ಮ ಮೊಬೈಲ್ 'ಸಿಮ್' ಜೋಪಾನ!..ಈ ಒಂದು ತಪ್ಪಿನಿಂದ ನೀವು ಮನೆ ಮಠ ಕಳೆದುಕೊಳ್ಳಬಹುದು!!