ಇಂಟರ್‌ನೆಟ್‌ ಇಲ್ಲದಿದ್ರೂ ಗೂಗಲ್‌ ಡಾಕ್ಯುಮೆಂಟ್‌ ಎಡಿಟ್‌ ಮಾಡಿ..!

ನೀವು ಡಾಕ್ಯುಮೆಂಟ್ ಸಂಪಾದಿಸುವಾಗ ನಿಮ್ಮ ಇಂಟರ್‌ನೆಟ್ ಸಂಪರ್ಕ ಕಡಿತಗೊಂಡರೆ, ಮತ್ತೆ ಇಂಟರ್‌ನೆಟ್‌ ಸಂಪರ್ಕ ಸಿಗುವವರೆಗೂ ಡಾಕ್ಯುಮೆಂಟ್‌ ಸಂಪಾದನೆಗೆ ಡಾಕ್ಸ್ ಅನುಮತಿ ನೀಡುವುದಿಲ್ಲ. ಆದ್ದರಿಂದ, ಗೂಗಲ್‌ ಡಾಕ್ಸ್ ಅನ್ನು ಆಫ್‌ಲೈನ್‌ನಲ್ಲಿ ಬಳಸಬಹುದಾ ಎಂದು ಚಿಂತಿಸುತ್ತಿದ್ದರೆ, ಎಲ್ಲೂ ಹುಡುಕುವ ಅವಶ್ಯಕತೆಯಿಲ್ಲ. ನಿಮಗಾಗಿಯೇ ಇಲ್ಲಿ ಅನೇಕ ಟಿಪ್ಸ್‌ಗಳನ್ನು ನೀಡಲಾಗಿದೆ.

ಆಫ್‌ಲೈನ್‌ನಲ್ಲಿ ಹೇಗೆ..?

ಇಂಟರ್‌ನೆಟ್ ಇಲ್ಲದೆ ಗೂಗಲ್‌ ಡಾಕ್ಸ್‌ನ್ನು ಆಫ್‌ಲೈನ್‌ನಲ್ಲಿ ಬಳಸುವುದು ಹೇಗೆ ಎಂದು ನೋಡುವುದಾದರೆ, ಅಗತ್ಯವಿರುವ ಬಳಕೆದಾರರ ಅನುಕೂಲಕ್ಕಾಗಿ ಗೂಗಲ್ ಡಾಕ್ಸ್ ಆಫ್‌ಲೈನ್ ಮೋಡ್‌ನೊಂದಿಗೂ ಬರುತ್ತಿದೆ. ಅದು ಇಂಟರ್‌ನೆಟ್ ಸಂಪರ್ಕವಿಲ್ಲದೆ ಡಾಕ್ಯುಮೆಂಟ್‌ಗಳನ್ನು ಸಂಪಾದಿಸಲು ನಿಮಗೆ ಅನುಮತಿ ನೀಡುತ್ತದೆ. ಆದಾಗ್ಯೂ, ಇದನ್ನು ಬಳಸಲು, ನೀವು ವೈಫೈ ಅಥವಾ ಸೆಲ್ಯುಲಾರ್ ಡೇಟಾದ ಮೂಲಕ ಇಂಟರ್‌ನೆಟ್‌ಗೆ ಸಂಪರ್ಕ ಹೊಂದಿರುವಾಗ ಒಂದಿಷ್ಟು ಕಾರ್ಯಗಳನ್ನು ಮುಂಚಿತವಾಗಿ ಮಾಡಿರಬೇಕಾಗುತ್ತದೆ.

ಈ ಹಂತಗಳನ್ನು ಅನುಸರಿಸಿ

1. ನಿಮ್ಮ ವೆಬ್ ಬ್ರೌಸರ್‌ನಲ್ಲಿ ಗೂಗಲ್‌ ಡಾಕ್ಸ್ ತೆರೆಯಿರಿ.

2. ಎಡಗೈ ಭಾಗದಲ್ಲಿರುವ ಹ್ಯಾಂಬರ್‌ಗರ್ ಮೆನು ಬಟನ್ ಕ್ಲಿಕ್ ಮಾಡಿ.

3. ಸೆಟ್ಟಿಂಗ್ಸ್‌ಗೆ ಹೋಗಿ.

4. "ಆಫ್‌ಲೈನ್" ಎಂದು ಹೇಳುವ ಟಾಗಲ್ ಬಟನ್ ಆನ್ ಮಾಡಿ.

5. ಆಫ್‌ಲೈನ್ ಮೋಡ್ ಹೊಂದಿಸಲು ಗೂಗಲ್‌ ಡಾಕ್ಸ್ ಸ್ವಲ್ಪ ಸಮಯ ತೆಗೆದುಕೊಳ್ಳುತ್ತದೆ. ನಂತರ, ನೀವು ಸಂಪಾದಿಸಲು ಬಯಸುವ ದಾಖಲೆಗಳನ್ನು ನೀವು ತೆರೆಯಬಹುದು. ಇಂಟರ್‌ನೆಟ್ ಇಲ್ಲದಿದ್ದಾಗ, ಡಾಕ್ಯುಮೆಂಟ್ ಫೈಲ್‌ಗಳು ಥಂಬ್‌ನೇಲ್‌ಗಳ ಬದಲಿಗೆ ಪಟ್ಟಿಯಾಗಿ ಗೋಚರಿಸುತ್ತವೆ.

ಹೈಲೈಟ್‌ ಮಾತ್ರ ಎಡಿಟ್‌

ಆಫ್‌ಲೈನ್ ಮೋಡ್‌ನಲ್ಲಿ, ದಪ್ಪವಾಗಿ ಹೈಲೈಟ್ ಮಾಡಲಾದ ಡಾಕ್ಯುಮೆಂಟ್‌ಗಳನ್ನು ಮಾತ್ರ ನೀವು ಸಂಪಾದಿಸಬಹುದು. ಮರೆಯಾದವುಗಳು "ವಿವ್‌ ಒನ್ಲಿ" ಆಗಿರಬಹುದು ಅಥವಾ ಅವುಗಳ ಡೇಟಾ ನಿಮ್ಮ ಕಂಪ್ಯೂಟರ್‌ಗೆ ಸಿಂಕ್ ಮಾಡಲಾಗಿರುವುದಿಲ್ಲ.

ಇತರ ಮಾರ್ಗಗಳು

ಇಂಟರ್‌ನೆಟ್ ಸಂಪರ್ಕ ಕಡಿತಗೊಂಡ ನಂತರ ಗೋಚರಿಸುವ ಅಧಿಸೂಚನೆಯಲ್ಲಿ ನೀವು ಟರ್ನ್‌ ಆನ್ ಆಯ್ಕೆಯನ್ನು ಕ್ಲಿಕ್ ಮಾಡಬಹುದು. ಮುಂದೆ, ಆಫ್‌ಲೈನ್ ಪ್ರವೇಶವನ್ನು ಟರ್ನ್‌ ಆನ್‌ ಕ್ಲಿಕ್ ಮಾಡಿ. ಇಂಟರ್‌ನೆಟ್ ಮತ್ತೆ ಸಕ್ರಿಯಗೊಂಡ ನಂತರ ಆಫ್‌ಲೈನ್ ಮೋಡ್ ಸ್ವಯಂಚಾಲಿತವಾಗಿ ಸಕ್ರಿಯಗೊಳ್ಳುತ್ತದೆ.

ಡಾಕ್ಸ್, ಶೀಟ್ಸ್, ಸ್ಲೈಡ್ಸ್‌ಗಳಲ್ಲಿ ಆಫ್‌ಲೈನ್ ಮೋಡ್

ಗೂಗಲ್‌ ಶೀಟ್ಸ್‌, ಗೂಗಲ್‌ ಸ್ಲೈಡ್‌ಗಳಲ್ಲಿ ಆಫ್‌ಲೈನ್ ಮೋಡ್ ಸ್ವಯಂಚಾಲಿತವಾಗಿ ಸಕ್ರಿಯಗೊಳ್ಳುತ್ತದೆ ಎಂಬುದನ್ನು ನೀವು ಗಮನಿಸಬಹುದು. ಅಲ್ಲದೆ, ನಿಮ್ಮ ಗೂಗಲ್‌ ಡ್ರೈವ್‌ನಲ್ಲಿಯೂ ಡಾಕ್ಯುಮೆಂಟ್‌ಗಳನ್ನು ಪ್ರವೇಶಿಸಬಹುದು. ಆಫ್‌ಲೈನ್ ಮೋಡ್ ಅನ್ನು ಆನ್ ಮಾಡಲು ಈ ಯಾವುದೇ ಅಪ್ಲಿಕೇಶನ್‌ಗಳಲ್ಲಿ ನೀವು ಅದೇ ಹಂತಗಳನ್ನು ಅನುಸರಿಸಬಹುದು.