ಸ್ಮಾರ್ಟ್‌ವಾಚ್‌ ಕ್ರೇಜ್‌ ಇನ್ನೆಷ್ಟು ದಿನ..? ಬರಲಿವೆ ಸ್ಮಾರ್ಟ್‌ರಿಂಗ್‌ಗಳು: ಫೀಚರ್ಸ್ ಏನು?

ಸ್ಮಾರ್ಟ್‌ವಾಚ್‌ಗಳು ಇಂದು ಕೇವಲ ಸಮಯವನ್ನಷ್ಟೇ ತಿಳಿಸದೆ ಬಳಕೆದಾರರ ಆರೋಗ್ಯದ ಮೇಲೆ ಸಂಪೂರ್ಣವಾಗಿ ನಿಗಾ ಇಡುತ್ತವೆ. ಈ ವಾಚ್‌ಗಳ ಬಳಕೆ ಹೆಚ್ಚಾದಂತೆ ವಿವಿಧ ಕಂಪೆನಿಗಳು ವಿವಿಧ ಫೀಚರ್ಸ್ ಇರುವ ಸ್ಮಾರ್ಟ್‌ವಾಚ್‌ಗಳನ್ನು ಅನಾವರಣ ಮಾಡಿಕೊಂಡು ಬರುತ್ತಿದ್ದು, ಇನ್ಮುಂದೆ ಈ ಸ್ಮಾರ್ಟ್‌ವಾಚ್‌ಗಳು ತಮ್ಮ ಅಳಿವು ಉಳಿವಿನ ಬಗ್ಗೆ ಚಿಂತಿಸುವಂತೆ ಆಗಿದೆ.

ಹೌದು, ಸ್ಮಾರ್ಟ್‌ವಾಚ್‌ಗಳು ಇಂದು ಪ್ರತಿಯೊಬ್ಬರಿಗೂ ಅಗತ್ಯವಾದ ಸ್ಮಾರ್ಟ್‌ಡಿವೈಸ್‌ ಆಗಿದ್ದು, ಈ ಮೂಲಕ ಬಳಕೆದಾರರ ಅಗತ್ಯತೆಗಳನ್ನು ಪೂರೈಕೆ ಮಾಡುತ್ತಿವೆ. ಆದರೆ, ಇನ್ಮುಂದೆ ಈ ಎಲ್ಲಾ ಕೆಲಸವನ್ನು ಸ್ಮಾರ್ಟ್‌ರಿಂಗ್‌ಗಳು ಮಾಡಲಿವೆ. ಈ ಸ್ಮಾರ್ಟ್‌ರಿಂಗ್‌ಗಳ ಮೂಲಕ ನೀವು ತಂತ್ರಜ್ಞಾನ ಹೇಗೆ ಶೀಘ್ರಗತಿಯಲ್ಲಿ ಬದಲಾಗುತ್ತಿದೆ ಎನ್ನವುದನ್ನು ಅರ್ಥ ಮಾಡಿಕೊಳ್ಳಬಹುದು. ಹಾಗಿದ್ರೆ, ಈ ಸ್ಮಾರ್ಟ್‌ರಿಂಗ್‌ಗಳ ಫೀಚರ್ಸ್‌ ಏನು?, ಇವು ಹೇಗೆ ಕೆಲಸ ಮಾಡುತ್ತವೆ ಎಂಬ ಮಾಹಿತಿಯನ್ನು ತಿಳಿದುಕೊಳ್ಳಿ.

ಈ ಹಿಂದೆ, ಸಮಯವನ್ನು ನೋಡಲು ಕೈಗಡಿಯಾರಗಳನ್ನು ಕೈಯಲ್ಲಿ ಧರಿಸಲಾಗುತ್ತಿತ್ತು. ನಂತರ ಅದರ ಸ್ಥಾನವನ್ನು ಅನಲಾಗ್ ವಾಚ್‌ಗಳು ಆಕ್ರಮಿಸಿಕೊಂಡವು. ಬಳಿಕ ಸ್ಮಾರ್ಟ್ ವಾಚ್‌ಗಳ ಟ್ರೆಂಡ್ ಪ್ರಾರಂಭವಾಯಿತು ಮತ್ತು ಈಗ ಸ್ಮಾರ್ಟ್ ರಿಂಗ್‌ಗಳು ಮಾರುಕಟ್ಟೆಯಲ್ಲಿ ಅಬ್ಬರಿಸಲು ಮುಂದಾಗಿವೆ. ಪ್ರಸ್ತುತ, ಭಾರತದಲ್ಲಿ ಈ ಸ್ಮಾರ್ಟ್‌ರಿಂಗ್‌ಗಳು ಅಷ್ಟಾಗಿ ಜನಪ್ರಿಯವಾಗಿಲ್ಲವಾದರೂ ಸಹ ಮುಂದಿನ ದಿನಗಳಲ್ಲಿ ಇವುಗಳ ಬಳಕೆ ಖಂಡಿತಾ ಹೆಚ್ಚಾಗಲಿದೆ.

ಏನಿದು ಸ್ಮಾರ್ಟ್‌ರಿಂಗ್‌?: ವಾಚ್‌ಗಳಂತೆ ಸ್ಮಾರ್ಟ್ ರಿಂಗ್‌ಗಳು ಸಹ ಸೆನ್ಸರ್‌ ಆಯ್ಕೆಯನ್ನು ಹೊಂದಿರಲಿದ್ದು, ಎನ್‌ಎಫ್‌ಸಿ ಚಿಪ್‌ಗಳ ಮೂಲಕ ಕಾರ್ಯನಿರ್ವಹಿಸಲಿವೆ. ಈಗ ಸ್ಮಾರ್ಟ್ ವಾಚ್‌ಗಳು ಬಳಕೆದಾರರ ಆರೋಗ್ಯವನ್ನು ಟ್ರ್ಯಾಕ್ ಮಾಡುವಂತೆಯೇ, ಸ್ಮಾರ್ಟ್‌ರಿಂಗ್ ಕೂಡ ಕೆಲಸ ಮಾಡುತ್ತದೆ. ಈ ಎರಡೂ ಸ್ಮಾರ್ಟ್‌ ಡಿವೈಸ್‌ಗಳಿಗೆ ಇರುವ ವ್ಯಾತ್ಯಾಸ ಏನೆಂದರೆ ಸ್ಮಾರ್ಟ್‌ರಿಂಗ್‌ನ ಗಾತ್ರವು ಸ್ಮಾರ್ಟ್‌ವಾಚ್‌ಗಿಂತ ಚಿಕ್ಕದಾಗಿದೆ. ನಿಮ್ಮ ಬೆರಳಿಗೆ ಅನುಗುಣವಾಗಿ ನೀವು ಸ್ಮಾರ್ಟ್ ರಿಂಗ್ ಅನ್ನು ಖರೀದಿಸಬಹುದು.

ಈ ಸ್ಮಾರ್ಟ್‌ರಿಂಗ್‌ನಲ್ಲಿ ಏನೆಲ್ಲಾ ಫೀಚರ್ಸ್‌ ಇದೆ?: ಸ್ಮಾರ್ಟ್‌ವಾಚ್‌ನಂತೆ ಹೃದಯ ಬಡಿತ ಸೆನ್ಸರ್‌, ಪಲ್ಸ್ ರೇಟ್ ಮಾನಿಟರ್, ಸ್ಲೀಪ್ ಮಾನಿಟರ್, ಬ್ಲೂಟೂತ್ ಕನೆಕ್ಟಿವಿಟಿ, ಕಾಂಟ್ಯಾಕ್ಟ್ ವಿಷಯ ಸೇರಿದಂತೆ ಅನೇಕ ಫೀಚರ್ಸ್‌ಗಳನ್ನು ಇದು ಪಡೆದುಕೊಂಡಿದೆ. ಹಾಗೆಯೇ ಬ್ಲೂಟೂತ್‌ ಕನೆಕ್ಟಿವಿಟಿ ಆಯ್ಕೆ ಇರುವುದರಿಂದ ವಿವಿಧ ಡಿವೈಸ್‌ಗಳಿಗೆ ಈ ಸ್ಮಾರ್ಟ್‌ರಿಂಗ್‌ ಅನ್ನು ಕನೆಕ್ಟ್ ಮಾಡಬಹುದು.

ಆಪ್‌ ಮೂಲಕ ಮಾಹಿತಿ ತಿಳಿದುಕೊಳ್ಳಬಹುದು: ಸ್ಮಾರ್ಟ್‌ವಾಚ್‌ಗಳು ಹೇಗೆ ಸಂಬಂಧಿತ ಆಪ್‌ಗಳ ಮೂಲಕ ಕೆಲಸ ಮಾಡುತ್ತವೆಯೋ ಅದೇ ರೀತಿ ಈ ಸ್ಮಾರ್ಟ್‌ರಿಂಗ್‌ ಸಹ ಕೆಲಸ ಮಾಡಲಿದ್ದು, ಬಳಕೆದಾರರು ತಮ್ಮ ಆರೋಗ್ಯ ಸಂಬಂಧಿ ಮಾಹಿತಿಯನ್ನು ಈ ಮೂಲಕ ತಿಳಿದುಕೊಳ್ಳಬಹುದು. ಈ ರೀತಿಯ ಸ್ಮಾರ್ಟ್‌ರಿಂಗ್‌ಗಳು ಈಗಾಗಲೇ ಮಾರುಕಟ್ಟೆಯಲ್ಲಿ ಭಾರೀ ಸದ್ದು ಮಾಡುತ್ತಿರುವುದನ್ನು ಗಮನಿಸಬಹುದು.

ಸಂಪರ್ಕರಹಿತ ಪಾವತಿ ವ್ಯವಸ್ಥೆ: ಈ ವಾಚ್‌ನಲ್ಲಿ ಸಂಪರ್ಕರಹಿತ ಫೀಚರ್ಸ್‌ ಇದ್ದು, ಇದೀಗ ವಿದೇಶದಲ್ಲಿ ಇದು ಭಾರೀ ಟ್ರೆಂಡಿಂಗ್‌ನಲ್ಲಿದೆ. ಅಂದರೆ ಯುಕೆ, ಜಪಾನ್, ಫ್ರಾನ್ಸ್, ನೆದರ್‌ಲ್ಯಾಂಡ್‌, ರಷ್ಯಾ ಮತ್ತು ಆಸ್ಟ್ರೇಲಿಯಾದಂತಹ ದೇಶಗಳಲ್ಲಿನ ಕೆಲವು ಬ್ಯಾಂಕ್‌ಗಳು ಈಗ ತಮ್ಮ ಗ್ರಾಹಕರಿಗೆ ವೀಸಾ ಮತ್ತು ಮಾಸ್ಟರ್‌ಕಾರ್ಡ್-ಸಕ್ರಿಯಗೊಳಿಸಿದ ಪಾವತಿ ಟರ್ಮಿನಲ್‌ಗಳಲ್ಲಿ ಕ್ರೆಡಿಟ್ ಮತ್ತು ಡೆಬಿಟ್ ಪಾವತಿಗಳಿಗಾಗಿ ಸಂಪರ್ಕರಹಿತ ಪಾವತಿ ರಿಂಗ್‌ ಅನ್ನು ಬಳಕೆ ಮಾಡಲು ಅನುಕೂಲ ಮಾಡಿಕೊಟ್ಟಿವೆ.

ಸ್ಮಾರ್ಟ್ ರಿಂಗ್‌ಗಳ ಬ್ಯಾಟರಿ ಸಾಮರ್ಥ್ಯ: ಫಿಟ್‌ನೆಸ್ ಬ್ಯಾಂಡ್‌ಗಳಂತಹ ಯಾವುದೇ ಧರಿಸಬಹುದಾದ ತಂತ್ರಜ್ಞಾನಕ್ಕಿಂತ ಕಡಿಮೆ ಬ್ಯಾಟರಿ ಸಾಮರ್ಥ್ಯ ಬಳಕೆ ಮಾಡುತ್ತವೆ. ಯಾಕೆಂದರೆ ಇವು ಡಿಸ್‌ಪ್ಲೇ ಆಯ್ಕೆ ಹೊಂದಿಲ್ಲ. ಇವುಗಳು ಚಿಕ್ಕ ಬ್ಯಾಟರಿಗಳನ್ನು ಪ್ಯಾಕ್ ಹೊಂದಿದ್ದರೂ ಸಹ ಸ್ಮಾರ್ಟ್ ವಾಚ್‌ಗಳು ಮತ್ತು ಫಿಟ್‌ನೆಸ್ ಬ್ಯಾಂಡ್‌ಗಳಿಗೆ ಹೋಲಿಸಿದರೆ ಹೆಚ್ಚಿನ ಸ್ಮಾರ್ಟ್ ರಿಂಗ್‌ಗಳು 3 ರಿಂದ 7 ದಿನಗಳವರೆಗೆ ಬ್ಯಾಕಪ್‌ ನೀಡಲಿವೆ.

ಸ್ಮಾರ್ಟ್‌ರಿಂಗ್‌ ಬೆಲೆ ವಿವರ: ವಿವಿಧ ಕಂಪೆನಿಯ ಸ್ಮಾರ್ಟ್‌ರಿಂಗ್‌ಗಳು ವಿವಿಧ ರೀತಿಯ ಬೆಲೆಯನ್ನು ಹೊಂದಿವೆ. ಅದರಲ್ಲಿ ಮೋಟಿವ್ ರಿಂಗ್‌ನ ಬೆಲೆ $200(16,353 ರೂ.ಗಳು) ಮತ್ತು ಔರಾ ರಿಂಗ್‌ನ ಬೆಲೆ $300 (24,532ರೂ.ಗಳು). ಅದಾಗ್ಯೂ ಬಜೆಟ್‌ ಬೆಲೆಯಲ್ಲೂ ಈ ರಿಂಗ್‌ಗಳು ಲಭ್ಯ ಆಗುತ್ತಿದ್ದು, ಅದರಲ್ಲಿ 1,471ರೂ.ಗಳ ಆರಂಭಿಕ ಬೆಲೆಯನ್ನು ಹೊಂದಿವೆ. ಆದರೆ, ಈ ವಾಚ್‌ಗಳು ಅಷ್ಟೊಂದು ವಿಶೇಷ ಫೀಚರ್ಸ್‌ ಆಯ್ಕೆ ಹೊಂದಿರುವುದಿಲ್ಲ.