ಗೂಗಲ್ ಮ್ಯಾಪ್ ನಂಬಿದ ಕಾರು ಚಾಲಕ ಸೇರಿದ್ದು ಕಾಡು ಹಾದಿ!

ಹೌದು, ಗೂಗಲ್‌ ಮ್ಯಾಪ್ ಬಳಸಿ ನೀವು ಯಾವುದೇ ಹೊಸ ಸ್ಥಳಕ್ಕೆ ಹೋಗಬೇಕಾದರೂ ದಾರಿ ಹುಡುಕುವುದು ಸುಲಭವಾಗಲಿದೆ. ಆದರೆ ಇದು ನಗರ ಪ್ರದೇಶಗಳಲ್ಲಿ ಸಾಕಷ್ಟು ಅನುಕೂಲಕರವಾಗಿದೆ. ಆದರೆ ದೂರದ ಪ್ರಯಾನ ಮಾಡುವಾಗ ಗೂಗಲ್‌ ಮ್ಯಾಪ್‌ ಟೆಕ್ನಾಲಜಿ ನಂಬಿದರೆ ಎಚ್ಚರಿಕೆ ವಹಿಸಬೇಕಾದ ಅಗತ್ಯ ಖಂಡಿತ ಇದ್ದೇ ಇರುತ್ತೆ. ಏಕೆಂದರೆ ಮಹರಾಷ್ಟ್ರದ ಪುಣೆಯಿಂದ ಜಬಲ್‌ಪುರಕ್ಕೆ ಪ್ರಯಾಣ ಬೆಳೆಸಿದ್ದ ಕಾರು ಚಾಲಕನೊಬ್ಬ ಗೂಗಲ್‌ ಮ್ಯಾಪ್‌ ನಂಬಿಕೊಂಡು ಕಾಡು ಸೇರಿದ್ದಾನೆ. ತಡ ರಾತ್ರಿಯಲ್ಲಿ ಕಾಡಿ ಕೆಸರಿನಲ್ಲಿ ಕಾರು ಸಿಲುಕಿಕೊಂಡು ಪಡಬಾರದ ಕಷ್ಟಪಟ್ಟಿದ್ದಾನೆ. ಅಷ್ಟಕ್ಕೂ ಇಲ್ಲಿ ಆಗಿದ್ದೇನು ಅನ್ನೊದನ್ನ ಈ ಲೇಖನದಲ್ಲಿ ತಿಳಿಸಿಕೊಡ್ತೀವಿ ಓದಿರಿ.

ಗೂಗಲ್‌ ಮ್ಯಾಪ್‌ ಬಳಸಿ ಪ್ರಯಾಣ ಮಾಡುವಾಗ ಗೂಗಲ್‌ ಮ್ಯಾಪ್‌ನ ಸೂಚನೆಯ ಜೊತೆಗೆ ನಮ್ಮದೇ ಆದ ಎಚ್ಚರಿಕೆ ಇದ್ದರೆ ತುಂಬಾ ಒಳ್ಳೆಯದು. ಅದರಲ್ಲೂ ದೂರದ ಪ್ರಯಾಣ ಬೆಳೆಸುವಾಗ ಗೂಗಲ್‌ ಮ್ಯಾಪ್‌ ಒಂದನ್ನೇ ನಂಬಿಕೊಂಡು ಪ್ರಯಾಣ ಮಾಡುವುದು ಉತ್ತಮವಲ್ಲ. ಗೂಗಲ್‌ ಮ್ಯಾಪ್‌ ನಂಬಿ ದಾರಿ ತಪ್ಪಿದ ಘಟನೆಗಳು ಸಾಕಷ್ಟು ನಡೆದಿವೆ. ಇದಕ್ಕೆ ಮತ್ತೊಂದು ಉದಾಹರಣೆ ಎಂಬಂತೆ ಮಹಾರಾಷ್ಟ್ರದ ಪುಣೆ-ಜಬಲ್‌ಪುರ ಮಾರ್ಗದಲ್ಲಿ ನಡೆದಿದೆ. ಇತ್ತೀಚಿಗೆ ಗೂಗಲ್ ಮ್ಯಾಪ್ ಬಳಸಿ ಪುಣೆಯಿಂದ ಜಬಲ್‌ಪುರಕ್ಕೆ ಪ್ರಯಾಣ ಆರಂಭಿಸಿ ಅದನ್ನೇ ಫಾಲೋ ಮಾಡಿಕೊಂಡು ಹೋದ ಕಾರು ಡ್ರೈವರ್‌ ಕಾಡಿನೊಳಗೆ ಬಂದಿಯಾಗಿದ್ದಾನೆ.

ಈತ ಎಲ್ಲರಂತೆ ಗೂಗಲ್‌ ಮ್ಯಾಪ್‌ ಬಳಸಿ ತನ್ನ ಟಾಟಾ ಹ್ಯಾರಿಯರ್ ಕಾರಿನಲ್ಲಿ ಹೆತ್ತವರೊಂದಿಗೆ ಮಹಾರಾಷ್ಟ್ರದ ಪುಣೆಯಿಂದ ಮಧ್ಯಪ್ರದೇಶದ ಜಬಲ್ ಪುರಕ್ಕೆ ಪ್ರಯಾಣ ಶುರುಮಾಡಿದ್ದ, ಜಬಲ್ ಪುರ- ಪುಣೆಯಿಂದ ಸುಮಾರು 1,000 ಕಿ.ಮೀ ದೂರದಲ್ಲಿದೆ. ಇನ್ನು ಈ ಹಾದಿಯಲ್ಲಿ ಈ ಡ್ರೈವರ್‌ ಇದೇ ಮೊದಲ ಬಾರಿ ಪ್ರಯಾಣಿಸುತ್ತಿದ್ದು, ಗೂಗಲ್ ಮ್ಯಾಪ್ ಬಳಸಿ ಪ್ರಯಾಣ ಬೆಳೆಸಿದ್ದಾನೆ. ಇನ್ನು ಗೂಗಲ್‌ ಮ್ಯಾಪ್‌ನಲ್ಲಿ ತೋರಿಸಿದ ಮಾರ್ಗದಲ್ಲಿ ನಾಗ್ಪುರ ಪುಣೆಯಿಂದ ಸುಮಾರು 700 ಕಿ.ಮೀ ದೂರದಲ್ಲಿದೆ. ರಾತ್ರಿ 11 ಘಂಟೆ ಸುಮಾರಿಗೆ ನಾಗ್ಪುರ ತಲುಪಬಹುದು ಎಂದು ತೋರಿಸಿದೆ. ಇದೇ ಕಾರಣಕ್ಕೆ ಆತ ಮ್ಯಾಪ್‌ ರೂಟ್‌ ಅನ್ನೇ ಬಳಸಿದ್ದಾನೆ.

ಇದರಂತೆ ಗೂಗಲ್ ಮ್ಯಾಪ್ ಮುಖ್ಯ ರಸ್ತೆಯಿಂದ ಅಮರಾವತಿ ಕಡೆಗೆ ತಿರುವು ಪಡೆಯುವಂತೆ ತೋರಿಸಿದೆ. ಆದರೆ ಆ ದಾರಿಯಲ್ಲಿ ಸಾಗಿದಂತೆ ರಸ್ತೆ ಕಿರಿದಾಗಿದೆ. ಅಲ್ಲದೆ ಅದೇ ಮಾರ್ಗದಲ್ಲಿ ಸುಮಾರು 20 ಕಿ.ಮೀ ಪ್ರಯಾಣಿಸಿದ ನಂತರ ಸೇತುವೆಯೊಂದು ಮುರಿದು ಬಿದ್ದಿರುವುದು ಕಂಡುಬಂದಿದೆ. ನಂತರ ಸೇತುವೆಯ ಎಡಭಾಗದಲ್ಲಿದ್ದ ಮಾರ್ಗದ ಮೂಲಕ ಸಾಗಿದ್ದಾರೆ, ಆದರೆ ಕಾರು ಮುಂದೆ ಸಾಗುತ್ತಾ ಮುಂದೆ ಇದ್ದ ಕೆಸರಿನಲ್ಲಿ ಹೂತು ಹೋಗಿದೆ. ಕೆಸರಿನಿಂದ ಕಾರನ್ನು ಹೊರ ತೆಗೆಯಲು ಪ್ರಯತ್ನಿಸಿ ಸೋತ ಕಾರು ಡ್ರೈವರ್‌, ಎಂಜಿನ್‌ನಿಂದ ಹೊಗೆ ಬರುತ್ತಿರುವುದನ್ನು ಗಮನಿಸಿದ್ದಾರೆ. ಅಲ್ಲದೆ ಕಾರಿನ ಹೆಡ್‌ಲ್ಯಾಂಪ್‌ಗಳು ಸಹ ಕೆಟ್ಟು ಹೋಗಿದ್ದು ಬೇರೆ ದಾರಿ ಕಾಣದೆ ಬೆಳಿಗ್ಗೆ 2.30ಕ್ಕೆ ಮೆಕಾನಿಕ್ ಒಬ್ಬರಿಗೆ ಕರೆ ಮಾಡಿದ್ದಾರೆ. ಮೆಕಾನಿಕ್ 70 ಮೈಲಿ ದೂರದಿಂದ ಬಂದು ಕಾರನ್ನು ರಿಪೇರಿ ಮಾಡಿದ್ದಾರೆ.

ತಂತ್ರಜ್ಞಾನವನ್ನು ಬಳಸೋದು ಸರಿ, ಆದರೆ ತಮ್ಮ ಬುದ್ದಿಯನ್ನು ಬಳಸದೇ, ಕಣ್ಮುಚ್ಚಿ ತಂತ್ರಜ್ಞಾನವನ್ನು ಬಳಸಿದರೆ ಏನಾಗುತ್ತೆ ಎಂಬುವುದಕ್ಕೆ ಈ ಕೆಳಗಿನ ಘಟನೆಯೇ ನಿದರ್ಶನ. ಅದರಲ್ಲಿಯೂ ಗೂಗಲ್ ಮ್ಯಾಪ್ ಎಂದರೆ ನೂರಕ್ಕೆ ನೂರು ಪಕ್ಕಾ ಎನ್ನುವವರು ಹುಷಾರು.!