ಗೂಗಲ್‌ ಮೀಟ್‌ನಲ್ಲಿ ಹೊಸ ಗ್ರೂಪ್‌ ರಚಿಸುವುದು ಹೇಗೆ?...ಈ ಕ್ರಮ ಅನುಸರಿಸಿ

ಹೌದು, ಈ ವರ್ಷದ ಮೊದಲಲ್ಲಿ ಗೂಗಲ್‌ಮೀಟ್‌ನಲ್ಲಿ ಹೊಸ ಫೀಚರ್ಸ್ ಪರಿಚಯಿಸಿ ಗೂಗಲ್ Duo ಆಪ್‌ಗೆ ವಿಲೀನ ಗೊಳಿಸಿತ್ತು. ಈ ಮೂಲಕ ಬಳಕೆದಾರರು ಸರಳ ರೀತಿಯಲ್ಲಿ ಯಾವುದೇ ವ್ಯಕ್ತಿ ಅಥವಾ ಗ್ರೂಪ್‌ ಜೊತೆಗೆ ವಿಡಿಯೋ ಕಾನ್ಫರೆನ್ಸ್ ಹಾಗೂ ವಿಡಿಯೋ ಕರೆಗಳನ್ನು ನಿಗದಿಪಡಿಸಿಕೊಳ್ಳಲು ಅನುಕೂಲ ಮಾಡಲಿದೆ. ಹಾಗೆಯೇ Duo ಮತ್ತು ಗೂಗಲ್‌ ಮೀಟ್‌ ನ ವಿಲೀನದಿಂದ ಗೂಗಲ್‌ ಅಕೌಂಟ್‌ ಇರುವ ಯಾರೇ ಆದರೂ ಒಂದೇ ಆಪ್‌ ಮೂಲಕ ಈ ಸೇವೆ ಪಡೆಯಬಹುದಾಗಿದೆ.

ಗೂಗಲ್‌ ಮೀಟ್‌ನಲ್ಲಿ ಗ್ರೂಪ್‌ ರಚಿಸುವುದು ಹೇಗೆ?

ಎಲ್ಲರೂ ಸಹ ಈ ಆಪ್‌ಅನ್ನು ಬಳಕೆ ಮಾಡಬಹುದಾಗಿದ್ದು, ನೀವೇನಾದರೂ ಗೂಗಲ್‌ ಮೀಟ್ ಗ್ರೂಪ್ ಹೊಂದಿರದ ಸಂಪರ್ಕಗಳ ಗ್ರೂಪ್‌ಗೆ ತಕ್ಷಣಕ್ಕೆ ಏನಾದರೂ ಕರೆ ಮಾಡಬೇಕಾದ ಸಂದರ್ಭಗಳು ಬರಬಹುದು. ಇಂತಹ ಸನ್ನಿವೇಶಗಳನ್ನ ನಿಭಾಯಿಸುವ ಕಾರಣಕ್ಕೆ ಗೂಗಲ್‌ ಮೀಟ್‌ನಲ್ಲಿ ತಕ್ಷಣವೇ ಹೊಸ ಗ್ರೂಪ್‌ ರಚನೆ ಮಾಡುವ ಅವಕಾಶ ನೀಡಿದೆ. ಅದರಂತೆ ಈ ಕೆಳಗೆ ನೀಡಲಾದ ಮಾಹಿತಿಯಂತೆ ಗ್ರೂಪ್‌ ರಚಿಸಿಕೊಳ್ಳಿ.

ಹಂತ 1

ಮೊದಲು ನಿಮ್ಮ ಆಂಡ್ರಾಯ್ಡ್‌ ಡಿವೈಸ್‌ನಲ್ಲಿ ಗೂಗಲ್ ಮೀಟ್‌ ಆಪ್‌ ಓಪನ್‌ ಮಾಡಿ ನಂತರ ಡಿಸ್‌ಪ್ಲೇಯ ಕೆಳಗಿನ ಬಲ ಮೂಲೆಯಲ್ಲಿ ಲಭ್ಯವಿರುವ 'ನ್ಯೂ' ಬಟನ್ ಮೇಲೆ ಟ್ಯಾಪ್ ಮಾಡಿ. ಇದಾದ ಬಳಿಕ 'ಕಾಲ್ ಎ ಗ್ರೂಪ್' ಆಯ್ಕೆಯ ಮೇಲೆ ಟ್ಯಾಪ್ ಮಾಡಿ.

ಹಂತ 2

'ಕಾಲ್ ಎ ಗ್ರೂಪ್' ಆಯ್ಕೆ ಮೇಲೆ ಟ್ಯಾಪ್ ಮಾಡಿದ ನಂತರ ನೀವು ಗ್ರೂಪ್‌‌ ಕರೆಗೆ ಸೇರಿಸಲು ಬಯಸುವ ಸಂಪರ್ಕಗಳನ್ನು ಆಯ್ಕೆ ಮಾಡಿಕೊಳ್ಳಿ. ನಂತರ ಡಿಸ್‌ಪ್ಲೇ ಮೇಲಿನ ಬಲ ಮೂಲೆಯಲ್ಲಿ ಕಾಣಿಸುವ 'ನೆಕ್ಸ್ಟ್' ಬಟನ್‌ ಮೇಲೆ ಟ್ಯಾಪ್‌ ಮಾಡಿ.

ಹಂತ 3

'ನೆಕ್ಸ್ಟ್' ಬಟನ್‌ ಮೇಲೆ ಕ್ಲಿಕ್ ಮಾಡಿದ ನಂತರ ನಿಮ್ಮ ಗ್ರೂಪ್‌ಗೆ ಹೆಸರನ್ನು ಹೊಂದಿಸಬೇಕಿದೆ. ಅದಕ್ಕೆ ಮೀಟ್ ಆಪ್‌ನಲ್ಲಿ 'ಪೆನ್‌' ಐಕಾನ್‌ ಕಾಣಿಸಿಕೊಳ್ಳುತ್ತದೆ ಅದರ ಮೇಲೆ ಟ್ಯಾಪ್‌ ಮಾಡಿ ಹಾಗೂ ಗ್ರೂಪ್‌ಗೆ ಹೆಸರನ್ನು ನೀಡಿ. ಈ ವೇಳೆ ನೀಡಲಾದ ಹೆಸರು ಎಲ್ಲಾ ಸದಸ್ಯರಿಗೂ ಕಾಣಿಸಿಕೊಳ್ಳುತ್ತದೆ. ಬಳಿಕ ಕರೆ ಮಾಡಲು 'ಸ್ಟಾರ್ಟ್‌' ಬಟನ್ ಮೇಲೆ ಟ್ಯಾಪ್‌ ಮಾಡಿದರೆ ಅವರಿಗೆ ಆಹ್ವಾನದ ಲಿಂಕ್‌ ರವಾನೆಯಾಗುತ್ತದೆ. ಅದರ ಮೂಲಕ ಎಲ್ಲರೂ ಗ್ರೂಪ್‌ ಕರೆಗೆ ಸೇರಿಕೊಳ್ಳಬಹುದು.

ಈ ಫೀಚರ್ಸ್‌ ಗೂಗಲ್‌ಮೀಟ್‌ನಲ್ಲಿ ಇರುವ ಹಾಗೆಯೇ ಜೂಮ್‌ ನಲ್ಲೂ ಸಹ ಲಭ್ಯವಿದೆ. ಇತ್ತೀಚಿನ ಅಪ್‌ಡೇಟ್‌ ಅನ್ವಯ ಜೂಮ್ ರೂಮ್‌ಗಳು ಮತ್ತು ಗೂಗಲ್‌ ಮೀಟ್‌ ಡಿವೈಸ್‌ಗಳಲ್ಲಿ ಮೀಟಿಂಗ್ ಕೋಡ್ ಅನ್ನು ನಮೂದಿಸುವ ಮೂಲಕ ಗೂಗಲ್‌ ಮೀಟ್‌ ಮೀಟಿಂಗ್‌ಗಳಿಗೆ ಸೇರಿಕೊಳ್ಳಬಹುದಾಗಿದೆ. ಆದರೆ, ಸೇರಿಸಿಕೊಳ್ಳುವ ಪ್ರಕ್ರಿಯೆಯ ಹಕ್ಕನ್ನು ಗ್ರೂಪ್‌ನ ನಿರ್ವಾಹಕರಿಗೆ ನೀಡಲಾಗಿದೆ. ಈ ಮೂಲಕ ಗೂಗಲ್‌ ಮೀಟ್‌ ಹಾಗೂ ಜೂಮ್‌ ಆಪ್‌ ಮೂಲಕ ಒಂದೇ ಮೀಟಿಂಗ್‌ ಗೆ ಸೇರಿಕೊಳ್ಳುವ ಅವಕಾಶ ನೀಡಲಾಗಿದೆ. ಅಂತೆಯೇ ಮೀಟಿಂಗ್‌ ಉದ್ದೇಶಕ್ಕೆ ಭಿನ್ನ ಆಪ್‌ಗಳನ್ನು ಇನ್‌ಸ್ಟಾಲ್‌ ಮಾಡಿಕೊಳ್ಳುವುದನ್ನು ಗೂಗಲ್‌ ತಪ್ಪಿಸಿದೆ.