ಜನರಿಗೂ, ಟೆಲಿಕಾಂ ಕಂಪೆನಿಗಳಿಗೂ ಸಮಸ್ಯೆ ತಂದಿಟ್ಟ 'ಆಧಾರ್' ಪ್ರಾಧಿಕಾರದ ಸೂಚನೆ!!

ಮೊಬೈಲ್ ಸಿಮ್ ಖರೀದಿಸಲು ಅಥವಾ ಟೆಲಿಕಾಂ ಕಂಪೆನಿಗಳಿಗೆ ಆಧಾರ್​ ನೀಡುವುದು ಕಡ್ಡಾಯವಲ್ಲ ಎಂದು ಸುಪ್ರೀಂಕೋರ್ಟ್ ತೀರ್ಪು ನೀಡಿದ ಒಂದು ವಾರದ ಒಳಗಾಗಿಯೇ, ಜಿಯೋ, ಏರ್ಟೆಲ್​, ವೊಡಾಫೋನ್​, ಐಡಿಯಾ ಸೇರಿದಂತೆ ದೇಶದ ಎಲ್ಲಾ ಟೆಲಿಕಾಂ ಕಂಪೆನಿಗಳಿಗೆ ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ(UIDAI)ವು ಆಧಾರ್ ಬಳಕೆ ಬಗ್ಗೆ ಸುತ್ತೋಲೆ ಹೊರಡಿಸಿದೆ.

ಸೆಕ್ಷನ್​ 57ನ್ನು ರದ್ದುಗೊಳಿಸಿ ಬ್ಯಾಂಕ್​ ಮತ್ತು ಟೆಲಿಕಾಂ ಕಂಪೆನಿಗಳಿಗೆ ಆಧಾರ್​ ನೀಡುವುದು ಕಡ್ಡಾಯವಲ್ಲ ಎಂದು ಸುಪ್ರೀಂ ಕೋರ್ಟ್ ಘೋಷಿಸಿದ ಕೇವಲ ಒಂದು ವಾರದಲ್ಲಿ ಆಧಾರ್ ಪ್ರಾಧಿಕಾರ ಟೆಲಿಕಾಂ ಕಂಪೆನಿಗಳಿಗೆ ಸುತ್ತೋಲೆ ನೀಡಿದೆ. 15 ದಿನಗಳೊಳಗಾಗಿ ಇ-ಕೆವೈಸಿಗೆ ಆಧಾರ್ ಮಾಹಿತಿ​ ಬಳಕೆ ಹೇಗೆ ನಿಲ್ಲಿಸುತ್ತೀರಾ ಎಂಬುದರ ಬಗ್ಗೆ ವರದಿ ನೀಡುವಂತೆ ಸೂಚಿಸಿದೆ.

2018ರ ಸಪ್ಟೆಂಬರ್​ 26 ರಂದು ಸುಪ್ರೀಂನೀಡಿದ ತೀರ್ಪಿನ ಅನ್ವಯ ಎಲ್ಲಾ ಟೆಲಿಕಾಂ ಕಂಪೆನಿಗಳಿಗೆ ತಕ್ಷಣ ಕ್ರಮ ತೆಗೆದುಕೊಳ್ಳಲು ಸೂಚಿಸಲಾಗಿದೆ. ಎಲ್ಲಾ ಕಂಪೆನಿಗಳು ಆಧಾರ್ ಆಧಾರಿತ ದೃಢೀಕರಣ ವ್ಯವಸ್ಥೆಗಳ ಬಳಕೆಯನ್ನು ನಿಲ್ಲಿಸಲು ಯಾವ ರೀತಿ ಯೋಜನೆ ರೂಪಿಸಿಕೊಳ್ಳುತ್ತದೆ ಎಂಬುವುದನ್ನು ಅಕ್ಟೋಬರ್​ 15ರೊಳಗೆ ತಿಳಿಸಬೇಕೆಂದು ಸುತ್ತೋಲೆಯಲ್ಲಿ ಸೂಚಿಸಲಾಗಿದೆ.

ಕೇವಲ 15 ದಿನಗಳೊಳಗೆ ಸಿಮ್​ ಖರೀದಿ ವೇಳೆ ಆಧಾರ್​ ಬಳಕೆ ಹೇಗೆ ನಿಲ್ಲಿಸುತ್ತೀರಿ ಹಾಗೂ ಇದಕ್ಕೆ ಪರ್ಯಾಯವೇನು ಎಂಬ ವರದಿ ನೀಡಲು ಪ್ರಾಧಿಕಾರ ಸೂಚಿಸಿದ ನಂತರ ಟೆಲಿಕಾಂ ಕಂಪೆನಿಗಳಿಗೆ ಇದು ನುಂಗಲಾರದ ತುತ್ತಾಗಿದೆ. ಟೆಲಿಕಾಂ ಕಂಪೆನಿಗಳ ಜೊತೆಗೆ ಮೊಬೈಲ್ ಗ್ರಾಹಕರಿಗೂ ಸಹ ಸಮಸ್ಯೆ ಎದುರಾಗುವ ಸಾಧ್ಯತೆಗಳು ಹೆಚ್ಚಾಗಿವೆ ಎಂದು ಹೇಳಲಾಗುತ್ತಿದೆ.

ಇ-ಕೆವೈಸಿಗೆ ಆಧಾರ್ ಮಾಹಿತಿ​ ಬಳಕೆಗೆ ಪರ್ಯಾಯವಾಗಿ ಟೆಲಿಕಾಂ ಕಂಪೆನಿಗಳು ಹಳೆ ಮಾದರಿಗೆ ವಾಪಸ್ ತೆರಳುವ ಸೂಚನೆ ಕೂಡ ಲಭ್ಯವಾಗಿದೆ. ಒಂದು ವೇಳೆ ಹಾಗೇನಾದರೂ ಆದಲ್ಲಿ, ಈಗ ಇ-ಕೆವೈಸಿ ಮೂಲಕ ಸಿಮ್ ಖರೀದಿಸಿದವರು ಬೇರೊಂದು ದಾಖಲೆಯನ್ನು ನೀಡಿ ಆಧಾರ್ ಮಾಹಿತಿ ಅಳಿಸುವಂತೆ ಕೇಳಬಹುದು. ಆದರಿದು ಎಲ್ಲರಿಗೂ ತಲೆನೊವ್ವಿನ ಕೆಲಸ.

ಓದಿರಿ: ಸ್ಮಾರ್ಟ್‌ಫೋನ್‌ ಅನ್ನು ಶರ್ಟ್ ಜೇಬಿನಲ್ಲಿ ಇಟ್ಟುಕೊಂಡರೆ ಅಕಾಲಿಕ ಮರಣ ಸಾಧ್ಯತೆ!