ನಿಮ್ಮ ಫೋನಿನಲ್ಲಿ ಆಂಟಿವೈರಸ್ ಆಪ್ ಇದ್ದರೆ ಈ ಶಾಕಿಂಗ್ ರಿಪೋರ್ಟ್ ನೋಡಿ!

ಮೂರನೇ ಎರಡರಷ್ಟು ಆಪ್‌ಗಳು ನಕಲಿ

ಆಸ್ಟ್ರಿಯನ್ ಆಂಟಿವೈರಸ್ ಟೆಸ್ಟಿಂಗ್ ಕಂಪನಿಯಾದ 'AV- ಕಂಪೆರೆಟಿವ್ಸ್' ಒಂದು ಅಧ್ಯಯನದ ಮೂಲಕ ಶಾಕಿಂಗ್ ರಿಪೋರ್ಟ ಒಂದನ್ನು ಪ್ರಕಟಿಸಿದೆ. 'AV- ಕಂಪೆರೆಟಿವ್ಸ್ ವಿಶ್ಲೇಷಣೆಯ ಪ್ರಕಾರ, ಪ್ಲೇ ಸ್ಟೋರ್‌ನಲ್ಲಿರುವ ಮೂರನೇ ಎರಡರಷ್ಟು ಆಂಟಿವೈರಸ್ ಆಪ್‌ಗಳು ಮಾಲ್ವೇರ್ ಅಥವಾ ನಕಲಿಯಾಗಿವೆ. ಅಂದರೆ ಬಹುತೇಕ ಆಪ್‌ಗಳು ಕೆಲಸ ಮಾಡದೇ ಸೋಗುಹಾಕುತ್ತಿವೆ.

ಸ್ಥಾಪನೆ ಪರೀಕ್ಷೆಯಲ್ಲಿ ನಿಜ ಬಣ್ಣ ಬಯಲು

AV- ಕಂಪೆರೆಟಿವ್ಸ್ ಕಂಪೆನಿ ಆಂಟಿವೈರಸ್ ಆಪ್‌ಗಳ ಬಗ್ಗೆ ಪರೀಕ್ಷೆ ನಡೆಸಿದ್ದು, ಈ ಪರೀಕ್ಷೆಯಲ್ಲಿ ಕಂಪನಿಯು ಪ್ರತಿ ಅಪ್ಲಿಕೇಶನ್ ಅನ್ನು ಪ್ರತ್ಯೇಕ ಸಾಧನದಲ್ಲಿ ಸ್ಥಾಪಿಸಿ ಈ ರಿಪೋರ್ಟ್ ತಯಾರಿಸಿದೆ. ಸುಮಾರು 250 ಆಂಟಿವೈರಸ್ ಅಪ್ಲಿಕೇಶನ್‌ಗಳನ್ನು ಪರೀಕ್ಷಿಸಿರುವ ಕಂಪೆನಿ, ಒಟ್ಟು 250 ಆಪ್‌ಗಳಲ್ಲಿ ಕೇವಲ 80 ಆಪ್‌ಗಳು ಮಾತ್ರ ಸೂಕ್ತ ರಕ್ಷಣೆ ನೀಡಿವೆ ಎಂದು ತಿಳಿಸಿದೆ.

ಕೆಲಸವನ್ನೇ ಆಡುತ್ತಿಲ್ಲ ಆಪ್‌ಗಳು

AV- ಕಂಪೆರೆಟಿವ್ಸ್ ಕಂಪೆನಿ ನಡೆಸಿದ ಅಧ್ಯಯನದಲ್ಲಿ ತಿಳಿದುಬಂದ ಪ್ರಮುಖ ಅಂಶವೆಂದರೆ, ಹೆಚ್ಚಿನ ಆಂಡ್ರಾಯ್ಡ್ ಆಂಟಿವೈರಸ್ ಅಪ್ಲಿಕೇಶನ್‌ಗಳು ಭಧ್ರತೆ ವಿಭಾಗದಲ್ಲಿ ಬಹುತೇಕ ವಿಫಲವಾಗಿವೆ. ಈ ಪರೀಕ್ಷೆಗಳಲ್ಲಿ ಕನಿಷ್ಠ 30% ರಷ್ಟು ಸಹ ಕೆಲಸ ನಿರ್ವಹಿಸದ ಶೇ.90 ರಷ್ಟು ಆಪ್‌ಗಳು ಇವೆ. ಇನ್ನು ಹಲವು ಆಪ್‌ಗಳಂತೂ ಮಾಲ್ವೇರ್ ಹೊಂದಿರುವ ಆಪ್‌ಗಳಾಗಿವೆ.

ತೋರಿಕೆಗಷ್ಟೇ ಇವೆ ಹಲವು ಆಪ್‌ಗಳು

ಹೆಚ್ಚು ಡೌನ್‌ಲೋಡ್ ಆಗಿರುವ ಬಹುತೇಕ ಆಂಟಿವೈರಸ್ ಆಪ್‌ಗಳು ಕೇವಲ ತೋರಿಕಗಷ್ಟೇ ಇವೆ. ನೀವು ಡೌನ್‌ಲೋಡ್ ಮಾಡಿರುವ ಆಂಟಿವೈರಸ್ ಕೆಲಸ ಮಾಡುತ್ತಿದೆ ಎಂದು ತಿಳಿದಿದ್ದರೆ ಅದು ಮೂರ್ಖತನ.ಏಕೆಂದರೆ, ಬಹುತೇಕ ಆಂಟಿವೈರಸ್ ಆಪ್‌ಗಳು ಮಾಲ್ವೇರ್ ಅನ್ನು ಕಂಡುಹಿಡಿಯುವ ರೀತಿ ನಾಟಕವಾಡುತ್ತವೆ. ಆದರೆ, ವಾಸ್ತವವಾಗಿ ಆ ಕೆಲಸವನ್ನೇ ಮಾಡುವುದಿಲ್ಲ.

ಜಾಹಿರಾತು ನೀಡುವ ಆಪ್‌ಗಳೇ ಹೆಚ್ಚು!

AV- ಕಂಪೆರೆಟಿವ್ಸ್ ಕಂಪೆನಿ ನಡೆಸಿರುವ ಈ ವರದಿಯಲ್ಲಿ ನಕಲಿ ಆಂಟಿವೈರಸ್ ಆಪ್‌ಗಳು ಕೇವಲ ಜಾಹಿರಾತುವಿಗಾಗಿ ಕೆಲಸ ಮಾಡುತ್ತಿವೆ ಎಂದು ತಿಳಿದುಬಂದಿದೆ. ವೈರಸ್ ಬೆದರಿಕೆಗಳನ್ನು ಪತ್ತೆಹಚ್ಚುವ ಬದಲು ಕೇವಲ ಜಾಹೀರಾತುಗಳನ್ನು ತೋರಿಸಲು ಹಲವು ಆಪ್‌ಗಳಿವೆ. ಆದಾಯದ ಗುರಿ ಹೊಂದಿರುವ ಇವುಗಳು ಭದ್ರತೆ ಮೇಲೆ ಗಮನಹರಿಸುವುದಿಲ್ಲ ಎಂದು ತಿಳಿದುಬಂದಿದೆ.

ಯಾವ ಆಪ್‌ಗಳು ಪರೀಕ್ಷೆಯಲ್ಲಿ ಪಾಸ್!

ಪಾವತಿಸಬೇಕಾದ ಭದ್ರತಾ ಕಂಪನಿಗಳ ಆಪ್‌ಗಳು ನಿಜವಾದ ಕೆಲಸ ಮಾಡುತ್ತಿವೆ. ಕ್ಯಾಸ್ಪರಸ್ಕಿ, ಎವಿಜಿ, ಮ್ಯಾಕ್ಅಫೀ, ಕ್ವಿಕ್ಹೀಲ್, ಮತ್ತು ಸಿಮ್ಯಾಂಟೆಕ್‌ನಂತಹ ಪ್ರಮುಖ ಕಂಪನಿಗಳ ಆಪ್‌ಗಳು ಮಾತ್ರ ಎವಿ-ಕಂಪೆರೆಟಿವ್ ಕಂಪೆನಿ ನಡೆಸಿದ ಪರೀಕ್ಷೆಯಲ್ಲಿ ಪಾಸ್ ಆಗಿವೆ. ಆದರೆ, ಉಚಿತವಾಗಿ ಲಭ್ಯವಿರುವ ಯಾವುದೇ ಅಪ್ಲಿಕೇಶನ್ ಕೆಲಸ ಮಾಡದಿರುವುದು ಕಂಡುಬಂದಿದೆ.