ಪೈರೇಟ್ಸ್ ಆಫ್ ದಿ ಕೆರಿಬಿಯನ್ ಚಿತ್ರಕ್ಕೆ ಕನ್ನ ಹಾಕಿದ ರಾನ್ ಸಮ್: ಹಣ ನೀಡದಿದ್ದರೆ ಪೈರಸಿ ಬಿಡುಗಡೆ ಮಾಡುವ ಬೆದರಿಕೆ

ಸಿನಿಮಾ ನಮ್ಮ ಕೈಲಿದೆ ಎಂದ ಹ್ಯಾಕರ್ಸ್:

'ಪೈರೇಟ್ಸ್ ಆಫ್ ದಿ ಕೆರಿಬಿಯನ್ - ಡೆಡ್ ಮಾನ್ ಟೆಲ್ ನೋ ಟೆಲ್ಸ್' ಚಿತ್ರವನ್ನು ಸಂಪೂರ್ಣವಾಗಿ ಕದ್ದಿರುವುದಾಗಿ ಘೋಷಣೆ ಮಾಡಿರುವ ಹ್ಯಾಕರ್ಸ್, ತಮ್ಮ ಬಳಿ ಈಗಾಗಲೇ ಅಂತಿಮ ಸಿಮಾದ ಕಾಪಿ ಇದೆ ಎಂದು ತಿಳಿಸಿದ್ದು, ಸಂಪೂರ್ಣ ಚಿತ್ರವನ್ನು ಆನ್ ಲೈನ್ ನಲ್ಲಿ ಉಚಿತವಾಗಿ ಬಿಡುಗಡೆ ಮಾಡುವ ಬೆದರಿಕೆ ಹಾಕಿದ್ದಾರೆ.

ಭಾರೀ ಪ್ರಮಾಣದ ಹಣಕ್ಕೆ ಬೇಡಿಕೆ:

'ಪೈರೇಟ್ಸ್ ಆಫ್ ದಿ ಕೆರಿಬಿಯನ್ - ಡೆಡ್ ಮಾನ್ ಟೆಲ್ ನೋ ಟೆಲ್ಸ್' ಸಿನಿಮಾ ಬಿಡುಗಡೆಗೆ ಸಿದ್ಧಗೊಂಡಿದ್ದು, ಶೀಘ್ರವೇ ವಿಶ್ವದಾದ್ಯಂತ ತೆರೆಕಾಣಲಿದೆ ಎನ್ನಲಾಗಿದೆ. ಈಗಾಗಲೇ ಸಾವಿರಾರು ಕೋಟಿ ಹಣವನ್ನು ಸಿನಿಮಾ ತಯಾರಿಕೆಗೆ ವೆಚ್ಚ ಮಾಡಲಾಗಿದೆ. ಸದ್ಯ ಈ ಚಿತ್ರವಿರುವ ಕಂಪ್ಯೂಟರ್ ಹ್ಯಾಕ್ ಮಾಡಿರುವ ಹ್ಯಾಕರ್ಸ್ ತಾವು ಕೇಳಿದಷ್ಟು ಹಣ ಕೊಡದಿದ್ದರೆ ಸಂಪೂರ್ಣ ಚಿತ್ರವನ್ನು ಬಿಡುಗಡೆಗೆ ಮುನ್ನವೇ ಲೀಕ್ ಮಾಡುವುದಾಗಿ ಬೆದರಿಕೆ ಹಾಕಿದ್ದಾರೆ ಎನ್ನಲಾಗಿದೆ.

ಮೇ 24ರಂದು ವಿಶ್ವಾದ್ಯಂತ ತೆರೆಗೆ:

ಈಗಾಗಲೇ ಪೈರೇಟ್ಸ್ ಆಫ್ ದಿ ಕೆರಿಬಿಯನ್ ಚಿತ್ರದ ನಾಲ್ಕು ಭಾಗಗಳು ವಿಶ್ವದಾದ್ಯಂತ ತೆರೆ ಕಂಡಿದ್ದು, ಭರ್ಜರಿ ಯಶಸ್ಸನ್ನು ಕಂಡಿರುವುದಲ್ಲದೇ ನಿರ್ಮಾಪಕರಿಗೆ ಭಾರೀ ಹಣ ಮಾಡಿಕೊಟ್ಟಿದೆ. ಈ ಹಿನ್ನಲೆಯಲ್ಲಿ ವಾಲ್ಟ್ ಡಿಸ್ನಿ ಭರ್ಜರಿ ವೆಚ್ಚದಲ್ಲಿ ಈ ಚಿತ್ರದ ಭಾಗ 5 ಅನ್ನು ನಿರ್ಮಾಣ ಮಾಡಿದೆ. ಮೇ 24ರಂದು ವಿಶ್ವಾದ್ಯಂತ ಬಿಡುಗಡೆಯಾಗಲು ಚಿತ್ರತಂಡ ತಯಾರಿ ನಡೆಸಿದ್ದರೇ ಇತ್ತ ಲೀಕ್ ಮಾಡುವುದಾಗಿ ಬೆದರಿಕೆ ಬಂದಿದೆ.

ಎಫ್ ಬಿಐ ಅಧಿಕಾರಿಗಳಿಗೆ ದೂರು:

ಬಿಡುಗಡೆಗೆ ಸಿದ್ಧವಾಗಿರುವ ತಮ್ಮ ಚಿತ್ರವನ್ನು ಹ್ಯಾಕರ್ಸ್‌ಗಳು ಕದ್ದಿರುವುದಾಗಿ ಬೆದರಿಕೆ ಹಾಕಿದ್ದಾರೆ ಎಂದು ಡಿಸ್ನಿ ಸ್ಟುಡಿಯೋ ಸಿಇಓ ಬಾಬ್ ಇಗರ್ ಎಫ್ ಬಿಐ ಅಧಿಕಾರಿಗಳಿಗೆ ದೂರು ನೀಡಿದ್ದಾರೆ. ಈ ಕುರಿತು ಮಾಧ್ಯಮಗಳಿಗೂ ಮಾಹಿತಿ ನೀಡಿದ್ದಾರೆ